| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. মহাপদেসসুত্তং
10. Mahāpadesasuttaṃ
১৮০. একং সমযং ভগৰা ভোগনগরে ৰিহরতি আনন্দচেতিযে 1। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ – ‘‘চত্তারোমে, ভিক্খৰে, মহাপদেসে দেসেস্সামি, তং সুণাথ , সাধুকং মনসি করোথ; ভাসিস্সামী’’তি। ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। ভগৰা এতদৰোচ –
180. Ekaṃ samayaṃ bhagavā bhoganagare viharati ānandacetiye 2. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘cattārome, bhikkhave, mahāpadese desessāmi, taṃ suṇātha , sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘কতমে, ভিক্খৰে, চত্তারো মহাপদেসা? ইধ, ভিক্খৰে, ভিক্খু এৰং ৰদেয্য – ‘সম্মুখা মেতং, আৰুসো, ভগৰতো সুতং সম্মুখা পটিগ্গহিতং – অযং ধম্মো, অযং ৰিনযো, ইদং সত্থুসাসন’ন্তি। তস্স, ভিক্খৰে, ভিক্খুনো ভাসিতং নেৰ অভিনন্দিতব্বং নপ্পটিক্কোসিতব্বং। অনভিনন্দিত্ৰা অপ্পটিক্কোসিত্ৰা তানি পদব্যঞ্জনানি সাধুকং উগ্গহেত্ৰা সুত্তে ওতারেতব্বানি 3, ৰিনযে সন্দস্সেতব্বানি। তানি চে সুত্তে ওতারিযমানানি 4 ৰিনযে সন্দস্সিযমানানি ন চেৰ সুত্তে ওতরন্তি 5 ন ৰিনযে সন্দিস্সন্তি, নিট্ঠমেত্থ গন্তব্বং – ‘অদ্ধা, ইদং ন চেৰ তস্স ভগৰতো ৰচনং অরহতো সম্মাসম্বুদ্ধস্স; ইমস্স চ ভিক্খুনো দুগ্গহিত’ন্তি। ইতি হেতং 6, ভিক্খৰে, ছড্ডেয্যাথ।
‘‘Katame, bhikkhave, cattāro mahāpadesā? Idha, bhikkhave, bhikkhu evaṃ vadeyya – ‘sammukhā metaṃ, āvuso, bhagavato sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni 7, vinaye sandassetabbāni. Tāni ce sutte otāriyamānāni 8 vinaye sandassiyamānāni na ceva sutte otaranti 9 na vinaye sandissanti, niṭṭhamettha gantabbaṃ – ‘addhā, idaṃ na ceva tassa bhagavato vacanaṃ arahato sammāsambuddhassa; imassa ca bhikkhuno duggahita’nti. Iti hetaṃ 10, bhikkhave, chaḍḍeyyātha.
11 ‘‘ইধ পন, ভিক্খৰে, ভিক্খু এৰং ৰদেয্য – ‘সম্মুখা মেতং, আৰুসো, ভগৰতো সুতং সম্মুখা পটিগ্গহিতং – অযং ধম্মো, অযং ৰিনযো, ইদং সত্থুসাসন’ন্তি। তস্স, ভিক্খৰে, ভিক্খুনো ভাসিতং নেৰ অভিনন্দিতব্বং নপ্পটিক্কোসিতব্বং। অনভিনন্দিত্ৰা অপ্পটিক্কোসিত্ৰা তানি পদব্যঞ্জনানি সাধুকং উগ্গহেত্ৰা সুত্তে ওতারেতব্বানি, ৰিনযে সন্দস্সেতব্বানি 12। তানি চে সুত্তে ওতারিযমানানি ৰিনযে সন্দস্সিযমানানি সুত্তে চেৰ ওতরন্তি ৰিনযে চ সন্দিস্সন্তি, নিট্ঠমেত্থ গন্তব্বং – ‘অদ্ধা, ইদং তস্স ভগৰতো ৰচনং অরহতো সম্মাসম্বুদ্ধস্স; ইমস্স চ ভিক্খুনো সুগ্গহিত’ন্তি। ইদং, ভিক্খৰে, পঠমং মহাপদেসং ধারেয্যাথ।
13 ‘‘Idha pana, bhikkhave, bhikkhu evaṃ vadeyya – ‘sammukhā metaṃ, āvuso, bhagavato sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni 14. Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṃ – ‘addhā, idaṃ tassa bhagavato vacanaṃ arahato sammāsambuddhassa; imassa ca bhikkhuno suggahita’nti. Idaṃ, bhikkhave, paṭhamaṃ mahāpadesaṃ dhāreyyātha.
