| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. မောဂ္ဂလ္လာနသုတ္တဝဏ္ဏနာ
4. Moggallānasuttavaṇṇanā
၈၂၆. ဥဒ္ဓစ္စပကတိကာတိ ဝိက္ခိတ္တသဘာဝာ, ဝိဗ္ဘန္တစိတ္တာတိ အတ္ထော။ အနဝဋ္ဌိတတာယ ဝိပ္ဖန္ဒိတစိတ္တတာယ ဝိပ္ဖန္ဒမာနစိတ္တာ။ တုစ္ဆတာယ နဠော ဝိယာတိ နဠော, မာနော, ဥဂ္ဂတော နဠော ဧတေသန္တိ ဥန္နဠာတိ အာဟ – ‘‘ဥန္နဠာတိ။ပေ.။ ဝုတ္တံ ဟောတီ’’တိ။ စပလာတိ စာပလ္ယတာ နာမ လောလဘာဝော။ မုရာတိ ခရဝစနာ, ဖရုသဝစနာတိ အတ္ထော။ ဝိကိဏ္ဏဝာစာ နာမ သမ္ဖပ္ပလာပိနောတိ ဝုတ္တံ ‘‘အသံယတဝစနာ’’တိအာဒိ။ ပဋိပတ္တိဓမ္မေ ပမုဋ္ဌာ ဝိနဋ္ဌာ ပဋိဝိနဋ္ဌာ သတိ ဧတေသန္တိ မုဋ္ဌသတီတိ အာဟ – ‘‘နဋ္ဌသ္သတိနော’’တိ။ ဥဗ္ဘန္တစိတ္တာတိ သမာဓိနော အဘာဝေန ဥဒ္ဓစ္စေနေဝ ဥပရူပရိ ဘန္တစိတ္တာ။ ပာကတိန္ဒ္ရိယာ အဘာဝိတကာယတာယ ဂာမဒာရကာ ဝိယ ပကတိဘူတဣန္ဒ္ရိယာ။ နေမော ဝုစ္စတိ ဘူမိယာ ဗဒ္ဓဘာဝနိမိတ္တပဒေသော, ဂမ္ဘီရော နေမော ဧတသ္သာတိ ဂမ္ဘီရနေမော။ သုဋ္ဌု နိခာတောတိအာဒိ တသ္သ ပာဒသ္သ သုပ္ပတိဋ္ဌိတဘာဝဒသ္သနံ။
826.Uddhaccapakatikāti vikkhittasabhāvā, vibbhantacittāti attho. Anavaṭṭhitatāya vipphanditacittatāya vipphandamānacittā. Tucchatāya naḷo viyāti naḷo, māno, uggato naḷo etesanti unnaḷāti āha – ‘‘unnaḷāti…pe… vuttaṃ hotī’’ti. Capalāti cāpalyatā nāma lolabhāvo. Murāti kharavacanā, pharusavacanāti attho. Vikiṇṇavācā nāma samphappalāpinoti vuttaṃ ‘‘asaṃyatavacanā’’tiādi. Paṭipattidhamme pamuṭṭhā vinaṭṭhā paṭivinaṭṭhā sati etesanti muṭṭhasatīti āha – ‘‘naṭṭhassatino’’ti. Ubbhantacittāti samādhino abhāvena uddhacceneva uparūpari bhantacittā. Pākatindriyā abhāvitakāyatāya gāmadārakā viya pakatibhūtaindriyā. Nemo vuccati bhūmiyā baddhabhāvanimittapadeso, gambhīro nemo etassāti gambhīranemo. Suṭṭhu nikhātotiādi tassa pādassa suppatiṭṭhitabhāvadassanaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. မောဂ္ဂလ္လာနသုတ္တံ • 4. Moggallānasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. မောဂ္ဂလ္လာနသုတ္တဝဏ္ဏနာ • 4. Moggallānasuttavaṇṇanā
