| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) |
೨. ಮಹಾಸೀಹನಾದಸುತ್ತವಣ್ಣನಾ
2. Mahāsīhanādasuttavaṇṇanā
ವೇಸಾಲೀನಗರವಣ್ಣನಾ
Vesālīnagaravaṇṇanā
೧೪೬. ಅಪರಾಪರನ್ತಿ ಪುನಪ್ಪುನಂ। ವಿಸಾಲೀಭೂತತಾಯಾತಿ ಗಾವುತನ್ತರಂ ಗಾವುತನ್ತರಂ ಪುಥುಭೂತತಾಯ। ತತ್ರಾತಿ ತಸ್ಸಂ ವಿಸಾಲೀಭೂತತಾಯಂ। ಛಡ್ಡಿತಮತ್ತೇತಿ ವಿಸ್ಸಟ್ಠಮತ್ತೇ। ಊಮಿಭಯಾದೀಹೀತಿ ಊಮಿಕುಮ್ಭೀಲಆವಟ್ಟಸಂಸುಕಾಭಯೇಹಿ। ಉದಕಪ್ಪವಾಹೇನಾಗತಸ್ಸಪಿ ಚ ಉಸ್ಮಾ ನ ವಿಗಚ್ಛತಿ, ಉಸ್ಮಾ ಚ ನಾಮ ಈದಿಸಸ್ಸ ಸವಿಞ್ಞಾಣಕತಾಯ ಭವೇಯ್ಯಾತಿ ‘‘ಸಿಯಾ ಗಬ್ಭೋ’’ತಿ ಚಿನ್ತೇಸಿ। ತಥಾ ಹೀತಿಆದಿ ತತ್ಥ ಕಾರಣಚಿನ್ತಾ। ಪುಞ್ಞವನ್ತತಾಯ ದುಗ್ಗನ್ಧಂ ನಾಹೋಸಿ, ಸಉಸುಮತಾಯ ಪೂತಿಕಭಾವೋ। ದಾರಕಾನಂ ಪುಞ್ಞೂಪನಿಸ್ಸಯತೋ ಅಙ್ಗುಟ್ಠಕತೋ ಚಸ್ಸ ಖೀರಂ ನಿಬ್ಬತ್ತಿ, ಖೀರಭತ್ತಞ್ಚ ಲಭಿ। ಚರಿಮಕಭವೇ ಬೋಧಿಸತ್ತೇ ಕುಚ್ಛಿಗತೇ ಬೋಧಿಸತ್ತಮಾತು ವಿಯ ಉದರಚ್ಛವಿಯಾ ಅಚ್ಛವಿಪ್ಪಸನ್ನತಾಯ ನಿಚ್ಛವಿ ವಿಯಾತಿ ಕತ್ವಾ ಆಹ ‘‘ನಿಚ್ಛವೀ ಅಹೇಸು’’ನ್ತಿ। ತೇಸನ್ತಿ ದ್ವಿನ್ನಂ ದಾರಕಾನಂ। ಮಾತಾಪಿತರೋತಿ ಪೋಸಕಮಾತಾಪಿತರೋ। ಅಭಿಸಿಞ್ಚಿತ್ವಾ ರಾಜಾನಂ ಅಕಂಸು ರಜ್ಜಸಮ್ಪತ್ತಿಯಾ ದಾಯಕಸ್ಸ ಕಮ್ಮಸ್ಸ ಕತತ್ತಾ, ಅಸಮ್ಭಿನ್ನೇ ಏವ ರಾಜಕುಲೇ ಉಪ್ಪನ್ನತ್ತಾ ಚ। ಕುಮಾರಸ್ಸ ಪುಞ್ಞಾನುಭಾವಸಞ್ಚೋದಿತಾ ದೇವತಾಧಿಗ್ಗಹಿತಾತಿ ಕೇಚಿ।
146.Aparāparanti punappunaṃ. Visālībhūtatāyāti gāvutantaraṃ gāvutantaraṃ puthubhūtatāya. Tatrāti tassaṃ visālībhūtatāyaṃ. Chaḍḍitamatteti vissaṭṭhamatte. Ūmibhayādīhīti ūmikumbhīlaāvaṭṭasaṃsukābhayehi. Udakappavāhenāgatassapi ca usmā na vigacchati, usmā ca nāma īdisassa saviññāṇakatāya bhaveyyāti ‘‘siyā gabbho’’ti cintesi. Tathā hītiādi tattha kāraṇacintā. Puññavantatāya duggandhaṃ nāhosi, sausumatāya pūtikabhāvo. Dārakānaṃ puññūpanissayato aṅguṭṭhakato cassa khīraṃ nibbatti, khīrabhattañca labhi. Carimakabhave bodhisatte kucchigate bodhisattamātu viya udaracchaviyā acchavippasannatāya nicchavi viyāti katvā āha ‘‘nicchavī ahesu’’nti. Tesanti dvinnaṃ dārakānaṃ. Mātāpitaroti posakamātāpitaro. Abhisiñcitvā rājānaṃ akaṃsu rajjasampattiyā dāyakassa kammassa katattā, asambhinne eva rājakule uppannattā ca. Kumārassa puññānubhāvasañcoditā devatādhiggahitāti keci.
ಪುರಸ್ಸ ಅಪರೇತಿ ಪುರಸ್ಸ ಅಪರದಿಸಾಯ ಗಾವುತಮತ್ತೇ ಠಾನೇ ಜೀವಕಮ್ಬವನಂ ವಿಯ ಸಪಾಕಾರಮನ್ದಿರಕೇ। ಅಚಿರಪಕ್ಕನ್ತೋತಿ ಏತ್ಥ ನ ದೇಸನ್ತರಪಕ್ಕಮನಂ ಅಧಿಪ್ಪೇತಂ, ಅಥ ಖೋ ಸಾಸನತೋ ಅಪಕ್ಕಮನನ್ತಿ ದಸ್ಸೇನ್ತೋ ‘‘ವಿಬ್ಭಮಿತ್ವಾ’’ತಿಆದಿಮಾಹ। ತೇನೇವಾಹ ‘‘ಇಮಸ್ಮಾ ಧಮ್ಮವಿನಯಾ’’ತಿ। ಪರಿಸತೀತಿ ಪರಿಸಾಯಂ, ಜನಸಮೂಹೇತಿ ಅತ್ಥೋ। ಜನಸಮೂಹಗತೋ ಪನ ‘‘ಪರಿಸಮಜ್ಝೇ’’ತಿ ವುತ್ತೋ। ಭಾವನಾಮನಸಿಕಾರೇನ ವಿನಾ ಪಕತಿಯಾವ ಮನುಸ್ಸೇಹಿ ನಿಬ್ಬತ್ತೇತಬ್ಬೋ ಧಮ್ಮೋತಿ ಮನುಸ್ಸಧಮ್ಮೋ, ಮನುಸ್ಸತ್ತಭಾವಾವಹೋ ವಾ ಧಮ್ಮೋ ಮನುಸ್ಸಧಮ್ಮೋ, ಅನುಳಾರಂ ಪರಿತ್ತಕುಸಲಂ। ಯಂ ಅಸತಿಪಿ ಬುದ್ಧುಪ್ಪಾದೇ ವತ್ತತಿ, ಯಞ್ಚ ಸನ್ಧಾಯಾಹ ‘‘ಹೀನೇನ ಬ್ರಹ್ಮಚರಿಯೇನ, ಖತ್ತಿಯೇ ಉಪಪಜ್ಜತೀ’’ತಿ। ‘‘ಅಮ್ಹಾಕಂ ಬುದ್ಧೋ’’ತಿ ಬುದ್ಧೇ ಮಮತ್ತಕಾರಿನೋ ಬುದ್ಧಮಾಮಕಾ। ಸೇಸಪದದ್ವಯೇಪಿ ಏಸೇವ ನಯೋ।
Purassa apareti purassa aparadisāya gāvutamatte ṭhāne jīvakambavanaṃ viya sapākāramandirake. Acirapakkantoti ettha na desantarapakkamanaṃ adhippetaṃ, atha kho sāsanato apakkamananti dassento ‘‘vibbhamitvā’’tiādimāha. Tenevāha ‘‘imasmā dhammavinayā’’ti. Parisatīti parisāyaṃ, janasamūheti attho. Janasamūhagato pana ‘‘parisamajjhe’’ti vutto. Bhāvanāmanasikārena vinā pakatiyāva manussehi nibbattetabbo dhammoti manussadhammo, manussattabhāvāvaho vā dhammo manussadhammo, anuḷāraṃ parittakusalaṃ. Yaṃ asatipi buddhuppāde vattati, yañca sandhāyāha ‘‘hīnena brahmacariyena, khattiye upapajjatī’’ti. ‘‘Amhākaṃ buddho’’ti buddhe mamattakārino buddhamāmakā. Sesapadadvayepi eseva nayo.
ಉತ್ತರಿಮನುಸ್ಸಧಮ್ಮಾದಿವಣ್ಣನಾ
Uttarimanussadhammādivaṇṇanā
ಅಲಂ ಅರಿಯಾಯ ಅರಿಯಭಾವಾಯಾತಿ ಅಲಮರಿಯೋ, ರೂಪಾಯತನಂ ಜಾನಾತಿ ಚಕ್ಖುವಿಞ್ಞಾಣಂ ವಿಯ ಪಸ್ಸತಿ ಚಾತಿ ಞಾಣದಸ್ಸನಂ, ದಿಬ್ಬಚಕ್ಖು। ಸಮ್ಮಸನುಪಗೇ ಚ ಪನ ಧಮ್ಮೇ ಲಕ್ಖಣತ್ತಯಞ್ಚ ತಥಾ ಜಾನಾತಿ ಪಸ್ಸತಿ ಚಾತಿ ಞಾಣದಸ್ಸನಂ, ವಿಪಸ್ಸನಾ। ನಿಬ್ಬಾನಂ, ಚತ್ತಾರಿ ವಾ ಸಚ್ಚಾನಿ ಅಸಮ್ಮೋಹಪಟಿವೇಧತೋ ಜಾನಾತಿ ಪಸ್ಸತಿ ಚಾತಿ ಞಾಣದಸ್ಸನಂ, ಮಗ್ಗೋ। ಫಲಂ ಪನ ನಿಬ್ಬಾನವಸೇನೇವ ಯೋಜೇತಬ್ಬಂ। ಪಚ್ಚವೇಕ್ಖಣಾ ಮಗ್ಗಾಧಿಗತಸ್ಸ ಅತ್ಥಸ್ಸ ಪಚ್ಚಕ್ಖತೋ ಜಾನನಟ್ಠೇನ ಞಾಣದಸ್ಸನಂ, ಸಬ್ಬಞ್ಞುತಾ ಅನಾವರಣತಾಯ ಸಮನ್ತಚಕ್ಖುತಾಯ ಚ ಞಾಣದಸ್ಸನಂ। ಲೋಕುತ್ತರಮಗ್ಗೋ ಅಧಿಪ್ಪೇತೋ, ತಸ್ಮಿಞ್ಹಿ ಪಟಿಸಿದ್ಧೇ ಸಬ್ಬೇಸಮ್ಪಿ ಬುದ್ಧಗುಣಾನಂ ಅಸಮ್ಭವೋತಿ ಅಧಿಪ್ಪಾಯೋ। ತೇನಾಹ ‘‘ತಞ್ಹಿ ಸೋ ಭಗವತೋ ಪಟಿಸೇಧೇತೀ’’ತಿ।
Alaṃ ariyāya ariyabhāvāyāti alamariyo, rūpāyatanaṃ jānāti cakkhuviññāṇaṃ viya passati cāti ñāṇadassanaṃ, dibbacakkhu. Sammasanupage ca pana dhamme lakkhaṇattayañca tathā jānāti passati cāti ñāṇadassanaṃ, vipassanā. Nibbānaṃ, cattāri vā saccāni asammohapaṭivedhato jānāti passati cāti ñāṇadassanaṃ, maggo. Phalaṃ pana nibbānavaseneva yojetabbaṃ. Paccavekkhaṇā maggādhigatassa atthassa paccakkhato jānanaṭṭhena ñāṇadassanaṃ, sabbaññutā anāvaraṇatāya samantacakkhutāya ca ñāṇadassanaṃ. Lokuttaramaggo adhippeto, tasmiñhi paṭisiddhe sabbesampi buddhaguṇānaṃ asambhavoti adhippāyo. Tenāha ‘‘tañhi so bhagavato paṭisedhetī’’ti.
ಸುಖುಮಂ ಧಮ್ಮನ್ತರಂ ನಾಮ ಝಾನವಿಪಸ್ಸನಾದಿಕಂ ಆಚರಿಯಾನುಗ್ಗಹೇನ ಗಹಿತಂ ನಾಮ ನತ್ಥಿ। ತಕ್ಕಪರಿಯಾಹತನ್ತಿ ‘‘ಇತಿ ಭವಿಸ್ಸತಿ, ಏವಂ ಭವಿಸ್ಸತೀ’’ತಿ ತಂತಂದಸ್ಸೇತಬ್ಬಮತ್ಥತಕ್ಕನೇನ ವಿತಕ್ಕನಮತ್ತೇನ ಪರಿತೋ ಆಹತಂ ಪರಿವತ್ತಿತಂ ಕತ್ವಾ। ತೇನಾಹ ‘‘ತಕ್ಕೇತ್ವಾ’’ತಿಆದಿ। ಲೋಕಿಯಪಞ್ಞಂ ಅನುಜಾನಾತಿ ಉಪನಿಸಿನ್ನಪರಿಸಾಯ ಅನುಕೂಲಧಮ್ಮಕಥನತೋತಿ ಅಧಿಪ್ಪಾಯೋ। ತೇನಾಹ ‘‘ಸಮಣೋ ಗೋತಮೋ’’ತಿಆದಿ। ಪಟಿಭಾತೀತಿ ಪಟಿಭಾನಂ, ‘‘ಇತಿ ವಕ್ಖಾಮೀ’’ತಿ ಏವಂಪವತ್ತಂ ಕಥನಚಿತ್ತಂ, ತತೋ ಪಟಿಭಾನತೋ ಜಾನನಂ ಪಟಿಭಾನಂ, ಆಗಮಾಭಾವತೋ ಸಯಮೇವ ಉಪಟ್ಠಿತತ್ತಾ ಸಯಂಪಟಿಭಾನಂ। ತೇನಾಹ ‘‘ಇಮಿನಾಸ್ಸ ಧಮ್ಮೇಸು ಪಚ್ಚಕ್ಖಭಾವಂ ಪಟಿಬಾಹತೀ’’ತಿ। ಸುಫುಸಿತನ್ತಿ ನಿಬ್ಬಿವರಂ। ಅಫುಸಿತತ್ತೇ ಹಿ ಸುಖೇನ ವಚೀಘೋಸೋ ನ ನಿಚ್ಛರತಿ। ದನ್ತಾವರಣನ್ತಿ ಓಟ್ಠದ್ವಯಂ। ಜಿವ್ಹಾಪಿ ಥದ್ಧತಾಯ ಸುಖೇನ ವಚೀಘೋಸೋ ನ ನಿಚ್ಛರತೀತಿ ಆಹ ‘‘ಮುದುಕಾ ಜಿವ್ಹಾ’’ತಿ। ಕರವೀಕರುತಮಞ್ಜುತಾಯ ಮಧುರೋ ಸರೋ। ಏಲಂ ವುಚ್ಚತಿ ದೋಸೋ, ಏಲಂ ಗಳತೀತಿ ಏಲಗಳಾ, ನ ಏಲಗಳಾ ಅನೇಲಗಳಾ, ನಿದ್ದೋಸಾ, ನ ರುಜ್ಝತೀತಿ ಅತ್ಥೋ। ಸಬ್ಬಮೇತಂ ರಞ್ಜನಸ್ಸೇವ ಕಾರಣಂ ದಸ್ಸೇನ್ತೋ ವದತಿ।
Sukhumaṃ dhammantaraṃ nāma jhānavipassanādikaṃ ācariyānuggahena gahitaṃ nāma natthi. Takkapariyāhatanti ‘‘iti bhavissati, evaṃ bhavissatī’’ti taṃtaṃdassetabbamatthatakkanena vitakkanamattena parito āhataṃ parivattitaṃ katvā. Tenāha ‘‘takketvā’’tiādi. Lokiyapaññaṃ anujānāti upanisinnaparisāya anukūladhammakathanatoti adhippāyo. Tenāha ‘‘samaṇo gotamo’’tiādi. Paṭibhātīti paṭibhānaṃ, ‘‘iti vakkhāmī’’ti evaṃpavattaṃ kathanacittaṃ, tato paṭibhānato jānanaṃ paṭibhānaṃ, āgamābhāvato sayameva upaṭṭhitattā sayaṃpaṭibhānaṃ. Tenāha ‘‘imināssa dhammesu paccakkhabhāvaṃ paṭibāhatī’’ti. Suphusitanti nibbivaraṃ. Aphusitatte hi sukhena vacīghoso na niccharati. Dantāvaraṇanti oṭṭhadvayaṃ. Jivhāpi thaddhatāya sukhena vacīghoso na niccharatīti āha ‘‘mudukā jivhā’’ti. Karavīkarutamañjutāya madhuro saro. Elaṃ vuccati doso, elaṃ gaḷatīti elagaḷā, na elagaḷā anelagaḷā, niddosā, na rujjhatīti attho. Sabbametaṃ rañjanasseva kāraṇaṃ dassento vadati.
ಪಞ್ಚ ಧಮ್ಮಾತಿ ಗಮ್ಭೀರಞಾಣಚರಿಯಭೂತಾನಂ ಖನ್ಧಾದೀನಂ ಉಗ್ಗಹಣ-ಸವನ-ಧಾರಣ-ಪರಿಚಯ-ಯೋನಿಸೋಮನಸಿಕಾರೇ ಸನ್ಧಾಯಾಹ। ತಕ್ಕರಸ್ಸ ಸಮ್ಮಾ ದುಕ್ಖಕ್ಖಯಾಯಾತಿ ಏತ್ಥ ಸಮ್ಮಾ-ಸದ್ದೋ ಉಭಯತ್ಥಾಪಿ ಯೋಜೇತಬ್ಬೋ ‘‘ಸಮ್ಮಾ ತಕ್ಕರಸ್ಸ ಸಮ್ಮಾ ದುಕ್ಖಕ್ಖಯಾಯಾ’’ತಿ। ಯೋ ಹಿ ಸಮ್ಮಾ ಧಮ್ಮಂ ಪಟಿಪಜ್ಜತಿ, ತಸ್ಸೇವ ಸಮ್ಮಾ ದುಕ್ಖಕ್ಖಯೋ ಹೋತಿ। ಯೋ ಪನ ವುತ್ತನಯೇನ ತಕ್ಕರೋ, ತಸ್ಸ ನಿಯ್ಯಾನಂ ಅತ್ಥತೋ ಧಮ್ಮಸ್ಸೇವ ನಿಯ್ಯಾನನ್ತಿ ಆಹ ‘‘ಸೋ ಧಮ್ಮೋ…ಪೇ॰… ನಿಯ್ಯಾತಿ ಗಚ್ಛತೀ’’ತಿ।
Pañca dhammāti gambhīrañāṇacariyabhūtānaṃ khandhādīnaṃ uggahaṇa-savana-dhāraṇa-paricaya-yonisomanasikāre sandhāyāha. Takkarassa sammā dukkhakkhayāyāti ettha sammā-saddo ubhayatthāpi yojetabbo ‘‘sammā takkarassa sammā dukkhakkhayāyā’’ti. Yo hi sammā dhammaṃ paṭipajjati, tasseva sammā dukkhakkhayo hoti. Yo pana vuttanayena takkaro, tassa niyyānaṃ atthato dhammasseva niyyānanti āha ‘‘so dhammo…pe… niyyāti gacchatī’’ti.
೧೪೭. ಕೋಧನೋತಿ ಕುಜ್ಝನಸೀಲೋ। ಯಸ್ಮಾ ಪನ ಸುನಕ್ಖತ್ತೋ ಕೋಧವಸೇನ ಕುರೂರೋ ಫರುಸವಚನೋ ಚ, ತಸ್ಮಾ ಆಹ ‘‘ಕೋಧನೋತಿ ಚಣ್ಡೋ ಫರುಸೋ ಚಾ’’ತಿ। ತಸ್ಮಿಂ ಅತ್ತಭಾವೇ ಮಗ್ಗಫಲಾನಂ ಉಪನಿಸ್ಸಯೋ ನತ್ಥೀತಿ ತಸ್ಮಿಂ ಅತ್ತಭಾವೇ ಉಪ್ಪಜ್ಜನಾರಹಾನಂ ಮಗ್ಗಫಲಾನಂ ಉಪನಿಸ್ಸಯೋ ನತ್ಥಿ। ತಂ ಬುದ್ಧಾ ‘‘ಮೋಘಪುರಿಸೋ’’ತಿ ವದನ್ತಿ ಯಥಾ ತಂ ಸುದಿನ್ನಲಾಳುದಾಯಿಆದಿಕೇ। ಉಪನಿಸ್ಸಯೇ ಸತಿಪಿ ತಸ್ಮಿಂ ಖಣೇ ಮಗ್ಗೇ ವಾ ಫಲೇ ವಾ ಅಸತಿ ‘‘ಮೋಘಪುರಿಸೋ’’ತಿ ವದನ್ತಿ ಯಥಾ ತಂ ಧನಿಯೂಪಸೇನತ್ಥೇರಾದಿಕೇ। ಸಮುಚ್ಛಿನ್ನೋಪನಿಸ್ಸಯೇ ಪನ ವತ್ತಬ್ಬಮೇವ ನತ್ಥಿ। ಯಥಾ ‘‘ಮಕ್ಖಲಿ ಮೋಘಪುರಿಸೋ ಮನುಸ್ಸಖಿಪ್ಪಂ ಮಞ್ಞೇ’’ತಿ (ಅ॰ ನಿ॰ ೧.೩೧೧) ತಥಾ ಸುನಕ್ಖತ್ತೋಪೀತಿ ಆಹ ‘‘ಇಮಸ್ಸ ಪನಾ’’ತಿಆದಿ। ಅಸ್ಸಾತಿ ಏತೇನ। ಕತ್ತರಿ ಹಿದಂ ಸಾಮಿವಚನಂ। ಕೋಧೇನಾತಿ ಕೋಧಹೇತುನಾ।
147.Kodhanoti kujjhanasīlo. Yasmā pana sunakkhatto kodhavasena kurūro pharusavacano ca, tasmā āha ‘‘kodhanoti caṇḍo pharuso cā’’ti. Tasmiṃ attabhāve maggaphalānaṃ upanissayo natthīti tasmiṃ attabhāve uppajjanārahānaṃ maggaphalānaṃ upanissayo natthi. Taṃ buddhā ‘‘moghapuriso’’ti vadanti yathā taṃ sudinnalāḷudāyiādike. Upanissaye satipi tasmiṃ khaṇe magge vā phale vā asati ‘‘moghapuriso’’ti vadanti yathā taṃ dhaniyūpasenattherādike. Samucchinnopanissaye pana vattabbameva natthi. Yathā ‘‘makkhali moghapuriso manussakhippaṃ maññe’’ti (a. ni. 1.311) tathā sunakkhattopīti āha ‘‘imassa panā’’tiādi. Assāti etena. Kattari hidaṃ sāmivacanaṃ. Kodhenāti kodhahetunā.
ಭಗವತೋತಿ ಸಮ್ಪದಾನವಚನಂ ಕುದ್ಧಪದಾಪೇಕ್ಖಾಯ। ಪುಬ್ಬೇತಿ ಭಿಕ್ಖುಕಾಲೇ। ಸದ್ದಂ ಸೋತುಕಾಮೋತಿ ಸೋ ಕಿರ ದಿಬ್ಬಚಕ್ಖುನಾ ತಾವತಿಂಸಭವನೇ ದೇವತಾನಂ ರೂಪಂ ಪಸ್ಸನ್ತೋ ಓಟ್ಠಚಲನಂ ಪಸ್ಸತಿ, ನ ಪನ ಸದ್ದಂ ಸುಣಾತಿ, ತಸ್ಮಾ ತಾಸಂ ಸದ್ದಂ ಸೋತುಕಾಮೋ ಅಹೋಸಿ। ತೇನ ವುತ್ತಂ ‘‘ಸದ್ದಂ ಸೋತುಕಾಮೋ…ಪೇ॰… ಪುಚ್ಛೀ’’ತಿ। ಸೋ ಚ ಅತೀತೇ ಏಕಂ ಸೀಲವನ್ತಂ ಭಿಕ್ಖುಂ ಕಣ್ಣಸಕ್ಖಲಿಯಂ ಪಹರಿತ್ವಾ ಬಧಿರಮಕಾಸಿ, ತಸ್ಮಾ ಪರಿಕಮ್ಮಂ ಕರೋನ್ತೋಪಿ ಅಭಬ್ಬೋವ ದಿಬ್ಬಸೋತಾಧಿಗಮಾಯ। ತಂ ಸನ್ಧಾಯ ವುತ್ತಂ ‘‘ಉಪನಿಸ್ಸಯೋ ನತ್ಥೀತಿ ಞತ್ವಾ ಪರಿಕಮ್ಮಂ ನ ಕಥೇಸೀ’’ತಿ। ಚಿನ್ತೇಸೀತಿ ಅತ್ತನೋ ಮಿಚ್ಛಾಪರಿವಿತಕ್ಕಿತೇನ ಅಯೋನಿಸೋ ಉಮ್ಮುಜ್ಜನ್ತೋ ಚಿನ್ತೇಸಿ।
Bhagavatoti sampadānavacanaṃ kuddhapadāpekkhāya. Pubbeti bhikkhukāle. Saddaṃ sotukāmoti so kira dibbacakkhunā tāvatiṃsabhavane devatānaṃ rūpaṃ passanto oṭṭhacalanaṃ passati, na pana saddaṃ suṇāti, tasmā tāsaṃ saddaṃ sotukāmo ahosi. Tena vuttaṃ ‘‘saddaṃ sotukāmo…pe… pucchī’’ti. So ca atīte ekaṃ sīlavantaṃ bhikkhuṃ kaṇṇasakkhaliyaṃ paharitvā badhiramakāsi, tasmā parikammaṃ karontopi abhabbova dibbasotādhigamāya. Taṃ sandhāya vuttaṃ ‘‘upanissayo natthīti ñatvā parikammaṃ na kathesī’’ti. Cintesīti attano micchāparivitakkitena ayoniso ummujjanto cintesi.
ನಿಯ್ಯಾನಿಕತ್ತಾವಬೋಧನತೋ ಅಭೇದೋಪಚಾರೇನ ‘‘ದೇಸನಾಧಮ್ಮೋ ನಿಯ್ಯಾನಿಕೋ’’ತಿ ವುತ್ತೋ। ನಿಯ್ಯಾನೋ ವಾ ಅರಿಯಮಗ್ಗೋ ಬೋಧೇತಬ್ಬೋ ಏತಸ್ಸ ಅತ್ಥೀತಿ ನಿಯ್ಯಾನಿಕೋ ದೇಸನಾಧಮ್ಮೋ। ಅತ್ತನಿ ಅತ್ಥಿತಂ ದಸ್ಸೇತಿ ಕಿಚ್ಚಸಿದ್ಧಿದಸ್ಸನೇನ ತತ್ಥ ತತ್ಥ ಪಾಕಟೀಕತತ್ತಾ, ನ ಪಟಿಞ್ಞಾಮತ್ತೇನ। ತಥಾ ಹಿ ಯಥಾಪರಾಧಂ ತಂತಂಸಿಕ್ಖಾಪದಪಞ್ಞತ್ತಿಯಾ ಯಥಾಧಮ್ಮಂ ವೇನೇಯ್ಯಜ್ಝಾಸಯಾನುರೂಪಞ್ಚ ಅವಿಪರೀತಧಮ್ಮದೇಸನಾಯ ದೇವಮನುಸ್ಸೇಹಿ ಯಥಾಭಿಸಙ್ಖತಪಞ್ಹಾನಂ ತದಜ್ಝಾಸಯಾನುಕೂಲಂ ಠಾನಸೋ ವಿಸ್ಸಜ್ಜನೇನ ಚ ಭಗವತೋ ಸಬ್ಬತ್ಥ ಅಪ್ಪಟಿಹತಞಾಣಚಾರಭಾವೇನ ಸಬ್ಬಞ್ಞುತಞ್ಞಾಣಂ ವಿಞ್ಞೂನಂ ಪಾಕಟಂ, ತಥಾ ತತ್ಥ ತತ್ಥ ಯಮಕಪಾಟಿಹಾರಿಯಕರಣಾದೀಸು ಇದ್ಧಿವಿಧಞಾಣಾದೀನೀತಿ। ತೇನಾಹ ‘‘ಮಯ್ಹಞ್ಚಾ’’ತಿಆದಿ। ಅನ್ವೇತಿ ಯಥಾಗಹಿತಸಙ್ಕೇತಸ್ಸ ಅನುಗಮನವಸೇನ ಏತಿ ಜಾನಾತೀತಿ ಅನ್ವಯೋ। ತೇನಾಹ ‘‘ಅನುಬುಜ್ಝತೀತಿ ಅತ್ಥೋ’’ತಿ। ಸಙ್ಕೇತಾನುಗಮನಞ್ಚೇತ್ಥ ‘‘ಯಥಾಪರಾಧಂ ತಂತಂಸಿಕ್ಖಾಪದಪಞ್ಞತ್ತಿಯಾ’’ತಿಆದಿನಾ ವುತ್ತನಯಮೇವ। ಏವಂ ಯೋಜನಾ ವೇದಿತಬ್ಬಾತಿ ಯಥಾ ಸಬ್ಬಞ್ಞುತಞ್ಞಾಣೇನ ಯೋಜನಾ ಕತಾ, ಏವಂ ‘‘ಏವರೂಪಮ್ಪಿ ನಾಮ ಮಯ್ಹಂ ಇದ್ಧಿವಿಧಞಾಣಸಙ್ಖಾತಂ ಉತ್ತರಿಮನುಸ್ಸಧಮ್ಮ’’ನ್ತಿಆದಿನಾ ತತ್ಥ ತತ್ಥ ಯೋಜನಾ ವೇದಿತಬ್ಬಾ।
Niyyānikattāvabodhanato abhedopacārena ‘‘desanādhammo niyyāniko’’ti vutto. Niyyāno vā ariyamaggo bodhetabbo etassa atthīti niyyāniko desanādhammo. Attani atthitaṃ dasseti kiccasiddhidassanena tattha tattha pākaṭīkatattā, na paṭiññāmattena. Tathā hi yathāparādhaṃ taṃtaṃsikkhāpadapaññattiyā yathādhammaṃ veneyyajjhāsayānurūpañca aviparītadhammadesanāya devamanussehi yathābhisaṅkhatapañhānaṃ tadajjhāsayānukūlaṃ ṭhānaso vissajjanena ca bhagavato sabbattha appaṭihatañāṇacārabhāvena sabbaññutaññāṇaṃ viññūnaṃ pākaṭaṃ, tathā tattha tattha yamakapāṭihāriyakaraṇādīsu iddhividhañāṇādīnīti. Tenāha ‘‘mayhañcā’’tiādi. Anveti yathāgahitasaṅketassa anugamanavasena eti jānātīti anvayo. Tenāha ‘‘anubujjhatīti attho’’ti. Saṅketānugamanañcettha ‘‘yathāparādhaṃ taṃtaṃsikkhāpadapaññattiyā’’tiādinā vuttanayameva. Evaṃ yojanā veditabbāti yathā sabbaññutaññāṇena yojanā katā, evaṃ ‘‘evarūpampi nāma mayhaṃ iddhividhañāṇasaṅkhātaṃ uttarimanussadhamma’’ntiādinā tattha tattha yojanā veditabbā.
