| Library / Tipiṭaka / ਤਿਪਿਟਕ • Tipiṭaka / ਉਦਾਨ-ਅਟ੍ਠਕਥਾ • Udāna-aṭṭhakathā |
੫. ਮਹਾਮੋਗ੍ਗਲ੍ਲਾਨਸੁਤ੍ਤવਣ੍ਣਨਾ
5. Mahāmoggallānasuttavaṇṇanā
੨੫. ਪਞ੍ਚਮੇ ਕਾਯਗਤਾਯ ਸਤਿਯਾਤਿ ਕਾਯਾਨੁਪਸ੍ਸਨਾવਸੇਨ ਕਾਯੇ ਗਤਾਯ ਕਾਯਾਰਮ੍ਮਣਾਯ ਸਤਿਯਾ, ਇਤ੍ਥਮ੍ਭੂਤਲਕ੍ਖਣੇ ਇਦਂ ਕਰਣવਚਨਂ । ਅਜ੍ਝਤ੍ਤਨ੍ਤਿ ਇਧ ਅਜ੍ਝਤ੍ਤਂ ਨਾਮ ਨਿਯਕਜ੍ਝਤ੍ਤਂ, ਤਸ੍ਮਾ ਅਤ੍ਤਨਿ ਅਤ੍ਤਸਨ੍ਤਾਨੇਤਿ ਅਤ੍ਥੋ। ਅਥ વਾ ਯਸ੍ਮਾ ਕਮ੍ਮਟ੍ਠਾਨਭੂਤੋ ਕੇਸਾਦਿਕੋ ਦ੍વਤ੍ਤਿਂਸਕੋਟ੍ਠਾਸਸਮੁਦਾਯੋ ਇਧ ਕਾਯੋਤਿ ਅਧਿਪ੍ਪੇਤੋ, ਤਸ੍ਮਾ ਅਜ੍ਝਤ੍ਤਨ੍ਤਿ ਪਦਸ੍ਸ ਗੋਚਰਜ੍ਝਤ੍ਤਨ੍ਤਿ ਅਤ੍ਥੋ વੇਦਿਤਬ੍ਬੋ। ਸੂਪਟ੍ਠਿਤਾਯਾਤਿ ਨਿਯਕਜ੍ਝਤ੍ਤਭੂਤੇ ਗੋਚਰਜ੍ਝਤ੍ਤਭੂਤੇ વਾ ਕਾਯੇ ਸੁਟ੍ਠੁ ਉਪਟ੍ਠਿਤਾਯ। ਕਾ ਪਨਾਯਂ ਸਤਿ, ਯਾ ‘‘ਅਜ੍ਝਤ੍ਤਂ ਸੂਪਟ੍ਠਿਤਾ’’ਤਿ વੁਤ੍ਤਾ? ਯ੍વਾਯਂ ਭਗવਤਾ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ ਲੋਮਾ’’ਤਿਆਦਿਨਾ (ਦੀ॰ ਨਿ॰ ੨.੩੭੭; ਮ॰ ਨਿ॰ ੧.੧੧੦; ਖੁ॰ ਪਾ॰ ੩.ਦ੍વਤ੍ਤਿਂਸਾਕਾਰ) ਅਜ੍ਝਤ੍ਤਕੇਸਾਦਿਕੋ ਦ੍વਤ੍ਤਿਂਸਾਕਾਰੋ ਕਾਯੋ વੁਤ੍ਤੋ, ਤਤ੍ਥ ਯਾ ਪਟਿਕੂਲਮਨਸਿਕਾਰਂ ਪવਤ੍ਤੇਨ੍ਤਸ੍ਸ ਉਪਚਾਰਪ੍ਪਨਾવਸੇਨ ਕਾਯੇ ਉਪਟ੍ਠਿਤਾ ਸਤਿ, ਸਾ ‘‘ਕਾਯਗਤਾ ਸਤੀ’’ਤਿ વੁਚ੍ਚਤਿ। ਯਥਾ ਚਾਯਂ, ਏવਂ ਆਨਾਪਾਨਚਤੁਇਰਿਯਾਪਥਸਤਿਸਮ੍ਪਜਞ੍ਞਾਨਂ વਸੇਨ ਉਦ੍ਧੁਮਾਤਕવਿਨੀਲਕਾਦਿવਸੇਨ ਚ ਮਨਸਿਕਾਰਂ ਪવਤ੍ਤੇਨ੍ਤਸ੍ਸ ਯਥਾਰਹਂ ਉਪਚਾਰਪ੍ਪਨਾવਸੇਨ ਕਾਯੇ ਉਪਟ੍ਠਿਤਾ ਸਤਿ ‘‘ਕਾਯਗਤਾ ਸਤੀ’’ਤਿ વੁਚ੍ਚਤਿ। ਇਧ ਪਨ ਅਜ੍ਝਤ੍ਤਂ ਕਾਯਗਤਾ ਸਤਿ ਪਥવੀਆਦਿਕਾ ਚਤਸ੍ਸੋ ਧਾਤੁਯੋ ਸਸਮ੍ਭਾਰਸਙ੍ਖੇਪਾਦੀਸੁ ਚਤੂਸੁ ਯੇਨ ਕੇਨਚਿ ਏਕੇਨਾਕਾਰੇਨ વવਤ੍ਥਪੇਤ੍વਾ ਤੇਸਂ ਅਨਿਚ੍ਚਾਦਿਲਕ੍ਖਣਸਲ੍ਲਕ੍ਖਣવਸੇਨ ਉਪਟ੍ਠਿਤਾ વਿਪਸ੍ਸਨਾਸਮ੍ਪਯੁਤ੍ਤਾ ਸਤਿ ‘‘ਕਾਯਗਤਾ ਸਤੀ’’ਤਿ ਅਧਿਪ੍ਪੇਤਾ। ਥੇਰੋ ਪਨ ਤਥਾ વਿਪਸ੍ਸਿਤ੍વਾ ਅਤ੍ਤਨੋ ਫਲਸਮਾਪਤ੍ਤਿਮੇવ ਸਮਾਪਜ੍ਜਿਤ੍વਾ ਨਿਸੀਦਿ। ਇਧਾਪਿ ਗਾਥਾਯ ਏવਂ ਇਮਸ੍ਸ ਅਤ੍ਥਸ੍ਸ વਿਞ੍ਞਾਤਬ੍ਬਤਾ ‘‘ਨ ਚਾਯਂ ਨਿਸਜ੍ਜਾ’’ਤਿਆਦਿਨਾ વੁਤ੍ਤਨਯਾਨੁਸਾਰੇਨ ਯੋਜੇਤਬ੍ਬਾ।
