| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೦. ಮಹಾಸಾಲಪುತ್ತಸುತ್ತಂ
10. Mahāsālaputtasuttaṃ
೪೦. ‘‘ಹಿಮವನ್ತಂ, ಭಿಕ್ಖವೇ, ಪಬ್ಬತರಾಜಂ ನಿಸ್ಸಾಯ ಮಹಾಸಾಲಾ ಪಞ್ಚಹಿ ವಡ್ಢೀಹಿ ವಡ್ಢನ್ತಿ। ಕತಮಾಹಿ ಪಞ್ಚಹಿ? ಸಾಖಾಪತ್ತಪಲಾಸೇನ ವಡ್ಢನ್ತಿ; ತಚೇನ ವಡ್ಢನ್ತಿ; ಪಪಟಿಕಾಯ ವಡ್ಢನ್ತಿ; ಫೇಗ್ಗುನಾ ವಡ್ಢನ್ತಿ; ಸಾರೇನ ವಡ್ಢನ್ತಿ। ಹಿಮವನ್ತಂ, ಭಿಕ್ಖವೇ, ಪಬ್ಬತರಾಜಂ ನಿಸ್ಸಾಯ ಮಹಾಸಾಲಾ ಇಮಾಹಿ ಪಞ್ಚಹಿ ವಡ್ಢೀಹಿ ವಡ್ಢನ್ತಿ। ಏವಮೇವಂ ಖೋ, ಭಿಕ್ಖವೇ, ಸದ್ಧಂ ಕುಲಪುತ್ತಂ ನಿಸ್ಸಾಯ ಅನ್ತೋಜನೋ ಪಞ್ಚಹಿ ವಡ್ಢೀಹಿ ವಡ್ಢತಿ। ಕತಮಾಹಿ ಪಞ್ಚಹಿ? ಸದ್ಧಾಯ ವಡ್ಢತಿ; ಸೀಲೇನ ವಡ್ಢತಿ; ಸುತೇನ ವಡ್ಢತಿ; ಚಾಗೇನ ವಡ್ಢತಿ; ಪಞ್ಞಾಯ ವಡ್ಢತಿ। ಸದ್ಧಂ, ಭಿಕ್ಖವೇ, ಕುಲಪುತ್ತಂ ನಿಸ್ಸಾಯ ಅನ್ತೋಜನೋ ಇಮಾಹಿ ಪಞ್ಚಹಿ ವಡ್ಢೀಹಿ ವಡ್ಢತೀ’’ತಿ।
40. ‘‘Himavantaṃ, bhikkhave, pabbatarājaṃ nissāya mahāsālā pañcahi vaḍḍhīhi vaḍḍhanti. Katamāhi pañcahi? Sākhāpattapalāsena vaḍḍhanti; tacena vaḍḍhanti; papaṭikāya vaḍḍhanti; pheggunā vaḍḍhanti; sārena vaḍḍhanti. Himavantaṃ, bhikkhave, pabbatarājaṃ nissāya mahāsālā imāhi pañcahi vaḍḍhīhi vaḍḍhanti. Evamevaṃ kho, bhikkhave, saddhaṃ kulaputtaṃ nissāya antojano pañcahi vaḍḍhīhi vaḍḍhati. Katamāhi pañcahi? Saddhāya vaḍḍhati; sīlena vaḍḍhati; sutena vaḍḍhati; cāgena vaḍḍhati; paññāya vaḍḍhati. Saddhaṃ, bhikkhave, kulaputtaṃ nissāya antojano imāhi pañcahi vaḍḍhīhi vaḍḍhatī’’ti.
‘‘ಯಥಾ ಹಿ ಪಬ್ಬತೋ ಸೇಲೋ, ಅರಞ್ಞಸ್ಮಿಂ ಬ್ರಹಾವನೇ।
‘‘Yathā hi pabbato selo, araññasmiṃ brahāvane;
ತಂ ರುಕ್ಖಾ ಉಪನಿಸ್ಸಾಯ, ವಡ್ಢನ್ತೇ ತೇ ವನಪ್ಪತೀ॥
Taṃ rukkhā upanissāya, vaḍḍhante te vanappatī.
ಉಪನಿಸ್ಸಾಯ ವಡ್ಢನ್ತಿ, ಪುತ್ತದಾರಾ ಚ ಬನ್ಧವಾ।
Upanissāya vaḍḍhanti, puttadārā ca bandhavā;
ಅಮಚ್ಚಾ ಞಾತಿಸಙ್ಘಾ ಚ, ಯೇ ಚಸ್ಸ ಅನುಜೀವಿನೋ॥
Amaccā ñātisaṅghā ca, ye cassa anujīvino.
‘‘ತ್ಯಸ್ಸ ಸೀಲವತೋ ಸೀಲಂ, ಚಾಗಂ ಸುಚರಿತಾನಿ ಚ।
‘‘Tyassa sīlavato sīlaṃ, cāgaṃ sucaritāni ca;
ಪಸ್ಸಮಾನಾನುಕುಬ್ಬನ್ತಿ, ಯೇ ಭವನ್ತಿ ವಿಚಕ್ಖಣಾ॥
Passamānānukubbanti, ye bhavanti vicakkhaṇā.
ನನ್ದಿನೋ ದೇವಲೋಕಸ್ಮಿಂ, ಮೋದನ್ತಿ ಕಾಮಕಾಮಿನೋ’’ತಿ॥ ದಸಮಂ।
Nandino devalokasmiṃ, modanti kāmakāmino’’ti. dasamaṃ;
ಸುಮನವಗ್ಗೋ ಚತುತ್ಥೋ।
Sumanavaggo catuttho.
ತಸ್ಸುದ್ದಾನಂ –
Tassuddānaṃ –
ಸುಮನಾ ಚುನ್ದೀ ಉಗ್ಗಹೋ, ಸೀಹೋ ದಾನಾನಿಸಂಸಕೋ।
Sumanā cundī uggaho, sīho dānānisaṃsako;
ಕಾಲಭೋಜನಸದ್ಧಾ ಚ, ಪುತ್ತಸಾಲೇಹಿ ತೇ ದಸಾತಿ॥
Kālabhojanasaddhā ca, puttasālehi te dasāti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧೦. ಮಹಾಸಾಲಪುತ್ತಸುತ್ತವಣ್ಣನಾ • 10. Mahāsālaputtasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೯-೧೦. ಪುತ್ತಸುತ್ತಾದಿವಣ್ಣನಾ • 9-10. Puttasuttādivaṇṇanā
