| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. মহাসালপুত্তসুত্তং
10. Mahāsālaputtasuttaṃ
৪০. ‘‘হিমৰন্তং, ভিক্খৰে, পব্বতরাজং নিস্সায মহাসালা পঞ্চহি ৰড্ঢীহি ৰড্ঢন্তি। কতমাহি পঞ্চহি? সাখাপত্তপলাসেন ৰড্ঢন্তি; তচেন ৰড্ঢন্তি; পপটিকায ৰড্ঢন্তি; ফেগ্গুনা ৰড্ঢন্তি; সারেন ৰড্ঢন্তি। হিমৰন্তং, ভিক্খৰে, পব্বতরাজং নিস্সায মহাসালা ইমাহি পঞ্চহি ৰড্ঢীহি ৰড্ঢন্তি। এৰমেৰং খো, ভিক্খৰে, সদ্ধং কুলপুত্তং নিস্সায অন্তোজনো পঞ্চহি ৰড্ঢীহি ৰড্ঢতি। কতমাহি পঞ্চহি? সদ্ধায ৰড্ঢতি; সীলেন ৰড্ঢতি; সুতেন ৰড্ঢতি; চাগেন ৰড্ঢতি; পঞ্ঞায ৰড্ঢতি। সদ্ধং, ভিক্খৰে, কুলপুত্তং নিস্সায অন্তোজনো ইমাহি পঞ্চহি ৰড্ঢীহি ৰড্ঢতী’’তি।
40. ‘‘Himavantaṃ, bhikkhave, pabbatarājaṃ nissāya mahāsālā pañcahi vaḍḍhīhi vaḍḍhanti. Katamāhi pañcahi? Sākhāpattapalāsena vaḍḍhanti; tacena vaḍḍhanti; papaṭikāya vaḍḍhanti; pheggunā vaḍḍhanti; sārena vaḍḍhanti. Himavantaṃ, bhikkhave, pabbatarājaṃ nissāya mahāsālā imāhi pañcahi vaḍḍhīhi vaḍḍhanti. Evamevaṃ kho, bhikkhave, saddhaṃ kulaputtaṃ nissāya antojano pañcahi vaḍḍhīhi vaḍḍhati. Katamāhi pañcahi? Saddhāya vaḍḍhati; sīlena vaḍḍhati; sutena vaḍḍhati; cāgena vaḍḍhati; paññāya vaḍḍhati. Saddhaṃ, bhikkhave, kulaputtaṃ nissāya antojano imāhi pañcahi vaḍḍhīhi vaḍḍhatī’’ti.
‘‘যথা হি পব্বতো সেলো, অরঞ্ঞস্মিং ব্রহাৰনে।
‘‘Yathā hi pabbato selo, araññasmiṃ brahāvane;
তং রুক্খা উপনিস্সায, ৰড্ঢন্তে তে ৰনপ্পতী॥
Taṃ rukkhā upanissāya, vaḍḍhante te vanappatī.
উপনিস্সায ৰড্ঢন্তি, পুত্তদারা চ বন্ধৰা।
Upanissāya vaḍḍhanti, puttadārā ca bandhavā;
অমচ্চা ঞাতিসঙ্ঘা চ, যে চস্স অনুজীৰিনো॥
Amaccā ñātisaṅghā ca, ye cassa anujīvino.
‘‘ত্যস্স সীলৰতো সীলং, চাগং সুচরিতানি চ।
‘‘Tyassa sīlavato sīlaṃ, cāgaṃ sucaritāni ca;
পস্সমানানুকুব্বন্তি, যে ভৰন্তি ৰিচক্খণা॥
Passamānānukubbanti, ye bhavanti vicakkhaṇā.
নন্দিনো দেৰলোকস্মিং, মোদন্তি কামকামিনো’’তি॥ দসমং।
Nandino devalokasmiṃ, modanti kāmakāmino’’ti. dasamaṃ;
সুমনৰগ্গো চতুত্থো।
Sumanavaggo catuttho.
তস্সুদ্দানং –
Tassuddānaṃ –
সুমনা চুন্দী উগ্গহো, সীহো দানানিসংসকো।
Sumanā cundī uggaho, sīho dānānisaṃsako;
কালভোজনসদ্ধা চ, পুত্তসালেহি তে দসাতি॥
Kālabhojanasaddhā ca, puttasālehi te dasāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. মহাসালপুত্তসুত্তৰণ্ণনা • 10. Mahāsālaputtasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৯-১০. পুত্তসুত্তাদিৰণ্ণনা • 9-10. Puttasuttādivaṇṇanā
