516. மஹாகபிஜாதகங் (6)

178.

பா³ராணஸ்யங் ¹ அஹூ ராஜா, காஸீனங் ரட்ட²வட்³ட⁴னோ;

மித்தாமச்சபரிப்³யூள்ஹோ, அக³மாஸி மிகா³ஜினங் ³.

179.

தத்த² ப்³ராஹ்மணமத்³த³க்கி², ஸேதங் சித்ரங் கிலாஸினங்;

வித்³த⁴ஸ்தங் கோவிளாரங்வ, கிஸங் த⁴மனிஸந்த²தங்.

180.

பரமகாருஞ்ஞதங் பத்தங், தி³ஸ்வா கிச்ச²க³தங் நரங்;

அவச ப்³யம்ஹிதோ ராஜா, ‘‘யக்கா²னங் கதமோ நுஸி.

181.

‘‘ஹத்த²பாதா³ ச தே ஸேதா, ததோ ஸேததரங் ⁵ ஸிரோ;

க³த்தங் கம்மாஸவண்ணங் தே, கிலாஸப³ஹுலோ சஸி.

182.

‘‘வட்டனாவளி ⁷ ஸங்காஸா, பிட்டி² தே நின்னதுன்னதா;

காளபப்³பா³வ ⁹ தே அங்கா³, நாஞ்ஞங் பஸ்ஸாமி ஏதி³ஸங்.

183.

‘‘உக்³க⁴ட்டபாதோ³ தஸிதோ, கிஸோ த⁴மனிஸந்த²தோ;

சா²தோ ஆதத்தரூபோஸி ¹¹, குதோஸி கத்த² க³ச்ச²ஸி.

184.

‘‘து³த்³த³ஸீ அப்பகாரோஸி, து³ப்³ப³ண்ணோ பீ⁴மத³ஸ்ஸனோ;

ஜனெத்தி யாபி தே மாதா, ந தங் இச்செ²ய்ய பஸ்ஸிதுங்.

185.

‘‘கிங் கம்மமகரங் ¹³ புப்³பே³, கங் அவஜ்ஜ²ங் அகா⁴தயி;

கிப்³பி³ஸங் யங் கரித்வான, இத³ங் து³க்க²ங் உபாக³மி’’.

186.

தக்³க⁴ தே அஹமக்கி²ஸ்ஸங், யதா²பி குஸலோ ததா²;

ஸச்சவாதி³ஞ்ஹி லோகஸ்மிங், பஸங்ஸந்தீத⁴ பண்டி³தா.

187.

ஏகோ சரங் கோ³க³வேஸோ, மூள்ஹோ அச்சஸரிங் வனே;

அரஞ்ஞே இரீணே ¹⁵ விவனே, நானாகுஞ்ஜரஸேவிதே.

188.

வாளமிகா³னுசரிதே, விப்பனட்டொ²ஸ்மி கானநே;

அசரிங் தத்த² ஸத்தாஹங், கு²ப்பிபாஸ ¹⁷ ஸமப்பிதோ.

189.

தத்த² திந்து³கமத்³த³க்கி²ங், விஸமட்ட²ங் பு³பு⁴க்கி²தோ;

பபாதமபி⁴லம்ப³ந்தங், ஸம்பன்னப²லதா⁴ரினங்.

190.

வாதஸ்ஸிதானி ப⁴க்கே²ஸிங், தானி ருச்சிங்ஸு மே பு⁴ஸங்;

அதித்தோ ருக்க²மாரூஹிங் ¹⁹, தத்த² ஹெஸ்ஸாமி ஆஸிதோ.

191.

ஏகங் மே ப⁴க்கி²தங் ஆஸி, து³தியங் அபி⁴பத்தி²தங்;

ததோ ஸா ப⁴ஞ்ஜத² ஸாகா², சி²ன்னா ப²ரஸுனா விய.

192.