ಉತ್ತರಿಮನುಸ್ಸಧಮ್ಮಾದಿವಣ್ಣನಾ ನಿಟ್ಠಿತಾ।
Uttarimanussadhammādivaṇṇanā niṭṭhitā.
ದಸಬಲಞಾಣವಣ್ಣನಾ
Dasabalañāṇavaṇṇanā
೧೪೮. ಯದಿಪಿ ಆದಿತೋ ಅಭಿಞ್ಞಾತ್ತಯವಸೇನ ದೇಸನಾಯ ಆಗತತ್ತಾ ಚೇತೋಪರಿಯಞಾಣಾನನ್ತರಂ ಉಪರಿ ತಿಸ್ಸೋ ಅಭಿಞ್ಞಾ ವತ್ತಬ್ಬಾ ಸಿಯುನ್ತಿ ವತ್ತಬ್ಬಂ ಸಿಯಾ, ಅತ್ಥತೋ ಪನ ವಿಜ್ಜಾತ್ತಯಂ ಯಥಾವುತ್ತಅಭಿಞ್ಞಾತ್ತಯಮೇವಾತಿ ಕತ್ವಾ ‘‘ತಿಸ್ಸೋ ವಿಜ್ಜಾ ವತ್ತಬ್ಬಾ ಸಿಯು’’ನ್ತಿ ವುತ್ತಂ। ಕಸ್ಮಾ ಪನೇತ್ಥ ‘‘ತಾಸು ವುತ್ತಾಸು ಉಪರಿ ದಸಬಲಞಾಣಂ ನ ಪರಿಪೂರತೀ’’ತಿ ವುತ್ತಂ, ನನು ಇಮಾನಿ ಞಾಣಾನಿ ಸೇಸಾಭಿಞ್ಞಾ ವಿಯ ಅತ್ತನೋ ವಿಸಯಸ್ಸ ಅಭಿಜಾನನಟ್ಠಂ ಉಪಾದಾಯ ಅಭಿಞ್ಞಾಸು ವತ್ತಬ್ಬಾನಿ, ಅಕಮ್ಪಿಯಟ್ಠಂ ಪನ ಉಪತ್ಥಮ್ಭನಟ್ಠಞ್ಚ ಉಪಾದಾಯ ಬಲಞಾಣೇಸು ಯಥಾ ಸಮ್ಮಾಸತಿಆದಯೋ ಇನ್ದ್ರಿಯಬಲಬೋಜ್ಝಙ್ಗಮಗ್ಗಙ್ಗೇಸೂತಿ? ನಯಿದಮೇವಂ। ತತ್ಥ ಹಿ ಧಮ್ಮಾನಂ ಧಮ್ಮಕಿಚ್ಚವಿಸೇಸವಿಭಾವನಪರಾಯ ದೇಸನಾಯ ವುತ್ತಂ, ಇಧ ಪನ ಸತ್ಥು ಗುಣವಿಸೇಸವಿಭಾವನಪರಾಯ ದೇಸನಾಯ ತಥಾ ವತ್ತುಂ ನ ಸಕ್ಕಾ ಅತ್ಥತೋ ಅನಞ್ಞತ್ತಾ, ಏಕಚ್ಚಾನಂ ಪುಥುಜ್ಜನಾನಂ ಏವಂ ಚಿತ್ತಂ ಉಪ್ಪಜ್ಜೇಯ್ಯ ‘‘ಕಿಮಿದಂ ಭಗವಾ ಹೇಟ್ಠಾ ವುತ್ತಗುಣೇ ಪುನಪಿ ಗಣ್ಹನ್ತೋ ಗುಣಾಧಿಕದಸ್ಸನಂ ಕರೋತೀ’’ತಿ। ತಸ್ಮಾ ಸುವುತ್ತಮೇತಂ ‘‘ಉಪರಿ ದಸಬಲಞಾಣಂ ನ ಪರಿಪೂರತೀ’’ತಿ।
148. Yadipi ādito abhiññāttayavasena desanāya āgatattā cetopariyañāṇānantaraṃ upari tisso abhiññā vattabbā siyunti vattabbaṃ siyā, atthato pana vijjāttayaṃ yathāvuttaabhiññāttayamevāti katvā ‘‘tisso vijjā vattabbā siyu’’nti vuttaṃ. Kasmā panettha ‘‘tāsu vuttāsu upari dasabalañāṇaṃ na paripūratī’’ti vuttaṃ, nanu imāni ñāṇāni sesābhiññā viya attano visayassa abhijānanaṭṭhaṃ upādāya abhiññāsu vattabbāni, akampiyaṭṭhaṃ pana upatthambhanaṭṭhañca upādāya balañāṇesu yathā sammāsatiādayo indriyabalabojjhaṅgamaggaṅgesūti? Nayidamevaṃ. Tattha hi dhammānaṃ dhammakiccavisesavibhāvanaparāya desanāya vuttaṃ, idha pana satthu guṇavisesavibhāvanaparāya desanāya tathā vattuṃ na sakkā atthato anaññattā, ekaccānaṃ puthujjanānaṃ evaṃ cittaṃ uppajjeyya ‘‘kimidaṃ bhagavā heṭṭhā vuttaguṇe punapi gaṇhanto guṇādhikadassanaṃ karotī’’ti. Tasmā suvuttametaṃ ‘‘upari dasabalañāṇaṃ na paripūratī’’ti.
ಅಞ್ಞೇಹಿ ಅಸಾಧಾರಣಾನೀತಿ ಕಸ್ಮಾ ವುತ್ತಂ (ಅ॰ ನಿ॰ ಟೀ॰ ೩.೧೦.೨೧), ನನು ಚೇತಾನಿ ಸಾವಕಾನಮ್ಪಿ ಏಕಚ್ಚಾನಂ ಉಪ್ಪಜ್ಜನ್ತೀತಿ? ಕಾಮಂ ಉಪ್ಪಜ್ಜನ್ತಿ, ಯಾದಿಸಾನಿ ಪನ ಬುದ್ಧಾನಂ ಠಾನಾಟ್ಠಾನಞಾಣಾದೀನಿ, ನ ತಾದಿಸಾನಿ ತದಞ್ಞೇಸಂ ಕದಾಚಿಪಿ ಉಪ್ಪಜ್ಜನ್ತೀತಿ ಅಞ್ಞೇಹಿ ಅಸಾಧಾರಣಾನೀತಿ। ತೇನಾಹ ‘‘ತಥಾಗತಸ್ಸೇವ ಬಲಾನೀ’’ತಿ। ಇಮಮೇವ ಹಿ ಯಥಾವುತ್ತಲೇಸಂ ಅಪೇಕ್ಖಿತ್ವಾ ತದಭಾವತೋ ಆಸಯಾನುಸಯಞಾಣಾದೀಸು ಏವ ಅಸಾಧಾರಣಗುಣಸಮಞ್ಞಾ ನಿರುಳ್ಹಾ। ಕಾಮಂ ಞಾಣಬಲಾನಂ ಞಾಣಸಮ್ಭಾರೋ ವಿಸೇಸಪಚ್ಚಯೋ, ಪುಞ್ಞಸಮ್ಭಾರೋಪಿ ಪನ ನೇಸಂ ಪಚ್ಚಯೋ ಏವ , ಞಾಣಸಮ್ಭಾರಸ್ಸಪಿ ವಾ ಪುಞ್ಞಸಮ್ಭಾರಭಾವತೋ ‘‘ಪುಞ್ಞುಸ್ಸಯಸಮ್ಪತ್ತಿಯಾ ಆಗತಾನೀ’’ತಿ ವುತ್ತಂ।
Aññehi asādhāraṇānīti kasmā vuttaṃ (a. ni. ṭī. 3.10.21), nanu cetāni sāvakānampi ekaccānaṃ uppajjantīti? Kāmaṃ uppajjanti, yādisāni pana buddhānaṃ ṭhānāṭṭhānañāṇādīni, na tādisāni tadaññesaṃ kadācipi uppajjantīti aññehi asādhāraṇānīti. Tenāha ‘‘tathāgatasseva balānī’’ti. Imameva hi yathāvuttalesaṃ apekkhitvā tadabhāvato āsayānusayañāṇādīsu eva asādhāraṇaguṇasamaññā niruḷhā. Kāmaṃ ñāṇabalānaṃ ñāṇasambhāro visesapaccayo, puññasambhāropi pana nesaṃ paccayo eva , ñāṇasambhārassapi vā puññasambhārabhāvato ‘‘puññussayasampattiyā āgatānī’’ti vuttaṃ.
ಪಕತಿಹತ್ಥಿಕುಲನ್ತಿ (ಸಂ॰ ನಿ॰ ೨.೨೨) ಗಿರಿಚರನದೀಚರವನಚರಾದಿಪ್ಪಭೇದಾ ಗೋಚರಿಯಕಾಲಾವಕನಾಮಾ ಸಬ್ಬಾಪಿ ಬಲೇನ ಪಾಕತಿಕಾ ಹತ್ಥಿಜಾತಿ। ದಸನ್ನಂ ಪುರಿಸಾನನ್ತಿ ಥಾಮಮಜ್ಝಿಮಾನಂ ದಸನ್ನಂ ಪುರಿಸಾನಂ। ಏಕಸ್ಸ ತಥಾಗತಸ್ಸ ಕಾಯಬಲನ್ತಿ ಆನೇತ್ವಾ ಸಮ್ಬನ್ಧೋ। ಏಕಸ್ಸಾತಿ ಚ ತಥಾ ಹೇಟ್ಠಾಕಥಾಯಂ ಆಗತತ್ತಾ ದೇಸನಾಸೋತೇನ ವುತ್ತಂ। ನಾರಾಯನಸಙ್ಘಾತಬಲನ್ತಿ ಏತ್ಥ ನಾರಾ ವುಚ್ಚನ್ತಿ ರಸ್ಮಿಯೋ, ತಾ ಬಹೂ ನಾನಾವಿಧಾ ಇತೋ ಉಪ್ಪಜ್ಜನ್ತೀತಿ ನಾರಾಯನಂ, ವಜಿರಂ, ತಸ್ಮಾ ನಾರಾಯನಸಙ್ಘಾತಬಲನ್ತಿ ವಜಿರಸಙ್ಘಾತಬಲನ್ತಿ ಅತ್ಥೋ। ಞಾಣಬಲಂ ಪನ ಪಾಳಿಯಂ ಆಗತಮೇವ, ನ ಕಾಯಬಲಂ ವಿಯ ಅಟ್ಠಕಥಾರುಳ್ಹಮೇವಾತಿ ಅಧಿಪ್ಪಾಯೋ। ‘‘ಸಂಯುತ್ತಕೇ ಆಗತಾನಿ ತೇಸತ್ತತಿ ಞಾಣಾನಿ ಸತ್ತಸತ್ತತಿ ಞಾಣಾನೀ’’ತಿ ವುತ್ತಂ (ವಿಭ॰ ಮೂಲಟೀ॰ ೭೬೦), ತತ್ಥ ಪನ ನಿದಾನವಗ್ಗೇ ಸತ್ತಸತ್ತತಿ ಆಗತಾನಿ ಚತುಚತ್ತಾರೀಸಞ್ಚ, ತೇಸತ್ತತಿ ಪನ ಪಟಿಸಮ್ಭಿದಾಮಗ್ಗೇ (ಪಟಿ॰ ಮ॰ ೧.೭೩ ಮಾತಿಕಾ) ಸುತಮಯಾದೀನಿ ಆಗತಾನಿ ದಿಸ್ಸನ್ತಿ, ನ ಸಂಯುತ್ತಕೇ। ಅಞ್ಞಾನಿಪೀತಿ ಏತೇನ ಞಾಣವತ್ಥುವಿಭಙ್ಗೇ ಏಕಕಾದಿವಸೇನ ವುತ್ತಾನಿ, ಅಞ್ಞತ್ಥ ಚ ‘‘ಪುಬ್ಬನ್ತೇ ಞಾಣ’’ನ್ತಿಆದಿನಾ (ಧ॰ ಸ॰ ೧೦೭೬) ಬ್ರಹ್ಮಜಾಲಾದೀಸು (ದೀ॰ ನಿ॰ ೧.೩೬) ಚ ‘‘ತಯಿದಂ ತಥಾಗತೋ ಪಜಾನಾತಿ, ಇಮಾನಿ ದಿಟ್ಠಿಟ್ಠಾನಾನಿ ಏವಂ ಗಹಿತಾನೀ’’ತಿಆದಿನಾ ವುತ್ತಾನಿ ಅನೇಕಾನಿ ಞಾಣಪ್ಪಭೇದಾನಿ ಸಙ್ಗಣ್ಹಾತಿ। ಯಾಥಾವಪಟಿವೇಧತೋ ಸಯಞ್ಚ ಅಕಮ್ಪಿಯಂ ಪುಗ್ಗಲಞ್ಚ ತಂಸಮಙ್ಗಿಂ ನೇಯ್ಯೇಸು ಅಧಿಬಲಂ ಕರೋತೀತಿ ಆಹ ‘‘ಅಕಮ್ಪಿಯಟ್ಠೇನ ಉಪತ್ಥಮ್ಭನಟ್ಠೇನ ಚಾ’’ತಿ।
Pakatihatthikulanti (saṃ. ni. 2.22) giricaranadīcaravanacarādippabhedā gocariyakālāvakanāmā sabbāpi balena pākatikā hatthijāti. Dasannaṃ purisānanti thāmamajjhimānaṃ dasannaṃ purisānaṃ. Ekassa tathāgatassa kāyabalanti ānetvā sambandho. Ekassāti ca tathā heṭṭhākathāyaṃ āgatattā desanāsotena vuttaṃ. Nārāyanasaṅghātabalanti ettha nārā vuccanti rasmiyo, tā bahū nānāvidhā ito uppajjantīti nārāyanaṃ, vajiraṃ, tasmā nārāyanasaṅghātabalanti vajirasaṅghātabalanti attho. Ñāṇabalaṃ pana pāḷiyaṃ āgatameva, na kāyabalaṃ viya aṭṭhakathāruḷhamevāti adhippāyo. ‘‘Saṃyuttake āgatāni tesattati ñāṇāni sattasattati ñāṇānī’’ti vuttaṃ (vibha. mūlaṭī. 760), tattha pana nidānavagge sattasattati āgatāni catucattārīsañca, tesattati pana paṭisambhidāmagge (paṭi. ma. 1.73 mātikā) sutamayādīni āgatāni dissanti, na saṃyuttake. Aññānipīti etena ñāṇavatthuvibhaṅge ekakādivasena vuttāni, aññattha ca ‘‘pubbante ñāṇa’’ntiādinā (dha. sa. 1076) brahmajālādīsu (dī. ni. 1.36) ca ‘‘tayidaṃ tathāgato pajānāti, imāni diṭṭhiṭṭhānāni evaṃ gahitānī’’tiādinā vuttāni anekāni ñāṇappabhedāni saṅgaṇhāti. Yāthāvapaṭivedhato sayañca akampiyaṃ puggalañca taṃsamaṅgiṃ neyyesu adhibalaṃ karotīti āha ‘‘akampiyaṭṭhena upatthambhanaṭṭhena cā’’ti.
ಉಸಭಸ್ಸ ಇದನ್ತಿ ಆಸಭಂ, (ಅ॰ ನಿ॰ ಟೀ॰ ೨.೪.೮) ಸೇಟ್ಠಂ ಠಾನಂ। ಸಬ್ಬಞ್ಞುತಪಟಿಜಾನನವಸೇನ ಅಭಿಮುಖಂ ಗಚ್ಛನ್ತಿ, ಅಟ್ಠ ವಾ ಪರಿಸಾ ಉಪಸಙ್ಕಮನ್ತೀತಿ ಆಸಭಾ, ಪುಬ್ಬಬುದ್ಧಾ। ಇದಂ ಪನಾತಿ ಬುದ್ಧಾನಂ ಠಾನಂ ಸಬ್ಬಞ್ಞುತಮೇವ ವದತಿ। ತಿಟ್ಠಮಾನೋವಾತಿ ಅವದನ್ತೋಪಿ (ಸಂ॰ ನಿ॰ ಟೀ॰ ೨.೨.೨೨) ತಿಟ್ಠಮಾನೋವ ಪಟಿಜಾನಾತಿ ನಾಮಾತಿ ಅತ್ಥೋ। ಉಪಗಚ್ಛತೀತಿ ಅನುಜಾನಾತಿ।
Usabhassa idanti āsabhaṃ, (a. ni. ṭī. 2.4.8) seṭṭhaṃ ṭhānaṃ. Sabbaññutapaṭijānanavasena abhimukhaṃ gacchanti, aṭṭha vā parisā upasaṅkamantīti āsabhā, pubbabuddhā. Idaṃ panāti buddhānaṃ ṭhānaṃ sabbaññutameva vadati. Tiṭṭhamānovāti avadantopi (saṃ. ni. ṭī. 2.2.22) tiṭṭhamānova paṭijānāti nāmāti attho. Upagacchatīti anujānāti.
ಅಟ್ಠಸು ಪರಿಸಾಸೂತಿ ‘‘ಅಭಿಜಾನಾಮಿ ಖೋ ಪನಾಹಂ, ಸಾರಿಪುತ್ತ, ಅನೇಕಸತಂ ಖತ್ತಿಯಪರಿಸಂ…ಪೇ॰… ತತ್ರ ವತ ಮಂ ಭಯಂ ವಾ ಸಾರಜ್ಜಂ ವಾ ಓಕ್ಕಮಿಸ್ಸತೀತಿ ನಿಮಿತ್ತಮೇತಂ, ಸಾರಿಪುತ್ತ, ನ ಸಮನುಪಸ್ಸಾಮೀ’’ತಿ (ಮ॰ ನಿ॰ ೧.೧೫೧) ವುತ್ತಾಸು ಅಟ್ಠಸು ಪರಿಸಾಸು। ಅಭೀತನಾದಂ ನದತೀತಿ ಪರತೋ ದಸ್ಸಿತಞಾಣಯೋಗೇನ ದಸಬಲೋಹನ್ತಿ ಅಭೀತನಾದಂ ನದತಿ। ಸೀಹನಾದಸುತ್ತೇನ ಖನ್ಧವಗ್ಗೇ (ಸಂ॰ ನಿ॰ ೩.೭೮) ಆಗತೇನ।
Aṭṭhasu parisāsūti ‘‘abhijānāmi kho panāhaṃ, sāriputta, anekasataṃ khattiyaparisaṃ…pe… tatra vata maṃ bhayaṃ vā sārajjaṃ vā okkamissatīti nimittametaṃ, sāriputta, na samanupassāmī’’ti (ma. ni. 1.151) vuttāsu aṭṭhasu parisāsu. Abhītanādaṃnadatīti parato dassitañāṇayogena dasabalohanti abhītanādaṃ nadati. Sīhanādasuttena khandhavagge (saṃ. ni. 3.78) āgatena.
‘‘ದೇವಮನುಸ್ಸಾನಂ ಚತುಚಕ್ಕಂ ವತ್ತತೀ’’ತಿ (ಅ॰ ನಿ॰ ೪.೩೧) ಸುತ್ತಸೇಸೇನ ಸಪ್ಪುರಿಸೂಪಸ್ಸಯಾದೀನಂ ಫಲಸಮ್ಪತ್ತಿಪವತ್ತಿ, ಪುರಿಮಸಪ್ಪುರಿಸೂಪಸ್ಸಯಾದಿಂ ಉಪನಿಸ್ಸಾಯ ಪಚ್ಛಿಮಸಪ್ಪುರಿಸೂಪಸ್ಸಯಾದೀನಂ ಸಮ್ಪತ್ತಿಪವತ್ತಿ ವಾ ವುತ್ತಾತಿ ಆದಿ-ಸದ್ದೇನ ತತ್ಥ ಚ ಚಕ್ಕ-ಸದ್ದಸ್ಸ ಗಹಣಂ ವೇದಿತಬ್ಬಂ। ವಿಚಕ್ಕಸಣ್ಠಾನಾ ಅಸನಿ ಏವ ಅಸನಿವಿಚಕ್ಕಂ। ಉರಚಕ್ಕಾದೀಸೂತಿ ಆದಿ-ಸದ್ದೇನ ಆಣಾಸಮೂಹಾದೀಸುಪಿ ಚಕ್ಕ-ಸದ್ದಸ್ಸ ಪವತ್ತಿ ವೇದಿತಬ್ಬಾ। ‘‘ಸಙ್ಘಭೇದಂ ಕರಿಸ್ಸಾಮ ಚಕ್ಕಭೇದ’’ನ್ತಿಆದೀಸು (ಪಾರಾ॰ ೪೦೯; ಚೂಳವ॰ ೩೪೩) ಹಿ ಆಣಾ ‘‘ಚಕ್ಕ’’ನ್ತಿ ವುತ್ತಾ, ‘‘ದೇವಚಕ್ಕಂ ಅಸುರಚಕ್ಕ’’ನ್ತಿಆದೀಸು (ಅ॰ ನಿ॰ ಟೀ॰ ೨.೪.೮) ಸಮೂಹೋತಿ। ಪಟಿವೇಧನಿಟ್ಠತ್ತಾ ಅರಹತ್ತಮಗ್ಗಞಾಣಂ ಪಟಿವೇಧೋತಿ ‘‘ಫಲಕ್ಖಣೇ ಉಪ್ಪನ್ನಂ ನಾಮಾ’’ತಿ ವುತ್ತಂ। ತೇನ ಪಟಿಲದ್ಧಸ್ಸಪಿ ದೇಸನಾಞಾಣಸ್ಸ ಕಿಚ್ಚನಿಪ್ಫತ್ತಿ ಪರಸ್ಸ ಬುಜ್ಝನಮತ್ತೇನ ಹೋತೀತಿ ‘‘ಅಞ್ಞಾತಕೋಣ್ಡಞ್ಞಸ್ಸ ಸೋತಾಪತ್ತಿ…ಪೇ॰… ಫಲಕ್ಖಣೇ ಪವತ್ತಂ ನಾಮಾ’’ತಿ ವುತ್ತಂ। ತತೋ ಪರಂ ಪನ ಯಾವ ಪರಿನಿಬ್ಬಾನಾ ದೇಸನಾಞಾಣಪ್ಪವತ್ತಿ ತಸ್ಸೇವ ಪವತ್ತಿತಸ್ಸ ಧಮ್ಮಚಕ್ಕಸ್ಸ ಠಾನನ್ತಿ ವೇದಿತಬ್ಬಂ ಪವತ್ತಿತಚಕ್ಕಸ್ಸ ಚಕ್ಕವತ್ತಿನೋ ಚಕ್ಕರತನಸ್ಸ ಠಾನಂ ವಿಯ।
‘‘Devamanussānaṃ catucakkaṃ vattatī’’ti (a. ni. 4.31) suttasesena sappurisūpassayādīnaṃ phalasampattipavatti, purimasappurisūpassayādiṃ upanissāya pacchimasappurisūpassayādīnaṃ sampattipavatti vā vuttāti ādi-saddena tattha ca cakka-saddassa gahaṇaṃ veditabbaṃ. Vicakkasaṇṭhānā asani eva asanivicakkaṃ. Uracakkādīsūti ādi-saddena āṇāsamūhādīsupi cakka-saddassa pavatti veditabbā. ‘‘Saṅghabhedaṃ karissāma cakkabheda’’ntiādīsu (pārā. 409; cūḷava. 343) hi āṇā ‘‘cakka’’nti vuttā, ‘‘devacakkaṃ asuracakka’’ntiādīsu (a. ni. ṭī. 2.4.8) samūhoti. Paṭivedhaniṭṭhattā arahattamaggañāṇaṃ paṭivedhoti ‘‘phalakkhaṇe uppannaṃ nāmā’’ti vuttaṃ. Tena paṭiladdhassapi desanāñāṇassa kiccanipphatti parassa bujjhanamattena hotīti ‘‘aññātakoṇḍaññassa sotāpatti…pe… phalakkhaṇe pavattaṃ nāmā’’ti vuttaṃ. Tato paraṃ pana yāva parinibbānā desanāñāṇappavatti tasseva pavattitassa dhammacakkassa ṭhānanti veditabbaṃ pavattitacakkassa cakkavattino cakkaratanassa ṭhānaṃ viya.
‘‘ತಿಟ್ಠತೀ’’ತಿ ವುತ್ತಂ, ಕಿಂ ಭೂಮಿಯಂ ಪುರಿಸೋ ವಿಯ? ನೋತಿ ಆಹ ‘‘ತದಾಯತ್ತವುತ್ತಿತಾಯಾ’’ತಿ। ಠಾನನ್ತಿ ಚೇತ್ಥ ಅತ್ತಲಾಭೋ ಧರಮಾನತಾ ಚ, ನ ಗತಿನಿವತ್ತೀತಿ ಆಹ ‘‘ಉಪ್ಪಜ್ಜತಿ ಚೇವ ಪವತ್ತತಿ ಚಾ’’ತಿ । ಯತ್ಥ ಪನೇತಂ ದಸಬಲಞಾಣಂ ವಿತ್ಥಾರಿತಂ, ತಂ ದಸ್ಸೇನ್ತೋ ‘‘ಅಭಿಧಮ್ಮೇ ಪನಾ’’ತಿಆದಿಮಾಹ। ಸೇಸೇಸುಪಿ ಏಸೇವ ನಯೋ।
‘‘Tiṭṭhatī’’ti vuttaṃ, kiṃ bhūmiyaṃ puriso viya? Noti āha ‘‘tadāyattavuttitāyā’’ti. Ṭhānanti cettha attalābho dharamānatā ca, na gatinivattīti āha ‘‘uppajjati ceva pavattati cā’’ti . Yattha panetaṃ dasabalañāṇaṃ vitthāritaṃ, taṃ dassento ‘‘abhidhamme panā’’tiādimāha. Sesesupi eseva nayo.
ಸಮಾದಿಯನ್ತೀತಿ ಸಮಾದಾನಾನಿ, ತಾನಿ ಪನ ಸಮಾದಿಯಿತ್ವಾ ಕತಾನಿ ಹೋನ್ತೀತಿ ಆಹ ‘‘ಸಮಾದಿಯಿತ್ವಾ ಕತಾನ’’ನ್ತಿ। ಕಮ್ಮಮೇವ ವಾ ಕಮ್ಮಸಮಾದಾನನ್ತಿ ಏತೇನ ಸಮಾದಾನಸದ್ದಸ್ಸ ಅಪುಬ್ಬತ್ಥಾಭಾವಂ ದಸ್ಸೇತಿ ಮುತ್ತಗತಸದ್ದೇ ಗತಸದ್ದಸ್ಸ ವಿಯ। ಗತೀತಿ ನಿರಯಾದಿಗತಿಯೋ। ಉಪಧೀತಿ ಅತ್ತಭಾವೋ। ಕಾಲೋತಿ ಕಮ್ಮಸ್ಸ ವಿಪಚ್ಚನಾರಹಕಾಲೋ। ಪಯೋಗೋತಿ ವಿಪಾಕುಪ್ಪತ್ತಿಯಾ ಪಚ್ಚಯಭೂತಾ ಕಿರಿಯಾ।
Samādiyantīti samādānāni, tāni pana samādiyitvā katāni hontīti āha ‘‘samādiyitvā katāna’’nti. Kammameva vā kammasamādānanti etena samādānasaddassa apubbatthābhāvaṃ dasseti muttagatasadde gatasaddassa viya. Gatīti nirayādigatiyo. Upadhīti attabhāvo. Kāloti kammassa vipaccanārahakālo. Payogoti vipākuppattiyā paccayabhūtā kiriyā.
ಅಗತಿಗಾಮಿನಿನ್ತಿ ನಿಬ್ಬಾನಗಾಮಿನಿಂ। ವಕ್ಖತಿ ಹಿ ‘‘ನಿಬ್ಬಾನಞ್ಚಾಹಂ, ಸಾರಿಪುತ್ತ, ಪಜಾನಾಮಿ ನಿಬ್ಬಾನಗಾಮಿಞ್ಚ ಮಗ್ಗಂ ನಿಬ್ಬಾನಗಾಮಿನಿಞ್ಚ ಪಟಿಪದ’’ನ್ತಿ (ಮ॰ ನಿ॰ ೧.೧೫೩)। ಬಹೂಸುಪಿ ಮನುಸ್ಸೇಸು ಏಕಮೇವ ಪಾಣಂ ಘಾತೇನ್ತೇಸು ಕಾಮಂ ಸಬ್ಬೇಸಂ ಚೇತನಾ ತಸ್ಸೇವೇಕಸ್ಸ ಜೀವಿತಿನ್ದ್ರಿಯಾರಮ್ಮಣಾ, ತಂ ಪನ ಕಮ್ಮಂ ತೇಸಂ ನಾನಾಕಾರಂ। ತೇಸು (ವಿಭ॰ ಅಟ್ಠ॰ ೮೧೧) ಹಿ ಏಕೋ ಆದರೇನ ಛನ್ದಜಾತೋ ಕರೋತಿ, ಏಕೋ ‘‘ಏಹಿ ತ್ವಮ್ಪಿ ಕರೋಹೀ’’ತಿ ಪರೇಹಿ ನಿಪ್ಪೀಳಿತೋ ಕರೋತಿ, ಏಕೋ ಸಮಾನಚ್ಛನ್ದೋ ವಿಯ ಹುತ್ವಾ ಅಪ್ಪಟಿಬಾಹಮಾನೋ ವಿಚರತಿ। ತೇಸು ಏಕೋ ತೇನೇವ ಕಮ್ಮೇನ ನಿರಯೇ ನಿಬ್ಬತ್ತತಿ, ಏಕೋ ತಿರಚ್ಛಾನಯೋನಿಯಂ, ಏಕೋ ಪೇತ್ತಿವಿಸಯೇ। ತಂ ತಥಾಗತೋ ಆಯೂಹನಕ್ಖಣೇ ಏವ – ‘‘ಇಮಿನಾ ನೀಹಾರೇನ ಆಯೂಹಿತತ್ತಾ ಏಸ ನಿರಯೇ ನಿಬ್ಬತ್ತಿಸ್ಸತಿ, ಏಸ ತಿರಚ್ಛಾನಯೋನಿಯಂ, ಏಸ ಪೇತ್ತಿವಿಸಯೇ’’ತಿ ಜಾನಾತಿ। ನಿರಯೇ ನಿಬ್ಬತ್ತಮಾನಮ್ಪಿ – ‘‘ಏಸ ಮಹಾನಿರಯೇ ನಿಬ್ಬತ್ತಿಸ್ಸತಿ, ಏಸ ಉಸ್ಸದನಿರಯೇ’’ತಿ ಜಾನಾತಿ। ತಿರಚ್ಛಾನಯೋನಿಯಂ ನಿಬ್ಬತ್ತಮಾನಮ್ಪಿ – ‘‘ಏಸ ಅಪಾದಕೋ ಭವಿಸ್ಸತಿ, ಏಸ ದ್ವಿಪಾದಕೋ, ಏಸ ಚತುಪ್ಪದೋ, ಏಸ ಬಹುಪ್ಪದೋ’’ತಿ ಜಾನಾತಿ। ಪೇತ್ತಿವಿಸಯೇ ನಿಬ್ಬತ್ತಮಾನಮ್ಪಿ – ‘‘ಏಸ ನಿಜ್ಝಾಮತಣ್ಹಿಕೋ ಭವಿಸ್ಸತಿ, ಏಸ ಖುಪ್ಪಿಪಾಸಿಕೋ, ಏಸ ಪರದತ್ತೂಪಜೀವೀ’’ತಿ ಜಾನಾತಿ। ತೇಸು ಚ ಕಮ್ಮೇಸು – ‘‘ಇದಂ ಕಮ್ಮಂ ಪಟಿಸನ್ಧಿಮಾಕಡ್ಢಿಸ್ಸತಿ, ಇದಂ ಅಞ್ಞೇನ ದಿನ್ನಾಯ ಪಟಿಸನ್ಧಿಯಾ ಉಪಧಿವೇಪಕ್ಕಂ ಭವಿಸ್ಸತೀ’’ತಿ ಜಾನಾತಿ।
Agatigāmininti nibbānagāminiṃ. Vakkhati hi ‘‘nibbānañcāhaṃ, sāriputta, pajānāmi nibbānagāmiñca maggaṃ nibbānagāminiñca paṭipada’’nti (ma. ni. 1.153). Bahūsupi manussesu ekameva pāṇaṃ ghātentesu kāmaṃ sabbesaṃ cetanā tassevekassa jīvitindriyārammaṇā, taṃ pana kammaṃ tesaṃ nānākāraṃ. Tesu (vibha. aṭṭha. 811) hi eko ādarena chandajāto karoti, eko ‘‘ehi tvampi karohī’’ti parehi nippīḷito karoti, eko samānacchando viya hutvā appaṭibāhamāno vicarati. Tesu eko teneva kammena niraye nibbattati, eko tiracchānayoniyaṃ, eko pettivisaye. Taṃ tathāgato āyūhanakkhaṇe eva – ‘‘iminā nīhārena āyūhitattā esa niraye nibbattissati, esa tiracchānayoniyaṃ, esa pettivisaye’’ti jānāti. Niraye nibbattamānampi – ‘‘esa mahāniraye nibbattissati, esa ussadaniraye’’ti jānāti. Tiracchānayoniyaṃ nibbattamānampi – ‘‘esa apādako bhavissati, esa dvipādako, esa catuppado, esa bahuppado’’ti jānāti. Pettivisaye nibbattamānampi – ‘‘esa nijjhāmataṇhiko bhavissati, esa khuppipāsiko, esa paradattūpajīvī’’ti jānāti. Tesu ca kammesu – ‘‘idaṃ kammaṃ paṭisandhimākaḍḍhissati, idaṃ aññena dinnāya paṭisandhiyā upadhivepakkaṃ bhavissatī’’ti jānāti.
