| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
៥. មង្គលពុទ្ធវំសោ
5. Maṅgalabuddhavaṃso
១.
1.
កោណ្ឌញ្ញស្ស អបរេន, មង្គលោ នាម នាយកោ;
Koṇḍaññassa aparena, maṅgalo nāma nāyako;
តមំ លោកេ និហន្ត្វាន, ធម្មោក្កមភិធារយិ។
Tamaṃ loke nihantvāna, dhammokkamabhidhārayi.
២.
2.
អតុលាសិ បភា តស្ស, ជិនេហញ្ញេហិ ឧត្តរិំ;
Atulāsi pabhā tassa, jinehaññehi uttariṃ;
ចន្ទសូរិយបភំ ហន្ត្វា, ទសសហស្សី វិរោចតិ។
Candasūriyapabhaṃ hantvā, dasasahassī virocati.
៣.
3.
សោបិ ពុទ្ធោ បកាសេសិ, ចតុរោ សច្ចវរុត្តមេ;
Sopi buddho pakāsesi, caturo saccavaruttame;
តេ តេ សច្ចរសំ បីត្វា, វិនោទេន្តិ មហាតមំ។
Te te saccarasaṃ pītvā, vinodenti mahātamaṃ.
៤.
4.
បត្វាន ពោធិមតុលំ, បឋមេ ធម្មទេសនេ;
Patvāna bodhimatulaṃ, paṭhame dhammadesane;
កោដិសតសហស្សានំ, ធម្មាភិសមយោ អហុ។
Koṭisatasahassānaṃ, dhammābhisamayo ahu.
៥.
5.
សុរិន្ទទេវភវនេ , ពុទ្ធោ ធម្មមទេសយិ;
Surindadevabhavane , buddho dhammamadesayi;
៦.
6.
យទា សុនន្ទោ ចក្កវត្តី, សម្ពុទ្ធំ ឧបសង្កមិ;
Yadā sunando cakkavattī, sambuddhaṃ upasaṅkami;
តទា អាហនិ សម្ពុទ្ធោ, ធម្មភេរិំ វរុត្តមំ។
Tadā āhani sambuddho, dhammabheriṃ varuttamaṃ.
៧.
7.
សុនន្ទស្សានុចរា ជនតា, តទាសុំ នវុតិកោដិយោ;
Sunandassānucarā janatā, tadāsuṃ navutikoṭiyo;
សព្ពេបិ តេ និរវសេសា, អហេសុំ ឯហិ ភិក្ខុកា។
Sabbepi te niravasesā, ahesuṃ ehi bhikkhukā.
៨.
8.
សន្និបាតា តយោ អាសុំ, មង្គលស្ស មហេសិនោ;
Sannipātā tayo āsuṃ, maṅgalassa mahesino;
កោដិសតសហស្សានំ, បឋមោ អាសិ សមាគមោ។
Koṭisatasahassānaṃ, paṭhamo āsi samāgamo.
៩.
9.
ទុតិយោ កោដិសតសហស្សានំ, តតិយោ នវុតិកោដិនំ;
Dutiyo koṭisatasahassānaṃ, tatiyo navutikoṭinaṃ;
ខីណាសវានំ វិមលានំ, តទា អាសិ សមាគមោ។
Khīṇāsavānaṃ vimalānaṃ, tadā āsi samāgamo.
១០.
10.
អហំ តេន សមយេន, សុរុចី នាម ព្រាហ្មណោ;
Ahaṃ tena samayena, surucī nāma brāhmaṇo;
អជ្ឈាយកោ មន្តធរោ, តិណ្ណំ វេទាន បារគូ។
Ajjhāyako mantadharo, tiṇṇaṃ vedāna pāragū.
១១.
11.
តមហំ ឧបសង្កម្ម, សរណំ គន្ត្វាន សត្ថុនោ;
Tamahaṃ upasaṅkamma, saraṇaṃ gantvāna satthuno;
សម្ពុទ្ធប្បមុខំ សង្ឃំ, គន្ធមាលេន បូជយិំ;
Sambuddhappamukhaṃ saṅghaṃ, gandhamālena pūjayiṃ;
បូជេត្វា គន្ធមាលេន, គវបានេន តប្បយិំ។
Pūjetvā gandhamālena, gavapānena tappayiṃ.
