| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
3. махааважчасуд̇д̇аван̣н̣анаа
3. Mahāvacchasuttavaṇṇanā
193. звам̣ мз суд̇анд̇и махааважчасуд̇д̇ам̣. д̇ад̇т̇а сахагат̇ийд̇и сад̣̇д̇хим̣ваад̣̇о, б̣ахум̣ маяаа д̇умхзхи сад̣̇д̇хим̣ гат̇ид̇абуб̣б̣анд̇и гат̇ам̣ саарзд̇и мзд̇д̇им̣ гхадзд̇и. буримаани хи д̣̇вз суд̇д̇аани зд̇ассзва гат̇ид̇аани, сам̣яуд̇д̇агз аб̣яаагад̇асам̣яуд̇д̇ам̣ (сам̣. ни. 4.416 аад̣̇аяо) наама зд̇ассзва гат̇ид̇ам̣ – ‘‘гим̣ ну ко, бхо г̇од̇ама, сассад̇о лого ид̣̇амзва сажжам̣ могхаман̃н̃анд̇и аб̣яаагад̇амзд̇а’’нд̇и звам̣ згуд̇д̇аранигааязби иминаа сад̣̇д̇хим̣ гат̇ид̇ам̣ ад̇т̇иязва. д̇асмаа звамааха. саммаасамб̣уд̣̇д̇хоби д̇асса ааг̇ад̇ааг̇ад̇асса сан̇г̇ахам̣ гад̇ваа огаасамагаасиязва. гасмаа? аяан̃хи сассад̇ад̣̇идтиго, сассад̇ад̣̇идтигаа жа сийгхам̣ лад̣̇д̇хим̣ на виссаж̇ж̇знд̇и, васаад̇зламагкид̇абилод̇игаа вияа жирзна суж̇жханд̇и. бассад̇и жа бхаг̇аваа – ‘‘аяам̣ бариб̣б̣ааж̇аго гаалз г̇ажчанд̇з г̇ажчанд̇з лад̣̇д̇хим̣ виссаж̇ж̇зд̇ваа мама санд̇игз баб̣б̣аж̇ид̇ваа ча абхин̃н̃ааяо сажчигад̇ваа абхин̃н̃аад̇асааваго бхависсад̇ий’’д̇и. д̇асмаа д̇асса ааг̇ад̇ааг̇ад̇асса сан̇г̇ахам̣ гад̇ваа огаасамагаасиязва. ид̣̇ам̣ банасса бажчимаг̇аманам̣. со хи имасмим̣ суд̇д̇з д̇аран̣ам̣ ваа ход̇у ад̇аран̣ам̣ ваа, яадтим̣ од̇арид̇ваа уд̣̇агз бад̇амаано вияа саман̣асса г̇од̇амасса санд̇игам̣ г̇анд̇ваа баб̣б̣аж̇иссаамийд̇и саннидтаанам̣ гад̇ваа ааг̇ад̇о. д̇асмаа д̇хаммад̣̇зсанам̣ яаажанд̇о саад̇ху мз бхавам̣ г̇од̇амод̇иаад̣̇имааха. д̇асса бхаг̇аваа муулавасзна сам̣кид̇д̇ад̣̇зсанам̣, гаммабат̇авасзна вид̇т̇аарад̣̇зсанам̣ д̣̇зсзси. муулавасзна жзд̇т̇а ад̇исам̣кид̇д̇аа д̣̇зсанаа, гаммабат̇авасзна сам̣кид̇д̇аа вид̇т̇аарасад̣̇исаа. б̣уд̣̇д̇хаанам̣ бана ниббарияааязна вид̇т̇аарад̣̇зсанаа наама над̇т̇и. жад̇увийсад̇исаманд̇абадтаанамби хи сад̇д̇абагаран̣з абхид̇хаммабидагз жа саб̣б̣ам̣ сам̣кид̇д̇амзва. д̇асмаа муулавасзнааби гаммабат̇авасзнааби сам̣кид̇д̇амзва д̣̇зсзсийд̇и взд̣̇ид̇аб̣б̣о.