ತಥಾ ಸಕಲಗಾಮವಾಸಿಕೇಸು ಏಕತೋ ಪಿಣ್ಡಪಾತಂ ದದಮಾನೇಸು ಕಾಮಂ ಸಬ್ಬೇಸಮ್ಪಿ ಚೇತನಾ ಪಿಣ್ಡಪಾತಾರಮ್ಮಣಾವ, ತಂ ಪನ ಕಮ್ಮಂ ತೇಸಂ ನಾನಾಕಾರಂ। ತೇಸು ಹಿ ಏಕೋ ಆದರೇನ ಕರೋತೀತಿ ಸೇಸಂ ಪುರಿಮಸದಿಸಂ, ತಸ್ಮಾ ತೇಸು ಕೇಚಿ ದೇವಲೋಕೇ ನಿಬ್ಬತ್ತನ್ತಿ, ಕೇಚಿ ಮನುಸ್ಸಲೋಕೇ, ತಂ ತಥಾಗತೋ ಆಯೂಹನಕ್ಖಣೇಯೇವ ಜಾನಾತಿ – ‘‘ಇಮಿನಾ ನೀಹಾರೇನ ಆಯೂಹಿತತ್ತಾ ಏಸ ಮನುಸ್ಸಲೋಕೇ ನಿಬ್ಬತ್ತಿಸ್ಸತಿ, ಏಸ ದೇವಲೋಕೇ, ತತ್ಥಾಪಿ ಏಸ ಖತ್ತಿಯಕುಲೇ, ಏಸ ಬ್ರಾಹ್ಮಣಕುಲೇ, ಏಸ ವೇಸ್ಸಕುಲೇ, ಏಸ ಸುದ್ದಕುಲೇ, ಏಸ ಪರನಿಮ್ಮಿತವಸವತ್ತೀಸು, ಏಸ ನಿಮ್ಮಾನರತೀಸು, ಏಸ ತುಸಿತೇಸು, ಏಸ ಯಾಮೇಸು, ಏಸ ತಾವತಿಂಸೇಸು, ಏಸ ಚಾತುಮಹಾರಾಜಿಕೇಸು, ಏಸ ಭುಮ್ಮದೇವೇಸೂ’’ತಿಆದಿನಾ ತತ್ಥ ತತ್ಥ ಹೀನಪಣೀತಸುವಣ್ಣದುಬ್ಬಣ್ಣಅಪ್ಪಪರಿವಾರಮಹಾಪರಿವಾರತಾದಿಭೇದಂ ತಂ ತಂ ವಿಸೇಸಂ ಆಯೂಹನಕ್ಖಣೇಯೇವ ಜಾನಾತಿ।
Tathā sakalagāmavāsikesu ekato piṇḍapātaṃ dadamānesu kāmaṃ sabbesampi cetanā piṇḍapātārammaṇāva, taṃ pana kammaṃ tesaṃ nānākāraṃ. Tesu hi eko ādarena karotīti sesaṃ purimasadisaṃ, tasmā tesu keci devaloke nibbattanti, keci manussaloke, taṃ tathāgato āyūhanakkhaṇeyeva jānāti – ‘‘iminā nīhārena āyūhitattā esa manussaloke nibbattissati, esa devaloke, tatthāpi esa khattiyakule, esa brāhmaṇakule, esa vessakule, esa suddakule, esa paranimmitavasavattīsu, esa nimmānaratīsu, esa tusitesu, esa yāmesu, esa tāvatiṃsesu, esa cātumahārājikesu, esa bhummadevesū’’tiādinā tattha tattha hīnapaṇītasuvaṇṇadubbaṇṇaappaparivāramahāparivāratādibhedaṃ taṃ taṃ visesaṃ āyūhanakkhaṇeyeva jānāti.
ತಥಾ ವಿಪಸ್ಸನಂ ಪಟ್ಠಪೇನ್ತೇಸುಯೇವ – ‘‘ಇಮಿನಾ ನೀಹಾರೇನ ಏಸ ಕಿಞ್ಚಿ ಸಲ್ಲಕ್ಖೇತುಂ ನ ಸಕ್ಖಿಸ್ಸತಿ, ಏಸ ಮಹಾಭೂತಮತ್ತಮೇವ ವವತ್ಥಪೇಸ್ಸತಿ, ಏಸ ರೂಪಪರಿಗ್ಗಹೇಯೇವ ಠಸ್ಸತಿ, ಏಸ ಅರೂಪಪರಿಗ್ಗಹೇಯೇವ, ಏಸ ನಾಮರೂಪಪರಿಗ್ಗಹೇಯೇವ , ಏಸ ಪಚ್ಚಯಪರಿಗ್ಗಹೇ ಏವ, ಏಸ ಲಕ್ಖಣಾರಮ್ಮಣಿಕವಿಪಸ್ಸನಾಯ ಏವ, ಏಸ ಪಠಮಫಲೇಯೇವ, ಏಸ ದುತಿಯಫಲೇ ಏವ, ಏಸ ತತಿಯಫಲೇ ಏವ, ಏಸ ಅರಹತ್ತಂ ಪಾಪುಣಿಸ್ಸತೀ’’ತಿ ಜಾನಾತಿ। ಕಸಿಣಪರಿಕಮ್ಮಂ ಕರೋನ್ತೇಸುಪಿ – ‘‘ಇಮಸ್ಸ ಪರಿಕಮ್ಮಮತ್ತಮೇವ ಭವಿಸ್ಸತಿ, ಏಸ ನಿಮಿತ್ತಂ ಉಪ್ಪಾದೇಸ್ಸತಿ, ಏಸ ಅಪ್ಪನಂ ಏವ ಪಾಪುಣಿಸ್ಸತಿ, ಏಸ ಝಾನಂ ಪಾದಕಂ ಕತ್ವಾ ವಿಪಸ್ಸನಂ ಪಟ್ಠಪೇತ್ವಾ ಅರಹತ್ತಂ ಗಣ್ಹಿಸ್ಸತೀ’’ತಿ ಜಾನಾತಿ। ತೇನಾಹ ‘‘ಇಮಸ್ಸ ಚೇತನಾ’’ತಿಆದಿ।
Tathā vipassanaṃ paṭṭhapentesuyeva – ‘‘iminā nīhārena esa kiñci sallakkhetuṃ na sakkhissati, esa mahābhūtamattameva vavatthapessati, esa rūpapariggaheyeva ṭhassati, esa arūpapariggaheyeva, esa nāmarūpapariggaheyeva , esa paccayapariggahe eva, esa lakkhaṇārammaṇikavipassanāya eva, esa paṭhamaphaleyeva, esa dutiyaphale eva, esa tatiyaphale eva, esa arahattaṃ pāpuṇissatī’’ti jānāti. Kasiṇaparikammaṃ karontesupi – ‘‘imassa parikammamattameva bhavissati, esa nimittaṃ uppādessati, esa appanaṃ eva pāpuṇissati, esa jhānaṃ pādakaṃ katvā vipassanaṃ paṭṭhapetvā arahattaṃ gaṇhissatī’’ti jānāti. Tenāha ‘‘imassa cetanā’’tiādi.
ಕಾಮನತೋ, ಕಾಮೇತಬ್ಬತೋ, ಕಾಮಪಟಿಸಂಯುತ್ತತೋ ಚ ಕಾಮೋ ಧಾತು ಕಾಮಧಾತು। ಆದಿ-ಸದ್ದೇನ ಬ್ಯಾಪಾದಧಾತು-ರೂಪಧಾತು-ಆದೀನಂ ಸಙ್ಗಹೋ। ವಿಲಕ್ಖಣತಾಯಾತಿ ವಿಸದಿಸಸಭಾವತಾಯ। ಖನ್ಧಾಯತನಧಾತುಲೋಕನ್ತಿ ಅನೇಕಧಾತುಂ ನಾನಾಧಾತುಂ ಖನ್ಧಲೋಕಂ ಆಯತನಲೋಕಂ ಧಾತುಲೋಕಂ ಯಥಾಭೂತಂ ಪಜಾನಾತೀತಿ ಯೋಜನಾ। ‘‘ಅಯಂ ರೂಪಕ್ಖನ್ಧೋ ನಾಮ…ಪೇ॰… ಅಯಂ ವಿಞ್ಞಾಣಕ್ಖನ್ಧೋ ನಾಮ। ತೇಸುಪಿ ಏಕವಿಧೇನ ರೂಪಕ್ಖನ್ಧೋ, ಏಕಾದಸವಿಧೇನ ರೂಪಕ್ಖನ್ಧೋ (ವಿಭ॰ ೩೩)। ಏಕವಿಧೇನ ವೇದನಾಕ್ಖನ್ಧೋ, ಬಹುವಿಧೇನ ವೇದನಾಕ್ಖನ್ಧೋ (ವಿಭ॰ ೩೪-೬೧)। ಏಕವಿಧೇನ ಸಞ್ಞಾಕ್ಖನ್ಧೋ, ಬಹುವಿಧೇನ ಸಞ್ಞಾಕ್ಖನ್ಧೋ (ವಿಭ॰ ೬೨-೯೧)। ಏಕವಿಧೇನ ಸಙ್ಖಾರಕ್ಖನ್ಧೋ, ಬಹುವಿಧೇನ ಸಙ್ಖಾರಕ್ಖನ್ಧೋ (ವಿಭ॰ ೯೨-೧೨೦)। ಏಕವಿಧೇನ ವಿಞ್ಞಾಣಕ್ಖನ್ಧೋ, ಬಹುವಿಧೇನ ವಿಞ್ಞಾಣಕ್ಖನ್ಧೋ’’ತಿ (ವಿಭ॰ ೧೨೧-೧೪೯) ಏವಂ ತಾವ ಖನ್ಧಲೋಕಸ್ಸ, ‘‘ಇದಂ ಚಕ್ಖಾಯತನಂ ನಾಮ…ಪೇ॰… ಇದಂ ಧಮ್ಮಾಯತನಂ ನಾಮ। ತತ್ಥ ದಸಾಯತನಾ ಕಾಮಾವಚರಾ, ದ್ವೇ ಚಾತುಭೂಮಕಾ’’ತಿಆದಿನಾ (ವಿಭ॰ ೧೫೬-೧೭೧) ಆಯತನಲೋಕಸ್ಸ, ‘‘ಅಯಂ ಚಕ್ಖುಧಾತು ನಾಮ…ಪೇ॰… ಅಯಂ ಮನೋವಿಞ್ಞಾಣಧಾತು ನಾಮ, ತತ್ಥ ಸೋಳಸ ಧಾತುಯೋ ಕಾಮಾವಚರಾ, ದ್ವೇ ಚಾತುಭೂಮಕಾ’’ತಿಆದಿನಾ (ವಿಭ॰ ೧೭೨-೧೮೮) ಧಾತುಲೋಕಸ್ಸ ಅನೇಕಸಭಾವಂ ನಾನಾಸಭಾವಞ್ಚ ಪಜಾನಾತಿ। ನ ಕೇವಲಂ ಉಪಾದಿನ್ನಕಸಙ್ಖಾರಲೋಕಸ್ಸೇವ, ಅಥ ಖೋ ಅನುಪಾದಿನ್ನಕಸಙ್ಖಾರಲೋಕಸ್ಸಪಿ – ‘‘ಇಮಾಯ ನಾಮ ಧಾತುಯಾ ಉಸ್ಸನ್ನತ್ತಾ ಇಮಸ್ಸ ರುಕ್ಖಸ್ಸ ಖನ್ಧೋ ಸೇತೋ, ಇಮಸ್ಸ ಕಾಳೋ, ಇಮಸ್ಸ ಮಟ್ಠೋ, ಇಮಸ್ಸ ಸಕಣ್ಟಕೋ, ಇಮಸ್ಸ ಬಹಲತ್ತಚೋ, ಇಮಸ್ಸ ತನುತ್ತಚೋ, ಇಮಸ್ಸ ಪತ್ತಂ ವಣ್ಣಸಣ್ಠಾನಾದಿವಸೇನ ಏವರೂಪಂ, ಇಮಸ್ಸ ಪುಪ್ಫಂ ನೀಲಂ ಪೀತಂ ಲೋಹಿತಂ ಓದಾತಂ ಸುಗನ್ಧಂ ದುಗ್ಗನ್ಧಂ, ಇಮಸ್ಸ ಫಲಂ ಖುದ್ದಕಂ ಮಹನ್ತಂ ದೀಘಂ ರಸ್ಸಂ ವಟ್ಟಂ ಸುಸಣ್ಠಾನಂ ದುಸ್ಸಣ್ಠಾನಂ ಮುದುಕಂ ಫರುಸಂ ಸುಗನ್ಧಂ ದುಗ್ಗನ್ಧಂ ಮಧುರಂ ತಿತ್ತಕಂ ಕಟುಕಂ ಅಮ್ಬಿಲಂ ಕಸಾವಂ, ಇಮಸ್ಸ ಕಣ್ಟಕೋ ತಿಖಿಣೋ ಕುಣ್ಠೋ ಉಜುಕೋ ಕುಟಿಲೋ ತಮ್ಬೋ ಕಾಳೋ ಓದಾತೋ ಹೋತೀ’’ತಿಆದಿನಾ ಪಜಾನಾತಿ। ಸಬ್ಬಞ್ಞುಬುದ್ಧಾದೀನಂ ಏವ ಹಿ ಏತಂ ಬಲಂ, ನ ಅಞ್ಞೇಸಂ।
Kāmanato, kāmetabbato, kāmapaṭisaṃyuttato ca kāmo dhātu kāmadhātu. Ādi-saddena byāpādadhātu-rūpadhātu-ādīnaṃ saṅgaho. Vilakkhaṇatāyāti visadisasabhāvatāya. Khandhāyatanadhātulokanti anekadhātuṃ nānādhātuṃ khandhalokaṃ āyatanalokaṃ dhātulokaṃ yathābhūtaṃ pajānātīti yojanā. ‘‘Ayaṃ rūpakkhandho nāma…pe… ayaṃ viññāṇakkhandho nāma. Tesupi ekavidhena rūpakkhandho, ekādasavidhena rūpakkhandho (vibha. 33). Ekavidhena vedanākkhandho, bahuvidhena vedanākkhandho (vibha. 34-61). Ekavidhena saññākkhandho, bahuvidhena saññākkhandho (vibha. 62-91). Ekavidhena saṅkhārakkhandho, bahuvidhena saṅkhārakkhandho (vibha. 92-120). Ekavidhena viññāṇakkhandho, bahuvidhena viññāṇakkhandho’’ti (vibha. 121-149) evaṃ tāva khandhalokassa, ‘‘idaṃ cakkhāyatanaṃ nāma…pe… idaṃ dhammāyatanaṃ nāma. Tattha dasāyatanā kāmāvacarā, dve cātubhūmakā’’tiādinā (vibha. 156-171) āyatanalokassa, ‘‘ayaṃ cakkhudhātu nāma…pe… ayaṃ manoviññāṇadhātu nāma, tattha soḷasa dhātuyo kāmāvacarā, dve cātubhūmakā’’tiādinā (vibha. 172-188) dhātulokassa anekasabhāvaṃ nānāsabhāvañca pajānāti. Na kevalaṃ upādinnakasaṅkhāralokasseva, atha kho anupādinnakasaṅkhāralokassapi – ‘‘imāya nāma dhātuyā ussannattā imassa rukkhassa khandho seto, imassa kāḷo, imassa maṭṭho, imassa sakaṇṭako, imassa bahalattaco, imassa tanuttaco, imassa pattaṃ vaṇṇasaṇṭhānādivasena evarūpaṃ, imassa pupphaṃ nīlaṃ pītaṃ lohitaṃ odātaṃ sugandhaṃ duggandhaṃ, imassa phalaṃ khuddakaṃ mahantaṃ dīghaṃ rassaṃ vaṭṭaṃ susaṇṭhānaṃ dussaṇṭhānaṃ mudukaṃ pharusaṃ sugandhaṃ duggandhaṃ madhuraṃ tittakaṃ kaṭukaṃ ambilaṃ kasāvaṃ, imassa kaṇṭako tikhiṇo kuṇṭho ujuko kuṭilo tambo kāḷo odāto hotī’’tiādinā pajānāti. Sabbaññubuddhādīnaṃ eva hi etaṃ balaṃ, na aññesaṃ.
ನಾನಾಧಿಮುತ್ತಿಕತನ್ತಿ ನಾನಾಅಜ್ಝಾಸಯತಂ। ಅಧಿಮುತ್ತಿ ನಾಮ ಅಜ್ಝಾಸಯಧಾತು ಅಜ್ಝಾಸಯಸಭಾವೋ। ಸೋ ಪನ ಹೀನಪಣೀತತಾಸಾಮಞ್ಞೇನ ಪಾಳಿಯಂ ದ್ವಿಧಾವ ವುತ್ತೋಪಿ ಹೀನಪಣೀತಾದಿಭೇದೇನ ಅನೇಕವಿಧೋತಿ ಆಹ ‘‘ಹೀನಾದೀಹಿ ಅಧಿಮುತ್ತೀಹಿ ನಾನಾಧಿಮುತ್ತಿಕಭಾವ’’ನ್ತಿ। ತತ್ಥ ತತ್ಥ ಯೇ ಯೇ ಸತ್ತಾ ಯಂಯಂಅಧಿಮುತ್ತಿಕಾ, ತೇ ತೇ ತಂತದಧಿಮುತ್ತಿಕೇ ಏವ ಸೇವನ್ತಿ ಭಜನ್ತಿ ಪಯಿರುಪಾಸನ್ತಿ ಧಾತುಸಭಾಗತೋ। ಯಥಾ ಗೂಥಾದೀನಂ ಧಾತುಸಭಾವೋ ಏಸೋ, ಯಂ ಗೂಥಾದೀಹಿ ಏವ ಸಂಸನ್ದನ್ತಿ ಸಮೇನ್ತಿ, ಏವಂ (ಪುಗ್ಗಲಾನಂ ಅಜ್ಝಾಸಯಸ್ಸೇವೇಸ ಸಭಾವೋ, ಯಂ) (ವಿಭ॰ ಮೂಲಟೀ॰ ೮೧೩) ಹೀನಜ್ಝಾಸಯಾ ದುಸ್ಸೀಲಾದೀಹಿ ಏವ ಸಂಸನ್ದನ್ತಿ ಸಮೇನ್ತಿ, ಸಮ್ಪನ್ನಸೀಲಾದಯೋ ಚ ಸಮ್ಪನ್ನಸೀಲಾದೀಹೇವ। ತಂ ನೇಸಂ ನಾನಾಧಿಮುತ್ತಿಕತಂ ಭಗವಾ ಯಥಾಭೂತಂ ಪಜಾನಾತೀತಿ।
Nānādhimuttikatanti nānāajjhāsayataṃ. Adhimutti nāma ajjhāsayadhātu ajjhāsayasabhāvo. So pana hīnapaṇītatāsāmaññena pāḷiyaṃ dvidhāva vuttopi hīnapaṇītādibhedena anekavidhoti āha ‘‘hīnādīhi adhimuttīhi nānādhimuttikabhāva’’nti. Tattha tattha ye ye sattā yaṃyaṃadhimuttikā, te te taṃtadadhimuttike eva sevanti bhajanti payirupāsanti dhātusabhāgato. Yathā gūthādīnaṃ dhātusabhāvo eso, yaṃ gūthādīhi eva saṃsandanti samenti, evaṃ (puggalānaṃ ajjhāsayassevesa sabhāvo, yaṃ) (vibha. mūlaṭī. 813) hīnajjhāsayā dussīlādīhi eva saṃsandanti samenti, sampannasīlādayo ca sampannasīlādīheva. Taṃ nesaṃ nānādhimuttikataṃ bhagavā yathābhūtaṃ pajānātīti.
ವುದ್ಧಿಞ್ಚ ಹಾನಿಞ್ಚಾತಿ ಪಚ್ಚಯವಿಸೇಸೇನ ಸಾಮತ್ಥಿಯತೋ ಅಧಿಕತಂ ಅನಧಿಕತಞ್ಚ। ಇನ್ದ್ರಿಯಪರೋಪರಿಯತ್ತಞಾಣನಿದ್ದೇಸೇ (ವಿಭ॰ ೮೧೪; ಪಟಿ॰ ಮ॰ ೧.೧೧೩) ‘‘ಆಸಯಂ ಜಾನಾತಿ ಅನುಸಯಂ ಜಾನಾತೀ’’ತಿ ಆಸಯಾದಿಜಾನನಂ ಕಸ್ಮಾ ನಿದ್ದಿಟ್ಠನ್ತಿ? ಆಸಯಜಾನನಾದಿನಾ ಯೇಹಿ ಇನ್ದ್ರಿಯೇಹಿ ಪರೋಪರೇಹಿ ಸತ್ತಾ ಕಲ್ಯಾಣಪಾಪಾಸಯಾದಿಕಾ ಹೋನ್ತಿ, ತೇಸಂ ಜಾನನಸ್ಸ ವಿಭಾವನತೋ। ಏವಞ್ಚ ಕತ್ವಾ ಇನ್ದ್ರಿಯಪರೋಪರಿಯತ್ತಆಸಯಾನುಸಯಞಾಣಾನಂ ವಿಸುಂ ಅಸಾಧಾರಣತಾ, ಇನ್ದ್ರಿಯಪರೋಪರಿಯತ್ತನಾನಾಧಿಮುತ್ತಿಕತಾಞಾಣಾನಂ ವಿಸುಂ ಬಲತಾ ಚ ಸಿದ್ಧಾ ಹೋತಿ। ತತ್ಥ ಆಸಯನ್ತಿ ಯತ್ಥ ಸತ್ತಾ ನಿವಸನ್ತಿ, ತಂ ತೇಸಂ ನಿವಾಸಟ್ಠಾನಂ ದಿಟ್ಠಿಗತಂ ವಾ ಯಥಾಭೂತಞಾಣಂ ವಾ ಆಸಯೋ। ಅನುಸಯೋ ಅಪ್ಪಹೀನಭಾವೇನ ಥಾಮಗತೋ ಕಿಲೇಸೋ। ತಂ ಪನ ಭಗವಾ ಸತ್ತಾನಂ ಆಸಯಂ ಜಾನನ್ತೋ ತೇಸಂ ತೇಸಂ ದಿಟ್ಠಿಗತಾನಂ, ವಿಪಸ್ಸನಾಮಗ್ಗಞಾಣಾನಞ್ಚ ಅಪ್ಪವತ್ತಿಕ್ಖಣೇಪಿ ಜಾನಾತಿ। ವುತ್ತಂ ಹೇತಂ –
Vuddhiñca hāniñcāti paccayavisesena sāmatthiyato adhikataṃ anadhikatañca. Indriyaparopariyattañāṇaniddese (vibha. 814; paṭi. ma. 1.113) ‘‘āsayaṃ jānāti anusayaṃ jānātī’’ti āsayādijānanaṃ kasmā niddiṭṭhanti? Āsayajānanādinā yehi indriyehi paroparehi sattā kalyāṇapāpāsayādikā honti, tesaṃ jānanassa vibhāvanato. Evañca katvā indriyaparopariyattaāsayānusayañāṇānaṃ visuṃ asādhāraṇatā, indriyaparopariyattanānādhimuttikatāñāṇānaṃ visuṃ balatā ca siddhā hoti. Tattha āsayanti yattha sattā nivasanti, taṃ tesaṃ nivāsaṭṭhānaṃ diṭṭhigataṃ vā yathābhūtañāṇaṃ vā āsayo.Anusayo appahīnabhāvena thāmagato kileso. Taṃ pana bhagavā sattānaṃ āsayaṃ jānanto tesaṃ tesaṃ diṭṭhigatānaṃ, vipassanāmaggañāṇānañca appavattikkhaṇepi jānāti. Vuttaṃ hetaṃ –
‘‘ಕಾಮಂ ಸೇವನ್ತಂಯೇವ ಭಗವಾ ಜಾನಾತಿ ‘ಅಯಂ ಪುಗ್ಗಲೋ ಕಾಮಗರುಕೋ ಕಾಮಾಸಯೋ ಕಾಮಾಧಿಮುತ್ತೋ’ತಿ। ಕಾಮಂ ಸೇವನ್ತಞ್ಞೇವ ಜಾನಾತಿ ‘ಅಯಂ ಪುಗ್ಗಲೋ ನೇಕ್ಖಮ್ಮಗರುಕೋ ನೇಕ್ಖಮ್ಮಾಸಯೋ ನೇಕ್ಖಮ್ಮಾಧಿಮುತ್ತೋ’ತಿ। ನೇಕ್ಖಮ್ಮಂ ಸೇವನ್ತಞ್ಞೇವ ಜಾನಾತಿ। ಬ್ಯಾಪಾದಂ, ಅಬ್ಯಾಪಾದಂ, ಥಿನಮಿದ್ಧಂ, ಆಲೋಕಸಞ್ಞಂ ಸೇವನ್ತಂಯೇವ ಜಾನಾತಿ ‘ಅಯಂ ಪುಗ್ಗಲೋ ಥಿನಮಿದ್ಧಗರುಕೋ ಥಿನಮಿದ್ಧಾಸಯೋ ಥಿನಮಿದ್ಧಾಧಿಮುತ್ತೋ’ತಿ’’ (ಪಟಿ॰ ಮ॰ ೧.೧೧೩)।
‘‘Kāmaṃ sevantaṃyeva bhagavā jānāti ‘ayaṃ puggalo kāmagaruko kāmāsayo kāmādhimutto’ti. Kāmaṃ sevantaññeva jānāti ‘ayaṃ puggalo nekkhammagaruko nekkhammāsayo nekkhammādhimutto’ti. Nekkhammaṃ sevantaññeva jānāti. Byāpādaṃ, abyāpādaṃ, thinamiddhaṃ, ālokasaññaṃ sevantaṃyeva jānāti ‘ayaṃ puggalo thinamiddhagaruko thinamiddhāsayo thinamiddhādhimutto’ti’’ (paṭi. ma. 1.113).