25. Pañcame kāyagatāya satiyāti kāyānupassanāvasena kāye gatāya kāyārammaṇāya satiyā, itthambhūtalakkhaṇe idaṃ karaṇavacanaṃ . Ajjhattanti idha ajjhattaṃ nāma niyakajjhattaṃ, tasmā attani attasantāneti attho. Atha vā yasmā kammaṭṭhānabhūto kesādiko dvattiṃsakoṭṭhāsasamudāyo idha kāyoti adhippeto, tasmā ajjhattanti padassa gocarajjhattanti attho veditabbo. Sūpaṭṭhitāyāti niyakajjhattabhūte gocarajjhattabhūte vā kāye suṭṭhu upaṭṭhitāya. Kā panāyaṃ sati, yā ‘‘ajjhattaṃ sūpaṭṭhitā’’ti vuttā? Yvāyaṃ bhagavatā ‘‘atthi imasmiṃ kāye kesā lomā’’tiādinā (dī. ni. 2.377; ma. ni. 1.110; khu. pā. 3.dvattiṃsākāra) ajjhattakesādiko dvattiṃsākāro kāyo vutto, tattha yā paṭikūlamanasikāraṃ pavattentassa upacārappanāvasena kāye upaṭṭhitā sati, sā ‘‘kāyagatā satī’’ti vuccati. Yathā cāyaṃ, evaṃ ānāpānacatuiriyāpathasatisampajaññānaṃ vasena uddhumātakavinīlakādivasena ca manasikāraṃ pavattentassa yathārahaṃ upacārappanāvasena kāye upaṭṭhitā sati ‘‘kāyagatā satī’’ti vuccati. Idha pana ajjhattaṃ kāyagatā sati pathavīādikā catasso dhātuyo sasambhārasaṅkhepādīsu catūsu yena kenaci ekenākārena vavatthapetvā tesaṃ aniccādilakkhaṇasallakkhaṇavasena upaṭṭhitā vipassanāsampayuttā sati ‘‘kāyagatā satī’’ti adhippetā. Thero pana tathā vipassitvā attano phalasamāpattimeva samāpajjitvā nisīdi. Idhāpi gāthāya evaṃ imassa atthassa viññātabbatā ‘‘na cāyaṃ nisajjā’’tiādinā vuttanayānusārena yojetabbā.
