| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
২৯. মিচ্ছাজীৰৰিৰজ্জনানিদ্দেসৰণ্ণনা
29. Micchājīvavivajjanāniddesavaṇṇanā
২০৯. আগম্ম জীৰন্তি এতেনাতি আজীৰো, কো সো? পচ্চযপরিযেসনৰাযামো। মিচ্ছায আজীৰো, তস্স ৰিৰজ্জনা মিচ্ছাজীৰৰিৰজ্জনা। সা পনাযং অত্থতো ‘‘ইধ ভিক্খু পাতিমোক্খসংৰরসংৰুতো ৰিহরতি আচারগোচরসম্পন্নো’’তি (ৰিভ॰ ৫০৮) এৰং পাতিমোক্খসংৰরসম্পত্তিযা পটিপত্তিদস্সনৰসেন আগতো আচারো চেৰ যথাক্কমেন পারাজিকসঙ্ঘাদিসেসথুল্লচ্চযপাচিত্তিযপাটিদেসনীযদুব্ভাসিতদুক্কটানং কারণভূতস্স আজীৰহেতুপঞ্ঞত্তানং অভূতারোচনসঞ্চরিত্তঅঞ্ঞাপদেসভূতারোচনপণীতভোজনৰিঞ্ঞত্তি ভিক্খুনিভোজনৰিঞ্ঞত্তিসূপোদনৰিঞ্ঞত্তিসিক্খাপদানং ৰীতিক্কমস্স চ কুহনলপননেমিত্তিকতা নিপ্পেসিকতা লাভেন লাভং নিজিগীসনতাতি এৰমাদীনঞ্চ পাপধম্মানং ৰসেন পৰত্তং মিচ্ছাজীৰৰিরতিসঙ্খাতং আজীৰপারিসুদ্ধিসীলঞ্চ। তস্সা পন কস্সচি ইধ দস্সনং যথা দস্সেতুমারদ্ধং পাতিমোক্খসংৰরসঙ্খাতায অধিসীলসিক্খায, চতুরারক্খৰিপস্সনাৰসেন আগতানং অধিচিত্তঅধিপঞ্ঞাসঙ্খাতানং দ্ৰিন্নং সিক্খানঞ্চ উপকারকধম্মপরিদীপনত্থন্তি দট্ঠব্বং, এৰমীদিসং ৰিঞ্ঞেয্যং, তং দস্সেতি ‘‘দারু’’ন্তিআদিনা। তত্থ ‘‘দারু’’ন্তিআদীনি ‘‘দদে’’তি এতস্স পত্তিকম্মং। চুণ্ণং সিরীসচুণ্ণাদিনহানিযচুণ্ণং। ন্হানমুখোদকন্তি ন্হানঞ্চ মুখঞ্চ, তস্স উদকন্তি সমাসো। আদি-সদ্দেন পণ্ণাদিং সঙ্গণ্হাতি। কুলসঙ্গহাতি কুলসঙ্গহকরণেন।
209. Āgamma jīvanti etenāti ājīvo, ko so? Paccayapariyesanavāyāmo. Micchāya ājīvo, tassa vivajjanā micchājīvavivajjanā. Sā panāyaṃ atthato ‘‘idha bhikkhu pātimokkhasaṃvarasaṃvuto viharati ācāragocarasampanno’’ti (vibha. 508) evaṃ pātimokkhasaṃvarasampattiyā paṭipattidassanavasena āgato ācāro ceva yathākkamena pārājikasaṅghādisesathullaccayapācittiyapāṭidesanīyadubbhāsitadukkaṭānaṃ kāraṇabhūtassa ājīvahetupaññattānaṃ abhūtārocanasañcarittaaññāpadesabhūtārocanapaṇītabhojanaviññatti bhikkhunibhojanaviññattisūpodanaviññattisikkhāpadānaṃ vītikkamassa ca kuhanalapananemittikatā nippesikatā lābhena lābhaṃ nijigīsanatāti evamādīnañca pāpadhammānaṃ vasena pavattaṃ micchājīvaviratisaṅkhātaṃ ājīvapārisuddhisīlañca. Tassā pana kassaci idha dassanaṃ yathā dassetumāraddhaṃ pātimokkhasaṃvarasaṅkhātāya adhisīlasikkhāya, caturārakkhavipassanāvasena āgatānaṃ adhicittaadhipaññāsaṅkhātānaṃ dvinnaṃ sikkhānañca upakārakadhammaparidīpanatthanti daṭṭhabbaṃ, evamīdisaṃ viññeyyaṃ, taṃ dasseti ‘‘dāru’’ntiādinā. Tattha ‘‘dāru’’ntiādīni ‘‘dade’’ti etassa pattikammaṃ. Cuṇṇaṃ sirīsacuṇṇādinahāniyacuṇṇaṃ. Nhānamukhodakanti nhānañca mukhañca, tassa udakanti samāso. Ādi-saddena paṇṇādiṃ saṅgaṇhāti. Kulasaṅgahāti kulasaṅgahakaraṇena.
