| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៣. មិច្ឆាទិដ្ឋិនិទ្ទេសោ
3. Micchādiṭṭhiniddeso
១៣៦. មិច្ឆាទិដ្ឋិយា កតមេហិ ទសហាការេហិ អភិនិវេសោ ហោតិ? ‘‘នត្ថិ ទិន្ន’’ន្តិ – វត្ថុ 1។ ឯវំវាទោ មិច្ឆាភិនិវេសបរាមាសោ 2 ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា មិច្ឆាវត្ថុកា មិច្ឆាទិដ្ឋិ។ មិច្ឆាទិដ្ឋិ ទិដ្ឋិវិបត្តិ…បេ.… ឥមានិ សញ្ញោជនានិ, ន ច ទិដ្ឋិយោ។ ‘‘នត្ថិ យិដ្ឋ’’ន្តិ – វត្ថុ…បេ.… ‘‘នត្ថិ ហុត’’ន្តិ – វត្ថុ… ‘‘នត្ថិ សុកតទុក្កដានំ កម្មានំ ផលំ វិបាកោ’’តិ – វត្ថុ… ‘‘នត្ថិ អយំ លោកោ’’តិ – វត្ថុ… ‘‘នត្ថិ បរោ លោកោ’’តិ – វត្ថុ… ‘‘នត្ថិ មាតា’’តិ – វត្ថុ… ‘‘នត្ថិ បិតា’’តិ – វត្ថុ… ‘‘នត្ថិ សត្តា ឱបបាតិកា’’តិ – វត្ថុ… ‘‘នត្ថិ លោកេ សមណព្រាហ្មណា សម្មគ្គតា 3 សម្មាបដិបន្នា, យេ ឥមញ្ច លោកំ, បរញ្ច លោកំ សយំ អភិញ្ញា សច្ឆិកត្វា បវេទេន្តី’’តិ – វត្ថុ។ ឯវំវាទោ មិច្ឆាភិនិវេសបរាមាសោ ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ ទសមា មិច្ឆាវត្ថុកា មិច្ឆាទិដ្ឋិ។ មិច្ឆាទិដ្ឋិ ទិដ្ឋិវិបត្តិ…បេ.… មិច្ឆាទិដ្ឋិកស្ស បុរិសបុគ្គលស្ស ទ្វេវ គតិយោ…បេ.… ឥមានិ សញ្ញោជនានិ, ន ច ទិដ្ឋិយោ។ មិច្ឆាទិដ្ឋិយា ឥមេហិ ទសហាការេហិ អភិនិវេសោ ហោតិ។
136. Micchādiṭṭhiyā katamehi dasahākārehi abhiniveso hoti? ‘‘Natthi dinna’’nti – vatthu 4. Evaṃvādo micchābhinivesaparāmāso 5 diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā micchāvatthukā micchādiṭṭhi. Micchādiṭṭhi diṭṭhivipatti…pe… imāni saññojanāni, na ca diṭṭhiyo. ‘‘Natthi yiṭṭha’’nti – vatthu…pe… ‘‘natthi huta’’nti – vatthu… ‘‘natthi sukatadukkaṭānaṃ kammānaṃ phalaṃ vipāko’’ti – vatthu… ‘‘natthi ayaṃ loko’’ti – vatthu… ‘‘natthi paro loko’’ti – vatthu… ‘‘natthi mātā’’ti – vatthu… ‘‘natthi pitā’’ti – vatthu… ‘‘natthi sattā opapātikā’’ti – vatthu… ‘‘natthi loke samaṇabrāhmaṇā sammaggatā 6 sammāpaṭipannā, ye imañca lokaṃ, parañca lokaṃ sayaṃ abhiññā sacchikatvā pavedentī’’ti – vatthu. Evaṃvādo micchābhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dasamā micchāvatthukā micchādiṭṭhi. Micchādiṭṭhi diṭṭhivipatti…pe… micchādiṭṭhikassa purisapuggalassa dveva gatiyo…pe… imāni saññojanāni, na ca diṭṭhiyo. Micchādiṭṭhiyā imehi dasahākārehi abhiniveso hoti.
មិច្ឆាទិដ្ឋិនិទ្ទេសោ តតិយោ។
Micchādiṭṭhiniddeso tatiyo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៣. មិច្ឆាទិដ្ឋិនិទ្ទេសវណ្ណនា • 3. Micchādiṭṭhiniddesavaṇṇanā