193.Evaṃme sutanti mahāvacchasuttaṃ. Tattha sahakathīti saddhiṃvādo, bahuṃ mayā tumhehi saddhiṃ kathitapubbanti kathaṃ sāreti mettiṃ ghaṭeti. Purimāni hi dve suttāni etasseva kathitāni, saṃyuttake abyākatasaṃyuttaṃ (saṃ. ni. 4.416 ādayo) nāma etasseva kathitaṃ – ‘‘kiṃ nu kho, bho gotama, sassato loko idameva saccaṃ moghamaññanti abyākatameta’’nti evaṃ ekuttaranikāyepi iminā saddhiṃ kathitaṃ atthiyeva. Tasmā evamāha. Sammāsambuddhopi tassa āgatāgatassa saṅgahaṃ katvā okāsamakāsiyeva. Kasmā? Ayañhi sassatadiṭṭhiko, sassatadiṭṭhikā ca sīghaṃ laddhiṃ na vissajjenti, vasātelamakkhitapilotikā viya cirena sujjhanti. Passati ca bhagavā – ‘‘ayaṃ paribbājako kāle gacchante gacchante laddhiṃ vissajjetvā mama santike pabbajitvā cha abhiññāyo sacchikatvā abhiññātasāvako bhavissatī’’ti. Tasmā tassa āgatāgatassa saṅgahaṃ katvā okāsamakāsiyeva. Idaṃ panassa pacchimagamanaṃ. So hi imasmiṃ sutte taraṇaṃ vā hotu ataraṇaṃ vā, yaṭṭhiṃ otaritvā udake patamāno viya samaṇassa gotamassa santikaṃ gantvā pabbajissāmīti sanniṭṭhānaṃ katvā āgato. Tasmā dhammadesanaṃ yācanto sādhu me bhavaṃ gotamotiādimāha. Tassa bhagavā mūlavasena saṃkhittadesanaṃ, kammapathavasena vitthāradesanaṃ desesi. Mūlavasena cettha atisaṃkhittā desanā, kammapathavasena saṃkhittā vitthārasadisā. Buddhānaṃ pana nippariyāyena vitthāradesanā nāma natthi. Catuvīsatisamantapaṭṭhānampi hi sattapakaraṇe abhidhammapiṭake ca sabbaṃ saṃkhittameva. Tasmā mūlavasenāpi kammapathavasenāpi saṃkhittameva desesīti veditabbo.
194. д̇ад̇т̇а баан̣аад̇ибаад̇аа взраман̣ий гусаланд̇иаад̣̇ийсу бадибаадияаа сад̇д̇ад̇хаммаа гаамааважараа, анабхиж̇жхаад̣̇аяо д̇аяо жад̇убхуумигааби вадданд̇и.
194. Tattha pāṇātipātā veramaṇī kusalantiādīsu paṭipāṭiyā sattadhammā kāmāvacarā, anabhijjhādayo tayo catubhūmikāpi vaṭṭanti.
яад̇о ко, важча, бхигкунод̇и гин̃жааби анияамзд̇ваа вуд̇д̇ам̣, яат̇аа бана ж̇ийвагасуд̇д̇з жа жан̇гийсуд̇д̇з жа, звам̣ имасмим̣ суд̇д̇з жа ад̇д̇аанамзва санд̇хааязд̇ам̣ бхаг̇авад̇аа вуд̇д̇анд̇и взд̣̇ид̇аб̣б̣ам̣.
Yatokho, vaccha, bhikkhunoti kiñcāpi aniyametvā vuttaṃ, yathā pana jīvakasutte ca caṅkīsutte ca, evaṃ imasmiṃ sutte ca attānameva sandhāyetaṃ bhagavatā vuttanti veditabbaṃ.
195. ад̇т̇и банаад̇и гим̣ бужчаамийд̇и бужчад̇и? аяам̣ гирасса лад̣̇д̇хи – ‘‘д̇асмим̣ д̇асмим̣ саасанз сад̇т̇аава арахаа ход̇и, сааваго бана арахад̇д̇ам̣ бад̇д̇ум̣ самад̇т̇о над̇т̇и. саман̣о жа г̇од̇амо ‘яад̇о ко, важча, бхигкуно’д̇и згам̣ бхигкум̣ гат̇знд̇о вияа гат̇зд̇и, ад̇т̇и ну ко саман̣асса г̇од̇амасса сааваго арахад̇д̇аббад̇д̇о’’д̇и. зд̇амад̇т̇ам̣ бужчиссаамийд̇и бужчад̇и. д̇ад̇т̇а д̇идтад̇ууд̇и бхавам̣ д̇аава г̇од̇амо д̇идтад̇у, бхаван̃хи логз баагадо арахаад̇и ад̇т̇о. д̇асмим̣ б̣яаагад̇з уд̇д̇ари бхигкунийаад̣̇ийнам̣ васзна бан̃хам̣ бужчи, бхаг̇аваабисса б̣яаагааси.