২১০. পরিভটতি পরেসং দারকে পরিহরতীতি পরিভটো, পরিভটস্স কম্মং পারিভটকো, সকত্থে তমেৰ পারিভটকতা। অলঙ্করণাদিনা কুলদারকপরিহরণস্সেতং নামং। মুগ্গস্স সূপো মুগ্গসূপো, সোযেৰ মুগ্গসুপ্পো। যথা মুগ্গসূপে পচ্চমানে কোচিদেৰ মুগ্গো ন পচ্চতি, অৰসেসা পচ্চন্তি, এৰং যস্স পুগ্গলস্স ৰচনে কিঞ্চিদেৰ সচ্চং হোতি, সেসং অলিকং, অযং পুগ্গলো মুগ্গসূপসদিসতায উপচারেন ‘‘মুগ্গসুপ্পো’’তি ৰুচ্চতি, তস্স ভাৰো মুগ্গসুপ্পতা । সচ্চালিকেন জীৰিতকপ্পনস্সেতং অধিৰচনং। ঘরৰত্থুআদিসম্বন্ধিনী ৰিজ্জা ৰত্থুৰিজ্জা। পারিভটকতা চাতিআদিনা দ্ৰন্দো নপুংসকত্তাভাৰে পারি…পে॰… ৰিজ্জা, তায। রস্সো পন গাথাবন্ধৰসেন, তথা দীঘো। পহিণানং তস্মিং তস্মিং কম্মে তেসং তেসং নিযুঞ্জনং পহেণং। আদরেন দূতেন কারেতব্বং যং কিঞ্চি কম্মং দূতকম্মং। পিসনং পেসনং, জঙ্ঘায পাদেন পেসনং জঙ্ঘপেসনং, তমস্স অত্থীতি জঙ্ঘপেসনিযং। তেসং তেসং গিহীনং গামন্তরদেসন্তরাদীসু সাসনপটিসাসনহরণস্সেতমধিৰচনং।
210. Paribhaṭati paresaṃ dārake pariharatīti paribhaṭo, paribhaṭassa kammaṃ pāribhaṭako, sakatthe tameva pāribhaṭakatā. Alaṅkaraṇādinā kuladārakapariharaṇassetaṃ nāmaṃ. Muggassa sūpo muggasūpo, soyeva muggasuppo. Yathā muggasūpe paccamāne kocideva muggo na paccati, avasesā paccanti, evaṃ yassa puggalassa vacane kiñcideva saccaṃ hoti, sesaṃ alikaṃ, ayaṃ puggalo muggasūpasadisatāya upacārena ‘‘muggasuppo’’ti vuccati, tassa bhāvo muggasuppatā . Saccālikena jīvitakappanassetaṃ adhivacanaṃ. Gharavatthuādisambandhinī vijjā vatthuvijjā. Pāribhaṭakatā cātiādinā dvando napuṃsakattābhāve pāri…pe… vijjā, tāya. Rasso pana gāthābandhavasena, tathā dīgho. Pahiṇānaṃ tasmiṃ tasmiṃ kamme tesaṃ tesaṃ niyuñjanaṃ paheṇaṃ. Ādarena dūtena kāretabbaṃ yaṃ kiñci kammaṃ dūtakammaṃ. Pisanaṃ pesanaṃ, jaṅghāya pādena pesanaṃ jaṅghapesanaṃ, tamassa atthīti jaṅghapesaniyaṃ. Tesaṃ tesaṃ gihīnaṃ gāmantaradesantarādīsu sāsanapaṭisāsanaharaṇassetamadhivacanaṃ.
