| Library / Tipiṭaka / तिपिटक • Tipiṭaka / जातकपाळि • Jātakapāḷi |
३७२. मिगपोतकजातकं (५-३-२)
372. Migapotakajātakaṃ (5-3-2)
११६.
116.
अगारा पच्चुपेतस्स, अनगारस्स ते सतो।
Agārā paccupetassa, anagārassa te sato;
समणस्स न तं साधु, यं पेतमनुसोचसि॥
Samaṇassa na taṃ sādhu, yaṃ petamanusocasi.
११७.
117.
संवासेन हवे सक्क, मनुस्सस्स मिगस्स वा।
Saṃvāsena have sakka, manussassa migassa vā;
हदये जायते पेमं, न तं सक्का असोचितुं॥
Hadaye jāyate pemaṃ, na taṃ sakkā asocituṃ.
११८.
118.
मतं मरिस्सं रोदन्ति, ये रुदन्ति लपन्ति च।
Mataṃ marissaṃ rodanti, ye rudanti lapanti ca;
तस्मा त्वं इसि मा रोदि, रोदितं मोघमाहु सन्तो॥
Tasmā tvaṃ isi mā rodi, roditaṃ moghamāhu santo.
११९.
119.
रोदितेन हवे ब्रह्मे, मतो पेतो समुट्ठहे।
Roditena have brahme, mato peto samuṭṭhahe;
सब्बे सङ्गम्म रोदाम, अञ्ञमञ्ञस्स ञातके॥
Sabbe saṅgamma rodāma, aññamaññassa ñātake.
१२०.
120.
आदित्तं वत मं सन्तं, घतसित्तंव पावकं।
Ādittaṃ vata maṃ santaṃ, ghatasittaṃva pāvakaṃ;
वारिना विय ओसिञ्चं, सब्बं निब्बापये दरं॥
Vārinā viya osiñcaṃ, sabbaṃ nibbāpaye daraṃ.
१२१.
121.
अब्बहि वत मे सल्लं, यमासि हदयस्सितं।
Abbahi vata me sallaṃ, yamāsi hadayassitaṃ;
यो मे सोकपरेतस्स, पुत्तसोकं अपानुदि॥
Yo me sokaparetassa, puttasokaṃ apānudi.
१२२.
122.
सोहं अब्बूळ्हसल्लोस्मि, वीतसोको अनाविलो।
Sohaṃ abbūḷhasallosmi, vītasoko anāvilo;
न सोचामि न रोदामि, तव सुत्वान वासवाति॥
Na socāmi na rodāmi, tava sutvāna vāsavāti.
मिगपोतकजातकं दुतियं।
Migapotakajātakaṃ dutiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [३७२] २. मिगपोतकजातकवण्णना • [372] 2. Migapotakajātakavaṇṇanā