‘‘ইধ পন, ভিক্খৰে, ভিক্খু এৰং ৰদেয্য – ‘অসুকস্মিং নাম আৰাসে সঙ্ঘো ৰিহরতি সথেরো সপামোক্খো। তস্স মে সঙ্ঘস্স সম্মুখা সুতং সম্মুখা পটিগ্গহিতং – অযং ধম্মো, অযং ৰিনযো, ইদং সত্থুসাসন’ন্তি। তস্স, ভিক্খৰে, ভিক্খুনো ভাসিতং নেৰ অভিনন্দিতব্বং নপ্পটিক্কোসিতব্বং। অনভিনন্দিত্ৰা অপ্পটিক্কোসিত্ৰা তানি পদব্যঞ্জনানি সাধুকং উগ্গহেত্ৰা সুত্তে ওতারেতব্বানি, ৰিনযে সন্দস্সেতব্বানি। তানি চে সুত্তে ওতারিযমানানি ৰিনযে সন্দস্সিযমানানি ন চেৰ সুত্তে ওতরন্তি ন ৰিনযে সন্দিস্সন্তি, নিট্ঠমেত্থ গন্তব্বং – ‘অদ্ধা, ইদং ন চেৰ তস্স ভগৰতো ৰচনং অরহতো সম্মাসম্বুদ্ধস্স ; তস্স চ সঙ্ঘস্স দুগ্গহিত’ন্তি। ইতি হেতং, ভিক্খৰে, ছড্ডেয্যাথ।
‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse saṅgho viharati sathero sapāmokkho. Tassa me saṅghassa sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṃ – ‘addhā, idaṃ na ceva tassa bhagavato vacanaṃ arahato sammāsambuddhassa ; tassa ca saṅghassa duggahita’nti. Iti hetaṃ, bhikkhave, chaḍḍeyyātha.
‘‘ইধ পন, ভিক্খৰে, ভিক্খু এৰং ৰদেয্য – ‘অসুকস্মিং নাম আৰাসে সঙ্ঘো ৰিহরতি সথেরো সপামোক্খো। তস্স মে সঙ্ঘস্স সম্মুখা সুতং সম্মুখা পটিগ্গহিতং – অযং ধম্মো, অযং ৰিনযো, ইদং সত্থুসাসন’ন্তি। তস্স, ভিক্খৰে, ভিক্খুনো ভাসিতং নেৰ অভিনন্দিতব্বং নপ্পটিক্কোসিতব্বং। অনভিনন্দিত্ৰা অপ্পটিক্কোসিত্ৰা তানি পদব্যঞ্জনানি সাধুকং উগ্গহেত্ৰা সুত্তে ওতারেতব্বানি, ৰিনযে সন্দস্সেতব্বানি। তানি চে সুত্তে ওতারিযমানানি, ৰিনযে সন্দস্সিযমানানি সুত্তে চেৰ ওতরন্তি ৰিনযে চ সন্দিস্সন্তি, নিট্ঠমেত্থ গন্তব্বং – ‘অদ্ধা, ইদং তস্স ভগৰতো ৰচনং অরহতো সম্মাসম্বুদ্ধস্স; তস্স চ সঙ্ঘস্স সুগ্গহিত’ন্তি। ইদং, ভিক্খৰে, দুতিযং মহাপদেসং ধারেয্যাথ।
‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse saṅgho viharati sathero sapāmokkho. Tassa me saṅghassa sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni, vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṃ – ‘addhā, idaṃ tassa bhagavato vacanaṃ arahato sammāsambuddhassa; tassa ca saṅghassa suggahita’nti. Idaṃ, bhikkhave, dutiyaṃ mahāpadesaṃ dhāreyyātha.