ಪಠಮಾದೀನಂ ಚತುನ್ನಂ ಝಾನಾನನ್ತಿ ರೂಪಾವಚರಾನಂ ಪಠಮಾದೀನಂ ಪಚ್ಚನೀಕಝಾಪನಟ್ಠೇನ ಆರಮ್ಮಣೂಪನಿಜ್ಝಾನಟ್ಠೇನ ಚ ಝಾನಾನಂ। ಚತುಕ್ಕನಯೇನ ಹೇತಂ ವುತ್ತಂ। ಅಟ್ಠನ್ನಂ ವಿಮೋಕ್ಖಾನನ್ತಿ ಏತ್ಥ ಪಟಿಪಾಟಿಯಾ ಸತ್ತ ಅಪ್ಪಿತಪ್ಪಿತಕ್ಖಣೇ ಪಚ್ಚನೀಕಧಮ್ಮೇಹಿ ವಿಮುಚ್ಚನತೋ ಆರಮ್ಮಣೇ ಚ ಅಧಿಮುಚ್ಚನತೋ ವಿಮೋಕ್ಖಾ ನಾಮ, ಅಟ್ಠಮೋ ಪನ ಸಬ್ಬಸೋ ಸಞ್ಞಾವೇದಯಿತೇಹಿ ವಿಮುತ್ತತ್ತಾ ಅಪಗಮವಿಮೋಕ್ಖೋ ನಾಮ। ಚತುಕ್ಕನಯಪಞ್ಚಕನಯೇಸು ಪಠಮಝಾನಸಮಾಧಿ ಸವಿತಕ್ಕಸವಿಚಾರೋ ನಾಮ, ಪಞ್ಚಕನಯೇ ದುತಿಯಜ್ಝಾನಸಮಾಧಿ ಅವಿತಕ್ಕವಿಚಾರಮತ್ತೋ, ನಯದ್ವಯೇಪಿ ಉಪರಿ ತೀಸು ಝಾನೇಸು ಸಮಾಧಿ ಅವಿತಕ್ಕಅವಿಚಾರೋ, ಸಮಾಪತ್ತೀಸು ಪಟಿಪಾಟಿಯಾ ಅಟ್ಠನ್ನಂ ಸಮಾಧೀತಿಪಿ ನಾಮಂ, ಸಮಾಪತ್ತೀತಿಪಿ ಚಿತ್ತೇಕಗ್ಗತಾಸಬ್ಭಾವತೋ, ನಿರೋಧಸಮಾಪತ್ತಿಯಾ ತದಭಾವತೋ ನ ಸಮಾಧೀತಿ ನಾಮಂ। ಹಾನಭಾಗಿಯಧಮ್ಮನ್ತಿ ಅಪ್ಪಗುಣೇಹಿ ಪಠಮಜ್ಝಾನಾದೀಹಿ ವುಟ್ಠಿತಸ್ಸ ಸಞ್ಞಾಮನಸಿಕಾರಾನಂ ಕಾಮಾದಿಅನುಪಕ್ಖನ್ದನಂ। ವಿಸೇಸಭಾಗಿಯಧಮ್ಮನ್ತಿ ಪಗುಣೇಹಿ ಪಠಮಜ್ಝಾನಾದೀಹಿ ವುಟ್ಠಿತಸ್ಸ ಸಞ್ಞಾಮನಸಿಕಾರಾನಂ ದುತಿಯಜ್ಝಾನಾದಿಪಕ್ಖನ್ದನಂ। ಇತಿ ಸಞ್ಞಾಮನಸಿಕಾರಾನಂ ಕಾಮಾದಿದುತಿಯಜ್ಝಾನಾದಿಪಕ್ಖನ್ದನಾನಿ ಹಾನಭಾಗಿಯವಿಸೇಸಭಾಗಿಯಧಮ್ಮಾತಿ ದಸ್ಸಿತಾನಿ, ತೇಹಿ ಪನ ಝಾನಾನಂ ತಂಸಭಾವತಾ ಧಮ್ಮ-ಸದ್ದೇನ ವುತ್ತಾ। ತಸ್ಮಾತಿ ವುತ್ತಮೇವತ್ಥಂ ಹೇತುಭಾವೇನ ಪಚ್ಚಾಮಸತಿ। ವೋದಾನನ್ತಿ ಪಗುಣತಾಸಙ್ಖಾತಂ ವೋದಾನಂ। ತಞ್ಹಿ ಪಠಮಜ್ಝಾನಾದೀಹಿ ವುಟ್ಠಹಿತ್ವಾ ದುತಿಯಜ್ಝಾನಾದಿಅಧಿಗಮಸ್ಸ ಪಚ್ಚಯತ್ತಾ ‘‘ವುಟ್ಠಾನ’’ನ್ತಿ ವುತ್ತಂ। ಯೇ (ಅ॰ ನಿ॰ ಟೀ॰ ೩.೧೦.೨೧) ಪನ ‘‘ನಿರೋಧತೋ ಫಲಸಮಾಪತ್ತಿಯಾ ವುಟ್ಠಾನನ್ತಿ ಪಾಳಿ ನತ್ಥೀ’’ತಿ ವದನ್ತಿ, ತೇ ‘‘ನಿರೋಧಾ ವುಟ್ಠಹನ್ತಸ್ಸ ನೇವಸಞ್ಞಾನಾಸಞ್ಞಾಯತನಂ ಫಲಸಮಾಪತ್ತಿಯಾ ಅನನ್ತರಪಚ್ಚಯೇನ ಪಚ್ಚಯೋ’’ತಿ ಇಮಾಯ ಪಾಳಿಯಾ (ಪಟ್ಠಾ॰ ೧.೧.೪೧೭) ಪಟಿಸೇಧೇತಬ್ಬಾ। ಯೋ ಸಮಾಪತ್ತಿಲಾಭೀ ಸಮಾನೋ ಏವ ‘‘ನ ಲಭಾಮಹ’’ನ್ತಿ, ಕಮ್ಮಟ್ಠಾನಂ ಸಮಾನಂ ಏವ ‘‘ನ ಕಮ್ಮಟ್ಠಾನ’’ನ್ತಿ ಸಞ್ಞೀ ಹೋತಿ, ಸೋ ಸಮ್ಪತ್ತಿಂಯೇವ ಸಮಾನಂ ‘‘ವಿಪತ್ತೀ’’ತಿ ಪಚ್ಚೇತೀತಿ ವೇದಿತಬ್ಬೋ।
Paṭhamādīnaṃ catunnaṃ jhānānanti rūpāvacarānaṃ paṭhamādīnaṃ paccanīkajhāpanaṭṭhena ārammaṇūpanijjhānaṭṭhena ca jhānānaṃ. Catukkanayena hetaṃ vuttaṃ. Aṭṭhannaṃ vimokkhānanti ettha paṭipāṭiyā satta appitappitakkhaṇe paccanīkadhammehi vimuccanato ārammaṇe ca adhimuccanato vimokkhā nāma, aṭṭhamo pana sabbaso saññāvedayitehi vimuttattā apagamavimokkho nāma. Catukkanayapañcakanayesu paṭhamajhānasamādhi savitakkasavicāro nāma, pañcakanaye dutiyajjhānasamādhi avitakkavicāramatto, nayadvayepi upari tīsu jhānesu samādhi avitakkaavicāro, samāpattīsu paṭipāṭiyā aṭṭhannaṃ samādhītipi nāmaṃ, samāpattītipi cittekaggatāsabbhāvato, nirodhasamāpattiyā tadabhāvato na samādhīti nāmaṃ. Hānabhāgiyadhammanti appaguṇehi paṭhamajjhānādīhi vuṭṭhitassa saññāmanasikārānaṃ kāmādianupakkhandanaṃ. Visesabhāgiyadhammanti paguṇehi paṭhamajjhānādīhi vuṭṭhitassa saññāmanasikārānaṃ dutiyajjhānādipakkhandanaṃ. Iti saññāmanasikārānaṃ kāmādidutiyajjhānādipakkhandanāni hānabhāgiyavisesabhāgiyadhammāti dassitāni, tehi pana jhānānaṃ taṃsabhāvatā dhamma-saddena vuttā. Tasmāti vuttamevatthaṃ hetubhāvena paccāmasati. Vodānanti paguṇatāsaṅkhātaṃ vodānaṃ. Tañhi paṭhamajjhānādīhi vuṭṭhahitvā dutiyajjhānādiadhigamassa paccayattā ‘‘vuṭṭhāna’’nti vuttaṃ. Ye (a. ni. ṭī. 3.10.21) pana ‘‘nirodhato phalasamāpattiyā vuṭṭhānanti pāḷi natthī’’ti vadanti, te ‘‘nirodhā vuṭṭhahantassa nevasaññānāsaññāyatanaṃ phalasamāpattiyā anantarapaccayena paccayo’’ti imāya pāḷiyā (paṭṭhā. 1.1.417) paṭisedhetabbā. Yo samāpattilābhī samāno eva ‘‘na labhāmaha’’nti, kammaṭṭhānaṃ samānaṃ eva ‘‘na kammaṭṭhāna’’nti saññī hoti, so sampattiṃyeva samānaṃ ‘‘vipattī’’ti paccetīti veditabbo.
೧೪೯. ಅಪ್ಪನನ್ತಿ ನಿಗಮನಂ। ನ ತಥಾ ದಟ್ಠಬ್ಬನ್ತಿ ಯಥಾ ಪರವಾದಿನಾ ವುತ್ತಂ, ತಥಾ ನ ದಟ್ಠಬ್ಬಂ। ಸಕಸಕಕಿಚ್ಚಮೇವ ಜಾನಾತೀತಿ ಠಾನಾಟ್ಠಾನಜಾನನಾದಿಂ ಸಕಂ ಸಕಂಯೇವ ಕಿಚ್ಚಂ ಕಾತುಂ ಜಾನಾತಿ, ಯಥಾಸಕಮೇವ ವಿಸಯಂ ಪಟಿವಿಜ್ಝತೀತಿ ಅತ್ಥೋ। ತಮ್ಪೀತಿ ತೇಹಿ ದಸಬಲಞಾಣೇಹಿ ಜಾನಿತಬ್ಬಮ್ಪಿ। ಕಮ್ಮನ್ತರವಿಪಾಕನ್ತರಮೇವಾತಿ ಕಮ್ಮನ್ತರಸ್ಸವಿಪಾಕನ್ತರಮೇವ ಜಾನಾತಿ, ಚೇತನಾಚೇತನಾಸಮ್ಪಯುತ್ತಧಮ್ಮೇ ನಿರಯಾದಿನಿಬ್ಬಾನಗಾಮಿನಿಪಟಿಪದಾಭೂತೇ ಕಮ್ಮನ್ತಿ ಗಹೇತ್ವಾ ಆಹ ‘‘ಕಮ್ಮಪರಿಚ್ಛೇದಮೇವಾ’’ತಿ। ಧಾತುನಾನತ್ತಞ್ಚ ಧಾತುನಾನತ್ತಕಾರಣಞ್ಚ ಧಾತುನಾನತ್ತಕಾರಣನ್ತಿ ಏಕದೇಸಸರೂಪೇಕಸೇಸೋ ದಟ್ಠಬ್ಬೋ। ತಞ್ಹಿ ಞಾಣಂ ತದುಭಯಮ್ಪಿ ಜಾನಾತಿ, ‘‘ಇಮಾಯ ನಾಮ ಧಾತುಯಾ ಉಸ್ಸನ್ನತ್ತಾ’’ತಿಆದಿನಾ (ವಿಭ॰ ಅಟ್ಠ॰ ೮೧೨) ತಥಾ ಚೇವ ಸಂವಣ್ಣಿತಂ। ಸಚ್ಚಪರಿಚ್ಛೇದಮೇವಾತಿ ಪರಿಞ್ಞಾಭಿಸಮಯಾದಿವಸೇನ ಸಚ್ಚಾನಂ ಪರಿಚ್ಛಿನ್ದನಮೇವ। ಅಪ್ಪೇತುಂ ನ ಸಕ್ಕೋತಿ ಅಟ್ಠಮನವಮಬಲಾನಿ ವಿಯ ತಂಸದಿಸಂ ಇದ್ಧಿವಿಧಞಾಣಂ ವಿಯ ವಿಕುಬ್ಬಿತುಂ। ಏತೇನಸ್ಸ ಬಲಸದಿಸತಞ್ಚ ನಿವಾರೇತಿ। ಝಾನಾದಿಞಾಣಂ ವಿಯ ವಾ ಅಪ್ಪೇತುಂ ವಿಕುಬ್ಬಿತುಞ್ಚ। ಯದಿಪಿ ಹಿ ‘‘ಝಾನಾದಿಪಚ್ಚವೇಕ್ಖಣಾಞಾಣಂ ಸತ್ತಮಬಲ’’ನ್ತಿ ತಸ್ಸ ಸವಿತಕ್ಕಸವಿಚಾರತಾ ವುತ್ತಾ, ತಥಾಪಿ ‘‘ಝಾನಾದೀಹಿ ವಿನಾ ಪಚ್ಚವೇಕ್ಖಣಾ ನತ್ಥೀ’’ತಿ ಝಾನಾದಿಸಹಗತಂ ಞಾಣಂ ತದನ್ತೋಗಧಂ ಕತ್ವಾ ಏವಂ ವುತ್ತನ್ತಿ ವೇದಿತಬ್ಬಂ। ಅಥ ವಾ ಸಬ್ಬಞ್ಞುತಞ್ಞಾಣಂ ಝಾನಾದಿಕಿಚ್ಚಂ ವಿಯ ನ ಸಬ್ಬಂ ಬಲಕಿಚ್ಚಂ ಕಾತುಂ ಸಕ್ಕೋತೀತಿ ದಸ್ಸೇತುಂ ‘‘ಝಾನಂ ಹುತ್ವಾ ಅಪ್ಪೇತುಂ ನ ಸಕ್ಕೋತಿ ಇದ್ಧಿ ಹುತ್ವಾ ವಿಕುಬ್ಬಿತುಂ ನ ಸಕ್ಕೋತೀ’’ತಿ ವುತ್ತಂ, ನ ಪನ ಕಸ್ಸಚಿ ಬಲಸ್ಸ ಝಾನಇದ್ಧಿಭಾವತೋತಿ ದಟ್ಠಬ್ಬಂ। ಏವಂ ಕಿಚ್ಚವಿಸೇಸವಸೇನಪಿ ದಸಬಲಞಾಣಸಬ್ಬಞ್ಞುತಞ್ಞಾಣಾನಂ ವಿಸೇಸಂ ದಸ್ಸೇತ್ವಾ ಇದಾನಿ ವಿತಕ್ಕತ್ತಿಕಭೂಮನ್ತರವಸೇನಪಿ ತಂ ದಸ್ಸೇತುಂ ‘‘ಅಪಿಚಾ’’ತಿಆದಿ ವುತ್ತಂ। ಪಟಿಪಾಟಿಯಾತಿಆದಿತೋ ಪಟ್ಠಾಯ ಪಟಿಪಾಟಿಯಾ।
149.Appananti nigamanaṃ. Na tathā daṭṭhabbanti yathā paravādinā vuttaṃ, tathā na daṭṭhabbaṃ. Sakasakakiccameva jānātīti ṭhānāṭṭhānajānanādiṃ sakaṃ sakaṃyeva kiccaṃ kātuṃ jānāti, yathāsakameva visayaṃ paṭivijjhatīti attho. Tampīti tehi dasabalañāṇehi jānitabbampi. Kammantaravipākantaramevāti kammantarassavipākantarameva jānāti, cetanācetanāsampayuttadhamme nirayādinibbānagāminipaṭipadābhūte kammanti gahetvā āha ‘‘kammaparicchedamevā’’ti. Dhātunānattañca dhātunānattakāraṇañca dhātunānattakāraṇanti ekadesasarūpekaseso daṭṭhabbo. Tañhi ñāṇaṃ tadubhayampi jānāti, ‘‘imāya nāma dhātuyā ussannattā’’tiādinā (vibha. aṭṭha. 812) tathā ceva saṃvaṇṇitaṃ. Saccaparicchedamevāti pariññābhisamayādivasena saccānaṃ paricchindanameva. Appetuṃ na sakkoti aṭṭhamanavamabalāni viya taṃsadisaṃ iddhividhañāṇaṃ viya vikubbituṃ. Etenassa balasadisatañca nivāreti. Jhānādiñāṇaṃ viya vā appetuṃ vikubbituñca. Yadipi hi ‘‘jhānādipaccavekkhaṇāñāṇaṃ sattamabala’’nti tassa savitakkasavicāratā vuttā, tathāpi ‘‘jhānādīhi vinā paccavekkhaṇā natthī’’ti jhānādisahagataṃ ñāṇaṃ tadantogadhaṃ katvā evaṃ vuttanti veditabbaṃ. Atha vā sabbaññutaññāṇaṃ jhānādikiccaṃ viya na sabbaṃ balakiccaṃ kātuṃ sakkotīti dassetuṃ ‘‘jhānaṃ hutvā appetuṃ na sakkoti iddhi hutvā vikubbituṃ na sakkotī’’ti vuttaṃ, na pana kassaci balassa jhānaiddhibhāvatoti daṭṭhabbaṃ. Evaṃ kiccavisesavasenapi dasabalañāṇasabbaññutaññāṇānaṃ visesaṃ dassetvā idāni vitakkattikabhūmantaravasenapi taṃ dassetuṃ ‘‘apicā’’tiādi vuttaṃ. Paṭipāṭiyātiādito paṭṭhāya paṭipāṭiyā.
ಅನುಪದವಣ್ಣನಂ ಕತ್ವಾ ವೇದಿತಬ್ಬಾನೀತಿ ಸಮ್ಬನ್ಧೋ। ಕಿಲೇಸಾವರಣಂ ನಿಯತಮಿಚ್ಛಾದಿಟ್ಠಿ, ಕಿಲೇಸಾವರಣಸ್ಸ ಅಭಾವೋ ಆಸವಕ್ಖಯಾಧಿಗಮಸ್ಸ ಠಾನಂ, ತಬ್ಭಾವೋ ಅಟ್ಠಾನಂ, ಅನಧಿಗಮಸ್ಸ ಪನ ತದುಭಯಂ ಯಥಾಕ್ಕಮಂ ಅಟ್ಠಾನಞ್ಚ ಠಾನಞ್ಚಾತಿ ತತ್ಥ ಕಾರಣಂ ದಸ್ಸೇನ್ತೋ ‘‘ಲೋಕಿಯ…ಪೇ॰… ದಸ್ಸನತೋ ಚಾ’’ತಿ ಆಹ। ತತ್ಥ ಲೋಕಿಯಸಮ್ಮಾದಿಟ್ಠಿಯಾ ಠಿತಿ ಆಸವಕ್ಖಯಾಧಿಗಮಸ್ಸ ಠಾನಂ ಕಿಲೇಸಾವರಣಾಭಾವಸ್ಸ ಕಾರಣತ್ತಾ। ಸಾ ಹಿ ತಸ್ಮಿಂ ಸತಿ ನ ಹೋತಿ, ಅಸತಿ ಚ ಹೋತಿ। ಏತೇನ ತಸ್ಸಾ ಅಟ್ಠಿತಿಯಾ ತಸ್ಸ ಅಟ್ಠಾನತಾ ವುತ್ತಾ ಏವ। ನೇಸಂ ವೇನೇಯ್ಯಸತ್ತಾನಂ। ಧಾತುವೇಮತ್ತದಸ್ಸನತೋತಿ ಕಾಮಧಾತುಆದೀನಂ ಪವತ್ತಿಭೇದದಸ್ಸನತೋ। ಯದಗ್ಗೇನ ಧಾತುವೇಮತ್ತಂ ಜಾನಾತಿ, ತದಗ್ಗೇನ ಚರಿಯಾವಿಸೇಸಮ್ಪಿ ಜಾನಾತಿ। ಧಾತುವೇಮತ್ತದಸ್ಸನತೋತಿ ವಾ ಧಮ್ಮಧಾತುವೇಮತ್ತದಸ್ಸನತೋ। ಸಬ್ಬಾಪಿ ಹಿ ಚರಿಯಾ ಧಮ್ಮಧಾತುಪರಿಯಾಪನ್ನಾ ಏವಾತಿ। ಪಯೋಗಂ ಅನಾದಿಯಿತ್ವಾಪಿ ಸನ್ತತಿಮಹಾಮತ್ತಾದೀನಂ (ಧ॰ ಪ॰ ೧೪೨) ವಿಯ। ದಿಬ್ಬಚಕ್ಖುಞಾಣಾನುಭಾವತೋ ಪತ್ತಬ್ಬೇನಾತಿ ಏತ್ಥ ದಿಬ್ಬಚಕ್ಖುನಾ ಪರಸ್ಸ ಹದಯವತ್ಥುಸನ್ನಿಸ್ಸಯಲೋಹಿತವಣ್ಣದಸ್ಸನಮುಖೇನ ತದಾ ಪವತ್ತಮಾನಚಿತ್ತಜಾನನತ್ಥಂ ಪರಿಕಮ್ಮಕರಣಂ ನಾಮ ಸಾವಕಾನಂ, ತಞ್ಚ ಖೋ ಆದಿಕಮ್ಮಿಕಾನಂ, ಯತೋ ದಿಬ್ಬಚಕ್ಖುಆನುಭಾವತೋ ಚೇತೋಪರಿಯಞಾಣಸ್ಸ ಪತ್ತಬ್ಬತಾ ಸಿಯಾ, ಬುದ್ಧಾನಂ ಪನ ಯದಿಪಿ ಆಸವಕ್ಖಯಞಾಣಾಧಿಗಮತೋ ಪಗೇವ ದಿಬ್ಬಚಕ್ಖುಞಾಣಾಧಿಗಮೋ, ತಥಾಪಿ ತಥಾ ಪರಿಕಮ್ಮಕರಣಂ ನತ್ಥಿ ವಿಜ್ಜಾತ್ತಯಸಿದ್ಧಿಯಾ ಸಿಜ್ಝನತೋ। ಸೇಸಾಭಿಞ್ಞಾತ್ತಯೇ ಚೇತೋಪರಿಯಞಾಣಂ ದಿಬ್ಬಚಕ್ಖುಞಾಣಾಧಿಗಮೇನ ಪತ್ತನ್ತಿ ಚ ವತ್ತಬ್ಬತಂ ಲಭತೀತಿ ತಥಾ ವುತ್ತನ್ತಿ ದಟ್ಠಬ್ಬಂ।
Anupadavaṇṇanaṃ katvā veditabbānīti sambandho. Kilesāvaraṇaṃ niyatamicchādiṭṭhi, kilesāvaraṇassa abhāvo āsavakkhayādhigamassa ṭhānaṃ, tabbhāvo aṭṭhānaṃ, anadhigamassa pana tadubhayaṃ yathākkamaṃ aṭṭhānañca ṭhānañcāti tattha kāraṇaṃ dassento ‘‘lokiya…pe… dassanato cā’’ti āha. Tattha lokiyasammādiṭṭhiyā ṭhiti āsavakkhayādhigamassa ṭhānaṃ kilesāvaraṇābhāvassa kāraṇattā. Sā hi tasmiṃ sati na hoti, asati ca hoti. Etena tassā aṭṭhitiyā tassa aṭṭhānatā vuttā eva. Nesaṃ veneyyasattānaṃ. Dhātuvemattadassanatoti kāmadhātuādīnaṃ pavattibhedadassanato. Yadaggena dhātuvemattaṃ jānāti, tadaggena cariyāvisesampi jānāti. Dhātuvemattadassanatoti vā dhammadhātuvemattadassanato. Sabbāpi hi cariyā dhammadhātupariyāpannā evāti. Payogaṃ anādiyitvāpi santatimahāmattādīnaṃ (dha. pa. 142) viya. Dibbacakkhuñāṇānubhāvato pattabbenāti ettha dibbacakkhunā parassa hadayavatthusannissayalohitavaṇṇadassanamukhena tadā pavattamānacittajānanatthaṃ parikammakaraṇaṃ nāma sāvakānaṃ, tañca kho ādikammikānaṃ, yato dibbacakkhuānubhāvato cetopariyañāṇassa pattabbatā siyā, buddhānaṃ pana yadipi āsavakkhayañāṇādhigamato pageva dibbacakkhuñāṇādhigamo, tathāpi tathā parikammakaraṇaṃ natthi vijjāttayasiddhiyā sijjhanato. Sesābhiññāttaye cetopariyañāṇaṃ dibbacakkhuñāṇādhigamena pattanti ca vattabbataṃ labhatīti tathā vuttanti daṭṭhabbaṃ.
ಪುನ ಏವರೂಪಿಂ ವಾಚಂ ನ ವಕ್ಖಾಮೀತಿ ಚಿತ್ತಂ ಉಪ್ಪಾದೇನ್ತೋ ತಂ ವಾಚಂ ಪಜಹತಿ ನಾಮ। ವಾಚಾಯ ಪನ ಸೋ ಅತ್ಥೋ ಪಾಕಟೋ ಹೋತೀತಿ ‘‘ವದನ್ತೋ’’ತಿ ವುತ್ತಂ। ದಿಟ್ಠಿಂ ನ ಗಣ್ಹಿಸ್ಸಾಮೀತಿ ದಿಟ್ಠಿಗ್ಗಾಹಪಟಿಕ್ಖೇಪೋ। ದಿಟ್ಠಿಯಾ ಅನುಪ್ಪಾದನಂ ಪಜಹನಮೇವಾತಿ ಆಹ ‘‘ಪಜಹನ್ತೋ’’ತಿ। ಸೋ ಅರಿಯೂಪವಾದೀ ನಿರಯೇ ಠಪಿತೋಯೇವ, ನಾಸ್ಸ ನಿರಯೂಪಪತ್ತಿಯಾ ಕೋಚಿ ವಿಬನ್ಧೋ ಏಕಂಸಿಕೋ ಅಯಮತ್ಥೋತಿ ಅಧಿಪ್ಪಾಯೋ।
Puna evarūpiṃ vācaṃ na vakkhāmīti cittaṃ uppādento taṃ vācaṃ pajahati nāma. Vācāya pana so attho pākaṭo hotīti ‘‘vadanto’’ti vuttaṃ. Diṭṭhiṃ na gaṇhissāmīti diṭṭhiggāhapaṭikkhepo. Diṭṭhiyā anuppādanaṃ pajahanamevāti āha ‘‘pajahanto’’ti. So ariyūpavādī niraye ṭhapitoyeva, nāssa nirayūpapattiyā koci vibandho ekaṃsiko ayamatthoti adhippāyo.
ಅಸ್ಸಾತಿ ಏಕಂಸಿಕಭಾವಸ್ಸ। ಸಿಕ್ಖಾಹಿ ಸೀಲಸಮಾಧಿಪಞ್ಞಾಹಿ, ತದತ್ಥಾಯ ವಿಪಸ್ಸನಾಯ ಚ ವಿನಾ ಅಞ್ಞಾರಾಧನಸ್ಸ ಅಸಮ್ಭವತೋ ‘‘ಲೋಕಿಯಲೋಕುತ್ತರಾ ಸೀಲಸಮಾಧಿಪಞ್ಞಾ ವೇದಿತಬ್ಬಾ’’ತಿ ವತ್ವಾ ಪುನ ಆಸನ್ನತರೇ ಸೀಲಾದಿಕೇ ದಸ್ಸೇನ್ತೋ ‘‘ಲೋಕುತ್ತರವಸೇನೇವ ವಿನಿವತ್ತೇತುಮ್ಪಿ ವಟ್ಟತೀ’’ತಿ ಆಹ, ತಸ್ಮಾ ಅಗ್ಗಮಗ್ಗಪರಿಯಾಪನ್ನಾ ಸೀಲಾದಯೋ ವೇದಿತಬ್ಬಾ। ಅಗ್ಗಮಗ್ಗಟ್ಠಸ್ಸ ಹಿ ದಿಟ್ಠೇವ ಧಮ್ಮೇ ಏಕಂಸಿಕಾ ಅಞ್ಞಾರಾಧನಾ, ಇತರೇಸಂ ಅನೇಕಂಸಿಕಾತಿ। ಸಮ್ಪಜ್ಜನಂ ಸಮ್ಪದಾ, ನಿಪ್ಫತ್ತೀತಿ ಅತ್ಥೋ, ತಸ್ಮಾ ಏವಂಸಮ್ಪದನ್ತಿ ಏವಂಅವಿರಜ್ಝನಕನಿಪ್ಫತ್ತಿಕನ್ತಿ ವುತ್ತಂ ಹೋತಿ। ತೇನಾಹ ‘‘ಇಮಮ್ಪಿ ಕಾರಣ’’ನ್ತಿಆದಿ। ತತ್ಥ ಕಾರಣನ್ತಿ ಯುತ್ತಿ। ತತ್ರಾಯಂ ಯುತ್ತಿನಿದ್ಧಾರಣಾ ‘‘ನಿರಯೂಪಗೋ ಅರಿಯೂಪವಾದೀ ತದಾದಾಯಸ್ಸ ಅವಿಜ್ಜಮಾನತೋ ಸೇಯ್ಯಥಾಪಿ ಮಿಚ್ಛಾದಿಟ್ಠೀ’’ತಿ। ಏತ್ಥ ಚ ‘‘ತಂ ವಾಚಂ ಅಪ್ಪಹಾಯಾ’’ತಿಆದಿವಚನೇನ ತದಾದಾಯಸ್ಸ ಅಪ್ಪಹಾನೇನ ಚ ಅರಿಯೂಪವಾದೋ ಅನ್ತರಾಯಿಕೋ ಅನತ್ಥಾವಹೋ ಚ, ಪಹಾನೇನ ಪನ ಅಚ್ಚಯಂ ದೇಸೇತ್ವಾ ಖಮಾಪನೇನ ಅನನ್ತರಾಯಿಕೋ ಅತ್ಥಾವಹೋ ಚ ಯಥಾ ತಂ ವುಟ್ಠಿತಾ ದೇಸಿತಾ ಚ ಆಪತ್ತೀತಿ ದಸ್ಸೇತಿ।
Assāti ekaṃsikabhāvassa. Sikkhāhi sīlasamādhipaññāhi, tadatthāya vipassanāya ca vinā aññārādhanassa asambhavato ‘‘lokiyalokuttarā sīlasamādhipaññā veditabbā’’ti vatvā puna āsannatare sīlādike dassento ‘‘lokuttaravaseneva vinivattetumpi vaṭṭatī’’ti āha, tasmā aggamaggapariyāpannā sīlādayo veditabbā. Aggamaggaṭṭhassa hi diṭṭheva dhamme ekaṃsikā aññārādhanā, itaresaṃ anekaṃsikāti. Sampajjanaṃ sampadā, nipphattīti attho, tasmā evaṃsampadanti evaṃavirajjhanakanipphattikanti vuttaṃ hoti. Tenāha ‘‘imampi kāraṇa’’ntiādi. Tattha kāraṇanti yutti. Tatrāyaṃ yuttiniddhāraṇā ‘‘nirayūpago ariyūpavādī tadādāyassa avijjamānato seyyathāpi micchādiṭṭhī’’ti. Ettha ca ‘‘taṃ vācaṃ appahāyā’’tiādivacanena tadādāyassa appahānena ca ariyūpavādo antarāyiko anatthāvaho ca, pahānena pana accayaṃ desetvā khamāpanena anantarāyiko atthāvaho ca yathā taṃ vuṭṭhitā desitā ca āpattīti dasseti.
ದಸಬಲಞಾಣವಣ್ಣನಾ ನಿಟ್ಠಿತಾ।
Dasabalañāṇavaṇṇanā niṭṭhitā.
ಚತುವೇಸಾರಜ್ಜಞಾಣವಣ್ಣನಾ
Catuvesārajjañāṇavaṇṇanā
೧೫೦. ಬ್ಯಾಮೋಹಭಯವಸೇನ (ಅ॰ ನಿ॰ ಟೀ॰ ೨.೪.೮) ಸರಣಪರಿಯೇಸನಂ ಸಾರಜ್ಜನಂ ಸಾರದೋ, ಬ್ಯಾಮೋಹಭಯಂ, ವಿಗತೋ ಸಾರದೋ ಏತಸ್ಸಾತಿ ವಿಸಾರದೋ, ತಸ್ಸ ಭಾವೋ ವೇಸಾರಜ್ಜಂ। ತಂ ಪನ ಞಾಣಸಮ್ಪದಂ ಪಹಾನಸಮ್ಪದಂ ದೇಸನಾವಿಸೇಸಸಮ್ಪದಂ ಖೇಮಂ ನಿಸ್ಸಾಯ ಪವತ್ತಂ ಚತುಬ್ಬಿಧಂ ಪಚ್ಚವೇಕ್ಖಣಞಾಣಂ। ತೇನಾಹ ‘‘ಚತೂಸು ಠಾನೇಸೂ’’ತಿಆದಿ। ದಸ್ಸಿತಧಮ್ಮೇಸೂತಿ ವುತ್ತಧಮ್ಮೇಸು। ವಚನಮತ್ತಮೇವ ಹಿ ತೇಸಂ, ನ ಪನ ದಸ್ಸನಂ ತಾದಿಸಸ್ಸೇವ ಧಮ್ಮಸ್ಸ ಅಭಾವತೋ। ಭಗವತಾ ಏವ ವಾ ‘‘ಇಮೇ ಧಮ್ಮಾ ಅನಭಿಸಮ್ಬುದ್ಧಾ’’ತಿ ಪರಸ್ಸ ವಚನವಸೇನ ದಸ್ಸಿತಧಮ್ಮೇಸು। ‘‘ಧಮ್ಮಪಟಿಸಮ್ಭಿದಾ’’ತಿಆದೀಸು (ವಿಭ॰ ೭೧೮) ವಿಯ ಧಮ್ಮ-ಸದ್ದೋ ಹೇತುಪರಿಯಾಯೋತಿ ಆಹ ‘‘ಸಹಧಮ್ಮೇನಾತಿ ಸಹೇತುನಾ’’ತಿ। ಹೇತೂತಿ ಚ ಉಪಪತ್ತಿಸಾಧನಹೇತು ವೇದಿತಬ್ಬೋ, ನ ಕಾರಕೋ ಸಮ್ಪಾಪಕೋ ಚ। ಅಪ್ಪಮಾಣನ್ತಿ ಅನಿದಸ್ಸನಂ। ನಿದಸ್ಸನಞ್ಹಿ ಅನ್ವಯತೋ ಬ್ಯತಿರೇಕತೋ ಪಮಾಣಙ್ಗತಾಯ ‘‘ಪಮಾಣ’’ನ್ತಿ ವುಚ್ಚತಿ। ನಿಮಿತ್ತನ್ತಿ ಚೋದನಾಯ ಕಾರಣಂ। ತತ್ಥ ಚೋದಕೋ ಚೋದನಂ ಕರೋತೀತಿ ಕಾರಣಂ, ಧಮ್ಮೋ ಚೋದನಂ ಕರೋತಿ ಏತೇನಾತಿ ಕಾರಣಂ। ತೇನಾಹ ‘‘ಪುಗ್ಗಲೋಪೀ’’ತಿಆದಿ। ಖೇಮನ್ತಿ ಕೇನಚಿ ಅಪ್ಪಟಿಬನ್ಧಿಯಭಾವೇನ ಅನುಪದ್ದುತತಂ।
150. Byāmohabhayavasena (a. ni. ṭī. 2.4.8) saraṇapariyesanaṃ sārajjanaṃ sārado, byāmohabhayaṃ, vigato sārado etassāti visārado, tassa bhāvo vesārajjaṃ. Taṃ pana ñāṇasampadaṃ pahānasampadaṃ desanāvisesasampadaṃ khemaṃ nissāya pavattaṃ catubbidhaṃ paccavekkhaṇañāṇaṃ. Tenāha ‘‘catūsu ṭhānesū’’tiādi. Dassitadhammesūti vuttadhammesu. Vacanamattameva hi tesaṃ, na pana dassanaṃ tādisasseva dhammassa abhāvato. Bhagavatā eva vā ‘‘ime dhammā anabhisambuddhā’’ti parassa vacanavasena dassitadhammesu. ‘‘Dhammapaṭisambhidā’’tiādīsu (vibha. 718) viya dhamma-saddo hetupariyāyoti āha ‘‘sahadhammenāti sahetunā’’ti. Hetūti ca upapattisādhanahetu veditabbo, na kārako sampāpako ca. Appamāṇanti anidassanaṃ. Nidassanañhi anvayato byatirekato pamāṇaṅgatāya ‘‘pamāṇa’’nti vuccati. Nimittanti codanāya kāraṇaṃ. Tattha codako codanaṃ karotīti kāraṇaṃ, dhammo codanaṃ karoti etenāti kāraṇaṃ. Tenāha ‘‘puggalopī’’tiādi. Khemanti kenaci appaṭibandhiyabhāvena anupaddutataṃ.
