| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
१०. महासालपुत्तसुत्तं
10. Mahāsālaputtasuttaṃ
४०. ‘‘हिमवन्तं, भिक्खवे, पब्बतराजं निस्साय महासाला पञ्चहि वड्ढीहि वड्ढन्ति। कतमाहि पञ्चहि? साखापत्तपलासेन वड्ढन्ति; तचेन वड्ढन्ति; पपटिकाय वड्ढन्ति; फेग्गुना वड्ढन्ति; सारेन वड्ढन्ति। हिमवन्तं, भिक्खवे, पब्बतराजं निस्साय महासाला इमाहि पञ्चहि वड्ढीहि वड्ढन्ति। एवमेवं खो, भिक्खवे, सद्धं कुलपुत्तं निस्साय अन्तोजनो पञ्चहि वड्ढीहि वड्ढति। कतमाहि पञ्चहि? सद्धाय वड्ढति; सीलेन वड्ढति; सुतेन वड्ढति; चागेन वड्ढति; पञ्ञाय वड्ढति। सद्धं, भिक्खवे, कुलपुत्तं निस्साय अन्तोजनो इमाहि पञ्चहि वड्ढीहि वड्ढती’’ति।
40. ‘‘Himavantaṃ, bhikkhave, pabbatarājaṃ nissāya mahāsālā pañcahi vaḍḍhīhi vaḍḍhanti. Katamāhi pañcahi? Sākhāpattapalāsena vaḍḍhanti; tacena vaḍḍhanti; papaṭikāya vaḍḍhanti; pheggunā vaḍḍhanti; sārena vaḍḍhanti. Himavantaṃ, bhikkhave, pabbatarājaṃ nissāya mahāsālā imāhi pañcahi vaḍḍhīhi vaḍḍhanti. Evamevaṃ kho, bhikkhave, saddhaṃ kulaputtaṃ nissāya antojano pañcahi vaḍḍhīhi vaḍḍhati. Katamāhi pañcahi? Saddhāya vaḍḍhati; sīlena vaḍḍhati; sutena vaḍḍhati; cāgena vaḍḍhati; paññāya vaḍḍhati. Saddhaṃ, bhikkhave, kulaputtaṃ nissāya antojano imāhi pañcahi vaḍḍhīhi vaḍḍhatī’’ti.
‘‘यथा हि पब्बतो सेलो, अरञ्ञस्मिं ब्रहावने।
‘‘Yathā hi pabbato selo, araññasmiṃ brahāvane;
तं रुक्खा उपनिस्साय, वड्ढन्ते ते वनप्पती॥
Taṃ rukkhā upanissāya, vaḍḍhante te vanappatī.
उपनिस्साय वड्ढन्ति, पुत्तदारा च बन्धवा।
Upanissāya vaḍḍhanti, puttadārā ca bandhavā;
अमच्चा ञातिसङ्घा च, ये चस्स अनुजीविनो॥
Amaccā ñātisaṅghā ca, ye cassa anujīvino.
‘‘त्यस्स सीलवतो सीलं, चागं सुचरितानि च।
‘‘Tyassa sīlavato sīlaṃ, cāgaṃ sucaritāni ca;
पस्समानानुकुब्बन्ति, ये भवन्ति विचक्खणा॥
Passamānānukubbanti, ye bhavanti vicakkhaṇā.
नन्दिनो देवलोकस्मिं, मोदन्ति कामकामिनो’’ति॥ दसमं।
Nandino devalokasmiṃ, modanti kāmakāmino’’ti. dasamaṃ;
सुमनवग्गो चतुत्थो।
Sumanavaggo catuttho.
तस्सुद्दानं –
Tassuddānaṃ –
सुमना चुन्दी उग्गहो, सीहो दानानिसंसको।
Sumanā cundī uggaho, sīho dānānisaṃsako;
कालभोजनसद्धा च, पुत्तसालेहि ते दसाति॥
Kālabhojanasaddhā ca, puttasālehi te dasāti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / १०. महासालपुत्तसुत्तवण्णना • 10. Mahāsālaputtasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ९-१०. पुत्तसुत्तादिवण्णना • 9-10. Puttasuttādivaṇṇanā
