| Library / Tipiṭaka / তিপিটক • Tipiṭaka / জাতকপাল়ি • Jātakapāḷi |
৪৫৩. মহামঙ্গলজাতকং (১৫)
453. Mahāmaṅgalajātakaṃ (15)
১৫৫.
155.
কিংসু নরো জপ্পমধিচ্চকালে, কং ৰা ৰিজ্জং কতমং ৰা সুতানং।
Kiṃsu naro jappamadhiccakāle, kaṃ vā vijjaṃ katamaṃ vā sutānaṃ;
সো মচ্চো অস্মিঞ্চ 1 পরম্হি লোকে, কথং করো সোত্থানেন গুত্তো॥
So macco asmiñca 2 paramhi loke, kathaṃ karo sotthānena gutto.
১৫৬.
156.
যস্স দেৰা পিতরো চ সব্বে, সরীসপা 3 সব্বভূতানি চাপি।
Yassa devā pitaro ca sabbe, sarīsapā 4 sabbabhūtāni cāpi;
মেত্তায নিচ্চং অপচিতানি হোন্তি, ভূতেসু ৰে সোত্থানং তদাহু॥
Mettāya niccaṃ apacitāni honti, bhūtesu ve sotthānaṃ tadāhu.
১৫৭.
157.
যো সব্বলোকস্স নিৰাতৰুত্তি, ইত্থীপুমানং সহদারকানং।
Yo sabbalokassa nivātavutti, itthīpumānaṃ sahadārakānaṃ;
খন্তা দুরুত্তানমপ্পটিকূলৰাদী, অধিৰাসনং সোত্থানং তদাহু॥
Khantā duruttānamappaṭikūlavādī, adhivāsanaṃ sotthānaṃ tadāhu.
১৫৮.
158.
যো নাৰজানাতি সহাযমিত্তে 5, সিপ্পেন কুল্যাহি ধনেন জচ্চা।
Yo nāvajānāti sahāyamitte 6, sippena kulyāhi dhanena jaccā;
রুচিপঞ্ঞো অত্থকালে মতীমা 7, সহাযেসু ৰে সোত্থানং তদাহু॥
Rucipañño atthakāle matīmā 8, sahāyesu ve sotthānaṃ tadāhu.
১৫৯.
159.
মিত্তানি ৰে যস্স ভৰন্তি সন্তো, সংৰিস্সত্থা অৰিসংৰাদকস্স।
Mittāni ve yassa bhavanti santo, saṃvissatthā avisaṃvādakassa;
ন মিত্তদুব্ভী সংৰিভাগী ধনেন, মিত্তেসু ৰে সোত্থানং তদাহু॥
Na mittadubbhī saṃvibhāgī dhanena, mittesu ve sotthānaṃ tadāhu.
১৬০.
160.
যস্স ভরিযা তুল্যৰযা সমগ্গা, অনুব্বতা ধম্মকামা পজাতা 9।
Yassa bhariyā tulyavayā samaggā, anubbatā dhammakāmā pajātā 10;
কোলিনিযা সীলৰতী পতিব্বতা, দারেসু ৰে সোত্থানং তদাহু॥
Koliniyā sīlavatī patibbatā, dāresu ve sotthānaṃ tadāhu.
১৬১.
161.
যস্স রাজা ভূতপতি 11 যসস্সী, জানাতি সোচেয্যং পরক্কমঞ্চ।
Yassa rājā bhūtapati 12 yasassī, jānāti soceyyaṃ parakkamañca;
অদ্ৰেজ্ঝতা সুহদযং মমন্তি, রাজূসু ৰে সোত্থানং তদাহু॥
Advejjhatā suhadayaṃ mamanti, rājūsu ve sotthānaṃ tadāhu.
১৬২.
162.
অন্নঞ্চ পানঞ্চ দদাতি সদ্ধো, মালঞ্চ গন্ধঞ্চ ৰিলেপনঞ্চ।
Annañca pānañca dadāti saddho, mālañca gandhañca vilepanañca;
পসন্নচিত্তো অনুমোদমানো, সগ্গেসু ৰে সোত্থানং তদাহু॥
Pasannacitto anumodamāno, saggesu ve sotthānaṃ tadāhu.
১৬৩.
163.
যমরিযধম্মেন পুনন্তি ৰুদ্ধা, আরাধিতা সমচরিযায সন্তো।
Yamariyadhammena punanti vuddhā, ārādhitā samacariyāya santo;
বহুস্সুতা ইসযো সীলৰন্তো, অরহন্তমজ্ঝে সোত্থানং তদাহু॥
Bahussutā isayo sīlavanto, arahantamajjhe sotthānaṃ tadāhu.
১৬৪.
164.
এতানি খো সোত্থানানি লোকে, ৰিঞ্ঞুপ্পসত্থানি সুখুদ্রযানি 13।
Etāni kho sotthānāni loke, viññuppasatthāni sukhudrayāni 14;
তানীধ সেৰেথ নরো সপঞ্ঞো, ন হি মঙ্গলে কিঞ্চনমত্থি সচ্চন্তি॥
Tānīdha sevetha naro sapañño, na hi maṅgale kiñcanamatthi saccanti.
মহামঙ্গলজাতকং পন্নরসমং।
Mahāmaṅgalajātakaṃ pannarasamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / জাতক-অট্ঠকথা • Jātaka-aṭṭhakathā / [৪৫৩] ১৫. মহামঙ্গলজাতকৰণ্ণনা • [453] 15. Mahāmaṅgalajātakavaṇṇanā