ಅನ್ತರಾಯೋ ಏತೇಸಂ ಅತ್ಥಿ, ಅನ್ತರಾಯೇವಾ ಯುತ್ತಾತಿ ಅನ್ತರಾಯಿಕಾ। ಏವಂಭೂತಾ ಪನ ತೇ ಯಸ್ಮಾ ಅನ್ತರಾಯಕರಾ ನಾಮ ಹೋನ್ತಿ, ತಸ್ಮಾ ಆಹ ‘‘ಅನ್ತರಾಯಂ ಕರೋನ್ತೀತಿ ಅನ್ತರಾಯಿಕಾ’’ತಿ। ಅಸಞ್ಚಿಚ್ಚ ವೀತಿಕ್ಕಮೋ ನ ತಥಾ ಸಾವಜ್ಜೋತಿ ಕತ್ವಾ ವುತ್ತಂ ‘‘ಸಞ್ಚಿಚ್ಚ ವೀತಿಕ್ಕನ್ತಾ’’ತಿ। ಸತ್ತ ಆಪತ್ತಿಕ್ಖನ್ಧಾತಿಆದಿ ನಿದಸ್ಸನಮತ್ತಂ ಇತರೇಸಮ್ಪಿ ಚತುನ್ನಂ ‘‘ಅನ್ತರಾಯಿಕಾ’’ತಿ ವುತ್ತಧಮ್ಮಾನಂ ತಬ್ಭಾವೇ ಬ್ಯಭಿಚಾರಾಭಾವತೋ। ಇಧ ಪನ ಮೇಥುನಧಮ್ಮೋ ಅಧಿಪ್ಪೇತೋತಿ ಇದಂ ಅಟ್ಠುಪ್ಪತ್ತಿವಸೇನ ವುತ್ತಂ ಅರಿಟ್ಠಸಿಕ್ಖಾಪದಂ (ಪಾಚಿ॰ ೪೧೭-೪೨೨) ವಿಯ। ಯಸ್ಮಾ ತಙ್ಖಣಮ್ಪಿ ಕಾಮೇಸು (ಅ॰ ನಿ॰ ಟೀ॰ ೨.೪.೮) ಆದೀನವಂ ದಿಸ್ವಾ ವಿರತ್ತೋ (ಅ॰ ನಿ॰ ಟೀ॰ ೨.೪.೮) ಹೋತಿ ಚೇ, ವಿಸೇಸಂ ಅಧಿಗಚ್ಛತಿ, ನ ಕಾಮೇಸು ಆಸತ್ತೋ, ತಸ್ಮಾ ವುತ್ತಂ ‘‘ಮೇಥುನಂ…ಪೇ॰… ಅನ್ತರಾಯೋ ಹೋತೀ’’ತಿ। ತತ್ಥ ಯಸ್ಸ ಕಸ್ಸಚೀತಿ ನ ಕೇವಲಂ ಪಬ್ಬಜಿತಸ್ಸೇವ, ಅಥ ಖೋ ಯಸ್ಸ ಕಸ್ಸಚಿ। ತಥಾ ಹಿ ವುತ್ತಂ ‘‘ಮೇಥುನಮನುಯುತ್ತಸ್ಸ, ಮುಸ್ಸತೇವಾಪಿ ಸಾಸನ’’ನ್ತಿ। ತಸ್ಮಿಂ ಅನಿಯ್ಯಾನಿಕಧಮ್ಮೇತಿ ತಸ್ಮಿಂ ಪರೇನ ಪರಿಕಪ್ಪಿತಅನಿಯ್ಯಾನಿಕಧಮ್ಮನಿಮಿತ್ತಂ। ನಿಮಿತ್ತತ್ಥೇ ಹಿ ಇದಂ ಕಮ್ಮಸಂಯೋಗೇ ಭುಮ್ಮಂ।
Antarāyo etesaṃ atthi, antarāyevā yuttāti antarāyikā. Evaṃbhūtā pana te yasmā antarāyakarā nāma honti, tasmā āha ‘‘antarāyaṃ karontīti antarāyikā’’ti. Asañcicca vītikkamo na tathā sāvajjoti katvā vuttaṃ ‘‘sañcicca vītikkantā’’ti. Satta āpattikkhandhātiādi nidassanamattaṃ itaresampi catunnaṃ ‘‘antarāyikā’’ti vuttadhammānaṃ tabbhāve byabhicārābhāvato. Idha pana methunadhammo adhippetoti idaṃ aṭṭhuppattivasena vuttaṃ ariṭṭhasikkhāpadaṃ (pāci. 417-422) viya. Yasmā taṅkhaṇampi kāmesu (a. ni. ṭī. 2.4.8) ādīnavaṃ disvā viratto (a. ni. ṭī. 2.4.8) hoti ce, visesaṃ adhigacchati, na kāmesu āsatto, tasmā vuttaṃ ‘‘methunaṃ…pe… antarāyo hotī’’ti. Tattha yassa kassacīti na kevalaṃ pabbajitasseva, atha kho yassa kassaci. Tathā hi vuttaṃ ‘‘methunamanuyuttassa, mussatevāpi sāsana’’nti. Tasmiṃ aniyyānikadhammeti tasmiṃ parena parikappitaaniyyānikadhammanimittaṃ. Nimittatthe hi idaṃ kammasaṃyoge bhummaṃ.
ಚತುವೇಸಾರಜ್ಜಞಾಣವಣ್ಣನಾ ನಿಟ್ಠಿತಾ।
Catuvesārajjañāṇavaṇṇanā niṭṭhitā.
ಅಟ್ಠಪರಿಸವಣ್ಣನಾ
Aṭṭhaparisavaṇṇanā
೧೫೧. ಪುರಿಸಸ್ಸ ಸೂರತರಭಾವೋ ನಾಮ ಸಙ್ಗಾಮೇ ಪಾಕಟೋ ಹೋತಿ, ನ ಗೇಹೇ ನಿಸಿನ್ನಕಾಲೇ, ಏವಂ ವೇಸಾರಜ್ಜಞಾಣಸ್ಸ ಆನುಭಾವೋ ಪಣ್ಡಿತಪರಿಸಾಸು ಯತ್ಥ ಕತ್ಥಚೀತಿ ದಸ್ಸೇನ್ತೋ ‘‘ವೇಸಾರಜ್ಜಞಾಣಸ್ಸ ಬಲದಸ್ಸನತ್ಥ’’ನ್ತಿ ಆಹ। ಸನ್ನಿಪತಿತ್ವಾ ನಿಸಿನ್ನಟ್ಠಾನನ್ತಿ ಠಾನಸೀಸೇನ ಸನ್ನಿಪತಿತಖತ್ತಿಯಪರಿಸಮೇವ ದಸ್ಸೇತಿ। ಏಸೇವ ನಯೋ ಸಬ್ಬತ್ಥಾತಿ ಅತಿದೇಸೇನ ಆವಿಭಾವಿತಮತ್ಥಂ ದಸ್ಸೇತುಂ ‘‘ಮಾರಕಾಯಿಕಾನ’’ನ್ತಿಆದಿ ವುತ್ತಂ ಸದಿಸತ್ಥವಿಸಯತ್ತಾ ಅತಿದೇಸಸ್ಸ। ಯಥಾ ಹಿ ಖತ್ತಿಯಾನಂ ಸಮೂಹೋ ಖತ್ತಿಯಪರಿಸಾತಿ ಅಯಮತ್ಥೋ ಲಬ್ಭತಿ, ನ ಏವಂ ‘‘ಮಾರಪರಿಸಾ’’ತಿ ಏತ್ಥ, ಮಾರಸ್ಸ ಪರಿಸಾತಿ ಪನ ಮಾರಪರಿಸಾತಿ ಅಯಮತ್ಥೋ ಅಧಿಪ್ಪೇತೋ। ತೇನಾಹ ‘‘ಮಾರಕಾಯಿಕಾನಂ…ಪೇ॰… ನ ಮಾರಾನ’’ನ್ತಿ। ಮಾರಕಾಯಿಕಾನನ್ತಿ ಮಾರಪಕ್ಖಿಯಾನಂ। ಉಗ್ಗಟ್ಠಾನದಸ್ಸನವಸೇನಾತಿ ಸಾರಜ್ಜಿತಬ್ಬಟ್ಠಾನದಸ್ಸನವಸೇನ, ಏವಂ ಉಗ್ಗಾ ಖತ್ತಿಯಾ ಅತ್ತನೋ ಪುಞ್ಞತೇಜೇನಾತಿ ಅಧಿಪ್ಪಾಯೋ। ಬ್ರಾಹ್ಮಣಾ ತೀಸು ವೇದೇಸೂತಿ ಇದಂ ಇತರೇಸಂ ಅವಿಸಯದಸ್ಸನವಸೇನ ವುತ್ತಂ। ವೇದೇ ಸಜ್ಝಾಯನ್ತಾಪಿ ಹಿ ಖತ್ತಿಯಾ ವೇಸ್ಸಾ ಚ ತದತ್ಥವಿಚಾರಣಾಯ ಯೇಭುಯ್ಯೇನ ಅಸಮತ್ಥಾ ಏವಾತಿ। ಕಸ್ಮಾ ಪನೇತ್ಥ ಯಾಮಾದಿಪರಿಸಾ ನ ಗಹಿತಾತಿ? ಭುಸಂ ಕಾಮಾಭಿಗಿದ್ಧತಾಯ ಯೋನಿಸೋಮನಸಿಕಾರವಿರಹತೋ। ಯಾಮಾದಯೋ ಹಿ ಉಳಾರುಳಾರೇ ಕಾಮೇ ಪಟಿಸೇವನ್ತಾ ತತ್ಥಾಭಿಗಿದ್ಧತಾಯ ಧಮ್ಮಸ್ಸವನಾಯ ಸಭಾವೇನ ಚಿತ್ತಮ್ಪಿ ನ ಉಪ್ಪಾದೇನ್ತಿ, ಮಹಾಬೋಧಿಸತ್ತಾನಂ ಪನ ಬುದ್ಧಾನಞ್ಚ ಆನುಭಾವೇನ ಆಕಡ್ಢಿಯಮಾನಾ ಕದಾಚಿ ತೇಸಂ ಪಯಿರುಪಾಸನಾದೀನಿ ಕರೋನ್ತಿ ತಾದಿಸೇ ಮಹಾಸಮಯೇ। ತೇನೇವ ಹಿ ವಿಮಾನವತ್ಥುದೇಸನಾಪಿ ತನ್ನಿಮಿತ್ತಾ ಬಹುಲಾ ನಾಹೋಸಿ। ಮನುಸ್ಸಾನಂ ವಸೇನಾಯಂ ಕತಾ।
151. Purisassa sūratarabhāvo nāma saṅgāme pākaṭo hoti, na gehe nisinnakāle, evaṃ vesārajjañāṇassa ānubhāvo paṇḍitaparisāsu yattha katthacīti dassento ‘‘vesārajjañāṇassa baladassanattha’’nti āha. Sannipatitvā nisinnaṭṭhānanti ṭhānasīsena sannipatitakhattiyaparisameva dasseti. Eseva nayo sabbatthāti atidesena āvibhāvitamatthaṃ dassetuṃ ‘‘mārakāyikāna’’ntiādi vuttaṃ sadisatthavisayattā atidesassa. Yathā hi khattiyānaṃ samūho khattiyaparisāti ayamattho labbhati, na evaṃ ‘‘māraparisā’’ti ettha, mārassa parisāti pana māraparisāti ayamattho adhippeto. Tenāha ‘‘mārakāyikānaṃ…pe… na mārāna’’nti. Mārakāyikānanti mārapakkhiyānaṃ. Uggaṭṭhānadassanavasenāti sārajjitabbaṭṭhānadassanavasena, evaṃ uggā khattiyā attano puññatejenāti adhippāyo. Brāhmaṇā tīsu vedesūti idaṃ itaresaṃ avisayadassanavasena vuttaṃ. Vede sajjhāyantāpi hi khattiyā vessā ca tadatthavicāraṇāya yebhuyyena asamatthā evāti. Kasmā panettha yāmādiparisā na gahitāti? Bhusaṃ kāmābhigiddhatāya yonisomanasikāravirahato. Yāmādayo hi uḷāruḷāre kāme paṭisevantā tatthābhigiddhatāya dhammassavanāya sabhāvena cittampi na uppādenti, mahābodhisattānaṃ pana buddhānañca ānubhāvena ākaḍḍhiyamānā kadāci tesaṃ payirupāsanādīni karonti tādise mahāsamaye. Teneva hi vimānavatthudesanāpi tannimittā bahulā nāhosi. Manussānaṃ vasenāyaṃ katā.
ಪರಚಕ್ಕವಾಳೇಸು ಚ ಮನುಸ್ಸಾನಂ ವಿಸೇಸಾಧಿಗಮೋ ನತ್ಥೀತಿ ಪುಚ್ಛತಿ ‘‘ಕಿಂ ಪನ ಭಗವಾ ಅಞ್ಞಾನಿ ಚಕ್ಕವಾಳಾನಿಪಿ ಗಚ್ಛತೀ’’ತಿ। ಇತರೋ ಯದಿಪಿ ತೇಸಂ ಅರಿಯಧಮ್ಮಾಧಿಗಮೋ ನತ್ಥಿ, ವಾಸನಾಯ ಪನ ತತ್ಥ ಗನ್ತ್ವಾ ಧಮ್ಮಂ ದೇಸೇತೀತಿ ದಸ್ಸೇನ್ತೋ ‘‘ಆಮಗಚ್ಛತೀ’’ತಿ ಆಹ। ಕೇಯೂರಂ ನಾನಾವಿಧರತನಪರಿಸಿಬ್ಬಿತಸುವಣ್ಣಜಾಲವಿನದ್ಧಂ ಭುಜಾಭರಣಂ। ಅಙ್ಗದಂ ನಾನಾಗನ್ಧಗನ್ಧಿತಂ, ಕೇವಲಂ ವಾ ಸುವಣ್ಣಮಯಂ ಬಾಹುವಲಯಂ। ಛಿನ್ನಸ್ಸರಾತಿ ದ್ವಿಧಾಭೂತಸ್ಸರಾ (ದೀ॰ ನಿ॰ ಟೀ॰ ೨.೧೭೨) ಗಗ್ಗರಸ್ಸರಾತಿ ಗಗ್ಗರಿಕಾಯ ವಿಯ ಗಗ್ಗರಾಯಮಾನಖರಸ್ಸರಾ (ದೀ॰ ನಿ॰ ಟೀ॰ ೨.೧೭೨; ಅ॰ ನಿ॰ ಟೀ॰ ೩.೮.೬೯)। ಭಾಸನ್ತರನ್ತಿ ತೇಸಂ ಭಾಸಂ (ದೀ॰ ನಿ॰ ಟೀ॰ ೨.೧೭೨; ಅ॰ ನಿ॰ ಟೀ॰ ೩.೮.೬೯) ಸನ್ಧಾಯಾಹ। ‘‘ವೀಮಂಸಾ ಉಪ್ಪಜ್ಜತೀ’’ತಿ ಸಙ್ಖೇಪತೋ ವುತ್ತಂ ವಿವರಿತುಂ ‘‘ಇದಂ ವುತ್ತಂ ಹೋತೀ’’ತಿಆದಿ ವುತ್ತಂ।
Paracakkavāḷesu ca manussānaṃ visesādhigamo natthīti pucchati ‘‘kiṃ pana bhagavā aññāni cakkavāḷānipi gacchatī’’ti. Itaro yadipi tesaṃ ariyadhammādhigamo natthi, vāsanāya pana tattha gantvā dhammaṃ desetīti dassento ‘‘āmagacchatī’’ti āha. Keyūraṃ nānāvidharatanaparisibbitasuvaṇṇajālavinaddhaṃ bhujābharaṇaṃ. Aṅgadaṃ nānāgandhagandhitaṃ, kevalaṃ vā suvaṇṇamayaṃ bāhuvalayaṃ. Chinnassarāti dvidhābhūtassarā (dī. ni. ṭī. 2.172) gaggarassarāti gaggarikāya viya gaggarāyamānakharassarā (dī. ni. ṭī. 2.172; a. ni. ṭī. 3.8.69). Bhāsantaranti tesaṃ bhāsaṃ (dī. ni. ṭī. 2.172; a. ni. ṭī. 3.8.69) sandhāyāha. ‘‘Vīmaṃsāuppajjatī’’ti saṅkhepato vuttaṃ vivarituṃ ‘‘idaṃ vuttaṃ hotī’’tiādi vuttaṃ.
ಸಙ್ಗಮ್ಮಾತಿ ಸಮಾಗನ್ತ್ವಾ। ಆದಿತೋ ಲಾಪೋ ಆಲಾಪೋ, ವಚನಪಟಿವಚನವಸೇನ ಸಮಂ ಲಾಪೋ ಸಲ್ಲಾಪೋ। ಸಮ್ಮಾ, ಸಮಞ್ಞಾ ವಾ ಕಥಾ ಸಂಕಥಾ, ಸಂಕಥಾವ ಸಾಕಚ್ಛಾ।
Saṅgammāti samāgantvā. Ādito lāpo ālāpo, vacanapaṭivacanavasena samaṃ lāpo sallāpo. Sammā, samaññā vā kathā saṃkathā, saṃkathāva sākacchā.
ಅಟ್ಠಪರಿಸವಣ್ಣನಾ ನಿಟ್ಠಿತಾ।
Aṭṭhaparisavaṇṇanā niṭṭhitā.
ಚತುಯೋನಿವಣ್ಣನಾ
Catuyonivaṇṇanā
೧೫೨. ಯವನ್ತಿ ತಾಯ ಸತ್ತಾ ಅಮಿಸ್ಸಿತಾಪಿ ಸಮಾನಜಾತಿತಾಯ ಮಿಸ್ಸಿತಾ ವಿಯ ಹೋನ್ತೀತಿ ಯೋನಿ। ಸಾ ಪನ ಅತ್ಥತೋ ಅಣ್ಡಾದಿಉಪ್ಪತ್ತಿಟ್ಠಾನವಿಸಿಟ್ಠೋ ಖನ್ಧಾನಂ ಭಾಗಸೋ ಪವತ್ತಿವಿಸೇಸೋತಿ ಆಹ ‘‘ಖನ್ಧಕೋಟ್ಠಾಸೋ ಯೋನಿ ನಾಮಾ’’ತಿ। ಅಣ್ಡೇ ಜಾತಾತಿ ಪಠಮಾಯ ಜಾತಿಯಾ ವಸೇನ ವುತ್ತಂ, ದುತಿಯಾಯ ಪನ ಅಣ್ಡತೋ, ಅಣ್ಡೇ ವಾ ಭಿಜ್ಜಮಾನೇ ಜಾತಾತಿ ಏವಮತ್ಥೋ ವೇದಿತಬ್ಬೋ। ತೇನಾಹ ‘‘ಅಭಿನಿಬ್ಭಿಜ್ಜ ಜಾಯನ್ತೀ’’ತಿ। ವಿನಾತಿ ಏತೇಹಿ ಅಣ್ಡಾದೀಹಿ ಬಾಹಿರಪಚ್ಚಯೇಹಿ ವಿನಾ। ಉಪ್ಪತಿತ್ವಾ ವಿಯಾತಿ ಉಪ್ಪಜ್ಜನವಸೇನ ಪತಿತ್ವಾ ವಿಯ। ಬಾಹಿರಪಚ್ಚಯನಿರಪೇಕ್ಖತ್ತಾಯೇವ ವಾ ಉಪಪತನೇ ಸಾಧುಕಾರಿನೋ ಉಪಪಾತಿಕಾ, ತೇ ಏವ ಇಧ ಓಪಪಾತಿಕಾತಿ ವುತ್ತಾ। ಆದಿ-ಸದ್ದೇನ ಗಬ್ಭಮಲೇ ನಿಬ್ಬತ್ತಮಹಾಪದುಮಕುಮಾರಾದೀನಂ ಸಙ್ಗಹೋ। ನಿಜ್ಝಾಮತಣ್ಹಿಕಪೇತಾನಂ ನಿಚ್ಚಂ ದುಕ್ಖಾತುರತಾಯ ಕಾಮಸೇವನಾ ನತ್ಥಿ , ತಸ್ಮಾ ತೇ ಗಬ್ಭಸೇಯ್ಯಕಾ ನ ಹೋನ್ತಿ, ಜಾಲವನ್ತತಾಯ ನ ತಾಸಂ ಕುಚ್ಛಿಯಂ ಗಬ್ಭೋ ಸಣ್ಠಾತಿ, ತಸ್ಮಾ ತೇ ಓಪಪಾತಿಕಾಯೇವ ಸಂಸೇದಜತ್ತಾಯಪಿ ಅಸಮ್ಭವತೋ। ನೇರಯಿಕಾ ವಿಯಾತಿ ನಿದಸ್ಸನಾಪದೇಸೇನ ತೇಸಮ್ಪಿ ಓಪಪಾತಿಕತ್ತಂ ದೀಪೇತಿ। ಅವಸೇಸಾತಿ ನಿಜ್ಝಾಮತಣ್ಹಿಕನೇರಯಿಕೇ ಠಪೇತ್ವಾ ಅವಸೇಸಾ ವಿನಿಪಾತಿಕಾ। ಯಕ್ಖಾನಂ ಚಾತುಮಹಾರಾಜಿಕತಾಯ ಓಪಪಾತಿಕಭಾವೇ ಏವ ಆಪನ್ನೇ ತಂ ನಿವತ್ತೇತುಂ ‘‘ಏವಂ ಯಕ್ಖಾಪೀ’’ತಿ ವುತ್ತಂ। ತಥಾ ಹಿ ತೇ ನ ಭುಮ್ಮದೇವಾ ನ ಚ ವಿನಿಪಾತಿಕಾತಿ।
152. Yavanti tāya sattā amissitāpi samānajātitāya missitā viya hontīti yoni. Sā pana atthato aṇḍādiuppattiṭṭhānavisiṭṭho khandhānaṃ bhāgaso pavattivisesoti āha ‘‘khandhakoṭṭhāso yoni nāmā’’ti. Aṇḍe jātāti paṭhamāya jātiyā vasena vuttaṃ, dutiyāya pana aṇḍato, aṇḍe vā bhijjamāne jātāti evamattho veditabbo. Tenāha ‘‘abhinibbhijja jāyantī’’ti. Vināti etehi aṇḍādīhi bāhirapaccayehi vinā. Uppatitvā viyāti uppajjanavasena patitvā viya. Bāhirapaccayanirapekkhattāyeva vā upapatane sādhukārino upapātikā, te eva idha opapātikāti vuttā. Ādi-saddena gabbhamale nibbattamahāpadumakumārādīnaṃ saṅgaho. Nijjhāmataṇhikapetānaṃ niccaṃ dukkhāturatāya kāmasevanā natthi , tasmā te gabbhaseyyakā na honti, jālavantatāya na tāsaṃ kucchiyaṃ gabbho saṇṭhāti, tasmā te opapātikāyeva saṃsedajattāyapi asambhavato. Nerayikā viyāti nidassanāpadesena tesampi opapātikattaṃ dīpeti. Avasesāti nijjhāmataṇhikanerayike ṭhapetvā avasesā vinipātikā. Yakkhānaṃ cātumahārājikatāya opapātikabhāve eva āpanne taṃ nivattetuṃ ‘‘evaṃ yakkhāpī’’ti vuttaṃ. Tathā hi te na bhummadevā na ca vinipātikāti.
ಚತುಯೋನಿವಣ್ಣನಾ ನಿಟ್ಠಿತಾ।
Catuyonivaṇṇanā niṭṭhitā.
ಪಞ್ಚಗತಿವಣ್ಣನಾ
Pañcagativaṇṇanā
೧೫೩. ಗನ್ತಬ್ಬಾತಿ ಉಪಪಜ್ಜಿತಬ್ಬಾ। ಯಥಾ ಹಿ ಕಮ್ಮಭವೋ ಪರಮತ್ಥತೋ ಅಸತಿಪಿ ಕಾರಕೇ ಪಚ್ಚಯಸಾಮಗ್ಗಿಯಾ ಸಿದ್ಧೋ ತಂಸಮಙ್ಗಿನಾ ಸನ್ತಾನಲಕ್ಖಣೇನ ಸತ್ತೇನ ಕತೋತಿ ವೋಹರೀಯತಿ, ತಥಾ ಉಪಪತ್ತಿಭವಲಕ್ಖಣಾ ಗತಿಯೋ ಪರಮತ್ಥತೋ ಅಸತಿಪಿ ಗಮಕೇ ತಂತಂಕಮ್ಮವಸೇನ ಯೇಸಂ ತಾನಿ ಕಮ್ಮಾನಿ, ತೇಹಿ ಗನ್ತಬ್ಬಾತಿ ವೋಹರೀಯನ್ತೀತಿ। ಏವಂ ಸದ್ದತ್ಥತೋ ಗತಿಂ ದಸ್ಸೇತ್ವಾ ಅತ್ಥುದ್ಧಾರನಯೇನಪಿ ತಂ ದಸ್ಸೇತುಂ ‘‘ಅಪಿಚಾ’’ತಿಆದಿ ವುತ್ತಂ। ಯೇಸು ನಿರಯಾದಿಭೇದೇಸು ಉಪಪತ್ತಿಭವೇಸು ಗತಿ-ಸದ್ದೋ ನಿರೂಳ್ಹೋ, ತತೋ ಅಞ್ಞತ್ಥಾಪಿ ಗತಿಸದ್ದಪ್ಪವತ್ತಿ ಅತ್ಥಿ, ತಂ ಏಕೇನ ಗತಿ-ಸದ್ದೇನ ವಿಸೇಸೇತ್ವಾ ಆಹ ‘‘ಗತಿಗತೀ’’ತಿ ಯಥಾ ‘‘ದುಕ್ಖದುಕ್ಖಂ, (ಸಂ॰ ನಿ॰ ೪.೩೨೭) ರೂಪರೂಪ’’ನ್ತಿ (ವಿಸುದ್ಧಿ॰ ೨.೪೪೯) ಚ। ಉಪ್ಪಾದಾವತ್ಥಾಯ ಗಮನಂ ಉಪಗಮನನ್ತಿ ‘‘ನಿಬ್ಬತ್ತಿಗತೀ’’ತಿ ವುತ್ತಾ। ಗತಿನ್ತಿ ಚಿತ್ತಗತಿಂ। ತೇನಾಹ ‘‘ಅಜ್ಝಾಸಯಗತಿ ನಾಮಾ’’ತಿ, ಅಜ್ಝಾಸಯಪ್ಪವತ್ತೀತಿ ಅತ್ಥೋ। ತದಟ್ಠಕಥಾಯಂ (ಮ॰ ನಿ॰ ಅಟ್ಠ॰ ೨.೫೦೩) ಪನ ‘‘ಗತಿನ್ತಿ ನಿಪ್ಫತ್ತಿ’’ನ್ತಿ ಅತ್ಥೋ ವುತ್ತೋ। ಬ್ರಹ್ಮನಿಮನ್ತನಸುತ್ತೇ (ಮ॰ ನಿ॰ ೧.೫೦೩) ಹಿ ಅಯಂ ಪಾಳೀತಿ। ಜುತಿನ್ತಿ ಆನುಭಾವಂ। ವಿಭವೋತಿ ವಿನಾಸೋ। ಸೋ ಹಿ ವಿಗಮೋತಿ ಅತ್ಥೇನ ಗತಿ। ತೇನೇವ ನಿಬ್ಬಾನಂ ಅರಹತೋ ಗತೀತಿ (ಪರಿ॰ ೩೩೯) ಅನುಪಾದಿಸೇಸನಿಬ್ಬಾನಂ ಅರಹತೋ ಗತಿ ವಿಗಮೋ ವಿಭವೋತಿ ಅನೇಕತ್ಥತ್ತಾ ಧಾತೂನಂ। ದ್ವೇಯೇವ ಗತಿಯೋತಿ ದ್ವೇವ ನಿಪ್ಫತ್ತಿಯೋತಿ ಅತ್ಥೋತಿ ಆಹ ‘‘ಅಯಂ ನಿಪ್ಫತ್ತಿಗತಿ ನಾಮಾ’’ತಿ।
153.Gantabbāti upapajjitabbā. Yathā hi kammabhavo paramatthato asatipi kārake paccayasāmaggiyā siddho taṃsamaṅginā santānalakkhaṇena sattena katoti voharīyati, tathā upapattibhavalakkhaṇā gatiyo paramatthato asatipi gamake taṃtaṃkammavasena yesaṃ tāni kammāni, tehi gantabbāti voharīyantīti. Evaṃ saddatthato gatiṃ dassetvā atthuddhāranayenapi taṃ dassetuṃ ‘‘apicā’’tiādi vuttaṃ. Yesu nirayādibhedesu upapattibhavesu gati-saddo nirūḷho, tato aññatthāpi gatisaddappavatti atthi, taṃ ekena gati-saddena visesetvā āha ‘‘gatigatī’’ti yathā ‘‘dukkhadukkhaṃ, (saṃ. ni. 4.327) rūparūpa’’nti (visuddhi. 2.449) ca. Uppādāvatthāya gamanaṃ upagamananti ‘‘nibbattigatī’’ti vuttā. Gatinti cittagatiṃ. Tenāha ‘‘ajjhāsayagati nāmā’’ti, ajjhāsayappavattīti attho. Tadaṭṭhakathāyaṃ (ma. ni. aṭṭha. 2.503) pana ‘‘gatinti nipphatti’’nti attho vutto. Brahmanimantanasutte (ma. ni. 1.503) hi ayaṃ pāḷīti. Jutinti ānubhāvaṃ. Vibhavoti vināso. So hi vigamoti atthena gati. Teneva nibbānaṃ arahato gatīti (pari. 339) anupādisesanibbānaṃ arahato gati vigamo vibhavoti anekatthattā dhātūnaṃ. Dveyeva gatiyoti dveva nipphattiyoti atthoti āha ‘‘ayaṃ nipphattigati nāmā’’ti.