195.Atthipanāti kiṃ pucchāmīti pucchati? Ayaṃ kirassa laddhi – ‘‘tasmiṃ tasmiṃ sāsane satthāva arahā hoti, sāvako pana arahattaṃ pattuṃ samattho natthi. Samaṇo ca gotamo ‘yato kho, vaccha, bhikkhuno’ti ekaṃ bhikkhuṃ kathento viya katheti, atthi nu kho samaṇassa gotamassa sāvako arahattappatto’’ti. Etamatthaṃ pucchissāmīti pucchati. Tattha tiṭṭhatūti bhavaṃ tāva gotamo tiṭṭhatu, bhavañhi loke pākaṭo arahāti attho. Tasmiṃ byākate uttari bhikkhunīādīnaṃ vasena pañhaṃ pucchi, bhagavāpissa byākāsi.
196. аараад̇хагод̇и самбаад̣̇аго барибуураго.
196.Ārādhakoti sampādako paripūrako.
197. сзкааяа виж̇ж̇ааяа бад̇д̇аб̣б̣анд̇и хздтимапалад̇д̇аяам̣ бад̇д̇аб̣б̣ам̣. д̇ам̣ саб̣б̣ам̣ маяаа ануббад̇д̇анд̇и вад̣̇ад̇и. вид̇ан̣д̣аваад̣̇ий банааха – ‘‘гад̇амз д̇хаммаа сзгкаа? жад̇д̇ааро маг̇г̇аа абарияаабаннаа хздтимаани жа д̇ийн̣и сааман̃н̃апалааний’’д̇и (д̇ха. са. 1023) важанад̇о арахад̇д̇амаг̇г̇оби анзна бад̇д̇оязва. палам̣ бана абад̇д̇ам̣, д̇асса бад̇д̇ияаа уд̇д̇ари яог̇ам̣ гат̇аабзд̇ийд̇и. со звам̣ сан̃н̃аабзд̇аб̣б̣о –
197.Sekhāya vijjāya pattabbanti heṭṭhimaphalattayaṃ pattabbaṃ. Taṃ sabbaṃ mayā anuppattanti vadati. Vitaṇḍavādī panāha – ‘‘katame dhammā sekkhā? Cattāro maggā apariyāpannā heṭṭhimāni ca tīṇi sāmaññaphalānī’’ti (dha. sa. 1023) vacanato arahattamaggopi anena pattoyeva. Phalaṃ pana apattaṃ, tassa pattiyā uttari yogaṃ kathāpetīti. So evaṃ saññāpetabbo –
‘‘яо вз гилзсаани бахааяа бан̃жа,
‘‘Yo ve kilesāni pahāya pañca,
барибун̣н̣асзко абарихаанад̇хаммо;
Paripuṇṇasekho aparihānadhammo;
жзд̇овасиббад̇д̇о самаахид̇инд̣̇рияо,
Cetovasippatto samāhitindriyo,
са вз тид̇ад̇д̇од̇и наро бавужжад̇ий’’д̇и. (а. ни. 4.5);
Sa ve ṭhitattoti naro pavuccatī’’ti. (a. ni. 4.5);
анааг̇аамибуг̇г̇ало хи зганд̇абарибун̣н̣асзко. д̇ам̣ санд̇хааяа ‘‘сзкааяа виж̇ж̇ааяа бад̇д̇аб̣б̣а’’нд̇и ааха. маг̇г̇асса бана згажид̇д̇агкан̣игад̇д̇аа д̇ад̇т̇а тид̇асса бужчаа наама над̇т̇и. иминаа суд̇д̇зна маг̇г̇оби б̣ахужид̇д̇агкан̣иго ход̇ууд̇и жз. зд̇ам̣ на б̣уд̣̇д̇хаважанам̣, вуд̇д̇аг̇аат̇ааяа жа ад̇т̇о вируж̇жхад̇и. д̇асмаа анааг̇аамипалз тад̇ваа арахад̇д̇амаг̇г̇асса вибассанам̣ гат̇аабзд̇ийд̇и взд̣̇ид̇аб̣б̣о. яасмаа банасса на гзвалам̣ суд̣̇д̇хаарахад̇д̇ассзва убаниссаяо, чаннамби абхин̃н̃аанам̣ убаниссаяо ад̇т̇и, д̇асмаа бхаг̇аваа – ‘‘звамаяам̣ самат̇з гаммам̣ гад̇ваа бан̃жа абхин̃н̃аа ниб̣б̣ад̇д̇зссад̇и , вибассанааяа гаммам̣ гад̇ваа арахад̇д̇ам̣ баабун̣иссад̇и. звам̣ чал̣абхин̃н̃о махаасааваго бхависсад̇ий’’д̇и вибассанаамад̇д̇ам̣ агат̇зд̇ваа самат̇авибассанаа аажигки.
