| Library / Tipiṭaka / តិបិដក • Tipiṭaka / ចរិយាបិដកបាឡិ • Cariyāpiṭakapāḷi |
១៥. មហាលោមហំសចរិយា
15. Mahālomahaṃsacariyā
១១៩.
119.
‘‘សុសានេ សេយ្យំ កប្បេមិ, ឆវដ្ឋិកំ ឧបនិធាយហំ;
‘‘Susāne seyyaṃ kappemi, chavaṭṭhikaṃ upanidhāyahaṃ;
១២០.
120.
‘‘អបរេ គន្ធមាលញ្ច, ភោជនំ វិវិធំ ពហុំ;
‘‘Apare gandhamālañca, bhojanaṃ vividhaṃ bahuṃ;
ឧបាយនានូបនេន្តិ, ហដ្ឋា សំវិគ្គមានសា។
Upāyanānūpanenti, haṭṭhā saṃviggamānasā.
១២១.
121.
‘‘យេ មេ ទុក្ខំ ឧបហរន្តិ, យេ ច ទេន្តិ សុខំ មម;
‘‘Ye me dukkhaṃ upaharanti, ye ca denti sukhaṃ mama;
សព្ពេសំ សមកោ ហោមិ, ទយា កោបោ ន វិជ្ជតិ។
Sabbesaṃ samako homi, dayā kopo na vijjati.
១២២.
122.
‘‘សុខទុក្ខេ តុលាភូតោ, យសេសុ អយសេសុ ច;
‘‘Sukhadukkhe tulābhūto, yasesu ayasesu ca;
សព្ពត្ថ សមកោ ហោមិ, ឯសា មេ ឧបេក្ខាបារមី’’តិ។
Sabbattha samako homi, esā me upekkhāpāramī’’ti.
មហាលោមហំសចរិយំ បន្នរសមំ។
Mahālomahaṃsacariyaṃ pannarasamaṃ.
យុធញ្ជយវគ្គោ តតិយោ។
Yudhañjayavaggo tatiyo.
តស្សុទ្ទានំ –
Tassuddānaṃ –
យុធញ្ជយោ សោមនស្សោ, អយោឃរភិសេន ច;
Yudhañjayo somanasso, ayogharabhisena ca;
សោណនន្ទោ មូគបក្ខោ, កបិរាជា សច្ចសវ្ហយោ។
Soṇanando mūgapakkho, kapirājā saccasavhayo.
វដ្ដកោ មច្ឆរាជា ច, កណ្ហទីបាយនោ ឥសិ;
Vaṭṭako maccharājā ca, kaṇhadīpāyano isi;
ភវាភវេ អនុភវិត្វា, បត្តោ សម្ពោធិមុត្តមំ។
Bhavābhave anubhavitvā, patto sambodhimuttamaṃ.
ទត្វា ទាតព្ពកំ ទានំ, សីលំ បូរេត្វា អសេសតោ;
Datvā dātabbakaṃ dānaṃ, sīlaṃ pūretvā asesato;
នេក្ខម្មេ បារមិំ គន្ត្វា, បត្តោ សម្ពោធិមុត្តមំ។
Nekkhamme pāramiṃ gantvā, patto sambodhimuttamaṃ.
បណ្ឌិតេ បរិបុច្ឆិត្វា, វីរិយំ កត្វាន មុត្តមំ;
Paṇḍite paripucchitvā, vīriyaṃ katvāna muttamaṃ;
ខន្តិយា បារមិំ គន្ត្វា, បត្តោ សម្ពោធិមុត្តមំ។
Khantiyā pāramiṃ gantvā, patto sambodhimuttamaṃ.
កត្វា ទឡ្ហមធិដ្ឋានំ, សច្ចវាចានុរក្ខិយ;
Katvā daḷhamadhiṭṭhānaṃ, saccavācānurakkhiya;
មេត្តាយ បារមិំ គន្ត្វា, បត្តោ សម្ពោធិមុត្តមំ។
Mettāya pāramiṃ gantvā, patto sambodhimuttamaṃ.
លាភាលាភេ យសាយសេ, សម្មាននាវមាននេ;
Lābhālābhe yasāyase, sammānanāvamānane;
សព្ពត្ថ សមកោ ហុត្វា, បត្តោ សម្ពោធិមុត្តមំ។
Sabbattha samako hutvā, patto sambodhimuttamaṃ.
កោសជ្ជំ ភយតោ ទិស្វា, វីរិយារម្ភញ្ច ខេមតោ;
Kosajjaṃ bhayato disvā, vīriyārambhañca khemato;
អារទ្ធវីរិយា ហោថ, ឯសា ពុទ្ធានុសាសនី។
Āraddhavīriyā hotha, esā buddhānusāsanī.
វិវាទំ ភយតោ ទិស្វា, អវិវាទញ្ច ខេមតោ;
Vivādaṃ bhayato disvā, avivādañca khemato;
សមគ្គា សខិលា ហោថ, ឯសា ពុទ្ធានុសាសនី។
Samaggā sakhilā hotha, esā buddhānusāsanī.
បមាទំ ភយតោ ទិស្វា, អប្បមាទញ្ច ខេមតោ;
Pamādaṃ bhayato disvā, appamādañca khemato;
ភាវេថដ្ឋង្គិកំ មគ្គំ, ឯសា ពុទ្ធានុសាសនី។
Bhāvethaṭṭhaṅgikaṃ maggaṃ, esā buddhānusāsanī.
ឥត្ថំ សុទំ ភគវា អត្តនោ បុព្ពចរិយំ សម្ភាវយមានោ ពុទ្ធាបទានិយំ នាម ធម្មបរិយាយំ អភាសិត្ថាតិ។
Itthaṃ sudaṃ bhagavā attano pubbacariyaṃ sambhāvayamāno buddhāpadāniyaṃ nāma dhammapariyāyaṃ abhāsitthāti.
ចរិយាបិដកំ និដ្ឋិតំ។
Cariyāpiṭakaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ចរិយាបិដក-អដ្ឋកថា • Cariyāpiṭaka-aṭṭhakathā / ១៥. មហាលោមហំសចរិយាវណ្ណនា • 15. Mahālomahaṃsacariyāvaṇṇanā