១២.
12.
សោបិ មំ ពុទ្ធោ ព្យាកាសិ, មង្គលោ ទ្វិបទុត្តមោ;
Sopi maṃ buddho byākāsi, maṅgalo dvipaduttamo;
‘‘អបរិមេយ្យិតោ កប្បេ, អយំ ពុទ្ធោ ភវិស្សតិ។
‘‘Aparimeyyito kappe, ayaṃ buddho bhavissati.
១៣.
13.
‘‘បធានំ បទហិត្វាន…បេ.… ហេស្សាម សម្មុខា ឥមំ’’។
‘‘Padhānaṃ padahitvāna…pe… hessāma sammukhā imaṃ’’.
១៤.
14.
តស្សាបិ វចនំ សុត្វា, ភិយ្យោ ចិត្តំ បសាទយិំ;
Tassāpi vacanaṃ sutvā, bhiyyo cittaṃ pasādayiṃ;
ឧត្តរិំ វតមធិដ្ឋាសិំ, ទស បារមិបូរិយា។
Uttariṃ vatamadhiṭṭhāsiṃ, dasa pāramipūriyā.
១៥.
15.
តទា បីតិមនុព្រូហន្តោ, សម្ពោធិវរបត្តិយា;
Tadā pītimanubrūhanto, sambodhivarapattiyā;
ពុទ្ធេ ទត្វាន មំ គេហំ, បព្ពជិំ តស្ស សន្តិកេ។
Buddhe datvāna maṃ gehaṃ, pabbajiṃ tassa santike.
១៦.
16.
សុត្តន្តំ វិនយញ្ចាបិ, នវង្គំ សត្ថុសាសនំ;
Suttantaṃ vinayañcāpi, navaṅgaṃ satthusāsanaṃ;
សព្ពំ បរិយាបុណិត្វា, សោភយិំ ជិនសាសនំ។
Sabbaṃ pariyāpuṇitvā, sobhayiṃ jinasāsanaṃ.
១៧.
17.
តត្ថប្បមត្តោ វិហរន្តោ, ព្រហ្មំ ភាវេត្វ ភាវនំ;
Tatthappamatto viharanto, brahmaṃ bhāvetva bhāvanaṃ;
អភិញ្ញាបារមិំ គន្ត្វា, ព្រហ្មលោកមគច្ឆហំ។
Abhiññāpāramiṃ gantvā, brahmalokamagacchahaṃ.
១៨.
18.
ឧត្តរំ នាម នគរំ, ឧត្តរោ នាម ខត្តិយោ;
Uttaraṃ nāma nagaraṃ, uttaro nāma khattiyo;
ឧត្តរា នាម ជនិកា, មង្គលស្ស មហេសិនោ។
Uttarā nāma janikā, maṅgalassa mahesino.
១៩.
19.
នវវស្សសហស្សានិ , អគារំ អជ្ឈ សោ វសិ;
Navavassasahassāni , agāraṃ ajjha so vasi;
យសវា សុចិមា សិរីមា, តយោ បាសាទមុត្តមា។
Yasavā sucimā sirīmā, tayo pāsādamuttamā.
២០.
20.
សមតិំសសហស្សានិ, នារិយោ សមលង្កតា;
Samatiṃsasahassāni, nāriyo samalaṅkatā;
យសវតី នាម នារី, សីវលោ នាម អត្រជោ។
Yasavatī nāma nārī, sīvalo nāma atrajo.
២១.
21.
និមិត្តេ ចតុរោ ទិស្វា, អស្សយានេន និក្ខមិ;
Nimitte caturo disvā, assayānena nikkhami;
អនូនអដ្ឋមាសានិ, បធានំ បទហី ជិនោ។
Anūnaaṭṭhamāsāni, padhānaṃ padahī jino.
២២.
22.