‘‘ইধ পন, ভিক্খৰে, ভিক্খু এৰং ৰদেয্য – ‘অসুকস্মিং নাম আৰাসে সম্বহুলা থেরা ভিক্খূ ৰিহরন্তি বহুস্সুতা আগতাগমা ধম্মধরা ৰিনযধরা মাতিকাধরা। তেসং মে থেরানং সম্মুখা সুতং সম্মুখা পটিগ্গহিতং – অযং ধম্মো, অযং ৰিনযো, ইদং সত্থুসাসন’ন্তি। তস্স, ভিক্খৰে , ভিক্খুনো ভাসিতং নেৰ অভিনন্দিতব্বং নপ্পটিক্কোসিতব্বং। অনভিনন্দিত্ৰা অপ্পটিক্কোসিত্ৰা তানি পদব্যঞ্জনানি সাধুকং উগ্গহেত্ৰা সুত্তে ওতারেতব্বানি, ৰিনযে সন্দস্সেতব্বানি। তানি চে সুত্তে ওতারিযমানানি ৰিনযে সন্দস্সিযমানানি ন চেৰ সুত্তে ওতরন্তি ন ৰিনযে সন্দিস্সন্তি, নিট্ঠমেত্থ গন্তব্বং – ‘অদ্ধা, ইদং ন চেৰ তস্স ভগৰতো ৰচনং অরহতো সম্মাসম্বুদ্ধস্স; তেসঞ্চ থেরানং দুগ্গহিত’ন্তি। ইতি হেতং, ভিক্খৰে, ছড্ডেয্যাথ।
‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse sambahulā therā bhikkhū viharanti bahussutā āgatāgamā dhammadharā vinayadharā mātikādharā. Tesaṃ me therānaṃ sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave , bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṃ – ‘addhā, idaṃ na ceva tassa bhagavato vacanaṃ arahato sammāsambuddhassa; tesañca therānaṃ duggahita’nti. Iti hetaṃ, bhikkhave, chaḍḍeyyātha.
‘‘ইধ পন, ভিক্খৰে, ভিক্খু এৰং ৰদেয্য – ‘অসুকস্মিং নাম আৰাসে সম্বহুলা থেরা ভিক্খূ ৰিহরন্তি বহুস্সুতা আগতাগমা ধম্মধরা ৰিনযধরা মাতিকাধরা। তেসং মে থেরানং সম্মুখা সুতং সম্মুখা পটিগ্গহিতং – অযং ধম্মো, অযং ৰিনযো, ইদং সত্থুসাসন’ন্তি। তস্স, ভিক্খৰে , ভিক্খুনো ভাসিতং নেৰ অভিনন্দিতব্বং নপ্পটিক্কোসিতব্বং। অনভিনন্দিত্ৰা অপ্পটিক্কোসিত্ৰা তানি পদব্যঞ্জনানি সাধুকং উগ্গহেত্ৰা সুত্তে ওতারেতব্বানি, ৰিনযে সন্দস্সেতব্বানি। তানি চে সুত্তে ওতারিযমানানি ৰিনযে সন্দস্সিযমানানি সুত্তে চেৰ ওতরন্তি ৰিনযে চ সন্দিস্সন্তি, নিট্ঠমেত্থ গন্তব্বং – ‘অদ্ধা, ইদং তস্স ভগৰতো ৰচনং অরহতো সম্মাসম্বুদ্ধস্স; তেসঞ্চ থেরানং সুগ্গহিত’ন্তি। ইদং, ভিক্খৰে, ততিযং মহাপদেসং ধারেয্যাথ।
‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse sambahulā therā bhikkhū viharanti bahussutā āgatāgamā dhammadharā vinayadharā mātikādharā. Tesaṃ me therānaṃ sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave , bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṃ – ‘addhā, idaṃ tassa bhagavato vacanaṃ arahato sammāsambuddhassa; tesañca therānaṃ suggahita’nti. Idaṃ, bhikkhave, tatiyaṃ mahāpadesaṃ dhāreyyātha.