ஸோஹங் ஸஹாவ ஸாகா²ஹி, உத்³த⁴ங்பாதோ³ அவங்ஸிரோ;

அப்பதிட்டே² அனாலம்பே³, கி³ரிது³க்³க³ஸ்மி பாபதங்.

193.

யஸ்மா ச வாரி க³ம்பீ⁴ரங், தஸ்மா ந ஸமபஜ்ஜிஸங் ²¹;

தத்த² ஸேஸிங் நிரானந்தோ³, அனூனா ²³ த³ஸ ரத்தியோ.

194.

அதெ²த்த² கபி மாக³ஞ்சி² ²⁵, கோ³னங்கு³லோ த³ரீசரோ;

ஸாகா²ஹி ஸாக²ங் விசரந்தோ, கா²த³மானோ து³மப்ப²லங்.

195.

ஸோ மங் தி³ஸ்வா கிஸங் பண்டு³ங், காருஞ்ஞமகரங் மயி;

அம்போ⁴ கோ நாம ஸோ எத்த², ஏவங் து³க்கே²ன அட்டிதோ.

196.

மனுஸ்ஸோ அமனுஸ்ஸோ வா, அத்தானங் மே பவேத³ய;

தஸ்ஸஞ்ஜலிங் பணாமெத்வா, இத³ங் வசனமப்³ரவிங்.

197.

மனுஸ்ஸோஹங் ப்³யஸம்பத்தோ ²⁷, ஸா மே நத்தி² இதோ க³தி;

தங் வோ வதா³மி ப⁴த்³த³ங் வோ, த்வஞ்ச மே ஸரணங் ப⁴வ.

198.

க³ருங் ²⁹ ஸிலங் க³ஹெத்வான, விசரீ ³⁰ பப்³ப³தே கபி;

ஸிலாய யொக்³க³ங் கத்வான, நிஸபோ⁴ ஏதத³ப்³ரவி.

199.

ஏஹி மே பிட்டி²மாருய்ஹ, கீ³வங் க³ண்ஹாஹி பா³ஹுபி⁴;

அஹங் தங் உத்³த⁴ரிஸ்ஸாமி, கி³ரிது³க்³க³த வேக³ஸா.

200.

தஸ்ஸ தங் வசனங் ஸுத்வா, வானரிந்த³ஸ்ஸ ஸிரீமதோ;

பிட்டி²மாருய்ஹ தீ⁴ரஸ்ஸ, கீ³வங் பா³ஹாஹி அக்³க³ஹிங்.

201.

ஸோ மங் ததோ ஸமுட்டா²ஸி, தேஜஸ்ஸீ ³³ ப³லவா கபி;

விஹஞ்ஞமானோ கிச்சே²ன, கி³ரிது³க்³க³த வேக³ஸா.

202.

உத்³த⁴ரித்வான மங் ஸந்தோ, நிஸபோ⁴ ஏதத³ப்³ரவி;

இங்க⁴ மங் ஸம்ம ரக்க²ஸ்ஸு, பஸ்ஸுபிஸ்ஸங் முஹுத்தகங்.

203.

ஸீஹா ப்³யக்³கா⁴ ச தீ³பீ ச, அச்ச²கோகதரச்ச²யோ;

தே மங் பமத்தங் ஹிங்ஸெய்யுங், தே த்வங் தி³ஸ்வா நிவாரய ³⁵.

204.

ஏவங் மே பரித்தாதூன ³⁷, பஸ்ஸுபி ஸோ முஹுத்தகங்;

ததா³ஹங் பாபிகங் தி³ட்டி²ங், படிலச்சி²ங் அயோனிஸோ.

205.

ப⁴க்கோ² அயங் மனுஸ்ஸானங், யதா² சஞ்ஞே வனே மிகா³;

யங் நூனிமங் வதி⁴த்வான, சா²தோ கா²தெ³ய்ய வானரங்.

206.

அஸிதோ ³⁹ ச க³மிஸ்ஸாமி, மங்ஸமாதா³ய ஸம்ப³லங்;

கந்தாரங் நித்த²ரிஸ்ஸாமி, பாதெ²ய்யங் மே ப⁴விஸ்ஸதி.