ព្រហ្មុនា យាចិតោ សន្តោ, មង្គលោ នាម នាយកោ;
Brahmunā yācito santo, maṅgalo nāma nāyako;
វត្តិ ចក្កំ មហាវីរោ, វនេ សិរីវរុត្តមេ។
Vatti cakkaṃ mahāvīro, vane sirīvaruttame.
២៣.
23.
សុទេវោ ធម្មសេនោ ច, អហេសុំ អគ្គសាវកា;
Sudevo dhammaseno ca, ahesuṃ aggasāvakā;
បាលិតោ នាមុបដ្ឋាកោ, មង្គលស្ស មហេសិនោ។
Pālito nāmupaṭṭhāko, maṅgalassa mahesino.
២៤.
24.
សីវលា ច អសោកា ច, អហេសុំ អគ្គសាវិកា;
Sīvalā ca asokā ca, ahesuṃ aggasāvikā;
ពោធិ តស្ស ភគវតោ, នាគរុក្ខោតិ វុច្ចតិ។
Bodhi tassa bhagavato, nāgarukkhoti vuccati.
២៥.
25.
នន្ទោ ចេវ វិសាខោ ច, អហេសុំ អគ្គុបដ្ឋកា;
Nando ceva visākho ca, ahesuṃ aggupaṭṭhakā;
អនុលា ចេវ សុតនា ច, អហេសុំ អគ្គុបដ្ឋិកា។
Anulā ceva sutanā ca, ahesuṃ aggupaṭṭhikā.
២៦.
26.
អដ្ឋាសីតិ រតនានិ, អច្ចុគ្គតោ មហាមុនិ;
Aṭṭhāsīti ratanāni, accuggato mahāmuni;
តតោ និទ្ធាវតី រំសី, អនេកសតសហស្សិយោ។
Tato niddhāvatī raṃsī, anekasatasahassiyo.
២៧.
27.
នវុតិវស្សសហស្សានិ, អាយុ វិជ្ជតិ តាវទេ;
Navutivassasahassāni, āyu vijjati tāvade;
តាវតា តិដ្ឋមានោ សោ, តារេសិ ជនតំ ពហុំ។
Tāvatā tiṭṭhamāno so, tāresi janataṃ bahuṃ.
២៨.
28.
យថាបិ សាគរេ ឩមី, ន សក្កា តា គណេតុយេ;
Yathāpi sāgare ūmī, na sakkā tā gaṇetuye;
តថេវ សាវកា តស្ស, ន សក្កា តេ គណេតុយេ។
Tatheva sāvakā tassa, na sakkā te gaṇetuye.
២៩.
29.
យាវ អដ្ឋាសិ សម្ពុទ្ធោ, មង្គលោ លោកនាយកោ;
Yāva aṭṭhāsi sambuddho, maṅgalo lokanāyako;
៣០.
30.
ធម្មោក្កំ ធារយិត្វាន, សន្តារេត្វា មហាជនំ;
Dhammokkaṃ dhārayitvāna, santāretvā mahājanaṃ;
ជលិត្វា ធូមកេតូវ, និព្ពុតោ សោ មហាយសោ។
Jalitvā dhūmaketūva, nibbuto so mahāyaso.
៣១.
31.
សង្ខារានំ សភាវត្ថំ, ទស្សយិត្វា សទេវកេ;
Saṅkhārānaṃ sabhāvatthaṃ, dassayitvā sadevake;
ជលិត្វា អគ្គិក្ខន្ធោវ, សូរិយោ អត្ថង្គតោ យថា។
Jalitvā aggikkhandhova, sūriyo atthaṅgato yathā.
៣២.
32.
ឧយ្យានេ វស្សរេ នាម, ពុទ្ធោ និព្ពាយិ មង្គលោ;
Uyyāne vassare nāma, buddho nibbāyi maṅgalo;
តត្ថេវស្ស ជិនថូបោ, តិំសយោជនមុគ្គតោតិ។
Tatthevassa jinathūpo, tiṃsayojanamuggatoti.
មង្គលស្ស ភគវតោ វំសោ តតិយោ។
Maṅgalassa bhagavato vaṃso tatiyo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ៥. មង្គលពុទ្ធវំសវណ្ណនា • 5. Maṅgalabuddhavaṃsavaṇṇanā