‘‘ইধ পন, ভিক্খৰে, ভিক্খু এৰং ৰদেয্য – ‘অসুকস্মিং নাম আৰাসে একো থেরো ভিক্খু ৰিহরতি বহুস্সুতো আগতাগমো ধম্মধরো ৰিনযধরো মাতিকাধরো। তস্স মে থেরস্স সম্মুখা সুতং সম্মুখা পটিগ্গহিতং – অযং ধম্মো, অযং ৰিনযো, ইদং সত্থুসাসন’ন্তি। তস্স, ভিক্খৰে, ভিক্খুনো ভাসিতং নেৰ অভিনন্দিতব্বং নপ্পটিক্কোসিতব্বং। অনভিনন্দিত্ৰা অপ্পটিক্কোসিত্ৰা তানি পদব্যঞ্জনানি সাধুকং উগ্গহেত্ৰা সুত্তে ওতারেতব্বানি, ৰিনযে সন্দস্সেতব্বানি। তানি চে সুত্তে ওতারিযমানানি ৰিনযে সন্দস্সিযমানানি ন চেৰ সুত্তে ওতরন্তি ন ৰিনযে সন্দিস্সন্তি, নিট্ঠমেত্থ গন্তব্বং – ‘অদ্ধা, ইদং ন চেৰ তস্স ভগৰতো ৰচনং অরহতো সম্মাসম্বুদ্ধস্স; তস্স চ থেরস্স দুগ্গহিত’ন্তি। ইতি হেতং, ভিক্খৰে, ছড্ডেয্যাথ।
‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse eko thero bhikkhu viharati bahussuto āgatāgamo dhammadharo vinayadharo mātikādharo. Tassa me therassa sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṃ – ‘addhā, idaṃ na ceva tassa bhagavato vacanaṃ arahato sammāsambuddhassa; tassa ca therassa duggahita’nti. Iti hetaṃ, bhikkhave, chaḍḍeyyātha.
‘‘ইধ পন, ভিক্খৰে, ভিক্খু এৰং ৰদেয্য – ‘অসুকস্মিং নাম আৰাসে একো থেরো ভিক্খু ৰিহরতি বহুস্সুতো আগতাগমো ধম্মধরো ৰিনযধরো মাতিকাধরো। তস্স মে থেরস্স সম্মুখা সুতং সম্মুখা পটিগ্গহিতং – অযং ধম্মো, অযং ৰিনযো, ইদং সত্থুসাসন’ন্তি। তস্স, ভিক্খৰে, ভিক্খুনো ভাসিতং নেৰ অভিনন্দিতব্বং নপ্পটিক্কোসিতব্বং। অনভিনন্দিত্ৰা অপ্পটিক্কোসিত্ৰা তানি পদব্যঞ্জনানি সাধুকং উগ্গহেত্ৰা সুত্তে ওতারেতব্বানি, ৰিনযে সন্দস্সেতব্বানি। তানি চে সুত্তে ওতারিযমানানি ৰিনযে সন্দস্সিযমানানি সুত্তে চেৰ ওতরন্তি ৰিনযে চ সন্দিস্সন্তি, নিট্ঠমেত্থ গন্তব্বং – ‘অদ্ধা, ইদং তস্স ভগৰতো ৰচনং অরহতো সম্মাসম্বুদ্ধস্স; তস্স চ থেরস্স সুগ্গহিত’ন্তি। ইদং, ভিক্খৰে, চতুত্থং মহাপদেসং ধারেয্যাথ। ইমে খো, ভিক্খৰে, চত্তারো মহাপদেসা’’তি। দসমং।
‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse eko thero bhikkhu viharati bahussuto āgatāgamo dhammadharo vinayadharo mātikādharo. Tassa me therassa sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṃ – ‘addhā, idaṃ tassa bhagavato vacanaṃ arahato sammāsambuddhassa; tassa ca therassa suggahita’nti. Idaṃ, bhikkhave, catutthaṃ mahāpadesaṃ dhāreyyātha. Ime kho, bhikkhave, cattāro mahāpadesā’’ti. Dasamaṃ.
সঞ্চেতনিযৰগ্গো ততিযো।
Sañcetaniyavaggo tatiyo.
তস্সুদ্দানং –
Tassuddānaṃ –
চেতনা ৰিভত্তি কোট্ঠিকো, আনন্দো উপৰাণপঞ্চমং।
Cetanā vibhatti koṭṭhiko, ānando upavāṇapañcamaṃ;
আযাচন-রাহুল-জম্বালী, নিব্বানং মহাপদেসেনাতি॥
Āyācana-rāhula-jambālī, nibbānaṃ mahāpadesenāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. মহাপদেসসুত্তৰণ্ণনা • 10. Mahāpadesasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. মহাপদেসসুত্তৰণ্ণনা • 10. Mahāpadesasuttavaṇṇanā
