| Library / Tipiṭaka / तिपिटक • Tipiṭaka / जातकपाळि • Jātakapāḷi |
३९९. मातुपोसकगिज्झजातकं (७-१-४)
399. Mātuposakagijjhajātakaṃ (7-1-4)
२२.
22.
ते कथं नु करिस्सन्ति, वुद्धा गिरिदरीसया।
Te kathaṃ nu karissanti, vuddhā giridarīsayā;
अहं बद्धोस्मि पासेन, निलीयस्स वसं गतो॥
Ahaṃ baddhosmi pāsena, nilīyassa vasaṃ gato.
२३.
23.
किं गिज्झ परिदेवसि, का नु ते परिदेवना।
Kiṃ gijjha paridevasi, kā nu te paridevanā;
न मे सुतो वा दिट्ठो वा, भासन्तो मानुसिं दिजो॥
Na me suto vā diṭṭho vā, bhāsanto mānusiṃ dijo.
२४.
24.
भरामि मातापितरो, वुद्धे गिरिदरीसये।
Bharāmi mātāpitaro, vuddhe giridarīsaye;
ते कथं नु करिस्सन्ति, अहं वसं गतो तव॥
Te kathaṃ nu karissanti, ahaṃ vasaṃ gato tava.
२५.
25.
यं नु गिज्झो योजनसतं, कुणपानि अवेक्खति।
Yaṃ nu gijjho yojanasataṃ, kuṇapāni avekkhati;
कस्मा जालञ्च पासञ्च, आसज्जापि न बुज्झसि॥
Kasmā jālañca pāsañca, āsajjāpi na bujjhasi.
२६.
26.
यदा पराभवो होति, पोसो जीवितसङ्खये।
Yadā parābhavo hoti, poso jīvitasaṅkhaye;
अथ जालञ्च पासञ्च, आसज्जापि न बुज्झति॥
Atha jālañca pāsañca, āsajjāpi na bujjhati.
२७.
27.
भरस्सु मातापितरो, वुद्धे गिरिदरीसये।
Bharassu mātāpitaro, vuddhe giridarīsaye;
मया त्वं समनुञ्ञातो, सोत्थिं पस्साहि ञातके॥
Mayā tvaṃ samanuññāto, sotthiṃ passāhi ñātake.
२८.
28.
एवं लुद्दक नन्दस्सु, सह सब्बेहि ञातिभि।
Evaṃ luddaka nandassu, saha sabbehi ñātibhi;
भरिस्सं मातापितरो, वुद्धे गिरिदरीसयेति॥
Bharissaṃ mātāpitaro, vuddhe giridarīsayeti.
मातुपोसकगिज्झजातकं चतुत्थं।
Mātuposakagijjhajātakaṃ catutthaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [३९९] ४. मातुपोसकगिज्झजातकवण्णना • [399] 4. Mātuposakagijjhajātakavaṇṇanā
