| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១០. មហាសាលបុត្តសុត្តំ
10. Mahāsālaputtasuttaṃ
៤០. ‘‘ហិមវន្តំ, ភិក្ខវេ, បព្ពតរាជំ និស្សាយ មហាសាលា បញ្ចហិ វឌ្ឍីហិ វឌ្ឍន្តិ។ កតមាហិ បញ្ចហិ? សាខាបត្តបលាសេន វឌ្ឍន្តិ; តចេន វឌ្ឍន្តិ; បបដិកាយ វឌ្ឍន្តិ; ផេគ្គុនា វឌ្ឍន្តិ; សារេន វឌ្ឍន្តិ។ ហិមវន្តំ, ភិក្ខវេ, បព្ពតរាជំ និស្សាយ មហាសាលា ឥមាហិ បញ្ចហិ វឌ្ឍីហិ វឌ្ឍន្តិ។ ឯវមេវំ ខោ, ភិក្ខវេ, សទ្ធំ កុលបុត្តំ និស្សាយ អន្តោជនោ បញ្ចហិ វឌ្ឍីហិ វឌ្ឍតិ។ កតមាហិ បញ្ចហិ? សទ្ធាយ វឌ្ឍតិ; សីលេន វឌ្ឍតិ; សុតេន វឌ្ឍតិ; ចាគេន វឌ្ឍតិ; បញ្ញាយ វឌ្ឍតិ។ សទ្ធំ, ភិក្ខវេ, កុលបុត្តំ និស្សាយ អន្តោជនោ ឥមាហិ បញ្ចហិ វឌ្ឍីហិ វឌ្ឍតី’’តិ។
40. ‘‘Himavantaṃ, bhikkhave, pabbatarājaṃ nissāya mahāsālā pañcahi vaḍḍhīhi vaḍḍhanti. Katamāhi pañcahi? Sākhāpattapalāsena vaḍḍhanti; tacena vaḍḍhanti; papaṭikāya vaḍḍhanti; pheggunā vaḍḍhanti; sārena vaḍḍhanti. Himavantaṃ, bhikkhave, pabbatarājaṃ nissāya mahāsālā imāhi pañcahi vaḍḍhīhi vaḍḍhanti. Evamevaṃ kho, bhikkhave, saddhaṃ kulaputtaṃ nissāya antojano pañcahi vaḍḍhīhi vaḍḍhati. Katamāhi pañcahi? Saddhāya vaḍḍhati; sīlena vaḍḍhati; sutena vaḍḍhati; cāgena vaḍḍhati; paññāya vaḍḍhati. Saddhaṃ, bhikkhave, kulaputtaṃ nissāya antojano imāhi pañcahi vaḍḍhīhi vaḍḍhatī’’ti.
‘‘យថា ហិ បព្ពតោ សេលោ, អរញ្ញស្មិំ ព្រហាវនេ;
‘‘Yathā hi pabbato selo, araññasmiṃ brahāvane;
តំ រុក្ខា ឧបនិស្សាយ, វឌ្ឍន្តេ តេ វនប្បតី។
Taṃ rukkhā upanissāya, vaḍḍhante te vanappatī.
ឧបនិស្សាយ វឌ្ឍន្តិ, បុត្តទារា ច ពន្ធវា;
Upanissāya vaḍḍhanti, puttadārā ca bandhavā;
អមច្ចា ញាតិសង្ឃា ច, យេ ចស្ស អនុជីវិនោ។
Amaccā ñātisaṅghā ca, ye cassa anujīvino.
‘‘ត្យស្ស សីលវតោ សីលំ, ចាគំ សុចរិតានិ ច;
‘‘Tyassa sīlavato sīlaṃ, cāgaṃ sucaritāni ca;
បស្សមានានុកុព្ពន្តិ, យេ ភវន្តិ វិចក្ខណា។
Passamānānukubbanti, ye bhavanti vicakkhaṇā.
នន្ទិនោ ទេវលោកស្មិំ, មោទន្តិ កាមកាមិនោ’’តិ។ ទសមំ;
Nandino devalokasmiṃ, modanti kāmakāmino’’ti. dasamaṃ;
សុមនវគ្គោ ចតុត្ថោ។
Sumanavaggo catuttho.
តស្សុទ្ទានំ –
Tassuddānaṃ –
សុមនា ចុន្ទី ឧគ្គហោ, សីហោ ទានានិសំសកោ;
Sumanā cundī uggaho, sīho dānānisaṃsako;
កាលភោជនសទ្ធា ច, បុត្តសាលេហិ តេ ទសាតិ។
Kālabhojanasaddhā ca, puttasālehi te dasāti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១០. មហាសាលបុត្តសុត្តវណ្ណនា • 10. Mahāsālaputtasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៩-១០. បុត្តសុត្តាទិវណ្ណនា • 9-10. Puttasuttādivaṇṇanā