২১১. লাভাসায লঞ্জদানং অনুপ্পদানং। সম্বুদ্ধপ্পটিকুট্ঠেন বুদ্ধগরহিতেন অঙ্গৰিজ্জানক্খত্তৰিজ্জাসুপিনৰিজ্জাভূতৰিজ্জাদিনা অঞ্ঞেন ৰা।
211. Lābhāsāya lañjadānaṃ anuppadānaṃ. Sambuddhappaṭikuṭṭhena buddhagarahitena aṅgavijjānakkhattavijjāsupinavijjābhūtavijjādinā aññena vā.
২১২. অঞ্ঞাতকানং অপ্পৰারিতানং ৰিঞ্ঞাপনং ৰিঞ্ঞত্তি, যাচনৰসেন পৰত্তো কাযৰচীপযোগো। বুদ্ধপ্পটিকুট্ঠেন মিচ্ছাজীৰেন পচ্চযপরিযেসনা অনেসনা। অভূতস্স অত্তনি অৰিজ্জমানস্স উত্তরিমনুস্সধম্মস্স উল্লপনং কথনং অভূতুল্লপনা। কুহনাদীহীতি কুহনালপনাদীহি। তত্থ লাভসক্কারসিলোকসন্নিস্সিতস্স পচ্চযপ্পটিসেৰনসামন্তজপ্পনইরিযাপথসণ্ঠাপনৰসেন জনৰিম্হাপনা কুহনা। ৰিহারং আগতে মনুস্সে দিস্ৰা ‘‘কিমত্থায ভোন্তো আগতা, কিং ভিক্খূ নিমন্তেতু’’ন্তি ৰা ‘‘মযি রাজা পসন্নো, অসুকো চ অসুকো চ রাজমহামত্তো পসন্নো’’তি ৰা আদিনা নযেন আলপনা লপনা। খাদনীযং গহেত্ৰা গচ্ছন্তে দিস্ৰা ‘‘কিং খাদনীযং লভিত্থা’’তিআদিনা নযেন নিমিত্তকরণাদি নেমিত্তকতা। ‘‘অস্সদ্ধো অপ্পসন্নো’’তিআদিনা নযেন গরহণানি চ ‘‘এতং এত্থ কথেথা’’তিআদিনা নযেন ৰাচায উক্খিপনাদি চ নিপ্পেসিকতা। অপ্পেন লাভেন বহুকং ৰঞ্চেত্ৰা গহেতুং ইচ্ছনং লাভেন লাভং নিজিগীসনতা। কুলদূসাদীতি এত্থ আদি-সদ্দেন রূপিযপ্পটিগ্গহণরূপিযসংৰোহারা সঙ্গয্হন্তীতি।
212. Aññātakānaṃ appavāritānaṃ viññāpanaṃ viññatti, yācanavasena pavatto kāyavacīpayogo. Buddhappaṭikuṭṭhena micchājīvena paccayapariyesanā anesanā. Abhūtassa attani avijjamānassa uttarimanussadhammassa ullapanaṃ kathanaṃ abhūtullapanā. Kuhanādīhīti kuhanālapanādīhi. Tattha lābhasakkārasilokasannissitassa paccayappaṭisevanasāmantajappanairiyāpathasaṇṭhāpanavasena janavimhāpanā kuhanā. Vihāraṃ āgate manusse disvā ‘‘kimatthāya bhonto āgatā, kiṃ bhikkhū nimantetu’’nti vā ‘‘mayi rājā pasanno, asuko ca asuko ca rājamahāmatto pasanno’’ti vā ādinā nayena ālapanā lapanā. Khādanīyaṃ gahetvā gacchante disvā ‘‘kiṃ khādanīyaṃ labhitthā’’tiādinā nayena nimittakaraṇādi nemittakatā. ‘‘Assaddho appasanno’’tiādinā nayena garahaṇāni ca ‘‘etaṃ ettha kathethā’’tiādinā nayena vācāya ukkhipanādi ca nippesikatā. Appena lābhena bahukaṃ vañcetvā gahetuṃ icchanaṃ lābhena lābhaṃ nijigīsanatā. Kuladūsādīti ettha ādi-saddena rūpiyappaṭiggahaṇarūpiyasaṃvohārā saṅgayhantīti.
মিচ্ছাজীৰৰিৰজ্জনানিদ্দেসৰণ্ণনা নিট্ঠিতা।
Micchājīvavivajjanāniddesavaṇṇanā niṭṭhitā.