ಯಸ್ಸ ಉಪ್ಪಜ್ಜತಿ, ತಂ ಬ್ರೂಹೇನ್ತೋ ಏವ ಉಪ್ಪಜ್ಜತೀತಿ ಅಯೋ, ಸುಖಂ। ನತ್ಥಿ ಏತ್ಥ ಅಯೋತಿ ನಿರಯೋ। ತತೋ ಏವ ರಮಿತಬ್ಬಂ ಅಸ್ಸಾದೇತಬ್ಬಂ ತತ್ಥ ನತ್ಥೀತಿ ದಸ್ಸೇನ್ತೋ ಆಹ ‘‘ನಿರತಿಅತ್ಥೇನ ನಿರಸ್ಸಾದಟ್ಠೇನ ನಿರಯೋ’’ತಿ। ತಿರಿಯಂ ಅಞ್ಚಿತಾತಿ ದೇವಮನುಸ್ಸಾದಯೋ ವಿಯ ಉದ್ಧಂ ದೀಘಾ ಅಹುತ್ವಾ ತಿರಿಯಂ ದೀಘಾಭಿ ಅತ್ಥೋ। ಪಕಟ್ಠತೋ ಸುಖತೋ ಅಯನಂ ಅಪಗಮೋ ಪೇಚ್ಚಭಾವೋ, ತಂ ಪೇಚ್ಚಭಾವಂ ಪತ್ತಾನಂ ವಿಸಯೋತಿ ಪೇತಯೋನಿಮೇವ ವದತಿ। ಮನಸೋ ಉಸ್ಸನ್ನತ್ತಾತಿ ಸತಿಸೂರಭಾವಬ್ರಹ್ಮಚರಿಯಯೋಗ್ಯತಾದಿಗುಣವಸೇನ ಉಪಚಿತಮಾನಸತಾಯ ಉಕ್ಕಟ್ಠಗುಣಚಿತ್ತತಾಯಾತಿ ಅತ್ತೋ। ಅಯಂ ಪನತ್ಥೋ ನಿಪ್ಪರಿಯಾಯತೋ ಜಮ್ಬುದೀಪವಾಸೀವಸೇನ ವೇದಿತಬ್ಬೋ। ಯಥಾಹ – ‘‘ತೀಹಿ, ಭಿಕ್ಖವೇ, ಠಾನೇಹಿ ಜಮ್ಬುದೀಪಿಕಾ ಮನುಸ್ಸಾ ಉತ್ತರಕುರುಕೇ ಮನುಸ್ಸೇ ಅಧಿಗ್ಗಣ್ಹನ್ತಿ ದೇವೇ ಚ ತಾವತಿಂಸೇ। ಕತಮೇಹಿ ತೀಹಿ? ಸೂರಾ ಸತಿಮನ್ತೋ ಇಧ ಬ್ರಹ್ಮಚರಿಯವಾಸೋ’’ತಿ (ಅ॰ ನಿ॰ ೯.೨೧)। ತೇಹಿ ಪನ ಸಮಾನರೂಪಾದಿತಾಯ ಸದ್ಧಿಂ ಪರಿತ್ತದೀಪವಾಸೀಹಿ ಇತರಮಹಾದೀಪವಾಸಿನೋಪಿ ಮನುಸ್ಸಾತೇವ ಪಞ್ಞಾಯಿಂಸು। ಲೋಕಿಯಾ ಪನ ‘‘ಮನುನೋ ಅಪಚ್ಚಭಾವೇನ ಮನುಸ್ಸಾ’’ತಿ ವದನ್ತಿ। ಅಯಮೇತ್ಥ ಸಙ್ಖೇಪೋ, ವಿತ್ಥಾರೋ ಪನ ಪರಮತ್ಥದೀಪನಿಯಂ ವಿಮಾನವತ್ಥುಸಂವಣ್ಣನಾಯಂ (ವಿ॰ ವ॰ ಅಟ್ಠ॰ ೩) ವುತ್ತನಯೇನ ಗಹೇತಬ್ಬೋ। ಆನುಭಾವೇಹೀತಿ ದೇವಾನುಭಾವಸಙ್ಖಾತೇಹಿ ಇದ್ಧಿವಿಸೇಸೇಹಿ। ತತ್ಥ ಕಾಮಾ ದೇವಾ ಕಾಮಗುಣೇಹಿ ಚೇವ ಇದ್ಧಿವಿಸೇಸೇಹಿ ಚ ಇತರೇ ಇದ್ಧಿವಿಸೇಸೇಹೇವ ದಿಬ್ಬನ್ತಿ ಕೀಳನ್ತಿ ಜೋತನ್ತಿ, ಸರಣನ್ತಿ ವಾ ಗಮ್ಮನ್ತಿ, ಅಭಿತ್ಥವಿಯನ್ತೀತಿ ವಾ ದೇವಾತಿ।
Yassa uppajjati, taṃ brūhento eva uppajjatīti ayo, sukhaṃ. Natthi ettha ayoti nirayo. Tato eva ramitabbaṃ assādetabbaṃ tattha natthīti dassento āha ‘‘niratiatthena nirassādaṭṭhena nirayo’’ti. Tiriyaṃ añcitāti devamanussādayo viya uddhaṃ dīghā ahutvā tiriyaṃ dīghābhi attho. Pakaṭṭhato sukhato ayanaṃ apagamo peccabhāvo, taṃ peccabhāvaṃ pattānaṃ visayoti petayonimeva vadati. Manaso ussannattāti satisūrabhāvabrahmacariyayogyatādiguṇavasena upacitamānasatāya ukkaṭṭhaguṇacittatāyāti atto. Ayaṃ panattho nippariyāyato jambudīpavāsīvasena veditabbo. Yathāha – ‘‘tīhi, bhikkhave, ṭhānehi jambudīpikā manussā uttarakuruke manusse adhiggaṇhanti deve ca tāvatiṃse. Katamehi tīhi? Sūrā satimanto idha brahmacariyavāso’’ti (a. ni. 9.21). Tehi pana samānarūpāditāya saddhiṃ parittadīpavāsīhi itaramahādīpavāsinopi manussāteva paññāyiṃsu. Lokiyā pana ‘‘manuno apaccabhāvena manussā’’ti vadanti. Ayamettha saṅkhepo, vitthāro pana paramatthadīpaniyaṃ vimānavatthusaṃvaṇṇanāyaṃ (vi. va. aṭṭha. 3) vuttanayena gahetabbo. Ānubhāvehīti devānubhāvasaṅkhātehi iddhivisesehi. Tattha kāmā devā kāmaguṇehi ceva iddhivisesehi ca itare iddhiviseseheva dibbanti kīḷanti jotanti, saraṇanti vā gammanti, abhitthaviyantīti vā devāti.
ತಿರಚ್ಛಾನಯೋನಿಞ್ಚಾತಿಆದೀಸೂತಿ ಏತ್ಥ ತಿರಚ್ಛಾನಯೋನಿಪೇತ್ತಿವಿಸಯಗ್ಗಹಣೇನ ಖನ್ಧಾನಂ ಏವ ಗಹಣಂ ತೇಸಂ ತಾದಿಸಸ್ಸ ಪರಿಚ್ಛಿನ್ನಸ್ಸ ಓಕಾಸಸ್ಸ ಅಭಾವತೋ। ಯತ್ಥ ವಾ ತೇ ಅರಞ್ಞಸಮುದ್ದಪಬ್ಬತಾದಿಕೇ ನಿಬದ್ಧವಾಸಂ ವಸನ್ತಿ, ತಾದಿಸಸ್ಸ ಠಾನಸ್ಸ ವಸೇನ ಓಕಾಸೋಪಿ ಗಹೇತಬ್ಬೋ। ನಿರಯೂಪಗಾದೀಹಿ ಸತ್ತೇಹಿ ಮಗ್ಗಿತಬ್ಬತೋ ಮಗ್ಗೋ ಪಟಿಪಜ್ಜಿತಬ್ಬಾ ಪಟಿಪದಾ ಚಾತಿ ತಂ ತಂ ಕಮ್ಮಮೇವ ವುತ್ತನ್ತಿ ಆಹ ‘‘ಉಭಯೇನಪೀ’’ತಿಆದಿ। ಯಥಾ ಚ ಪಟಿಪನ್ನೋತಿ ಇಮಿನಾ ತಸ್ಸ ಕಮ್ಮಸ್ಸ ಕತೂಪಚಿತಾಕಾರಮಾಹ। ಏತ್ಥ ಚ ನಿರಯಗಾಮಿಞ್ಚ ಮಗ್ಗಂ ನಿರಯಗಾಮಿನಿಞ್ಚ ಪಟಿಪದನ್ತಿ ಇಮಿನಾ ಸಾಧಾರಣತೋ ನಿರಯಸಂವತ್ತನಿಯಂ ಕಮ್ಮಂ ವತ್ವಾ ಪುನ ತಂ ತಂ ಸನ್ತಾನಪತಿತತಾಯ ಅಸಾಧಾರಣತಂ ದಸ್ಸೇತುಂ ‘‘ಯಥಾಪಟಿಪನ್ನೋ’’ತಿಆದಿ ವುತ್ತನ್ತಿ ದಟ್ಠಬ್ಬಂ। ವಿನಿಪತನ್ತೀತಿ ವಿವಸಾ, ವಿರೂಪಂ ವಾ ನಿಪತನ್ತಿ। ಕಸ್ಮಾ ಪನೇತ್ಥ ಪಞ್ಚಗತಿಪರಿಚ್ಛೇದಕಞಾಣಂ ದಸ್ಸೇನ್ತೋ ಭಗವಾ ‘‘ನಿಬ್ಬಾನಞ್ಚಾಹ’’ನ್ತಿಆದಿಮಾಹಾತಿ ಅನುಯೋಗಂ ಸನ್ಧಾಯಾಹ ‘‘ಇದಂ ಪನಾ’’ತಿಆದಿ। ನ ಹಿ ಭಗವಾ ಅತ್ತನೋ ಬುದ್ಧಸುಬುದ್ಧತಂ ವಿಭಾವೇನ್ತೋ ಸಾವಸೇಸಂ ಕತ್ವಾ ದೇಸನಂ ದೇಸೇತಿ।
Tiracchānayoniñcātiādīsūti ettha tiracchānayonipettivisayaggahaṇena khandhānaṃ eva gahaṇaṃ tesaṃ tādisassa paricchinnassa okāsassa abhāvato. Yattha vā te araññasamuddapabbatādike nibaddhavāsaṃ vasanti, tādisassa ṭhānassa vasena okāsopi gahetabbo. Nirayūpagādīhi sattehi maggitabbato maggo paṭipajjitabbā paṭipadā cāti taṃ taṃ kammameva vuttanti āha ‘‘ubhayenapī’’tiādi. Yathā ca paṭipannoti iminā tassa kammassa katūpacitākāramāha. Ettha ca nirayagāmiñca maggaṃ nirayagāminiñca paṭipadanti iminā sādhāraṇato nirayasaṃvattaniyaṃ kammaṃ vatvā puna taṃ taṃ santānapatitatāya asādhāraṇataṃ dassetuṃ ‘‘yathāpaṭipanno’’tiādi vuttanti daṭṭhabbaṃ. Vinipatantīti vivasā, virūpaṃ vā nipatanti. Kasmā panettha pañcagatiparicchedakañāṇaṃ dassento bhagavā ‘‘nibbānañcāha’’ntiādimāhāti anuyogaṃ sandhāyāha ‘‘idaṃ panā’’tiādi. Na hi bhagavā attano buddhasubuddhataṃ vibhāvento sāvasesaṃ katvā desanaṃ deseti.
ಪಞ್ಚಗತಿವಣ್ಣನಾ ನಿಟ್ಠಿತಾ।
Pañcagativaṇṇanā niṭṭhitā.
ಞಾಣಪವತ್ತಾಕಾರವಣ್ಣನಾ
Ñāṇapavattākāravaṇṇanā
೧೫೪. ಞಾಣಪ್ಪವತ್ತಾಕಾರನ್ತಿ ಞಾಣಸ್ಸ ಪವತ್ತಿಆಕಾರಂ, ಞಾಣಸ್ಸ ವಾ ಪವತ್ತಿಪಕಾರಂ। ಏಕನ್ತದುಕ್ಖಾತಿ ಏಕನ್ತೇನ ದುಕ್ಖಾ ಅಚ್ಚನ್ತದುಕ್ಖಾ। ತಾ ಪನ ಸಬ್ಬಕಾಲಂ ದುಕ್ಖಾ ಸುಖಾಲಯೇನಪಿ ಅಸಮ್ಮಿಸ್ಸಾತಿ ದಸ್ಸೇನ್ತೋ ಆಹ ‘‘ನಿಚ್ಚದುಕ್ಖಾ ನಿರನ್ತರದುಕ್ಖಾ’’ತಿ। ಬಹಲಾತಿ ಅತನುಕಾ, ಮಹನ್ತಾತಿ ಅತ್ಥೋ । ತಿಬ್ಬಾತಿ ವಾ ತಿಖಿಣಾ। ಖರಾತಿ ಕಕ್ಖಳಾ। ಕಟುಕಾತಿ ವಾ ಅನಿಟ್ಠಾ। ಕಸ್ಸತಿ ಖಣೀಯತೀತಿ ಕಾಸು, ಆವಾಟೋ। ಕಸೀಯತಿ ಚೀಯತೀತಿ ಕಾಸು, ರಾಸಿ। ಫುನನ್ತೀತಿ ದ್ವೀಹಿ ಹತ್ಥೇಹಿ ಅಙ್ಗಾರಾನಿ ಉಕ್ಖಿಪಿತ್ವಾ ಪಟಿವಾತಂ ಓಫುನನ್ತಿ, ತೇನ ತೇಸಂ ಸಕಲಸರೀರಂ ಡಯ್ಹತಿ। ತೇನಾಹ ‘‘ಪರಿದಡ್ಢಗತ್ತಾ’’ತಿ। ಪುರಿಸಪ್ಪಮಾಣಂ ಪೋರಿಸಂ। ಏಕಪಥೇನೇವಾತಿ ಏಕಮಗ್ಗಭೂತೇನೇವ। ಅನುಕ್ಕಮನೀಯೇನಾತಿ ಉಕ್ಕಮಿತುಂ ಅಪಕ್ಕಮಿತುಂ ಅಸಕ್ಕುಣೇಯ್ಯೇನ।
154.Ñāṇappavattākāranti ñāṇassa pavattiākāraṃ, ñāṇassa vā pavattipakāraṃ. Ekantadukkhāti ekantena dukkhā accantadukkhā. Tā pana sabbakālaṃ dukkhā sukhālayenapi asammissāti dassento āha ‘‘niccadukkhā nirantaradukkhā’’ti. Bahalāti atanukā, mahantāti attho . Tibbāti vā tikhiṇā. Kharāti kakkhaḷā. Kaṭukāti vā aniṭṭhā. Kassati khaṇīyatīti kāsu, āvāṭo. Kasīyati cīyatīti kāsu, rāsi. Phunantīti dvīhi hatthehi aṅgārāni ukkhipitvā paṭivātaṃ ophunanti, tena tesaṃ sakalasarīraṃ ḍayhati. Tenāha ‘‘paridaḍḍhagattā’’ti. Purisappamāṇaṃ porisaṃ. Ekapathenevāti ekamaggabhūteneva. Anukkamanīyenāti ukkamituṃ apakkamituṃ asakkuṇeyyena.
ನನು ಚ ದಿಬ್ಬಚಕ್ಖುಞಾಣಂ ಪಚ್ಚುಪ್ಪನ್ನವಣ್ಣಾರಮ್ಮಣಂ, ತೇನ ಕಥಂ ರೂಪನ್ತರಸಮಙ್ಗಿಂ ನಿರಯೇ ನಿಬ್ಬತ್ತಸತ್ತಂ ‘‘ಅಯಂ ಸೋ’’ತಿ ಜಾನಾತೀತಿ ಚೋದನಂ ಸನ್ಧಾಯಾಹ ‘‘ತತ್ಥ ಕಿಞ್ಚಾಪೀ’’ತಿಆದಿ। ಯಥಾಕಮ್ಮೂಪಗಞಾಣೇನ ‘‘ಅಯಂ ಸೋ’’ತಿ ಸಲ್ಲಕ್ಖೇತಿ, ತಸ್ಸ ಪನ ದಿಬ್ಬಚಕ್ಖುಆನುಭಾವೇನ ಪತ್ತಬ್ಬತ್ತಾ ‘‘ದಿಬ್ಬಚಕ್ಖುಬಲಂ ನಾಮ ಏತನ್ತಿ ವುತ್ತಂ।
Nanu ca dibbacakkhuñāṇaṃ paccuppannavaṇṇārammaṇaṃ, tena kathaṃ rūpantarasamaṅgiṃ niraye nibbattasattaṃ ‘‘ayaṃ so’’ti jānātīti codanaṃ sandhāyāha ‘‘tattha kiñcāpī’’tiādi. Yathākammūpagañāṇena ‘‘ayaṃ so’’ti sallakkheti, tassa pana dibbacakkhuānubhāvena pattabbattā ‘‘dibbacakkhubalaṃ nāma etanti vuttaṃ.
ಪುರಿಮನಯೇನೇವಾತಿ ‘‘ಗೂಥಕೂಪೋ ವಿಯ ತಿರಚ್ಛಾನಯೋನಿ ದಟ್ಠಬ್ಬಾ’’ತಿಆದಿನಾ ಅಙ್ಗಾರಕಾಸುಪಮಾಯಂ ವುತ್ತನಯೇನೇವ। ದುಕ್ಖಾ ವೇದನಾ ಬಹುಲಾ ಏತಾಸೂತಿ ದುಕ್ಖಬಹುಲಾ। ಬಹಲಪತ್ತಪಲಾಸೋತಿ ಅವಿರಳತನುವಿಪುಲಪಣ್ಣೋ। ಸುಖಪರಿಭೋಗಂ ಮಹಾಪಾಸಾದಂ ದಸ್ಸೇತುಂ ‘‘ದೀಘಪಾಸಾದೋ’’ತಿ ವುತ್ತಂ ಚತುರಸ್ಸಪಾಸಾದಾದೀನಂ ಖುದ್ದಕತ್ತಾ। ಉಣ್ಣಾಮಯಅತ್ಥರಣೇನಾತಿ ಉಣ್ಣಾಮಯಲೋಹಿತಅತ್ಥರಣೇನ। ಉತ್ತರಂ ಉಪರಿಭಾಗಂ ಛಾದೇತೀತಿ ಉತ್ತರಚ್ಛದೋ, ವಿತಾನಂ। ತಂ ಪನ ಲೋಹಿತವಿತಾನಂ ಇಧಾಧಿಪ್ಪೇತನ್ತಿ ‘‘ರತ್ತವಿತಾನೇನಾ’’ತಿ ವುತ್ತಂ।
Purimanayenevāti ‘‘gūthakūpo viya tiracchānayoni daṭṭhabbā’’tiādinā aṅgārakāsupamāyaṃ vuttanayeneva. Dukkhā vedanā bahulā etāsūti dukkhabahulā. Bahalapattapalāsoti aviraḷatanuvipulapaṇṇo. Sukhaparibhogaṃ mahāpāsādaṃ dassetuṃ ‘‘dīghapāsādo’’ti vuttaṃ caturassapāsādādīnaṃ khuddakattā. Uṇṇāmayaattharaṇenāti uṇṇāmayalohitaattharaṇena. Uttaraṃ uparibhāgaṃ chādetīti uttaracchado, vitānaṃ. Taṃ pana lohitavitānaṃ idhādhippetanti ‘‘rattavitānenā’’ti vuttaṃ.
ಅಪರಭಾಗಯೋಜನಾತಿ ಪಾಳಿಯಂ ‘‘ಅಪರೇನ ಸಮಯೇನಾ’’ತಿ ವುತ್ತಸ್ಸ ಅಪರಭಾಗಸ್ಸ ಯೋಜನಾ। ಸಾ ಪನ ಏಕದೇಸೇನ ಪುರಿಮಭಾಗೇ ವುತ್ತೇ ಏವ ಸುವಿಞ್ಞೇಯ್ಯಾ ಹೋತೀತಿ ‘‘ಯಥಾ ಸೋ’’ತಿಆದಿಮಾಹ। ಮಗ್ಗಾರುಳ್ಹಮೇವಾತಿ ಮಗ್ಗಂ ಉಪಗತಮತ್ತಮೇವ।
Aparabhāgayojanāti pāḷiyaṃ ‘‘aparena samayenā’’ti vuttassa aparabhāgassa yojanā. Sā pana ekadesena purimabhāge vutte eva suviññeyyā hotīti ‘‘yathā so’’tiādimāha. Maggāruḷhamevāti maggaṃ upagatamattameva.
ನಿಯಮಾಭಾವಾತಿ ‘‘ದಿಬ್ಬಚಕ್ಖುನಾವ ಪಸ್ಸತೀ’’ತಿ ನಿಯಮಸ್ಸ ಅಭಾವಾ। ‘‘ದಿಬ್ಬಚಕ್ಖುನಾಪಿ ಪಸ್ಸಿಸ್ಸತೀ’’ತಿ ಇದಂ ನ ಅನುತ್ತರಸುಖಾನುಭವನಸ್ಸ ದಿಬ್ಬಚಕ್ಖುಗೋಚರತ್ತಾ ವುತ್ತಂ, ಅನಾಗತಸ್ಸ ಪನ ತಸ್ಸ ದಿಬ್ಬಚಕ್ಖುಪರಿಭಣ್ಡಭೂತೇನ ಅನಾಗತಂಸಞಾಣೇನ ದಸ್ಸನಮೇವಾತಿ ಕಾರಣೂಪಚಾರೇನ ವುತ್ತಂ। ಪಾಳಿಯಂ ಪನ ‘‘ಚೇತಸಾ ಚೇತೋ ಪರಿಚ್ಚ ಪಜಾನಾಮಿ’’ಚ್ಚೇವ ವುತ್ತಂ। ‘‘ಅತ್ಥತೋ ಪನ ನಾನಾ ಹೋತೀ’’ತಿ ಸಙ್ಖೇಪತೋ ವುತ್ತಮತ್ಥಂ ವಿವರಿತುಂ ‘‘ದೇವಲೋಕಸುಖಂ ಹೀ’’ತಿಆದಿಂ ವತ್ವಾ ಯಥಾದಸ್ಸಿತಉಪಮಾಹಿಪಿ ಅಯಮತ್ಥೋ ಪಾಕಟೋ ಏವಾತಿ ದಸ್ಸೇನ್ತೋ ‘‘ಉಪಮಾಯಮ್ಪೀ’’ತಿಆದಿಮಾಹ। ಗೋತ್ರಭುಞಾಣುಪ್ಪಾದತೋ ಪಟ್ಠಾಯ ನಿರೋಧಂ ಪಸ್ಸಿತ್ವಾ ಉಪ್ಪನ್ನಮಗ್ಗಫಲಪಚ್ಚವೇಕ್ಖಣವಸೇನ ಚೇವ ಪರತೋ ಫಲಸಮಾಪತ್ತಿಸಮಾಪಜ್ಜನವಸೇನ ಚ ಅರಿಯಸಾವಕೋ ನಿರೋಧೇ ಸಯಿತೋ ವಿಯ ಹೋತಿ ತದಪಸ್ಸಯೇನೇವ ಪವತ್ತನತೋತಿ ಆಹ ‘‘ನಿರೋಧಸಯನವರಗತ’’ನ್ತಿ। ತೇನಾಹ ‘‘ನಿಬ್ಬಾನಾ…ಪೇ॰… ಪಸ್ಸತೀ’’ತಿ।
Niyamābhāvāti ‘‘dibbacakkhunāva passatī’’ti niyamassa abhāvā. ‘‘Dibbacakkhunāpi passissatī’’ti idaṃ na anuttarasukhānubhavanassa dibbacakkhugocarattā vuttaṃ, anāgatassa pana tassa dibbacakkhuparibhaṇḍabhūtena anāgataṃsañāṇena dassanamevāti kāraṇūpacārena vuttaṃ. Pāḷiyaṃ pana ‘‘cetasā ceto paricca pajānāmi’’cceva vuttaṃ. ‘‘Atthato pana nānā hotī’’ti saṅkhepato vuttamatthaṃ vivarituṃ ‘‘devalokasukhaṃ hī’’tiādiṃ vatvā yathādassitaupamāhipi ayamattho pākaṭo evāti dassento ‘‘upamāyampī’’tiādimāha. Gotrabhuñāṇuppādato paṭṭhāya nirodhaṃ passitvā uppannamaggaphalapaccavekkhaṇavasena ceva parato phalasamāpattisamāpajjanavasena ca ariyasāvako nirodhe sayito viya hoti tadapassayeneva pavattanatoti āha ‘‘nirodhasayanavaragata’’nti. Tenāha ‘‘nibbānā…pe… passatī’’ti.
ಞಾಣಪವತ್ತಾಕಾರವಣ್ಣನಾ ನಿಟ್ಠಿತಾ।
Ñāṇapavattākāravaṇṇanā niṭṭhitā.
ದುಕ್ಕರಕಾರಿಕಾದಿಸುದ್ಧಿವಣ್ಣನಾ
Dukkarakārikādisuddhivaṇṇanā
೧೫೫. ಪುಚ್ಛಾನುಸನ್ಧಿಆದಿಅನುಸನ್ಧಿತ್ತಯತೋ ಅಞ್ಞತ್ತಾ ‘‘ಪಾಟಿಯೇಕ್ಕಂ ಅನುಸನ್ಧಿವಸೇನಾ’’ತಿ ವುತ್ತಂ। ನ ಕೇವಲಂ ‘‘ದುಕ್ಕರಕಾರಿಕಾಯ ಸುದ್ಧಿ ಹೋತೀ’’ತಿ ಏವಂಲದ್ಧಿಕೋ ಏವ, ಅಥ ಖೋ ದುಕ್ಕರಚಾರೀಸು ಅಭಿಪ್ಪಸನ್ನೋತಿ ದಸ್ಸೇತುಂ ‘‘ಅಪಿಚಾ’’ತಿಆದಿ ವುತ್ತಂ। ಚತುಕುಣ್ಡಿಕೋತಿ ದ್ವೀಹಿ ಪಾದೇಹಿ ಹತ್ಥೇಹೀತಿ ಚತೂಹಿ ಅಙ್ಗೇಹಿ ಕುಣ್ಡನಕೋ ಆಹಿಣ್ಡನಕೋ। ಛಮಾನಿಕಿಣ್ಣನ್ತಿ ಭೂಮಿಯಂ ಖಿತ್ತಂ। ಭಕ್ಖಸನ್ತಿ ಆಹಾರಂ।
155. Pucchānusandhiādianusandhittayato aññattā ‘‘pāṭiyekkaṃ anusandhivasenā’’ti vuttaṃ. Na kevalaṃ ‘‘dukkarakārikāya suddhi hotī’’ti evaṃladdhiko eva, atha kho dukkaracārīsu abhippasannoti dassetuṃ ‘‘apicā’’tiādi vuttaṃ. Catukuṇḍikoti dvīhi pādehi hatthehīti catūhi aṅgehi kuṇḍanako āhiṇḍanako. Chamānikiṇṇanti bhūmiyaṃ khittaṃ. Bhakkhasanti āhāraṃ.
ಮಚ್ಛರಿಯಮಲಾದಿಪಾಪಧಮ್ಮವಿಗಮನತೋ ಮೇತ್ತಾದಿಗುಣಾನುಬ್ರೂಹನತೋ ಚ ಬ್ರಹ್ಮಂ ಸೇಟ್ಠಂ ಚರಿಯನ್ತಿ ಬ್ರಹ್ಮಚರಿಯಂ, ದಾನಂ। ತಥಾ ಹಿ ತಂ ಭಗವತಾ ಪಣ್ಡಿತಪಞ್ಞತ್ತಂ ವುತ್ತಂ। ಏವಂ ಸೇಸೇಸುಪಿ ಯಥಾರಹಂ ಬ್ರಹ್ಮಚರಿಯಪರಿಯಾಯೋ ನಿದ್ಧಾರೇತ್ವಾ ವತ್ತಬ್ಬೋ। ಕಿನ್ತಿ ಕೀದಿಸಂ। ವತನ್ತಿ ಸಮಾದಿನ್ನವತಂ। ಸುಚಿಣ್ಣಸ್ಸಾತಿ ಸುಟ್ಠು ಚಿಣ್ಣಸ್ಸ ಪುಞ್ಞಸ್ಸ। ಇದ್ಧೀತಿ ಆನುಭಾವೋ। ಜುತೀತಿ ವತ್ಥಾಭರಣೋಭಾಸಸಮುಜ್ಜಲಾ ಸರೀರಪ್ಪಭಾ। ಬಲವೀರಿಯೂಪಪತ್ತೀತಿ ಕಾಯಬಲೇನ ಚೇವ ಉಸ್ಸಾಹೇನ ಚ ಸಮನ್ನಾಗಮೋ।
Macchariyamalādipāpadhammavigamanato mettādiguṇānubrūhanato ca brahmaṃ seṭṭhaṃ cariyanti brahmacariyaṃ, dānaṃ. Tathā hi taṃ bhagavatā paṇḍitapaññattaṃ vuttaṃ. Evaṃ sesesupi yathārahaṃ brahmacariyapariyāyo niddhāretvā vattabbo. Kinti kīdisaṃ. Vatanti samādinnavataṃ. Suciṇṇassāti suṭṭhu ciṇṇassa puññassa. Iddhīti ānubhāvo. Jutīti vatthābharaṇobhāsasamujjalā sarīrappabhā. Balavīriyūpapattīti kāyabalena ceva ussāhena ca samannāgamo.
ತೇನ ಪಾಣಿ ಕಾಮದದೋತಿ ತೇನ ಅದ್ಧಿಕಾನಂ ಉಪಗಚ್ಛನ್ತಾನಂ ಹತ್ಥಂ ಪಸಾರೇತ್ವಾ ಅಸಯ್ಹಸೇಟ್ಠಿನೋ ದಾನಟ್ಠಾನದಸ್ಸನಮಯೇನ ಪುಞ್ಞೇನ ಇದಾನಿ ಮಯ್ಹಂ ಹತ್ಥೋ ಕಪ್ಪರುಕ್ಖೋ ವಿಯ ಕಾಮದದೋ ಇಚ್ಛಿತಿಚ್ಛಿತದಾಯೀ, ಕಾಮದದೋ ಹೋನ್ತೋ ಚ ಮಧುಸ್ಸವೋ ಇಟ್ಠವತ್ಥುವಿಸ್ಸಜ್ಜನಕೋ ಜಾತೋ। ತೇನ ಮೇ ಬ್ರಹ್ಮಚರಿಯೇನಾತಿ ತೇನ ಮಮ ಯಥಾವುತ್ತಕಾಯವೇಯ್ಯಾವಟಿಯಕಮ್ಮಸಙ್ಖಾತೇನ ಸೇಟ್ಠಚರಿಯೇನ। ಪುಞ್ಞನ್ತಿ ಪುಞ್ಞಫಲಂ। ತಮ್ಪಿ ಹಿ ಪುಜ್ಜಸಭಾವತೋ, ಉತ್ತರಪದಲೋಪೇನ ವಾ ‘‘ಏವಮಿದಂ ಪುಞ್ಞಂ ಪವಡ್ಢತೀ’’ತಿಆದೀಸು (ದೀ॰ ನಿ॰ ೩.೮೦) ‘‘ಪುಞ್ಞ’’ನ್ತಿ ವುಚ್ಚತಿ।
Tena pāṇi kāmadadoti tena addhikānaṃ upagacchantānaṃ hatthaṃ pasāretvā asayhaseṭṭhino dānaṭṭhānadassanamayena puññena idāni mayhaṃ hattho kapparukkho viya kāmadado icchiticchitadāyī, kāmadado honto ca madhussavo iṭṭhavatthuvissajjanako jāto. Tena me brahmacariyenāti tena mama yathāvuttakāyaveyyāvaṭiyakammasaṅkhātena seṭṭhacariyena. Puññanti puññaphalaṃ. Tampi hi pujjasabhāvato, uttarapadalopena vā ‘‘evamidaṃ puññaṃ pavaḍḍhatī’’tiādīsu (dī. ni. 3.80) ‘‘puñña’’nti vuccati.