ਏਤਮਤ੍ਥਨ੍ਤਿ ਏਤਂ ਥੇਰਸ੍ਸ ਚਤੁਧਾਤੁવવਤ੍ਥਾਨਮੁਖੇਨ ਕਾਯਾਨੁਪਸ੍ਸਨਾਸਤਿਪਟ੍ਠਾਨੇਨ વਿਪਸ੍ਸਨਂ ਓਗਾਹੇਤ੍વਾ ਫਲਸਮਾਪਤ੍ਤਿਸਮਾਪਜ੍ਜਨਸਙ੍ਖਾਤਂ ਅਤ੍ਥਂ વਿਦਿਤ੍વਾ। ਇਮਂ ਉਦਾਨਨ੍ਤਿ ਇਮਂ ਸਤਿਪਟ੍ਠਾਨਭਾવਨਾਯ ਨਿਬ੍ਬਾਨਾਧਿਗਮਦੀਪਕਂ ਉਦਾਨਂ ਉਦਾਨੇਸਿ।
Etamatthanti etaṃ therassa catudhātuvavatthānamukhena kāyānupassanāsatipaṭṭhānena vipassanaṃ ogāhetvā phalasamāpattisamāpajjanasaṅkhātaṃ atthaṃ viditvā. Imaṃ udānanti imaṃ satipaṭṭhānabhāvanāya nibbānādhigamadīpakaṃ udānaṃ udānesi.
ਤਤ੍ਥ ਸਤਿ ਕਾਯਗਤਾ ਉਪਟ੍ਠਿਤਾਤਿ ਪੁਬ੍ਬੇ વੁਤ੍ਤਲਕ੍ਖਣਾ ਸਤਿ ਸਦ੍ਧਾਪੁਬ੍ਬਙ੍ਗਮਾਨਂ ਸਮਾਧਿવੀਰਿਯਪਞ੍ਞਾਨਂ ਯਥਾਸਕਂ ਕਿਚ੍ਚਨਿਪ੍ਫਾਦਨੇਨ ਸਹਾਯਭਾવਂ ਆਪਨ੍ਨਤ੍ਤਾ ਪਹੀਨਪ੍ਪਟਿਪਕ੍ਖਾ ਤਤੋ ਏવ ਤਿਕ੍ਖવਿਸਦਭੂਤਾ ਚ ਯਥਾવੁਤ੍ਤਕਾਯਸਂવਰਣવਸੇਨ ਏਕਤ੍ਥਸਮੋਸਰਣવਸੇਨ ਚ ਅવਿਪਰੀਤਸਭਾવਂ ਸਲ੍ਲਕ੍ਖੇਨ੍ਤੀ ਉਪਗਨ੍ਤ੍વਾ ਠਿਤਾ ਹੋਤਿ, ਏਤੇਨ ਕਾਯਸਙ੍ਖਾਤਾਨਂ ਚਤੁਨ੍ਨਂ ਧਾਤੂਨਂ ਤਨ੍ਨਿਸ੍ਸਿਤਾਨਞ੍ਚ ਉਪਾਦਾਰੂਪਾਨਂ ਸਲ੍ਲਕ੍ਖਣવਸੇਨ, ਪਚ੍ਚਯੇ વવਤ੍ਥਪੇਤ੍વਾ ਤਤੋ ਪਰਂ ਤੇਸਂ ਅਨਿਚ੍ਚਾਦਿਲਕ੍ਖਣਸਲ੍ਲਕ੍ਖਣવਸੇਨ ਚ ਪવਤ੍ਤਂ ਞਾਣਪਰਮ੍ਪਰਾਗਤਂ ਸਤਿਂ ਦਸ੍ਸੇਤਿ, ਸਤਿਸੀਸੇਨ વਾ ਤਂਸਮ੍ਪਯੁਤ੍ਤਂ ਪਰਿਞ੍ਞਾਤ੍ਤਯਪਰਿਯਾਪਨ੍ਨਞਾਣਪਰਮ੍ਪਰਮੇવ ਦਸ੍ਸੇਤਿ। ਛਸੁ ਫਸ੍ਸਾਯਤਨੇਸੁ ਸਂવੁਤੋਤਿ ਯਥਾવੁਤ੍ਤਾਯ ਕਾਯੇ ਉਪਟ੍ਠਿਤਾਯ ਸਤਿਯਾ ਸਮਨ੍ਨਾਗਤੋ ਚਕ੍ਖਾਦੀਸੁ ਫਸ੍ਸਸ੍ਸ ਕਾਰਣਭੂਤੇਸੁ ਛਸੁ ਦ੍વਾਰੇਸੁ ਕਾਯਾਨੁਪਸ੍ਸਨਾਯ ਅਭਾવਿਤਾਯ ਉਪ੍ਪਜ੍ਜਨਾਰਹਾਨਂ ਅਭਿਜ੍ਝਾਦੀਨਂ ਤਸ੍ਸਾ ਭਾવਿਤਤ੍ਤਾ ਞਾਣਪ੍ਪવਤ੍ਤਿਂ ਪਟਿવੇਧੇਨ੍ਤੋ ਤੇ ਪਿਦਹਨ੍ਤੋ ‘‘ਤਤ੍ਥ ਸਂવੁਤੋ’’ਤਿ વੁਚ੍ਚਤਿ, ਏਤੇਨ ਞਾਣਸਂવਰਂ ਦਸ੍ਸੇਤਿ।
