8. Mallikāvimānavatthu

658.

‘‘Pītavatthe pītadhaje, pītālaṅkārabhūsite;

Pītantarāhi vaggūhi, apiḷandhāva sobhasi.

659.

‘‘Kā kambukāyūradhare ², kañcanāveḷabhūsite;

Hemajālakasañchanne ⁴, nānāratanamālinī.

660.

‘‘Sovaṇṇamayā lohitaṅgamayā ⁶ ca, muttāmayā veḷuriyamayā ca;

Masāragallā sahalohitaṅgā ⁸, pārevatakkhīhi maṇīhi cittatā.

661.

‘‘Koci koci ettha mayūrasussaro, haṃsassa rañño karavīkasussaro;

Tesaṃ saro suyyati vaggurūpo, pañcaṅgikaṃ tūriyamivappavāditaṃ.

662.

‘‘Ratho ca te subho vaggu ¹¹, nānāratanacittito ¹²;

Nānāvaṇṇāhi dhātūhi, suvibhattova sobhati.

663.

‘‘Tasmiṃ rathe kañcanabimbavaṇṇe, yā tvaṃ ¹⁴ ṭhitā bhāsasi maṃ padesaṃ;

Devate pucchitācikkha, kissa kammassidaṃ phala’’nti.

664.

‘‘Sovaṇṇajālaṃ maṇisoṇṇacittitaṃ ¹⁷, muttācitaṃ hemajālena channaṃ ¹⁸;

Parinibbute gotame appameyye, pasannacittā ahamābhiropayiṃ.

665.

‘‘Tāhaṃ kammaṃ karitvāna, kusalaṃ buddhavaṇṇitaṃ;

Apetasokā sukhitā, sampamodāmanāmayā’’ti.

Mallikāvimānaṃ aṭṭhamaṃ.