| Library / Tipiṭaka / တိပိဋက • Tipiṭaka / ပေတဝတ္ထုပာဠိ • Petavatthupāḷi |
၉. မဟာပေသကာရပေတိဝတ္ထု
9. Mahāpesakārapetivatthu
၅၄.
54.
‘‘ဂူထဉ္စ မုတ္တံ ရုဟိရဉ္စ ပုဗ္ဗံ၊ ပရိဘုဉ္ဇတိ ကိသ္သ အယံ ဝိပာကော။
‘‘Gūthañca muttaṃ ruhirañca pubbaṃ, paribhuñjati kissa ayaṃ vipāko;
အယံ နု ကိံ ကမ္မမကာသိ နာရီ၊ ယာ သဗ္ဗဒာ လောဟိတပုဗ္ဗဘက္ခာ။
Ayaṃ nu kiṃ kammamakāsi nārī, yā sabbadā lohitapubbabhakkhā.
၅၅.
55.
‘‘နဝာနိ ဝတ္ထာနိ သုဘာနိ စေဝ၊ မုဒူနိ သုဒ္ဓာနိ စ လောမသာနိ။
‘‘Navāni vatthāni subhāni ceva, mudūni suddhāni ca lomasāni;
ဒိန္နာနိ မိသ္သာ ကိတကာ 1 ဘဝန္တိ၊ အယံ နု ကိံ ကမ္မမကာသိ နာရီ’’တိ။
Dinnāni missā kitakā 2 bhavanti, ayaṃ nu kiṃ kammamakāsi nārī’’ti.
၅၆.
56.
‘‘ဘရိယာ မမေသာ အဟူ ဘဒန္တေ၊ အဒာယိကာ မစ္ဆရိနီ ကဒရိယာ။
‘‘Bhariyā mamesā ahū bhadante, adāyikā maccharinī kadariyā;
သာ မံ ဒဒန္တံ သမဏဗ္ရာဟ္မဏာနံ၊ အက္ကောသတိ စ ပရိဘာသတိ စ။
Sā maṃ dadantaṃ samaṇabrāhmaṇānaṃ, akkosati ca paribhāsati ca.
၅၇.
57.
‘‘‘ဂူထဉ္စ မုတ္တံ ရုဟိရဉ္စ ပုဗ္ဗံ၊ ပရိဘုဉ္ဇ တ္ဝံ အသုစိံ သဗ္ဗကာလံ။
‘‘‘Gūthañca muttaṃ ruhirañca pubbaṃ, paribhuñja tvaṃ asuciṃ sabbakālaṃ;
ဧတံ တေ ပရလောကသ္မိံ ဟောတု၊ ဝတ္ထာ စ တေ ကိဋကသမာ ဘဝန္တု’။
Etaṃ te paralokasmiṃ hotu, vatthā ca te kiṭakasamā bhavantu’;
ဧတာဒိသံ ဒုစ္စရိတံ စရိတ္ဝာ၊ ဣဓာဂတာ စိရရတ္တာယ ခာဒတီ’’တိ။
Etādisaṃ duccaritaṃ caritvā, idhāgatā cirarattāya khādatī’’ti.
မဟာပေသကာရပေတိဝတ္ထု နဝမံ။
Mahāpesakārapetivatthu navamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပေတဝတ္ထု-အဋ္ဌကထာ • Petavatthu-aṭṭhakathā / ၉. မဟာပေသကာရပေတိဝတ္ထုဝဏ္ဏနာ • 9. Mahāpesakārapetivatthuvaṇṇanā