Tattha sati kāyagatā upaṭṭhitāti pubbe vuttalakkhaṇā sati saddhāpubbaṅgamānaṃ samādhivīriyapaññānaṃ yathāsakaṃ kiccanipphādanena sahāyabhāvaṃ āpannattā pahīnappaṭipakkhā tato eva tikkhavisadabhūtā ca yathāvuttakāyasaṃvaraṇavasena ekatthasamosaraṇavasena ca aviparītasabhāvaṃ sallakkhentī upagantvā ṭhitā hoti, etena kāyasaṅkhātānaṃ catunnaṃ dhātūnaṃ tannissitānañca upādārūpānaṃ sallakkhaṇavasena, paccaye vavatthapetvā tato paraṃ tesaṃ aniccādilakkhaṇasallakkhaṇavasena ca pavattaṃ ñāṇaparamparāgataṃ satiṃ dasseti, satisīsena vā taṃsampayuttaṃ pariññāttayapariyāpannañāṇaparamparameva dasseti. Chasu phassāyatanesu saṃvutoti yathāvuttāya kāye upaṭṭhitāya satiyā samannāgato cakkhādīsu phassassa kāraṇabhūtesu chasu dvāresu kāyānupassanāya abhāvitāya uppajjanārahānaṃ abhijjhādīnaṃ tassā bhāvitattā ñāṇappavattiṃ paṭivedhento te pidahanto ‘‘tattha saṃvuto’’ti vuccati, etena ñāṇasaṃvaraṃ dasseti.
