3. Mettaguttheraapadānaṃ

45.

‘‘Himavantassāvidūre , asoko nāma pabbato;

Tatthāsi assamo mayhaṃ, vissakammena ² māpito.

46.

‘‘Sumedho nāma sambuddho, aggo kāruṇiko muni;

Nivāsayitvā pubbaṇhe, piṇḍāya me ⁴ upāgami.

47.

‘‘Upāgataṃ mahāvīraṃ, sumedhaṃ lokanāyakaṃ;

Paggayha sugatapattaṃ ⁷, sappitelaṃ apūrayiṃ ⁸.

48.

‘‘Datvānahaṃ buddhaseṭṭhe, sumedhe lokanāyake;

Añjaliṃ paggahetvāna, bhiyyo ¹⁰ hāsaṃ janesahaṃ.

49.

‘‘Iminā sappidānena, cetanāpaṇidhīhi ca;

Devabhūto manusso vā, labhāmi vipulaṃ sukhaṃ.

50.

‘‘Vinipātaṃ vivajjetvā, saṃsarāmi bhavābhave;

Tattha cittaṃ paṇidhitvā, labhāmi acalaṃ padaṃ.

51.

‘‘Lābhā tuyhaṃ suladdhaṃ te, yaṃ maṃ addakkhi brāhmaṇa;

Mama dassanamāgamma, arahattaṃ bhavissati ¹².

52.

‘‘Vissattho ¹⁴ hohi mā bhāyi, adhigantvā mahāyasaṃ;

Mamañhi sappiṃ datvāna, parimokkhasi jātiyā.

53.

‘‘Iminā sappidānena, cetanāpaṇidhīhi ca;

Devabhūto manusso vā, labhase vipulaṃ sukhaṃ.

54.

‘‘Iminā sappidānena, mettacittavatāya ca;

Aṭṭhārase kappasate, devaloke ramissasi.

55.

‘‘Aṭṭhatiṃsatikkhattuñca, devarājā bhavissasi;

Padesarajjaṃ vipulaṃ, gaṇanāto asaṅkhiyaṃ.

56.

‘‘Ekapaññāsakkhattuñca, cakkavattī bhavissasi;

Cāturanto vijitāvī, jambumaṇḍassa ¹⁶ issaro.

57.

‘‘Mahāsamuddovakkhobho, duddharo pathavī yathā;

Evameva ca te bhogā, appameyyā bhavissare.

58.

‘‘Saṭṭhikoṭī hiraññassa, cajitvā ¹⁸ pabbajiṃ ahaṃ;

Kiṃ kusalaṃ gavesanto, bāvariṃ upasaṅkamiṃ.

59.

‘‘Tattha mante adhīyāmi, chaḷaṅgaṃ nāma lakkhaṇaṃ;

Tamandhakāraṃ vidhamaṃ, uppajji tvaṃ mahāmuni.

60.

‘‘Tava dassanakāmohaṃ, āgatomhi mahāmuni;

Tava dhammaṃ suṇitvāna, pattomhi acalaṃ padaṃ.

61.

‘‘Tiṃsakappasahassamhi, sappiṃ buddhassadāsahaṃ;

Etthantare nābhijāne, sappiṃ viññāpitaṃ ²⁰ mayā.

62.

‘‘Mama saṅkappamaññāya, uppajjati yadicchakaṃ;

Cittamaññāya nibbattaṃ, sabbe santappayāmahaṃ.

63.

‘‘Aho buddhā aho dhammā ²², aho no satthu sampadā;

Thokañhi sappiṃ datvāna, appameyyaṃ labhāmahaṃ.

64.

‘‘Mahāsamudde udakaṃ, yāvatā nerupassato;

Mama sappiṃ upādāya, kalabhāgaṃ na hessati ²⁴.

65.

‘‘Yāvatā cakkavāḷassa, kariyantassa ²⁶ rāsito;

Mama nibbattavatthānaṃ ²⁸, okāso so na sammati.

66.

‘‘Pabbatarājā himavā, pavaropi siluccayo;

Mamānulittagandhassa, upanidhiṃ ³⁰ na hessati.

67.

‘‘Vatthaṃ gandhañca sappiñca, aññañca diṭṭhadhammikaṃ;

Asaṅkhatañca nibbānaṃ, sappidānassidaṃ phalaṃ.

68.

‘‘Satipaṭṭhānasayano, samādhijhānagocaro;

Bojjhaṅgabhojano ³² ajja, sappidānassidaṃ phalaṃ.

69.

‘‘Kilesā jhāpitā mayhaṃ…pe… viharāmi anāsavo.

70.

‘‘Svāgataṃ vata me āsi…pe… kataṃ buddhassa sāsanaṃ.

71.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā mettagū thero imā gāthāyo

Abhāsitthāti.

Mettaguttherassāpadānaṃ tatiyaṃ.