| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๗. มาตงฺคจริยา
7. Mātaṅgacariyā
๖๐.
60.
‘‘ปุนาปรํ ยทา โหมิ, ชฎิโล อุคฺคตาปโน;
‘‘Punāparaṃ yadā homi, jaṭilo uggatāpano;
มาตโงฺค นาม นาเมน, สีลวา สุสมาหิโตฯ
Mātaṅgo nāma nāmena, sīlavā susamāhito.
๖๑.
61.
‘‘อหญฺจ พฺราหฺมโณ เอโก, คงฺคากูเล วสามุโภ;
‘‘Ahañca brāhmaṇo eko, gaṅgākūle vasāmubho;
อหํ วสามิ อุปริ, เหฎฺฐา วสติ พฺราหฺมโณฯ
Ahaṃ vasāmi upari, heṭṭhā vasati brāhmaṇo.
๖๒.
62.
‘‘วิจรโนฺต อนุกูลมฺหิ, อุทฺธํ เม อสฺสมทฺทส;
‘‘Vicaranto anukūlamhi, uddhaṃ me assamaddasa;
ตตฺถ มํ ปริภาเสตฺวา, อภิสปิ มุทฺธผาลนํฯ
Tattha maṃ paribhāsetvā, abhisapi muddhaphālanaṃ.
๖๓.
63.
‘‘ยทิหํ ตสฺส ปกุเปฺปยฺยํ, ยทิ สีลํ น โคปเย;
‘‘Yadihaṃ tassa pakuppeyyaṃ, yadi sīlaṃ na gopaye;
โอโลเกตฺวานหํ ตสฺส, กเรยฺยํ ฉาริกํ วิยฯ
Oloketvānahaṃ tassa, kareyyaṃ chārikaṃ viya.
๖๔.
64.
‘‘ยํ โส ตทา มํ อภิสปิ, กุปิโต ทุฎฺฐมานโส;
‘‘Yaṃ so tadā maṃ abhisapi, kupito duṭṭhamānaso;
ตเสฺสว มตฺถเก นิปติ, โยเคน ตํ ปโมจยิํฯ
Tasseva matthake nipati, yogena taṃ pamocayiṃ.
๖๕.
65.
‘‘อนุรกฺขิํ มม สีลํ, นารกฺขิํ มม ชีวิตํ;
‘‘Anurakkhiṃ mama sīlaṃ, nārakkhiṃ mama jīvitaṃ;
สีลวา หิ ตทา อาสิํ, โพธิยาเยว การณา’’ติฯ
Sīlavā hi tadā āsiṃ, bodhiyāyeva kāraṇā’’ti.
มาตงฺคจริยํ สตฺตมํฯ
Mātaṅgacariyaṃ sattamaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๗. มาตงฺคจริยาวณฺณนา • 7. Mātaṅgacariyāvaṇṇanā