ਸਤਤਂ ਭਿਕ੍ਖੁ ਸਮਾਹਿਤੋਤਿ ਸੋ ਭਿਕ੍ਖੁ ਏવਂ ਉਪਟ੍ਠਿਤਸ੍ਸਤਿ ਸਬ੍ਬਤ੍ਥ ਚ ਸਂવੁਤੋ ਪੁਥੁਤ੍ਤਾਰਮ੍ਮਣੇ ਚਿਤ੍ਤਂ ਅવਿਸ੍ਸਜ੍ਜੇਤ੍વਾ ਅਨਿਚ੍ਚਾਦਿવਸੇਨ ਸਮ੍ਮਸਨ੍ਤੋ વਿਪਸ੍ਸਨਂ ਉਸ੍ਸੁਕ੍ਕਾਪੇਤ੍વਾ ਞਾਣੇ ਤਿਕ੍ਖੇ ਸੂਰੇ વਹਨ੍ਤੇ વਿਪਸ੍ਸਨਾਸਮਾਧਿਨਾ ਤਾવ ਸਤਤਂ ਨਿਰਨ੍ਤਰਂ ਸਮਾਹਿਤੋ ਅਨੁਲੋਮਞਾਣਾਨਨ੍ਤਰਂ ਗੋਤ੍ਰਭੁਞਾਣੋਦਯਤੋ ਪਟ੍ਠਾਯ। ਜਞ੍ਞਾ ਨਿਬ੍ਬਾਨਮਤ੍ਤਨੋਤਿ ਅਞ੍ਞੇਸਂ ਪੁਥੁਜ੍ਜਨਾਨਂ ਸੁਪਿਨਨ੍ਤੇਪਿ ਅਗੋਚਰਭਾવਤੋ, ਅਰਿਯਾਨਂ ਪਨ ਤਸ੍ਸ ਤਸ੍ਸੇવ ਆવੇਣਿਕਤ੍ਤਾ ਅਤ੍ਤਸਦਿਸਤ੍ਤਾ ਚ ‘‘ਅਤ੍ਤਾ’’ਤਿ ਲਦ੍ਧવੋਹਾਰਸ੍ਸ ਮਗ੍ਗਫਲਞਾਣਸ੍ਸ ਸਾਤਿਸਯવਿਸਯਭਾવਤੋ ਏਕਨ੍ਤਸੁਖਾવਹਂ ਨਿਬ੍ਬਾਨਂ ਅਸਙ੍ਖਤਧਾਤੁ ‘‘ਅਤ੍ਤਨੋ’’ਤਿ વੁਤ੍ਤਂ, ਤਂ ਨਿਬ੍ਬਾਨਂ ਜਞ੍ਞਾ ਜਾਨੇਯ੍ਯ, ਮਗ੍ਗਫਲਞਾਣੇਹਿ ਪਟਿવਿਜ੍ਝੇਯ੍ਯ, ਸਚ੍ਛਿਕਰੇਯ੍ਯਾਤਿ ਅਤ੍ਥੋ। ਏਤੇਨ ਅਰਿਯਾਨਂ ਨਿਬ੍ਬਾਨੇ ਅਧਿਮੁਤ੍ਤਤਂ ਦਸ੍ਸੇਤਿ। ਅਰਿਯਾ ਹਿ ਅਧਿਚਿਤ੍ਤਪ੍ਪવਤ੍ਤਿਕਾਲੇਪਿ ਏਕਨ੍ਤੇਨੇવ ਨਿਬ੍ਬਾਨੇ ਨਿਨ੍ਨਪੋਣਪਬ੍ਭਾਰਭਾવੇਨ વਿਹਰਨ੍ਤਿ। ਏਤ੍ਥ ਚ ਯਸ੍ਸ ਸਤਿ ਕਾਯਗਤਾ ਉਪਟ੍ਠਿਤਾ, ਸੋ ਭਿਕ੍ਖੁ ਛਸੁ ਫਸ੍ਸਾਯਤਨੇਸੁ ਸਂવੁਤੋ, ਤਤੋ ਏવ ਸਤਤਂ ਸਮਾਹਿਤੋ ਅਤ੍ਤਪਚ੍ਚਕ੍ਖਕਰਣੇਨ ਨਿਬ੍ਬਾਨਂ ਅਤ੍ਤਨੋ ਜਾਨੇਯ੍ਯਾਤਿ ਏવਂ ਗਾਥਾਪਦਾਨਂ ਸਮ੍ਬਨ੍ਧੋ વੇਦਿਤਬ੍ਬੋ। ਏવਂ ਕਾਯਾਨੁਪਸ੍ਸਨਾਸਤਿਪਟ੍ਠਾਨਮੁਖੇਨ ਯਾવ ਅਰਹਤ੍ਤਾ ਏਕਸ੍ਸ ਭਿਕ੍ਖੁਨੋ ਨਿਯ੍ਯਾਨਮਗ੍ਗਂ ਦਸ੍ਸੇਤਿ ਧਮ੍ਮਰਾਜਾ।
