| Library / Tipiṭaka / तिपिटक • Tipiṭaka / पेतवत्थुपाळि • Petavatthupāḷi |
९. महापेसकारपेतिवत्थु
9. Mahāpesakārapetivatthu
५४.
54.
‘‘गूथञ्च मुत्तं रुहिरञ्च पुब्बं, परिभुञ्जति किस्स अयं विपाको।
‘‘Gūthañca muttaṃ ruhirañca pubbaṃ, paribhuñjati kissa ayaṃ vipāko;
अयं नु किं कम्ममकासि नारी, या सब्बदा लोहितपुब्बभक्खा॥
Ayaṃ nu kiṃ kammamakāsi nārī, yā sabbadā lohitapubbabhakkhā.
५५.
55.
‘‘नवानि वत्थानि सुभानि चेव, मुदूनि सुद्धानि च लोमसानि।
‘‘Navāni vatthāni subhāni ceva, mudūni suddhāni ca lomasāni;
दिन्नानि मिस्सा कितका 1 भवन्ति, अयं नु किं कम्ममकासि नारी’’ति॥
Dinnāni missā kitakā 2 bhavanti, ayaṃ nu kiṃ kammamakāsi nārī’’ti.
५६.
56.
‘‘भरिया ममेसा अहू भदन्ते, अदायिका मच्छरिनी कदरिया।
‘‘Bhariyā mamesā ahū bhadante, adāyikā maccharinī kadariyā;
सा मं ददन्तं समणब्राह्मणानं, अक्कोसति च परिभासति च॥
Sā maṃ dadantaṃ samaṇabrāhmaṇānaṃ, akkosati ca paribhāsati ca.
५७.
57.
‘‘‘गूथञ्च मुत्तं रुहिरञ्च पुब्बं, परिभुञ्ज त्वं असुचिं सब्बकालं।
‘‘‘Gūthañca muttaṃ ruhirañca pubbaṃ, paribhuñja tvaṃ asuciṃ sabbakālaṃ;
एतं ते परलोकस्मिं होतु, वत्था च ते किटकसमा भवन्तु’।
Etaṃ te paralokasmiṃ hotu, vatthā ca te kiṭakasamā bhavantu’;
एतादिसं दुच्चरितं चरित्वा, इधागता चिररत्ताय खादती’’ति॥
Etādisaṃ duccaritaṃ caritvā, idhāgatā cirarattāya khādatī’’ti.
महापेसकारपेतिवत्थु नवमं।
Mahāpesakārapetivatthu navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पेतवत्थु-अट्ठकथा • Petavatthu-aṭṭhakathā / ९. महापेसकारपेतिवत्थुवण्णना • 9. Mahāpesakārapetivatthuvaṇṇanā
