| Library / Tipiṭaka / তিপিটক • Tipiṭaka / জাতক-অট্ঠকথা • Jātaka-aṭṭhakathā |
[৮২] ২. মিত্তৰিন্দকজাতকৰণ্ণনা
[82] 2. Mittavindakajātakavaṇṇanā
অতিক্কম্ম রমণকন্তি ইদং সত্থা জেতৰনে ৰিহরন্তো একং দুব্বচভিক্খুং আরব্ভ কথেসি। ইমস্স পন জাতকস্স কস্সপসম্মাসম্বুদ্ধকালিকং ৰত্থু, তং দসকনিপাতে মহামিত্তৰিন্দকজাতকে (জা॰ ১.১.৮২; ১.৫.১০০ আদযো) আৰি ভৰিস্সতি। তদা পন বোধিসত্তো ইমং গাথমাহ –
Atikkammaramaṇakanti idaṃ satthā jetavane viharanto ekaṃ dubbacabhikkhuṃ ārabbha kathesi. Imassa pana jātakassa kassapasammāsambuddhakālikaṃ vatthu, taṃ dasakanipāte mahāmittavindakajātake (jā. 1.1.82; 1.5.100 ādayo) āvi bhavissati. Tadā pana bodhisatto imaṃ gāthamāha –
৮২.
82.
‘‘অতিক্কম্ম রমণকং, সদামত্তঞ্চ দূভকং।
‘‘Atikkamma ramaṇakaṃ, sadāmattañca dūbhakaṃ;
স্ৰাসি পাসাণমাসীনো, যস্মা জীৰং ন মোক্খসী’’তি॥
Svāsi pāsāṇamāsīno, yasmā jīvaṃ na mokkhasī’’ti.
তত্থ রমণকন্তি তস্মিং কালে ফলিকস্স নামং, ফলিকপাসাদঞ্চ অতিক্কন্তোসীতি দীপেতি। সদামত্তঞ্চাতি রজতস্স নামং, রজতপাসাদঞ্চ অতিক্কন্তোসীতি দীপেতি। দূভকন্তি মণিনো নামং, মণিপাসাদঞ্চ অতিক্কন্তোসীতি দীপেতি। স্ৰাসীতি সো অসি ত্ৰং। পাসাণমাসীনোতি খুরচক্কং নাম পাসাণমযং ৰা হোতি রজতমযং ৰা মণিমযং ৰা, তং পন পাসাণমযমেৰ। সো চ তেন আসীনো অতিনিৰিট্ঠো অজ্ঝোত্থটো। তস্মা পাসাণেন আসীনত্তা ‘‘পাসাণাসীনো’’তি ৰত্তব্বে ব্যঞ্জনসন্ধিৰসেন মকারং আদায ‘‘পাসাণমাসীনো’’তি ৰুত্তং। পাসাণং ৰা আসীনো, তং খুরচক্কং আসজ্জ পাপুণিত্ৰা ঠিতোতি অত্থো। যস্মা জীৰং ন মোক্খসীতি যস্মা খুরচক্কা যাৰ তে পাপং ন খীযতি, তাৰ জীৰন্তোযেৰ ন মুচ্চিস্সসি, তং আসীনোসীতি।
Tattha ramaṇakanti tasmiṃ kāle phalikassa nāmaṃ, phalikapāsādañca atikkantosīti dīpeti. Sadāmattañcāti rajatassa nāmaṃ, rajatapāsādañca atikkantosīti dīpeti. Dūbhakanti maṇino nāmaṃ, maṇipāsādañca atikkantosīti dīpeti. Svāsīti so asi tvaṃ. Pāsāṇamāsīnoti khuracakkaṃ nāma pāsāṇamayaṃ vā hoti rajatamayaṃ vā maṇimayaṃ vā, taṃ pana pāsāṇamayameva. So ca tena āsīno atiniviṭṭho ajjhotthaṭo. Tasmā pāsāṇena āsīnattā ‘‘pāsāṇāsīno’’ti vattabbe byañjanasandhivasena makāraṃ ādāya ‘‘pāsāṇamāsīno’’ti vuttaṃ. Pāsāṇaṃ vā āsīno, taṃ khuracakkaṃ āsajja pāpuṇitvā ṭhitoti attho. Yasmā jīvaṃ na mokkhasīti yasmā khuracakkā yāva te pāpaṃ na khīyati, tāva jīvantoyeva na muccissasi, taṃ āsīnosīti.
ইমং গাথং ৰত্ৰা বোধিসত্তো অত্তনো ৰসনট্ঠানংযেৰ গতো। মিত্তৰিন্দকোপি খুরচক্কং উক্খিপিত্ৰা মহাদুক্খং অনুভৰমানো পাপকম্মে পরিক্খীণে যথাকম্মং গতো।
Imaṃ gāthaṃ vatvā bodhisatto attano vasanaṭṭhānaṃyeva gato. Mittavindakopi khuracakkaṃ ukkhipitvā mahādukkhaṃ anubhavamāno pāpakamme parikkhīṇe yathākammaṃ gato.
সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা মিত্তৰিন্দকো দুব্বচভিক্খু অহোসি, দেৰরাজা পন অহমেৰ অহোসি’’ন্তি।
Satthā imaṃ dhammadesanaṃ āharitvā jātakaṃ samodhānesi – ‘‘tadā mittavindako dubbacabhikkhu ahosi, devarājā pana ahameva ahosi’’nti.
মিত্তৰিন্দকজাতকৰণ্ণনা দুতিযা।
Mittavindakajātakavaṇṇanā dutiyā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / জাতকপাল়ি • Jātakapāḷi / ৮২. মিত্তৰিন্দকজাতকং • 82. Mittavindakajātakaṃ
