| Library / Tipiṭaka / तिपिटक • Tipiṭaka / जातकपाळि • Jātakapāḷi |
२४०. महापिङ्गलजातकं (२-९-१०)
240. Mahāpiṅgalajātakaṃ (2-9-10)
१७९.
179.
सब्बो जनो हिंसितो पिङ्गलेन, तस्मिं मते पच्चया 1 वेदयन्ति।
Sabbo jano hiṃsito piṅgalena, tasmiṃ mate paccayā 2 vedayanti;
पियो नु ते आसि अकण्हनेत्तो, कस्मा नु त्वं रोदसि द्वारपाल॥
Piyo nu te āsi akaṇhanetto, kasmā nu tvaṃ rodasi dvārapāla.
१८०.
180.
न मे पियो आसि अकण्हनेत्तो, भायामि पच्चागमनाय तस्स।
Na me piyo āsi akaṇhanetto, bhāyāmi paccāgamanāya tassa;
इतो गतो हिंसेय्य मच्चुराजं, सो हिंसितो आनेय्य पुन इध॥
Ito gato hiṃseyya maccurājaṃ, so hiṃsito āneyya puna idha.
१८१.
181.
दड्ढो वाहसहस्सेहि, सित्तो घटसतेहि सो।
Daḍḍho vāhasahassehi, sitto ghaṭasatehi so;
परिक्खता च सा भूमि, मा भायि नागमिस्सतीति॥
Parikkhatā ca sā bhūmi, mā bhāyi nāgamissatīti.
महापिङ्गलजातकं दसमं।
Mahāpiṅgalajātakaṃ dasamaṃ.
उपाहनवग्गो नवमो।
Upāhanavaggo navamo.
तस्सुद्दानं –
Tassuddānaṃ –
वरुपाहन खुज्ज विकण्णकको, असिताभुय पञ्चमवच्छनखो।
Varupāhana khujja vikaṇṇakako, asitābhuya pañcamavacchanakho;
दिज पेमवरुत्तमएकपदं, कुमिनामुख पिङ्गलकेन दसाति॥
Dija pemavaruttamaekapadaṃ, kumināmukha piṅgalakena dasāti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [२४०] १०. महापिङ्गलजातकवण्णना • [240] 10. Mahāpiṅgalajātakavaṇṇanā