Satataṃ bhikkhu samāhitoti so bhikkhu evaṃ upaṭṭhitassati sabbattha ca saṃvuto puthuttārammaṇe cittaṃ avissajjetvā aniccādivasena sammasanto vipassanaṃ ussukkāpetvā ñāṇe tikkhe sūre vahante vipassanāsamādhinā tāva satataṃ nirantaraṃ samāhito anulomañāṇānantaraṃ gotrabhuñāṇodayato paṭṭhāya. Jaññā nibbānamattanoti aññesaṃ puthujjanānaṃ supinantepi agocarabhāvato, ariyānaṃ pana tassa tasseva āveṇikattā attasadisattā ca ‘‘attā’’ti laddhavohārassa maggaphalañāṇassa sātisayavisayabhāvato ekantasukhāvahaṃ nibbānaṃ asaṅkhatadhātu ‘‘attano’’ti vuttaṃ, taṃ nibbānaṃ jaññā jāneyya, maggaphalañāṇehi paṭivijjheyya, sacchikareyyāti attho. Etena ariyānaṃ nibbāne adhimuttataṃ dasseti. Ariyā hi adhicittappavattikālepi ekanteneva nibbāne ninnapoṇapabbhārabhāvena viharanti. Ettha ca yassa sati kāyagatā upaṭṭhitā, so bhikkhu chasu phassāyatanesu saṃvuto, tato eva satataṃ samāhito attapaccakkhakaraṇena nibbānaṃ attano jāneyyāti evaṃ gāthāpadānaṃ sambandho veditabbo. Evaṃ kāyānupassanāsatipaṭṭhānamukhena yāva arahattā ekassa bhikkhuno niyyānamaggaṃ dasseti dhammarājā.
