| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៨. មល្លិកាសុត្តវណ្ណនា
8. Mallikāsuttavaṇṇanā
១១៩. ‘‘កស្មា បុច្ឆតី’’តិ? បុច្ឆាការណំ ចោទេត្វា សមុទយតោ បដ្ឋាយ ទស្សេតុំ ‘‘អយំ កិរ មល្លិកា’’តិអាទិ វុត្តំ។ មាលារាមំ គន្ត្វាតិ អត្តនោ បិតុ មាលារាមំ រក្ខណត្ថញ្ចេវ អវសេសបុប្ផគ្គហណត្ថញ្ច គន្ត្វា។ កាសិគាមេតិ កាសិរដ្ឋស្ស គាមេ។ សោ កិរ គាមោ មហាកោសលរាជេន អត្តនោ ធីតុយា បតិឃរំ គច្ឆន្តិយា បុប្ផមូលត្ថាយ ទិន្នោ, តំនិមិត្តំ។ ភាគិនេយ្យេន អជាតសត្តុនា។ តស្សាតិ រញ្ញោ បសេនទិស្ស។ សាតិ មល្លិកា។ និវត្តិតុន្តិ តស្សា ធម្មតាយ និវត្តិតុំ តស្សា វចនំ បដិក្ខិបិតុំ។ នេវជ្ឈគាតិ វត្តមានត្ថេ អតីតវចនន្តិ អាហ ‘‘នាធិគច្ឆតី’’តិ។ បុថុ អត្តាតិ តេសំ សត្តានំ អត្តា។
119.‘‘Kasmā pucchatī’’ti? Pucchākāraṇaṃ codetvā samudayato paṭṭhāya dassetuṃ ‘‘ayaṃ kira mallikā’’tiādi vuttaṃ. Mālārāmaṃ gantvāti attano pitu mālārāmaṃ rakkhaṇatthañceva avasesapupphaggahaṇatthañca gantvā. Kāsigāmeti kāsiraṭṭhassa gāme. So kira gāmo mahākosalarājena attano dhītuyā patigharaṃ gacchantiyā pupphamūlatthāya dinno, taṃnimittaṃ. Bhāgineyyena ajātasattunā. Tassāti rañño pasenadissa. Sāti mallikā. Nivattitunti tassā dhammatāya nivattituṃ tassā vacanaṃ paṭikkhipituṃ. Nevajjhagāti vattamānatthe atītavacananti āha ‘‘nādhigacchatī’’ti. Puthu attāti tesaṃ sattānaṃ attā.
មល្លិកាសុត្តវណ្ណនា និដ្ឋិតា។
Mallikāsuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. មល្លិកាសុត្តំ • 8. Mallikāsuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. មល្លិកាសុត្តវណ្ណនា • 8. Mallikāsuttavaṇṇanā
