| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၁. ပဉ္စဂတိပေယ္ယာလဝဂ္ဂော
11. Pañcagatipeyyālavaggo
၁. မနုသ္သစုတိနိရယသုတ္တံ
1. Manussacutinirayasuttaṃ
၁၁၇၂. အထ ခော ဘဂဝာ ပရိတ္တံ နခသိခာယံ ပံသုံ အာရောပေတ္ဝာ ဘိက္ခူ အာမန္တေသိ – ‘‘တံ ကိံ မညထ, ဘိက္ခဝေ, ကတမံ နု ခော ဗဟုတရံ – ယော ဝာယံ မယာ ပရိတ္တော နခသိခာယံ ပံသု အာရောပိတော, အယံ ဝာ မဟာပထဝီ’’တိ? ‘‘ဧတဒေဝ, ဘန္တေ, ဗဟုတရံ, ယဒိဒံ – မဟာပထဝီ; အပ္ပမတ္တကာယံ ဘဂဝတာ ပရိတ္တော နခသိခာယံ ပံသု အာရောပိတော။ သင္ခမ္ပိ န ဥပေတိ, ဥပနိဓမ္ပိ န ဥပေတိ, ကလဘာဂမ္ပိ န ဥပေတိ မဟာပထဝိံ ဥပနိဓာယ ဘဂဝတာ ပရိတ္တော နခသိခာယံ ပံသု အာရောပိတော’’တိ။ ဧဝမေဝ ခော, ဘိက္ခဝေ, အပ္ပကာ တေ သတ္တာ ယေ မနုသ္သာ စုတာ မနုသ္သေသု ပစ္စာဇာယန္တိ; အထ ခော ဧတေဝ ဗဟုတရာ သတ္တာ ယေ မနုသ္သာ စုတာ နိရယေ ပစ္စာဇာယန္တိ။ပေ.။။ ပဌမံ။
1172. Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yo vāyaṃ mayā paritto nakhasikhāyaṃ paṃsu āropito, ayaṃ vā mahāpathavī’’ti? ‘‘Etadeva, bhante, bahutaraṃ, yadidaṃ – mahāpathavī; appamattakāyaṃ bhagavatā paritto nakhasikhāyaṃ paṃsu āropito. Saṅkhampi na upeti, upanidhampi na upeti, kalabhāgampi na upeti mahāpathaviṃ upanidhāya bhagavatā paritto nakhasikhāyaṃ paṃsu āropito’’ti. Evameva kho, bhikkhave, appakā te sattā ye manussā cutā manussesu paccājāyanti; atha kho eteva bahutarā sattā ye manussā cutā niraye paccājāyanti…pe…. Paṭhamaṃ.