ਅਪਰੋ ਨਯੋ – ਸਤਿ ਕਾਯਗਤਾ ਉਪਟ੍ਠਿਤਾਤਿ ਏਤੇਨ ਕਾਯਾਨੁਪਸ੍ਸਨਾਸਤਿਪਟ੍ਠਾਨਂ ਦਸ੍ਸੇਤਿ। ਛਸੁ ਫਸ੍ਸਾਯਤਨੇਸੁ ਸਂવੁਤੋਤਿ ਫਸ੍ਸੋ ਆਯਤਨਂ ਕਾਰਣਂ ਏਤੇਸਨ੍ਤਿ ਫਸ੍ਸਾਯਤਨਾਨਿ, ਤੇਸੁ ਫਸ੍ਸਾਯਤਨੇਸੁ। ਫਸ੍ਸਹੇਤੁਕੇਸੁ ਫਸ੍ਸਪਚ੍ਚਯਾ ਨਿਬ੍ਬਤ੍ਤੇਸੁ ਛਸੁ ਚਕ੍ਖੁਸਮ੍ਫਸ੍ਸਜਾਦਿવੇਦਯਿਤੇਸੁ ਤਣ੍ਹਾਦੀਨਂ ਅਪ੍ਪવਤ੍ਤਿਯਾ ਸਂવੁਤੋ, ਏਤੇਨ વੇਦਨਾਨੁਪਸ੍ਸਨਾਸਤਿਪਟ੍ਠਾਨਂ ਦਸ੍ਸੇਤਿ। ਸਤਤਂ ਭਿਕ੍ਖੁ ਸਮਾਹਿਤੋਤਿ ਸਤਤਂ ਨਿਚ੍ਚਕਾਲਂ ਨਿਰਨ੍ਤਰਂ વਿਕ੍ਖੇਪਾਭਾવਤੋ ਸਮਾਹਿਤੋ ਭਿਕ੍ਖੁ। ਸੋ ਚਾਯਂ ਅવਿਕ੍ਖੇਪੋ ਸਬ੍ਬਸੋ ਸਤਿਪਟ੍ਠਾਨਭਾવਨਾਯ ਮਤ੍ਥਕਪ੍ਪਤ੍ਤਾਯ ਹੋਤਿ। ਸਮ੍ਮਸਨ੍ਤੋ ਹਿ ਅਤੀਤਾਦਿਭੇਦਭਿਨ੍ਨੇਸੁ ਪਞ੍ਚੁਪਾਦਾਨਕ੍ਖਨ੍ਧੇਸੁ ਅਨવਸੇਸਤੋવ ਪਰਿਗ੍ਗਹੇਤ੍વਾ ਸਮ੍ਮਸਤੀਤਿ। ਏਤੇਨ ਸੇਸਸਤਿਪਟ੍ਠਾਨੇ ਦਸ੍ਸੇਤਿ। ਜਞ੍ਞਾ ਨਿਬ੍ਬਾਨਮਤ੍ਤਨੋਤਿ ਏવਂ ਚਤੁਸਤਿਪਟ੍ਠਾਨਭਾવਨਂ ਮਤ੍ਥਕਂ ਪਾਪੇਤ੍વਾ ਠਿਤੋ ਭਿਨ੍ਨਕਿਲੇਸੋ ਭਿਕ੍ਖੁ ਅਤ੍ਤਨੋ ਕਿਲੇਸਨਿਬ੍ਬਾਨਂ ਪਚ੍ਚવੇਕ੍ਖਣਞਾਣੇਨ ਸਯਮੇવ ਜਾਨੇਯ੍ਯਾਤਿ ਅਤ੍ਥੋ।
Aparo nayo – sati kāyagatā upaṭṭhitāti etena kāyānupassanāsatipaṭṭhānaṃ dasseti. Chasu phassāyatanesu saṃvutoti phasso āyatanaṃ kāraṇaṃ etesanti phassāyatanāni, tesu phassāyatanesu. Phassahetukesu phassapaccayā nibbattesu chasu cakkhusamphassajādivedayitesu taṇhādīnaṃ appavattiyā saṃvuto, etena vedanānupassanāsatipaṭṭhānaṃ dasseti. Satataṃ bhikkhu samāhitoti satataṃ niccakālaṃ nirantaraṃ vikkhepābhāvato samāhito bhikkhu. So cāyaṃ avikkhepo sabbaso satipaṭṭhānabhāvanāya matthakappattāya hoti. Sammasanto hi atītādibhedabhinnesu pañcupādānakkhandhesu anavasesatova pariggahetvā sammasatīti. Etena sesasatipaṭṭhāne dasseti. Jaññā nibbānamattanoti evaṃ catusatipaṭṭhānabhāvanaṃ matthakaṃ pāpetvā ṭhito bhinnakileso bhikkhu attano kilesanibbānaṃ paccavekkhaṇañāṇena sayameva jāneyyāti attho.
