| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. নালন্দৰগ্গো
2. Nālandavaggo
১. মহাপুরিসসুত্তং
1. Mahāpurisasuttaṃ
৩৭৭. সাৰত্থিনিদানং । অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা সারিপুত্তো ভগৰন্তং এতদৰোচ – ‘‘‘মহাপুরিসো, মহাপুরিসো’তি, ভন্তে, ৰুচ্চতি। কিত্তাৰতা নু খো, ভন্তে, মহাপুরিসো হোতী’’তি? ‘‘ৰিমুত্তচিত্তত্তা খ্ৰাহং, সারিপুত্ত, ‘মহাপুরিসো’তি ৰদামি। অৰিমুত্তচিত্তত্তা ‘নো মহাপুরিসো’তি ৰদামি’’।
377. Sāvatthinidānaṃ . Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhagavantaṃ etadavoca – ‘‘‘mahāpuriso, mahāpuriso’ti, bhante, vuccati. Kittāvatā nu kho, bhante, mahāpuriso hotī’’ti? ‘‘Vimuttacittattā khvāhaṃ, sāriputta, ‘mahāpuriso’ti vadāmi. Avimuttacittattā ‘no mahāpuriso’ti vadāmi’’.
‘‘কথঞ্চ, সারিপুত্ত, ৰিমুত্তচিত্তো হোতি? ইধ, সারিপুত্ত, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। তস্স কাযে কাযানুপস্সিনো ৰিহরতো চিত্তং ৰিরজ্জতি, ৰিমুচ্চতি অনুপাদায আসৰেহি। ৰেদনাসু…পে॰… চিত্তে…পে॰… ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। তস্স ধম্মেসু ধম্মানুপস্সিনো ৰিহরতো চিত্তং ৰিরজ্জতি, ৰিমুচ্চতি অনুপাদায আসৰেহি। এৰং খো, সারিপুত্ত, ৰিমুত্তচিত্তো হোতি। ৰিমুত্তচিত্তত্তা খ্ৰাহং, সারিপুত্ত, ‘মহাপুরিসো’তি ৰদামি। অৰিমুত্তচিত্তত্তা ‘নো মহাপুরিসো’তি ৰদামী’’তি। পঠমং।
‘‘Kathañca, sāriputta, vimuttacitto hoti? Idha, sāriputta, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ. Tassa kāye kāyānupassino viharato cittaṃ virajjati, vimuccati anupādāya āsavehi. Vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Tassa dhammesu dhammānupassino viharato cittaṃ virajjati, vimuccati anupādāya āsavehi. Evaṃ kho, sāriputta, vimuttacitto hoti. Vimuttacittattā khvāhaṃ, sāriputta, ‘mahāpuriso’ti vadāmi. Avimuttacittattā ‘no mahāpuriso’ti vadāmī’’ti. Paṭhamaṃ.