ಪಞ್ಚ ಸಿಕ್ಖಾಪದಾನಿ ಸಮಾಹಟಾನಿ ಪಞ್ಚಸಿಕ್ಖಾಪದಂ ಯಥಾ ‘‘ತಿಭವಂ, ತಿಸಕಟ’’ನ್ತಿ ಚ। ಬ್ರಹ್ಮಚರಿಯಸ್ಮಿನ್ತಿ ಧಮ್ಮದೇಸನಾಯ। ಸಾ ಹಿ ವಿನೇಯ್ಯಾನಂ ಬ್ರಹ್ಮಭಾವಾವಹನತೋ ಬ್ರಹ್ಮಂ ಸೇಟ್ಠಂ ಚರಿಯಂ, ಬ್ರಹ್ಮುನೋ ವಾ ಭಗವತೋ ವಾಚಸಿಕಂ ಚರಿಯನ್ತಿ ‘‘ಬ್ರಹ್ಮಚರಿಯ’’ನ್ತಿ ವುಚ್ಚತಿ।
Pañca sikkhāpadāni samāhaṭāni pañcasikkhāpadaṃ yathā ‘‘tibhavaṃ, tisakaṭa’’nti ca. Brahmacariyasminti dhammadesanāya. Sā hi vineyyānaṃ brahmabhāvāvahanato brahmaṃ seṭṭhaṃ cariyaṃ, brahmuno vā bhagavato vācasikaṃ cariyanti ‘‘brahmacariya’’nti vuccati.
ಸಹಸ್ಸಂ ಮಚ್ಚುಹಾಯಿನನ್ತಿ ಸಹಸ್ಸಮತ್ತಾ ಅರಹತ್ತಸಮಧಿಗಮೇನ ಮಚ್ಚುವಿಸಯಾತಿಕ್ಕಮೇನ ಮಚ್ಚುಪಹಾಯಿನೋ ಜಾತಾ। ಬ್ರಹ್ಮಚಾರೀ ಭವಿಸ್ಸಾಮಾತಿ ಏತ್ಥ ಯೇನ ಬ್ರಹ್ಮಚರಿಯೇನ ತೇ ಬ್ರಹ್ಮಚಾರಿನೋತಿ ವುಚ್ಚನ್ತಿ, ತಂ ಬ್ರಹ್ಮಚರಿಯಂ ನಿದ್ಧಾರೇತ್ವಾ ಆಹ ‘‘ಮೇಥುನವಿರತಿ ಬ್ರಹ್ಮಚರಿಯನ್ತಿ ವುತ್ತಾ’’ತಿ।
Sahassaṃ maccuhāyinanti sahassamattā arahattasamadhigamena maccuvisayātikkamena maccupahāyino jātā. Brahmacārī bhavissāmāti ettha yena brahmacariyena te brahmacārinoti vuccanti, taṃ brahmacariyaṃ niddhāretvā āha ‘‘methunavirati brahmacariyanti vuttā’’ti.
ನಾತಿಕ್ಕಮಾಮಾತಿ ನ ಅತಿಚರಾಮ ಅಗಮನೀಯಟ್ಠಾನೇಪಿ ಇತರತ್ಥಾಪಿ ನ ವೀತಿಕ್ಕಮಾಮ। ತೇನಾಹ ‘‘ಅಞ್ಞತ್ರ ತಾಹಿ ಬ್ರಹ್ಮಚರಿಯಂ ಚರಾಮಾ’’ತಿ। ಅಮ್ಹನ್ತಿ ಅಮ್ಹಾಕಂ।
Nātikkamāmāti na aticarāma agamanīyaṭṭhānepi itaratthāpi na vītikkamāma. Tenāha ‘‘aññatra tāhi brahmacariyaṃ carāmā’’ti. Amhanti amhākaṃ.
ಅತ್ತದಮನವಸೇನಾತಿ ಯಥಾಪಟಿಞ್ಞಂ ಅರಹನ್ತಾನಂ ಅನುಕರಣಾಕಾರೇನ ಪವತ್ತಚಿತ್ತದಮನವಸೇನ, ಮನಚ್ಛಟ್ಠಾನಂ ಇನ್ದ್ರಿಯಾನಂ ದಮನೇನಾತಿ ಅತ್ಥೋ। ಸಿಖಾಪ್ಪತ್ತಸೇಟ್ಠಚರಿಯತಾಯ ಅರಿಯಮಗ್ಗೋ ಬ್ರಹ್ಮಚರಿಯಂ। ಬ್ರಹ್ಮಂ ಸೇಟ್ಠಂ ಚರತಿ ಏತೇನಾತಿ ಬ್ರಹ್ಮಚರಿಯಂ, ಸತ್ಥುಸಾಸನಂ।
Attadamanavasenāti yathāpaṭiññaṃ arahantānaṃ anukaraṇākārena pavattacittadamanavasena, manacchaṭṭhānaṃ indriyānaṃ damanenāti attho. Sikhāppattaseṭṭhacariyatāya ariyamaggo brahmacariyaṃ. Brahmaṃ seṭṭhaṃ carati etenāti brahmacariyaṃ, satthusāsanaṃ.
ಅತರಮಾನಾನನ್ತಿ ನ ತರಮಾನಾನಂ ದೇಸಕಾಲಂ ಉದಿಕ್ಖನ್ತಾನಂ। ಫಲಾಸಾವ ಸಮಿಜ್ಝತೀತಿ ಸುದುಲ್ಲಭಫಲೇಪಿ ಆಸಾ ಸಮ್ಮಾಪಯೋಗಮನ್ವಾಯ ಸಮಿಜ್ಝತಿ ಏವ। ವಿಪಕ್ಕಬ್ರಹ್ಮಚರಿಯೋಸ್ಮೀತಿ ವಿಸೇಸೇನ ನಿಪ್ಫನ್ನಪಣೀತಜ್ಝಾಸಯೋ ಪರಿಪುಣ್ಣಉಳಾರಮನೋರಥೋ। ಸೋ ಹಿ ಸೇಟ್ಠಮನೋಸಮಾಚಾರತಾಯ ಬ್ರಹ್ಮಚರಿಯಪರಿಯಾಯೇನ ವುತ್ತೋ।
Ataramānānanti na taramānānaṃ desakālaṃ udikkhantānaṃ. Phalāsāva samijjhatīti sudullabhaphalepi āsā sammāpayogamanvāya samijjhati eva. Vipakkabrahmacariyosmīti visesena nipphannapaṇītajjhāsayo paripuṇṇauḷāramanoratho. So hi seṭṭhamanosamācāratāya brahmacariyapariyāyena vutto.
ಇದಮೇವ ಸುತ್ತಂ ಆಗತಟ್ಠಾನನ್ತಿ ಅಧಿಪ್ಪಾಯೋ ತೇಪಿಟಕೇ ಬುದ್ಧವಚನೇ ಇದಮೇವ ಸುತ್ತಪದಂ ‘‘ವೀರಿಯಂ ಬ್ರಹ್ಮಚರಿಯ’’ನ್ತಿ ಆಗತಟ್ಠಾನನ್ತಿ ಅತ್ಥೋ। ವೀರಿಯಞ್ಹಿ ತಸ್ಮಿಂ ವಿಸಯೇ ಉತ್ತಮಂ ಪರಮುಕ್ಕಂಸಗತಂ ತಾದಿಸಚರಿಯಾಹೇತು ಚಾತಿ ಬ್ರಹ್ಮಚರಿಯನ್ತಿ ಇಧ ವುತ್ತಂ। ಚತುರಙ್ಗಸಮನ್ನಾಗತನ್ತಿ ಚತುಬ್ಬಿಧದುಕ್ಕರಕಿರಿಯಾಯ ಸಾಧಕಸ್ಸ ಚತುಬ್ಬಿಧಸ್ಸ ಅತ್ತನೋ ಪವತ್ತಿಆಕಾರಸ್ಸ ವಸೇನ ಚತುರಙ್ಗಸಮನ್ನಾಗತಂ।
Idameva suttaṃ āgataṭṭhānanti adhippāyo tepiṭake buddhavacane idameva suttapadaṃ ‘‘vīriyaṃ brahmacariya’’nti āgataṭṭhānanti attho. Vīriyañhi tasmiṃ visaye uttamaṃ paramukkaṃsagataṃ tādisacariyāhetu cāti brahmacariyanti idha vuttaṃ. Caturaṅgasamannāgatanti catubbidhadukkarakiriyāya sādhakassa catubbidhassa attano pavattiākārassa vasena caturaṅgasamannāgataṃ.
ಕೋಚಿ ಛಿನ್ನಭಿನ್ನಪಟಪಿಲೋತಿಕಧರೋ ದಸನ್ತಯುತ್ತಸ್ಸ ವತ್ಥಸ್ಸ ಅಭಾವತೋ ನಿಚ್ಚೇಲೋತಿ ವತ್ತಬ್ಬತಂ ಲಭೇಯ್ಯಾತಿ ತಂ ನಿವತ್ತೇನ್ತೋ ಆಹ ‘‘ನಗ್ಗೋ’’ತಿ। ಏವಂ ಅಕಾಸಿಂ, ಏವಮ್ಪಿ ಸತ್ತಪೀಳಾ ಮಾ ಅಹೋಸೀತಿ ಅಧಿಪ್ಪಾಯೋ। ಯಥಾ ‘‘ಅಭಿಹಟಂ ನ ಸಾದಿಯಾಮೀ’’ತಿಆದಿ (ಮ॰ ನಿ॰ ೧.೧೫೫) ಭಿಕ್ಖಾಪರಿಯೇಸನೇ ಉಕ್ಕಟ್ಠಚಾರಿತಾದಸ್ಸನಂ, ಏವಂ ‘‘ನಏಹಿ ಭದ್ದನ್ತಿಕಾದಿಭಾವೋಪೀ’’ತಿ ಗಹೇತಬ್ಬಂ। ಪುರಿಸನ್ತರಗತಾಯಾತಿ ಪುರಿಸಸಮೀಪಗತಾಯ। ಸಂಕಿತ್ತೀಯನ್ತಿ ಏತಾಯಾತಿ ಸಂಕಿತ್ತಿ, ಗಾಮವಾಸಿಆದೀಹಿ ಸಮುದಾಯವಸೇನ ಕರಿಯಮಾನಕಿರಿಯಾ। ಇಧ ಪನ ಭತ್ತಸಂಕಿತ್ತಿ ಅಧಿಪ್ಪೇತಾತಿ ಆಹ ‘‘ಸಂಕಿತ್ತೇತ್ವಾ ಕತಭತ್ತೇಸೂ’’ತಿ। ದದನ್ತಿ ತಾಯಾತಿ ದತ್ತಿ। ಏಕಾಹಂ ಅನ್ತರಭೂತಂ ಏತಸ್ಸ ಅತ್ಥೀತಿ ಏಕಾಹಿಕಂ। ಏಸ ನಯೋ ಸೇಸಪದೇಸುಪಿ। ಏಕಾಹವಾರೇನಾತಿ ಏಕಾಹಿಕವಾರೇನ। ‘‘ಏಕಾಹಿಕ’’ನ್ತಿಆದಿನಾ ವುತ್ತವಿಧಿಮೇವ ಪಟಿಪಾಟಿಯಾ ಪವತ್ತಭಾವಂ ದಸ್ಸೇತುಂ ಪುನ ವುತ್ತಂ। ತೇನಾಹ ‘‘ಇತಿ ಏವರೂಪ’’ನ್ತಿಆದಿ।
Koci chinnabhinnapaṭapilotikadharo dasantayuttassa vatthassa abhāvato nicceloti vattabbataṃ labheyyāti taṃ nivattento āha ‘‘naggo’’ti. Evaṃ akāsiṃ, evampi sattapīḷā mā ahosīti adhippāyo. Yathā ‘‘abhihaṭaṃ na sādiyāmī’’tiādi (ma. ni. 1.155) bhikkhāpariyesane ukkaṭṭhacāritādassanaṃ, evaṃ ‘‘naehi bhaddantikādibhāvopī’’ti gahetabbaṃ. Purisantaragatāyāti purisasamīpagatāya. Saṃkittīyanti etāyāti saṃkitti, gāmavāsiādīhi samudāyavasena kariyamānakiriyā. Idha pana bhattasaṃkitti adhippetāti āha ‘‘saṃkittetvā katabhattesū’’ti. Dadanti tāyāti datti. Ekāhaṃ antarabhūtaṃ etassa atthīti ekāhikaṃ. Esa nayo sesapadesupi. Ekāhavārenāti ekāhikavārena. ‘‘Ekāhika’’ntiādinā vuttavidhimeva paṭipāṭiyā pavattabhāvaṃ dassetuṃ puna vuttaṃ. Tenāha ‘‘iti evarūpa’’ntiādi.
ಏರಕತಿಣಾದೀನಿ ವಾತಿ ಏರಕತಿಣಾದೀನಿ ಗನ್ಥಿತ್ವಾ ಕತನಿವಾಸನಾನಿ ಛವದುಸ್ಸಾನಿ, ನಿಹೀನದುಸ್ಸಾನೀತಿ ಅತ್ಥೋ। ತನ್ತಾವುತಾನನ್ತಿ ತನ್ತಂ ಪಸಾರೇತ್ವಾ ವೀತಾನಂ। ಪಕತಿಕಣ್ಟಕೇತಿ ಸಲಾಕಕಣ್ಟಕೇ।
Erakatiṇādīni vāti erakatiṇādīni ganthitvā katanivāsanāni chavadussāni, nihīnadussānīti attho. Tantāvutānanti tantaṃ pasāretvā vītānaṃ. Pakatikaṇṭaketi salākakaṇṭake.
೧೫೬. ನೇಕವಸ್ಸಗಣಸಞ್ಜಾತನ್ತಿ ಅನೇಕವಸ್ಸಸಮೂಹಸಞ್ಜಾತಂ। ನನು ಚ ಇದಾನೇವ ‘‘ಸಾಯತತಿಯಕಮ್ಪಿ ಉದಕೋರೋಹನಾನುಯೋಗಮನುಯುತ್ತೋ’’ತಿ ವುತ್ತಂ, ‘‘ನೇಕವಸ್ಸಗಣಿಕಂ ರಜೋಜಲ್ಲಂ ಕಾಯೇ ಸನ್ನಿಚಿತ’’ನ್ತಿ ಚ, ತದುಭಯಂ ಏಕಸ್ಮಿಂ ಕಥಂ ಸಮ್ಭವತೀತಿ ಆಹ ‘‘ಇದಂ ಅತ್ತನೋ ರಜೋಜಲ್ಲಕವತಸಮಾದಾನಕಾಲಂ ಸನ್ಧಾಯ ವದತೀ’’ತಿ। ಏತೇನೇವ ‘‘ಅಚೇಲಕೋ ಹೋಮೀ’’ತಿ ವುತ್ತಅಚೇಲಕಪಟಿಞ್ಞಾ, ‘‘ಸಾಣಾನಿಪಿ ಧಾರೇಮೀ’’ತಿಆದಿನಾ ವುತ್ತಛನ್ನಕಪಟಿಞ್ಞಾ, ತತ್ಥಾಪಿ ಸಾಣ-ಮಸಾಣ-ಛವದುಸ್ಸಾದಿ-ನಿವತ್ಥ-ಪಟಿಞ್ಞಾ ಚ ಅವಿರುದ್ಧಾತಿ ದಟ್ಠಬ್ಬಾ ತಸ್ಮಿಂ ತಸ್ಮಿಂ ಕಾಲೇ ತಥಾ ತಥಾ ಪಟಿಪನ್ನತ್ತಾ। ತೇತಿ ಅಚೇಲಕಾ। ಸಙ್ಘಾತನ್ತಿ ಸಬ್ಬಸೋ ಘಾತಂ। ತೇನಾಹ ‘‘ವಧ’’ನ್ತಿ। ಸೀಲವಾ ನಾಮ ನತ್ಥಿ ‘‘ಅನಭಿಸನ್ಧಿಕಮ್ಪಿ ಪಾಪಂ ಹೋತೀ’’ತಿ ಏವಂ ಲದ್ಧಿಕತ್ತಾ। ಸೀಲಂ ಅಧಿಟ್ಠಾಯಾತಿ ಇದಂ ಪಟಿಕ್ಕಮನಕಿರಿಯಂ ಸನ್ಧಾಯ ವುತ್ತಂ।
156.Nekavassagaṇasañjātanti anekavassasamūhasañjātaṃ. Nanu ca idāneva ‘‘sāyatatiyakampi udakorohanānuyogamanuyutto’’ti vuttaṃ, ‘‘nekavassagaṇikaṃ rajojallaṃ kāye sannicita’’nti ca, tadubhayaṃ ekasmiṃ kathaṃ sambhavatīti āha ‘‘idaṃ attano rajojallakavatasamādānakālaṃ sandhāya vadatī’’ti. Eteneva ‘‘acelako homī’’ti vuttaacelakapaṭiññā, ‘‘sāṇānipi dhāremī’’tiādinā vuttachannakapaṭiññā, tatthāpi sāṇa-masāṇa-chavadussādi-nivattha-paṭiññā ca aviruddhāti daṭṭhabbā tasmiṃ tasmiṃ kāle tathā tathā paṭipannattā. Teti acelakā. Saṅghātanti sabbaso ghātaṃ. Tenāha ‘‘vadha’’nti. Sīlavā nāma natthi ‘‘anabhisandhikampi pāpaṃ hotī’’ti evaṃ laddhikattā. Sīlaṃ adhiṭṭhāyāti idaṃ paṭikkamanakiriyaṃ sandhāya vuttaṃ.
ಪಾಸಣ್ಡಪರಿಗ್ಗಹಣತ್ಥಾಯಾತಿ ಪಾಸಣ್ಡೇಸು ಅಸಾರಸಾರಭಾವವೀಮಂಸನತ್ಥಾಯ। ತಂ ಪಬ್ಬಜ್ಜನ್ತಿ ಆಜೀವಕಪಬ್ಬಜ್ಜಂ। ವಿಕಟಭೋಜನೇತಿ ವಿಕತಭೋಜನೇ ವಿರೂಪಭೋಜನೇ। ತೇನಾಹ ‘‘ಅಪಕತಿಭೋಜನೇ’’ತಿ।
Pāsaṇḍapariggahaṇatthāyāti pāsaṇḍesu asārasārabhāvavīmaṃsanatthāya. Taṃ pabbajjanti ājīvakapabbajjaṃ. Vikaṭabhojaneti vikatabhojane virūpabhojane. Tenāha ‘‘apakatibhojane’’ti.
೧೫೭. ಭಿಂಸನಕತಸ್ಮಿನ್ತಿ ಭಾವಸಾಧನಭಾವೀ ಇದಂ ಪದನ್ತಿ ಆಹ ‘‘ಭಿಂಸನಕತಸ್ಮಿಂ ಭಿಂಸನಕಕಿರಿಯಾಯಾ’’ತಿ। ‘‘ಭಿಂಸನಕತ್ತಸ್ಮಿ’’ನ್ತಿ ವತ್ತಬ್ಬೇ ಏಕಸ್ಸ ತ-ಕಾರಸ್ಸ ಲೋಪೋ ದಟ್ಠಬ್ಬೋ। ಯೇಭುಯ್ಯಗ್ಗಹಣಂ ಲೋಮವನ್ತವಸೇನಪಿ ಯೋಜೇತಬ್ಬಂ, ನ ಲೋಮವಸೇನಾತಿ ಆಹ ‘‘ಬಹುತರಾನಂ ವಾ’’ತಿಆದಿ।
157.Bhiṃsanakatasminti bhāvasādhanabhāvī idaṃ padanti āha ‘‘bhiṃsanakatasmiṃ bhiṃsanakakiriyāyā’’ti. ‘‘Bhiṃsanakattasmi’’nti vattabbe ekassa ta-kārassa lopo daṭṭhabbo. Yebhuyyaggahaṇaṃ lomavantavasenapi yojetabbaṃ, na lomavasenāti āha ‘‘bahutarānaṃ vā’’tiādi.
ಸು-ಸದ್ದೇ ಉ-ಕಾರಸ್ಸ ಓ-ಕಾರಂ ಕತ್ವಾ ಪಾಳಿಯಂ ‘‘ಸೋತತ್ತೋ’’ತಿ ವುತ್ತನ್ತಿ ತದತ್ಥಂ ವಿವರನ್ತೋ ‘‘ಸುತತ್ತೋ’’ತಿ ಆಹ। ಸುಟ್ಠು ಅವತತ್ತೋತಿ ವಾ ಸೋತತ್ತೋ। ಸೋಸಿನ್ನೋತಿ ಏತ್ಥಾಪಿ ಏಸೇವ ನಯೋ। ಸುದ್ಧಿವಸನತ್ಥಾಯಾತಿ ಸಂಸಾರಸುದ್ಧಿಗವೇಸನತ್ಥಾಯ।
Su-sadde u-kārassa o-kāraṃ katvā pāḷiyaṃ ‘‘sotatto’’ti vuttanti tadatthaṃ vivaranto ‘‘sutatto’’ti āha. Suṭṭhu avatattoti vā sotatto. Sosinnoti etthāpi eseva nayo. Suddhivasanatthāyāti saṃsārasuddhigavesanatthāya.
ವಿಹಾರಸ್ಮಿನ್ತಿ ಪಚ್ಚತ್ತೇ ಭುಮ್ಮವಚನನ್ತಿ ಆಹ ‘‘ವಿಹಾರೋ ಏವ ಹಿ ‘ವಿಹಾರಸ್ಮಿ’ನ್ತಿ ವುತ್ತೋ’’ತಿ। ತೇನೇವ ಚಾತಿ ತೇನೇವ ವಿಭತ್ತಿವಿಪಲ್ಲಾಸವಸೇನ। ಏವಂ ಅತ್ಥೋತಿ ಅಯಂ ಏವಂ ಲಿಙ್ಗವಿಪಲ್ಲಾಸವಸೇನ ಅತ್ಥೋ ವೇದಿತಬ್ಬೋ। ದುಕ್ಖಪ್ಪತ್ತೋತಿ ಆನೇತ್ವಾ ಸಮ್ಬನ್ಧೋ। ಸಬ್ಬತ್ಥಾತಿ ಸುಖದುಕ್ಖೇ ಲಾಭಾಲಾಭಾದಿಕೇ ಚ। ತುಲಿತೋತಿ ತುಲಾಸದಿಸೋ।
Vihārasminti paccatte bhummavacananti āha ‘‘vihāro eva hi ‘vihārasmi’nti vutto’’ti. Teneva cāti teneva vibhattivipallāsavasena. Evaṃ atthoti ayaṃ evaṃ liṅgavipallāsavasena attho veditabbo. Dukkhappattoti ānetvā sambandho. Sabbatthāti sukhadukkhe lābhālābhādike ca. Tulitoti tulāsadiso.
ದುಕ್ಕರಕಾರಿಕಾದಿಸುದ್ಧಿವಣ್ಣನಾ ನಿಟ್ಠಿತಾ।
Dukkarakārikādisuddhivaṇṇanā niṭṭhitā.
ಆಹಾರಸುದ್ಧಿವಣ್ಣನಾ
Āhārasuddhivaṇṇanā
೧೫೮. ಸುಜ್ಝಿತುನ್ತಿ ಸಂಸಾರತೋ ಸುಜ್ಝಿತುಂ।
158.Sujjhitunti saṃsārato sujjhituṃ.
೧೫೯. ಆಸೀತಿಕಪಬ್ಬಾನೀತಿ ಆಸೀತಿಕಪಿಟ್ಠಿಪಬ್ಬಾನಿ, ‘‘ಕಾಳಪಬ್ಬಾನೀ’’ತಿ ವದನ್ತಿ। ಪಬ್ಬಾನಂ ಮಜ್ಝೇ। ಉನ್ನತುನ್ನತಾನೀತಿ ಮಂಸೇ ಮಿಲಾತೇ ದ್ವಿನ್ನಂ ಸನ್ಧೀನಂ ಅನ್ತರೇ ವಾತೇನುದ್ಧುಮಾತಧಮನೀಜಾಲತಾಯ ಉನ್ನತಾನಿ ಉನ್ನತಾನೀತಿ। ಆನಿಸದನ್ತಿ ಆನಿಸದಟ್ಠಾನಂ। ನಿಸಿನ್ನಟ್ಠಾನನ್ತಿ ಪಂಸೂಹಿ, ವಾಲಿಕಾಹಿ ವಾ ನಿಚಿತಂ ನಿಸಿನ್ನಟ್ಠಾನಂ। ಸರಪೋಙ್ಖೇನಾತಿ ಸರಸ್ಸ ಪೋಙ್ಖಪ್ಪದೇಸೇನ, ಸರಪೋಙ್ಖಸಞ್ಞಿತೇನ ವಾ ಮಗ್ಗೇನ। ಅಕ್ಕನ್ತನ್ತಿ ಅಕ್ಕನ್ತಟ್ಠಾನಂ। ತಕ್ಕಗೋಳಿಕಸದಿಸಾನಂ, ಸರೀರಘಂಸನತ್ಥಂ ಕತ ಕುರುವಿನ್ದಗೋಳಕಾನಂ ವಾ ಆವಳಿ ವಟ್ಟನಾಹಾರೋ। ವಂಸತೋತಿ ಪಿಟ್ಠಿವಂಸತೋ। ಮಣ್ಡಲೇತಿ ಭಿತ್ತಿಪಾದಾನಂ ಮತ್ಥಕೇ ಠಪಿತಮಣ್ಡಲಕೇ ಸೀಸಗ್ಗೇನ ಪತಿಟ್ಠಹನ್ತಿ। ನ ಏವಂ ಫಾಸುಳಿಯೋತಿ ಯಥಾ ಯಥಾ ವುತ್ತಗೋಪಾನಸಿಯೋ ಪಪತಾ ತಿಟ್ಠನ್ತಿ, ನ ಏವಂ ಬೋಧಿಸತ್ತಸ್ಸ ಫಾಸುಕಾಪಿ ಪಪತಾ ಠಿತಾ।
159.Āsītikapabbānīti āsītikapiṭṭhipabbāni, ‘‘kāḷapabbānī’’ti vadanti. Pabbānaṃ majjhe. Unnatunnatānīti maṃse milāte dvinnaṃ sandhīnaṃ antare vātenuddhumātadhamanījālatāya unnatāni unnatānīti. Ānisadanti ānisadaṭṭhānaṃ. Nisinnaṭṭhānanti paṃsūhi, vālikāhi vā nicitaṃ nisinnaṭṭhānaṃ. Sarapoṅkhenāti sarassa poṅkhappadesena, sarapoṅkhasaññitena vā maggena. Akkantanti akkantaṭṭhānaṃ. Takkagoḷikasadisānaṃ, sarīraghaṃsanatthaṃ kata kuruvindagoḷakānaṃ vā āvaḷi vaṭṭanāhāro. Vaṃsatoti piṭṭhivaṃsato. Maṇḍaleti bhittipādānaṃ matthake ṭhapitamaṇḍalake sīsaggena patiṭṭhahanti. Na evaṃ phāsuḷiyoti yathā yathā vuttagopānasiyo papatā tiṭṭhanti, na evaṃ bodhisattassa phāsukāpi papatā ṭhitā.
ಓಕ್ಖಾಯಿಕಾತಿ ಅವಕ್ಖಾಯಿಕಾ, ಹೇಟ್ಠಾ ಹುತ್ವಾ ನಿನ್ನಭಾವೇನ ಪಞ್ಞಾಯಮಾನಾ। ಏವರೂಪಾತಿ ಯಥಾವುತ್ತರೂಪಾ, ನಿನ್ನತರಾತಿ ಅತ್ಥೋ। ಯಾವ ಪಿಟ್ಠಿಕಣ್ಟಕಂ ಅಲ್ಲೀನಾ ಹೋತೀತಿ ಮಯ್ಹಂ ಉದರಚ್ಛವಿ ಯಾವ ಪಿಟ್ಠಿಕಣ್ಟಕಂ, ತಾವ ತಂ ಆಹಚ್ಚ ಠಿತತ್ತಾ ಅಲ್ಲೀನಾ ಹೋತಿ ಉದರಿಯಸ್ಸ ಪರಿಕ್ಖಯೇನ ಅನ್ತಾನಞ್ಚ ಸುಟ್ಠುಮಿಲಾತತಾಯ। ಭಾರಿಯಭಾರಿಯಾತಿ ಗರುತರಾ। ಸಹಉದರಚ್ಛವಿಂ ಪಿಟ್ಠಿಕಣ್ಟಕಂ, ಸಹಪಿಟ್ಠಿಕಣ್ಟಕಂ ಉದರಚ್ಛವಿನ್ತಿ ಯೋಜನಾ। ನೇವ ನಿಕ್ಖಮತಿ ಆಹಾರಸನ್ನಿಸ್ಸಯಆಪೋಧಾತುಯಾ ಸಬ್ಬಸೋ ವಿಸುಕ್ಖತ್ತಾ। ಪೂತಿಮೂಲಾನೀತಿ ಲೋಮಮೂಲಾನಂ ಪರಿಬ್ರೂಹನಕೇ ಮಂಸೇ ಲೋಹಿತೇ ಚ ಪರಿಕ್ಖೀಣೇ ತಾನಿ ಸುಕ್ಖಾನಿ ಠಾನತೋ ಭಟ್ಠಾನಿ ಅಭಾವೇನೇವ ‘‘ಪೂತಿಮೂಲಾನೀ’’ತಿ ವುತ್ತಾನಿ। ತೇನಾಹ ‘‘ತಸ್ಸ ಪನಾ’’ತಿಆದಿ।
Okkhāyikāti avakkhāyikā, heṭṭhā hutvā ninnabhāvena paññāyamānā. Evarūpāti yathāvuttarūpā, ninnatarāti attho. Yāva piṭṭhikaṇṭakaṃallīnāhotīti mayhaṃ udaracchavi yāva piṭṭhikaṇṭakaṃ, tāva taṃ āhacca ṭhitattā allīnā hoti udariyassa parikkhayena antānañca suṭṭhumilātatāya. Bhāriyabhāriyāti garutarā. Sahaudaracchaviṃ piṭṭhikaṇṭakaṃ, sahapiṭṭhikaṇṭakaṃ udaracchavinti yojanā. Neva nikkhamati āhārasannissayaāpodhātuyā sabbaso visukkhattā. Pūtimūlānīti lomamūlānaṃ paribrūhanake maṃse lohite ca parikkhīṇe tāni sukkhāni ṭhānato bhaṭṭhāni abhāveneva ‘‘pūtimūlānī’’ti vuttāni. Tenāha ‘‘tassa panā’’tiādi.