ਅਥ વਾ ਸਤਿ ਕਾਯਗਤਾ ਉਪਟ੍ਠਿਤਾਤਿ ਅਤ੍ਤਨੋ ਪਰੇਸਞ੍ਚ ਕਾਯਸ੍ਸ ਯਥਾਸਭਾવਪਰਿਞ੍ਞਾਦੀਪਨੇਨ ਥੇਰਸ੍ਸ ਸਤਿવੇਪੁਲ੍ਲਪ੍ਪਤ੍ਤਿ ਦੀਪਿਤਾ। ਛਸੁ ਫਸ੍ਸਾਯਤਨੇਸੁ ਸਂવੁਤੋਤਿ ਚਕ੍ਖਾਦੀਸੁ ਛਸੁ ਦ੍વਾਰੇਸੁ ਅਚ੍ਚਨ੍ਤਸਂવਰਦੀਪਨੇਨ ਸਤਤવਿਹਾਰਿવਸੇਨ ਥੇਰਸ੍ਸ ਸਮ੍ਪਜਞ੍ਞਪ੍ਪਕਾਸਿਨੀ ਪਞ੍ਞਾવੇਪੁਲ੍ਲਪ੍ਪਤ੍ਤਿ ਦੀਪਿਤਾ। ਸਤਤਂ ਭਿਕ੍ਖੁ ਸਮਾਹਿਤੋਤਿ ਸਮਾਪਤ੍ਤਿਬਹੁਲਤਾਦਸ੍ਸਨੇਨ ਨવਾਨੁਪੁਬ੍ਬવਿਹਾਰਸਮਾਪਤ੍ਤਿਯੋ ਦਸ੍ਸਿਤਾ। ਏવਂਭੂਤੋ ਪਨ ਭਿਕ੍ਖੁ ਜਞ੍ਞਾ ਨਿਬ੍ਬਾਨਮਤ੍ਤਨੋਤਿ ਕਤਕਿਚ੍ਚਤ੍ਤਾ ਉਤ੍ਤਰਿ ਕਰਣੀਯਾਭਾવਤੋ ਕੇવਲਂ ਅਤ੍ਤਨੋ ਅਨੁਪਾਦਿਸੇਸਨਿਬ੍ਬਾਨਮੇવ ਜਾਨੇਯ੍ਯ ਚਿਨ੍ਤੇਯ੍ਯ, ਅਞ੍ਞਮ੍ਪਿ ਤਸ੍ਸ ਚਿਨ੍ਤੇਤਬ੍ਬਂ ਨਤ੍ਥੀਤਿ ਅਧਿਪ੍ਪਾਯੋ।
Atha vā sati kāyagatā upaṭṭhitāti attano paresañca kāyassa yathāsabhāvapariññādīpanena therassa sativepullappatti dīpitā. Chasu phassāyatanesu saṃvutoti cakkhādīsu chasu dvāresu accantasaṃvaradīpanena satatavihārivasena therassa sampajaññappakāsinī paññāvepullappatti dīpitā. Satataṃ bhikkhu samāhitoti samāpattibahulatādassanena navānupubbavihārasamāpattiyo dassitā. Evaṃbhūto pana bhikkhu jaññā nibbānamattanoti katakiccattā uttari karaṇīyābhāvato kevalaṃ attano anupādisesanibbānameva jāneyya cinteyya, aññampi tassa cintetabbaṃ natthīti adhippāyo.
ਪਞ੍ਚਮਸੁਤ੍ਤવਣ੍ਣਨਾ ਨਿਟ੍ਠਿਤਾ।
Pañcamasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਉਦਾਨਪਾਲ਼ਿ • Udānapāḷi / ੫. ਮਹਾਮੋਗ੍ਗਲ੍ਲਾਨਸੁਤ੍ਤਂ • 5. Mahāmoggallānasuttaṃ