Anāgāmipuggalo hi ekantaparipuṇṇasekho. Taṃ sandhāya ‘‘sekhāya vijjāya pattabba’’nti āha. Maggassa pana ekacittakkhaṇikattā tattha ṭhitassa pucchā nāma natthi. Iminā suttena maggopi bahucittakkhaṇiko hotūti ce. Etaṃ na buddhavacanaṃ, vuttagāthāya ca attho virujjhati. Tasmā anāgāmiphale ṭhatvā arahattamaggassa vipassanaṃ kathāpetīti veditabbo. Yasmā panassa na kevalaṃ suddhaarahattasseva upanissayo, channampi abhiññānaṃ upanissayo atthi, tasmā bhagavā – ‘‘evamayaṃ samathe kammaṃ katvā pañca abhiññā nibbattessati , vipassanāya kammaṃ katvā arahattaṃ pāpuṇissati. Evaṃ chaḷabhiñño mahāsāvako bhavissatī’’ti vipassanāmattaṃ akathetvā samathavipassanā ācikkhi.
198. сад̇и сад̇иааяад̇анзд̇и сад̇и сад̇игааран̣з. гин̃жзд̇т̇а гааран̣ам̣? абхин̃н̃аа ваа абхин̃н̃аабаад̣̇агаж̇жхаанам̣ ваа авасаанз бана арахад̇д̇ам̣ ваа гааран̣ам̣ арахад̇д̇асса вибассанаа ваад̇и взд̣̇ид̇аб̣б̣ам̣.
198.Satisatiāyataneti sati satikāraṇe. Kiñcettha kāraṇaṃ? Abhiññā vā abhiññāpādakajjhānaṃ vā avasāne pana arahattaṃ vā kāraṇaṃ arahattassa vipassanā vāti veditabbaṃ.
200. барижин̣н̣о мз бхаг̇аваад̇и сад̇д̇а хи сзкаа бхаг̇аванд̇ам̣ барижаранд̇и наама, кийн̣аасавзна бхаг̇аваа барижин̣н̣о ход̇и. ид̇и сан̇кзбзна арахад̇д̇ам̣ б̣яаагаронд̇о т̇зро звамааха. д̇з бана бхигкуу д̇амад̇т̇ам̣ на ж̇ааним̣су, аж̇аананд̇аава д̇асса важанам̣ самбадижчид̇ваа. бхаг̇авад̇о аарожзсум̣. д̣̇звад̇аад̇и д̇зсам̣ г̇ун̣аанам̣ лаабхий д̣̇звад̇аа. сзсам̣ саб̣б̣ад̇т̇а уд̇д̇аанамзваад̇и.
200.Pariciṇṇo me bhagavāti satta hi sekhā bhagavantaṃ paricaranti nāma, khīṇāsavena bhagavā pariciṇṇo hoti. Iti saṅkhepena arahattaṃ byākaronto thero evamāha. Te pana bhikkhū tamatthaṃ na jāniṃsu, ajānantāva tassa vacanaṃ sampaṭicchitvā. Bhagavato ārocesuṃ. Devatāti tesaṃ guṇānaṃ lābhī devatā. Sesaṃ sabbattha uttānamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
махааважчасуд̇д̇аван̣н̣анаа нидтид̇аа.
Mahāvacchasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 3. махааважчасуд̇д̇ам̣ • 3. Mahāvacchasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 3. махааважчасуд̇д̇аван̣н̣анаа • 3. Mahāvacchasuttavaṇṇanā