ಅಧಿಗತಾತಿ ಇದಾನಿ ಅಧಿಗತಾ। ಯಥಾ ಏತರಹಿ ವಿಪಸ್ಸನಾಪಞ್ಞಾಯ ಅಧಿಗತತ್ತಾತಿ ಇಮಿನಾ ಕಿಞ್ಚಾಪಿ ಮಹಾಬೋಧಿಸತ್ತಾ ಪರಿಪಾಕಗತಞಾಣಾ ವಸೀಭೂತಜ್ಝಾನಾಭಿಞ್ಞಾ ವಿಪಸ್ಸನಾಯ ಪರಿಕಮ್ಮಂ ಕರೋನ್ತಿ, ಯಥಾ ಚ ನೇಸಂ ಚರಿಮಭವೇ ವಿಪಸ್ಸನಾಚಾರೋ, ನ ತಥಾ ತದಾತಿ ದಸ್ಸೇತಿ। ಏತದೇವಾತಿ ಯಂ ಯೇನ ವುತ್ತಂ ಅತ್ಥಜಾತಂ, ಏತದೇವ ಏತ್ಥ ಏತಸ್ಮಿಂ ಪಾಠಪದೇಸೇ ಯುತ್ತಂ ಪುಬ್ಬೇನಾಪರಂ ಅವಿರುಜ್ಝನತೋ। ಇತರಥಾತಿ ಭಿಕ್ಖೂಹಿ ವುತ್ತಪ್ಪಕಾರೇನ ಅನನುರೂಪೋ ಸಿಯಾ ‘‘ಇಮಿಸ್ಸಾ’’ತಿ ವುತ್ತಾಯ ಅಞ್ಞತ್ತೇ।
Adhigatāti idāni adhigatā. Yathā etarahi vipassanāpaññāya adhigatattāti iminā kiñcāpi mahābodhisattā paripākagatañāṇā vasībhūtajjhānābhiññā vipassanāya parikammaṃ karonti, yathā ca nesaṃ carimabhave vipassanācāro, na tathā tadāti dasseti. Etadevāti yaṃ yena vuttaṃ atthajātaṃ, etadeva ettha etasmiṃ pāṭhapadese yuttaṃ pubbenāparaṃ avirujjhanato. Itarathāti bhikkhūhi vuttappakārena ananurūpo siyā ‘‘imissā’’ti vuttāya aññatte.
ಆಹಾರಸುದ್ಧಿವಣ್ಣನಾ ನಿಟ್ಠಿತಾ।
Āhārasuddhivaṇṇanā niṭṭhitā.
ಸಂಸಾರಸುದ್ಧಿಆದಿವಣ್ಣನಾ
Saṃsārasuddhiādivaṇṇanā
೧೬೦. ಸಂಸಾರೇನಾತಿ ಅಪರಾಪರಂ ಚವನುಪಪಜ್ಜನವಸೇನ ಭವೇಸು ಸಂಸರಣೇನ। ಯಂ ಸನ್ಧಾಯ ವುತ್ತಂ –
160.Saṃsārenāti aparāparaṃ cavanupapajjanavasena bhavesu saṃsaraṇena. Yaṃ sandhāya vuttaṃ –
‘‘ಖನ್ಧಾನಞ್ಚ ಪಟಿಪಾಟಿ, ಧಾತುಆಯತನಾನ ಚ।
‘‘Khandhānañca paṭipāṭi, dhātuāyatanāna ca;
ಅಬ್ಬೋಚ್ಛಿನ್ನಂ ವತ್ತಮಾನಾ, ಸಂಸಾರೋತಿ ಪವುಚ್ಚತೀ’’ತಿ॥ (ವಿಸುದ್ಧಿ॰ ೨.೬೧೯; ದೀ॰ ನಿ॰ ಅಟ್ಠ॰ ೨.೯೫; ಸಂ॰ ನಿ॰ ಅಟ್ಠ॰ ೨.೨.೬೦; ಅ॰ ನಿ॰ ಅಟ್ಠ॰ ೨.೪.೧೯೯; ಧ॰ ಸ॰ ಅಟ್ಠ॰ ನಿದಾನಕಥಾ; ವಿಭ॰ ಅಟ್ಠ॰ ೨೨೬; ಸು॰ ನಿ॰ ಅಟ್ಠ॰ ೨.೫೨೩; ಉದಾ॰ ಅಟ್ಠ॰ ೩೯; ಇತಿವು॰ ಅಟ್ಠ॰ ೧೪, ೫೮; ಥೇರಗಾ॰ ಅಟ್ಠ॰ ೧.೬೭, ೯೯; ಬು॰ ವಂ॰ ಅಟ್ಠ॰ ೫೮; ಚೂಳನಿ॰ ಅಟ್ಠ॰ ೬; ಪಟಿ॰ ಮ॰ ಅಟ್ಠ॰ ೨.೧.೧೧೭; ವಿಸುದ್ಧಿ॰ ಮಹಾಟೀ॰ ೧.೧೨೭; ಅ॰ ನಿ॰ ಟೀ॰ ೨.೪.೯; ಸಾರತ್ಥ॰ ಟೀ॰ ೧.೧)।
Abbocchinnaṃ vattamānā, saṃsāroti pavuccatī’’ti. (visuddhi. 2.619; dī. ni. aṭṭha. 2.95; saṃ. ni. aṭṭha. 2.2.60; a. ni. aṭṭha. 2.4.199; dha. sa. aṭṭha. nidānakathā; vibha. aṭṭha. 226; su. ni. aṭṭha. 2.523; udā. aṭṭha. 39; itivu. aṭṭha. 14, 58; theragā. aṭṭha. 1.67, 99; bu. vaṃ. aṭṭha. 58; cūḷani. aṭṭha. 6; paṭi. ma. aṭṭha. 2.1.117; visuddhi. mahāṭī. 1.127; a. ni. ṭī. 2.4.9; sārattha. ṭī. 1.1);
ಬಹುಕನ್ತಿ ಬಹುಕಾಲಂ ಬಹುಕ್ಖತ್ತುಂ। ಉಪಪಜ್ಜಿತ್ವಾತಿ ತತ್ಥ ತತ್ಥ ಭವೇ ನಿಬ್ಬತ್ತಿತ್ವಾ। ಆವಾಸೇನಾತಿ ತಸ್ಮಿಂ ತಸ್ಮಿಂ ಸತ್ತಾವಾಸೇ ಆವಸನೇನ ನಿಬ್ಬತ್ತಿತ್ವಾ ಜೀವನೇನ। ಖನ್ಧಾಯೇವ ವುತ್ತಾ ತೇಸಂಯೇವ ಪವತ್ತಿವಿಸೇಸಸ್ಸ ತೇನ ತೇನ ಪರಿಯಾಯೇನ ವುತ್ತತ್ತಾ। ಬಹುಯಾಗೇತಿ ಅಜಸೂಕರಗೋಮಾಯ್ವಾದಿಕೇ ಬಹುವಿಧೇ ಮಹಾಯಞ್ಞೇ। ಬಹುಅಗ್ಗೀತಿ ವಾಚಾಪೇಯ್ಯಾದಿವಸೇನ ಅನ್ತಮಸೋ ಪಾಕಯಞ್ಞಾದಿವಸೇನ ಚ ಬಹುಕೇಪಿ ಅಗ್ಗೀ ಪರಿಚರಣೇನ।
Bahukanti bahukālaṃ bahukkhattuṃ. Upapajjitvāti tattha tattha bhave nibbattitvā. Āvāsenāti tasmiṃ tasmiṃ sattāvāse āvasanena nibbattitvā jīvanena. Khandhāyeva vuttā tesaṃyeva pavattivisesassa tena tena pariyāyena vuttattā. Bahuyāgeti ajasūkaragomāyvādike bahuvidhe mahāyaññe. Bahuaggīti vācāpeyyādivasena antamaso pākayaññādivasena ca bahukepi aggī paricaraṇena.
೧೬೧. ಬಾಲದಾರಕೋಪಿ ‘‘ದಹರೋ’’ತಿ ವುಚ್ಚತೀತಿ ತತೋ ವಿಸೇಸನತ್ಥಂ ‘‘ಯುವಾ’’ತಿ ವುತ್ತಂ। ಅತಿಕ್ಕನ್ತಪಠಮವಯಾ ಸತ್ತಾ ಸಭಾವೇನ ಪಲಿತಸಿರಾ ಹೋನ್ತೀತಿ ಪಠಮವಯೇ ಠಿತಭಾವಂ ದಸ್ಸೇತುಂ ‘‘ಸುಸುಕಾಳಕೇಸೋ’’ತಿ ವುತ್ತಂ। ಜರಾಜಿಣ್ಣೋತಿ ಜರಾಯ ಜಿಣ್ಣೋ, ನ ಅಕಾಲಿಕೇನ ಜರಾಯ ಅಭಿಭೂತೋ। ಉಕ್ಕಂಸಗತಬುದ್ಧತಾಯ ವುದ್ಧೋ। ತೇನಾಹ ‘‘ವಡ್ಢಿತ್ವಾ ಠಿತಅಙ್ಗಪಚ್ಚಙ್ಗೋ’’ತಿ, ಆರೋಹಪರಿಣಾಹವಸೇನ ವುದ್ಧಿರಹಿತೋತಿ ಅತ್ಥೋ। ಜಾತಿಮಹಲ್ಲಕೋತಿ ಜಾತಿಯಾ ಮಹಲ್ಲಕೋ, ನ ಭೋಗಪರಿವಾರಾದೀಹೀತಿ ಅತ್ಥೋ। ಅದ್ಧಗತೋತಿ ಏತ್ಥ ಅದ್ಧ-ಸದ್ದೋ ದೀಘಕಾಲವಾಚೀತಿ ಆಹ ‘‘ಬಹುಅದ್ಧಾನಂ ಗತೋ’’ತಿ। ವಯೋತಿಆದಿಪದಲೋಪೇನಾಯಂ ನಿದ್ದೇಸೋತಿ ಆಹ ‘‘ಪಚ್ಛಿಮವಯ’’ನ್ತಿ। ಪದಸತಮ್ಪಿ…ಪೇ॰… ಸಮತ್ಥತಾತಿ ಪದಸತಮ್ಪಿ ಪದಸಹಸ್ಸಮ್ಪಿ ಸೋತಪಥಮಾಗಚ್ಛನ್ತಮೇವ ಉಗ್ಗಹಣಸಮತ್ಥತಾ ಪರಿಗ್ಗಹೇತುಂ ಸಮತ್ಥತಾ। ಅಯಞ್ಚ ಗತಿಯಾ ಬ್ಯಾಪಾರೋತಿ ಸಕ್ಕಾ ವಿಞ್ಞಾತುಂ ಗಹಣಮತ್ತಭಾವತೋ। ತದೇವಾತಿ ಪದಸತಮ್ಪಿ ಪದಸಹಸ್ಸಮ್ಪಿ। ಆಧಾರಣಂ ಅಪಿಲಾಪನವಸೇನ ಹದಯೇ ಧಾರಣಂ। ಉಪನಿಬನ್ಧನಂ ಯಥಾ ನ ಪಮುಟ್ಠಂ ಹೋತಿ, ತಥಾ ಉಪೇಚ್ಚ ಅಪರಾಪರಂ ನಿಬನ್ಧನಂ। ಅಯಂ ಪನ ಸತಿಯಾ ಬ್ಯಾಪಾರೋತಿ ಸಕ್ಕಾ ವಿಞ್ಞಾತುಂ। ಪಾಳಿಯಞ್ಚ ‘‘ಪರಮಾಯ ಗತಿಯಾ ಚ ಸತಿಯಾ ಚ ಧಿತಿಯಾ ಚಾ’’ತಿ ವುತ್ತಂ, ಪರತೋ ಚ ‘‘ಏವಂ ಅಧಿಮತ್ತಗತಿಮನ್ತೋ’’ತಿ ವುತ್ತಂ। ಸಮತ್ಥವೀರಿಯಂ ಧಿತಿ ನಾಮಾತಿ ವಿಸಿಟ್ಠವಿಸಯಂ ದಸ್ಸೇನ್ತೋ ಯಥಾವುತ್ತಸತಿಸಮಾಯೋಗಂ ತಸ್ಸ ದೀಪೇತಿ। ತಸ್ಸಾತಿ ಯಥಾವುತ್ತಗತಿಸತಿಧಿತೀಹಿ ಸುಭಧಾತವಚೀಪರಿಚಿತಸ್ಸ ಪರಿಯತ್ತಿಧಮ್ಮಸ್ಸ ಆಗಮವಸೇನ ಅತ್ಥದಸ್ಸನಸಮತ್ಥತಾ ಯುತ್ತಿವಸೇನ ಕಾರಣದಸ್ಸನಸಮತ್ಥತಾ।
161. Bāladārakopi ‘‘daharo’’ti vuccatīti tato visesanatthaṃ ‘‘yuvā’’ti vuttaṃ. Atikkantapaṭhamavayā sattā sabhāvena palitasirā hontīti paṭhamavaye ṭhitabhāvaṃ dassetuṃ ‘‘susukāḷakeso’’ti vuttaṃ. Jarājiṇṇoti jarāya jiṇṇo, na akālikena jarāya abhibhūto. Ukkaṃsagatabuddhatāya vuddho. Tenāha ‘‘vaḍḍhitvā ṭhitaaṅgapaccaṅgo’’ti, ārohapariṇāhavasena vuddhirahitoti attho. Jātimahallakoti jātiyā mahallako, na bhogaparivārādīhīti attho. Addhagatoti ettha addha-saddo dīghakālavācīti āha ‘‘bahuaddhānaṃ gato’’ti. Vayotiādipadalopenāyaṃ niddesoti āha ‘‘pacchimavaya’’nti. Padasatampi…pe… samatthatāti padasatampi padasahassampi sotapathamāgacchantameva uggahaṇasamatthatā pariggahetuṃ samatthatā. Ayañca gatiyā byāpāroti sakkā viññātuṃ gahaṇamattabhāvato. Tadevāti padasatampi padasahassampi. Ādhāraṇaṃ apilāpanavasena hadaye dhāraṇaṃ. Upanibandhanaṃ yathā na pamuṭṭhaṃ hoti, tathā upecca aparāparaṃ nibandhanaṃ. Ayaṃ pana satiyā byāpāroti sakkā viññātuṃ. Pāḷiyañca ‘‘paramāya gatiyā ca satiyā ca dhitiyā cā’’ti vuttaṃ, parato ca ‘‘evaṃ adhimattagatimanto’’ti vuttaṃ. Samatthavīriyaṃ dhiti nāmāti visiṭṭhavisayaṃ dassento yathāvuttasatisamāyogaṃ tassa dīpeti. Tassāti yathāvuttagatisatidhitīhi subhadhātavacīparicitassa pariyattidhammassa āgamavasena atthadassanasamatthatā yuttivasena kāraṇadassanasamatthatā.
ದಳ್ಹಂ (ಅ॰ ನಿ॰ ಟೀ॰ ೩.೯.೩೮) ಥಿರಂ ಧನು ಏತಸ್ಸಾತಿ ದಳ್ಹಧನ್ವಾ, ಸೋ ಏವ ಇಧ ‘‘ದಳ್ಹಧಮ್ಮಾ’’ತಿ ವುತ್ತೋ। ಪಟಿಸತ್ತುವಿಧಮನತ್ಥಂ ಧನುಂ ಗಣ್ಹಾತೀತಿ ಧನುಗ್ಗಹೋ, ಸೋ ಏವ ಉಸುಂ ಸರಂ ಅಸತಿ ಖಿಪತೀತಿ ಇಸ್ಸಾಸೋತಿ ಆಹ ‘‘ಧನುಂ ಗಹೇತ್ವಾ ಠಿತೋ ಇಸ್ಸಾಸೋ’’ತಿ। ದ್ವಿಸಹಸ್ಸಪಲಂ ಲೋಹಾದಿಭಾರಂ ವಹಿತುಂ ಸಮತ್ಥಂ ದ್ವಿಸಹಸ್ಸಥಾಮಂ। ತೇನಾಹ ‘‘ದ್ವಿಸಹಸ್ಸಥಾಮಂ ನಾಮಾ’’ತಿಆದಿ। ದಣ್ಡೇತಿ ಧನುದಣ್ಡೇ। ಯಾವ ಕಣ್ಡಪ್ಪಮಾಣಾತಿ ದೀಘತೋ ಯತ್ತಕಂ ಕಣ್ಡಸ್ಸ ಪಮಾಣಂ, ತತ್ತಕೇ ಧನುದಣ್ಡೇ ಉಕ್ಖಿತ್ತಮತ್ತೇ ಆರೋಪಿತೋ ಚೇವ ಹೋತಿ ಜಿಯಾದಣ್ಡೋ, ಸೋ ಚ ಭಾರೋ ಪಥವಿತೋ ಮುಚ್ಚತಿ, ಏವಂ ಇದಂ ‘‘ದ್ವಿಸಹಸ್ಸಥಾಮಂ ನಾಮ ಧನೂತಿ ದಟ್ಠಬ್ಬಂ। ಉಗ್ಗಹಿತಸಿಪ್ಪೋತಿ ಉಗ್ಗಹಿತಧನುಸಿಪ್ಪೋ। ಕತಹತ್ಥೋತಿ ಥಿರತರಂ ಲಕ್ಖೇಸು ಅವಿರಜ್ಝನಸರಕ್ಖೇಪೋ। ಈದಿಸೋ ಪನ ತತ್ಥ ವಸೀಭೂತೋ ಕತಹತ್ಥೋ ನಾಮ ಹೋತೀತಿ ಆಹ ‘‘ಚಿಣ್ಣವಸೀಭಾವೋ’’ತಿ। ಕತಂ ರಾಜಕುಲಾದೀಸು ಉಪೇಚ್ಚ ಅಸನಂ ಏತೇನ ಸೋ ಕತೂಪಾಸನೋತಿ ಆಹ ‘‘ರಾಜಕುಲಾದೀಸು ದಸ್ಸಿತಸಿಪ್ಪೋ’’ತಿ। ಏವಂ ಕತನ್ತಿ ಏವಂ ಅನ್ತೋಸುಸಿರಕರಣಾದಿನಾ ಸಲ್ಲಹುಕಂ ಕತಂ।
Daḷhaṃ (a. ni. ṭī. 3.9.38) thiraṃ dhanu etassāti daḷhadhanvā, so eva idha ‘‘daḷhadhammā’’ti vutto. Paṭisattuvidhamanatthaṃ dhanuṃ gaṇhātīti dhanuggaho, so eva usuṃ saraṃ asati khipatīti issāsoti āha ‘‘dhanuṃ gahetvā ṭhito issāso’’ti. Dvisahassapalaṃ lohādibhāraṃ vahituṃ samatthaṃ dvisahassathāmaṃ. Tenāha ‘‘dvisahassathāmaṃ nāmā’’tiādi. Daṇḍeti dhanudaṇḍe. Yāva kaṇḍappamāṇāti dīghato yattakaṃ kaṇḍassa pamāṇaṃ, tattake dhanudaṇḍe ukkhittamatte āropito ceva hoti jiyādaṇḍo, so ca bhāro pathavito muccati, evaṃ idaṃ ‘‘dvisahassathāmaṃ nāma dhanūti daṭṭhabbaṃ. Uggahitasippoti uggahitadhanusippo. Katahatthoti thirataraṃ lakkhesu avirajjhanasarakkhepo. Īdiso pana tattha vasībhūto katahattho nāma hotīti āha ‘‘ciṇṇavasībhāvo’’ti. Kataṃ rājakulādīsu upecca asanaṃ etena so katūpāsanoti āha ‘‘rājakulādīsu dassitasippo’’ti. Evaṃ katanti evaṃ antosusirakaraṇādinā sallahukaṃ kataṃ.
ಓಲೋಕೇತೀತಿ ಉದಿಕ್ಖತಿ। ಏವಂ ಸನ್ತೇಪಿ ತೇಸಂ ವಾರೋ ಪಞ್ಞಾಯತೀತಿ ತೇಸಂ ಭಿಕ್ಖೂನಂ ‘‘ಅಯಂ ಪಠಮಂ ಪುಚ್ಛತಿ, ಅಯಂ ದುತಿಯ’’ನ್ತಿಆದಿನಾ ಪುಚ್ಛನವಾರೋ ತಾದಿಸಸ್ಸ ಪಞ್ಞವತೋ ಪಞ್ಞಾಯತಿ ಸುಖುಮಸ್ಸ ಅನ್ತರಸ್ಸ ಲಬ್ಭನತೋ। ಬುದ್ಧಾನಂ ಪನ ವಾರೋತಿ ಈದಿಸೇ ಠಾನೇ ಬುದ್ಧಾನಂ ದೇಸನಾವಾರೋ ಅಞ್ಞೇಸಂ ನಪಞ್ಞಾಯನತೋ ಬುದ್ಧಾನಂಯೇವ ಪಞ್ಞಾಯತಿ। ಇದಾನಿ ತಮೇವ ಪಞ್ಞಾಯನತಂ ಯುತ್ತಿತೋ ದಸ್ಸೇನ್ತೋ ‘‘ವಿದತ್ಥಿಚತುರಙ್ಗುಲಛಾಯ’’ನ್ತಿಆದಿಮಾಹ। ಅಚ್ಛರಾಸಙ್ಘಾಟಮತ್ತೇ ಖಣೇ ಅನೇಕ-ಕೋಟಿಸಹಸ್ಸ-ಚಿತ್ತಪವತ್ತಿಸಮ್ಭವತೋ ‘‘ವಿದತ್ಥಿಚತುರಙ್ಗುಲಛಾಯಂ ಅತಿಕ್ಕಮನತೋ ಪುರೇತರಂಯೇವ ಭಗವಾ…ಪೇ॰… ಕಥೇತೀ’’ತಿ ವತ್ವಾ ತತೋ ಲಹುತರಾಪಿ ಸತ್ಥು ದೇಸನಾಪವತ್ತಿ ಅತ್ಥೇವಾತಿ ದಸ್ಸೇನ್ತೋ ‘‘ತಿಟ್ಠನ್ತು ವಾ ತಾವ ಏತೇ’’ತಿಆದಿಮಾಹ। ಇದಾನಿ ತತ್ಥ ಕಾರಣಂ ದಸ್ಸೇತುಂ ‘‘ಕಸ್ಮಾ’’ತಿಆದಿ ವುತ್ತಂ। ಸೋಳಸ ಪದಾನಿ ಕಥೇತೀತಿ ಏತೇನ ಲೋಕಿಯಜನಸ್ಸ ಏಕಪದುಚ್ಚಾರಣಕ್ಖಣೇ ಭಗವಾ ಅಟ್ಠವೀಸಸತಪದಾನಿ ಕಥೇತೀತಿ ದಸ್ಸೇತಿ। ಇದಾನಿ ತಸ್ಸಪಿ ಕಾರಣಂ ದಸ್ಸೇತುಂ ‘‘ಕಸ್ಮಾ’’ತಿಆದಿ ವುತ್ತಂ।
Oloketīti udikkhati. Evaṃ santepi tesaṃ vāro paññāyatīti tesaṃ bhikkhūnaṃ ‘‘ayaṃ paṭhamaṃ pucchati, ayaṃ dutiya’’ntiādinā pucchanavāro tādisassa paññavato paññāyati sukhumassa antarassa labbhanato. Buddhānaṃ pana vāroti īdise ṭhāne buddhānaṃ desanāvāro aññesaṃ napaññāyanato buddhānaṃyeva paññāyati. Idāni tameva paññāyanataṃ yuttito dassento ‘‘vidatthicaturaṅgulachāya’’ntiādimāha. Accharāsaṅghāṭamatte khaṇe aneka-koṭisahassa-cittapavattisambhavato ‘‘vidatthicaturaṅgulachāyaṃ atikkamanato puretaraṃyeva bhagavā…pe… kathetī’’ti vatvā tato lahutarāpi satthu desanāpavatti atthevāti dassento ‘‘tiṭṭhantu vā tāva ete’’tiādimāha. Idāni tattha kāraṇaṃ dassetuṃ ‘‘kasmā’’tiādi vuttaṃ. Soḷasa padāni kathetīti etena lokiyajanassa ekapaduccāraṇakkhaṇe bhagavā aṭṭhavīsasatapadāni kathetīti dasseti. Idāni tassapi kāraṇaṃ dassetuṃ ‘‘kasmā’’tiādi vuttaṃ.
ಧಮ್ಮೋತಿ ಪಾಳಿ। ಪಜ್ಜತಿ ಅತ್ಥೋ ಏತೇನಾತಿ ಪದಂ, ತದತ್ಥೋ। ಅತ್ಥಂ ಬ್ಯಞ್ಜೇತೀತಿ ಬ್ಯಞ್ಜನಂ, ಅಕ್ಖರಂ। ತಞ್ಹಿ ಪದವಾಕ್ಯಕ್ಖರಭಾವೇಹಿ ಪರಿಚ್ಛಿಜ್ಜಮಾನಂ ತಂ ತಂ ಅತ್ಥಂ ಬ್ಯಞ್ಜೇತಿ ಪಕಾಸೇತಿ। ತೇನಾಹ ‘‘ಧಮ್ಮಪದಬ್ಯಞ್ಜನನ್ತಿ ಪಾಳಿಯಾ ಪದಬ್ಯಞ್ಜನಂ, ತಸ್ಸ ತಸ್ಸ ಅತ್ಥಸ್ಸ ಬ್ಯಞ್ಜನಕಂ ಅಕ್ಖರ’’ನ್ತಿ। ಏತೇನ ಅಪರಾಪರೇಹಿ ಪದಬ್ಯಞ್ಜನೇಹಿ ಸುಚಿರಮ್ಪಿ ಕಾಲಂ ಕಥೇನ್ತಸ್ಸ ತಥಾಗತಸ್ಸ ನ ಕದಾಚಿ ತೇಸಂ ಪರಿಯಾದಾನಂ ಅತ್ಥೀತಿ ದಸ್ಸೇತಿ। ಪಞ್ಹಂ ಬ್ಯಾಕರೋನ್ತಿ ಏತೇನಾತಿ ಪಞ್ಹಬ್ಯಾಕರಣಂ, ತಥಾಪವತ್ತಪಟಿಭಾನಂ। ಅಪರಿಕ್ಖಯಪಟಿಭಾನಾ ಹಿ ಬುದ್ಧಾ ಭಗವನ್ತೋ, ಯತೋ ವುತ್ತಂ ‘‘ನತ್ಥಿ ಧಮ್ಮದೇಸನಾಯ ಹಾನೀ’’ತಿ (ದೀ॰ ನಿ॰ ಟೀ॰ ೩.೧೪೧, ೩೦೫; ವಿಭ॰ ಮೂಲಟೀ॰ ೧.ಸುತ್ತನ್ತಭಾಜನೀಯವಣ್ಣನಾ)। ತೇನಾಹ ‘‘ಇಮಿನಾ ಕಿಂ ದಸ್ಸೇತೀ’’ತಿಆದಿ। ತಥಾ ಆಸನ್ನಪರಿನಿಬ್ಬಾನಸ್ಸಪಿ ಭಗವತೋ ದೇಸನಾಯ ಇತರಾಯ ಚ ವಿಸೇಸಾತಾವೋತಿ ಪಠಮಬುದ್ಧವಚನಮ್ಪಿ ಮಜ್ಝಿಮಬುದ್ಧವಚನಮ್ಪಿ ಪಚ್ಛಿಮಬುದ್ಧವಚನಮ್ಪಿ ಸದಿಸಮೇವ। ಆಸೀತಿಕವಸ್ಸತೋ ಪರಂ ಪಞ್ಚಮೋ ಆಯುಕೋಟ್ಠಾಸೋ।
Dhammoti pāḷi. Pajjati attho etenāti padaṃ, tadattho. Atthaṃ byañjetīti byañjanaṃ, akkharaṃ. Tañhi padavākyakkharabhāvehi paricchijjamānaṃ taṃ taṃ atthaṃ byañjeti pakāseti. Tenāha ‘‘dhammapadabyañjananti pāḷiyā padabyañjanaṃ, tassa tassa atthassa byañjanakaṃ akkhara’’nti. Etena aparāparehi padabyañjanehi sucirampi kālaṃ kathentassa tathāgatassa na kadāci tesaṃ pariyādānaṃ atthīti dasseti. Pañhaṃ byākaronti etenāti pañhabyākaraṇaṃ, tathāpavattapaṭibhānaṃ. Aparikkhayapaṭibhānā hi buddhā bhagavanto, yato vuttaṃ ‘‘natthi dhammadesanāya hānī’’ti (dī. ni. ṭī. 3.141, 305; vibha. mūlaṭī. 1.suttantabhājanīyavaṇṇanā). Tenāha ‘‘iminā kiṃ dassetī’’tiādi. Tathā āsannaparinibbānassapi bhagavato desanāya itarāya ca visesātāvoti paṭhamabuddhavacanampi majjhimabuddhavacanampi pacchimabuddhavacanampi sadisameva. Āsītikavassato paraṃ pañcamo āyukoṭṭhāso.
೧೬೨. ಕಾಮಞ್ಚೇತ್ಥ ಭಗವತಾ ನಾಗಸಮಾಲತ್ಥೇರಸ್ಸ ಅಚ್ಛರಿಯಅಬ್ಭುತಪವೇದನಮುಖೇನ ಅತ್ತನೋ ಲೋಮಾನಂ ಹಟ್ಠಭಾವಸ್ಸ ಪವೇದಿತತ್ತಾ ‘‘ಲೋಮಹಂಸನಪರಿಯಾಯೋ’’ತಿ ನಾಮಂ ಗಹಿತಂ, ತಥಾಪಿ ಸಬ್ಬಞ್ಞುತಞ್ಞಾಣಾದಿ-ಅನಞ್ಞಸಾಧಾರಣಞಾಣಾನುಭಾವ-ವಿಭಾವನಾದಿವಸೇನ ಸೋಳಸಸಮೂಹತೋ ಸೀಹನಾದಸ್ಸ ನದನೇನ ದೇಸನಾಯ ಪವತ್ತಿತತ್ತಾ ‘‘ಮಹಾಸೀಹನಾದೋ’’ತ್ವೇವ ಸಙ್ಗೀತಿಕಾರಮಹಾಥೇರೇಹಿ ನಾಮಂ ಠಪಿತನ್ತಿ ದಟ್ಠಬ್ಬಂ।
162. Kāmañcettha bhagavatā nāgasamālattherassa acchariyaabbhutapavedanamukhena attano lomānaṃ haṭṭhabhāvassa paveditattā ‘‘lomahaṃsanapariyāyo’’ti nāmaṃ gahitaṃ, tathāpi sabbaññutaññāṇādi-anaññasādhāraṇañāṇānubhāva-vibhāvanādivasena soḷasasamūhato sīhanādassa nadanena desanāya pavattitattā ‘‘mahāsīhanādo’’tveva saṅgītikāramahātherehi nāmaṃ ṭhapitanti daṭṭhabbaṃ.
ಮಹಾಸೀಹನಾದಸುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।
Mahāsīhanādasuttavaṇṇanāya līnatthappakāsanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೨. ಮಹಾಸೀಹನಾದಸುತ್ತಂ • 2. Mahāsīhanādasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) / ೨. ಮಹಾಸೀಹನಾದಸುತ್ತವಣ್ಣನಾ • 2. Mahāsīhanādasuttavaṇṇanā