207.

ததோ ஸிலங் க³ஹெத்வான, மத்த²கங் ஸன்னிதாளயிங்;

மம க³த்த ⁴¹ கிலந்தஸ்ஸ, பஹாரோ து³ப்³ப³லோ அஹு.

208.

ஸோ ச வேகே³னுத³ப்பத்தோ, கபி ருஹிர ⁴³ மக்கி²தோ;

அஸ்ஸுபுண்ணேஹி நெத்தேஹி, ரோத³ந்தோ மங் உதி³க்க²தி.

209.

மாய்யோமங் கரி ப⁴த்³த³ந்தே, த்வஞ்ச நாமேதி³ஸங் கரி;

த்வஞ்ச கோ² நாம தீ³கா⁴வு ⁴⁵, அஞ்ஞே ⁴⁶ வாரேதுமரஹஸி.

210.

அஹோ வத ரே புரிஸ, தாவ து³க்கரகாரக;

ஏதி³ஸா விஸமா து³க்³கா³, பபாதா உத்³த⁴தோ ⁴⁹ மயா.

211.

ஆனீதோ பரலோகாவ, து³ப்³பெ⁴ய்யங் மங் அமஞ்ஞத²;

தங் தேன பாபத⁴ம்மேன, பாபங் பாபேன சிந்திதங்.

212.

மா ஹேவ த்வங் அத⁴ம்மட்ட², வேத³னங் கடுகங் பு²ஸி;

மா ஹேவ பாபகம்மங் தங், ப²லங் வேளுங்வ தங் வதி⁴.

213.

தயிமே நத்தி² விஸ்ஸாஸோ, பாபத⁴ம்ம அஸஞ்ஞத ⁵¹;

ஏஹி மே பிட்டி²தோ க³ச்ச², தி³ஸ்ஸமானோவ ஸந்திகே.

214.

முத்தோஸி ஹத்தா² வாளானங், பத்தோஸி மானுஸிங் பத³ங்;

ஏஸ மக்³கோ³ அத⁴ம்மட்ட², தேன க³ச்ச² யதா²ஸுக²ங்.

215.

இத³ங் வத்வா கி³ரிசரோ, ரஹதே³ ⁵³ பக்க²ல்ய மத்த²கங்;

அஸ்ஸூனி ஸம்பமஜ்ஜித்வா, ததோ பப்³ப³தமாருஹி.

216.

ஸோஹங் தேனாபி⁴ஸத்தொஸ்மி, பரிளாஹேன அட்டிதோ;

ட³ய்ஹமானேன க³த்தேன, வாரிங் பாதுங் உபாக³மிங்.

217.

அக்³கி³னா விய ஸந்தத்தோ, ரஹதோ³ ருஹிரமக்கி²தோ;

புப்³ப³லோஹிதஸங்காஸோ, ஸப்³போ³ மே ஸமபஜ்ஜத².

218.

யாவந்தோ உத³பி³ந்தூ³னி, காயஸ்மிங் நிபதிங்ஸு மே;

தாவந்தோ க³ண்ட³ ⁵⁵ ஜாயேத², அத்³த⁴பே³லுவஸாதி³ஸா.

219.

பபி⁴ன்னா பக்³க⁴ரிங்ஸு மே, குணபா புப்³ப³லோஹிதா;

யேன யேனேவ க³ச்சா²மி, கா³மேஸு நிக³மேஸு ச.

220.

த³ண்ட³ஹத்தா² நிவாரெந்தி, இத்தி²யோ புரிஸா ச மங்;

ஓக்கிதா ⁵⁷ பூதிக³ந்தே⁴ன, மாஸ்ஸு ஓரேன ஆக³மா ⁵⁸.

221.

ஏதாதி³ஸங் இத³ங் து³க்க²ங், ஸத்த வஸ்ஸானி தா³னி மே;

அனுபோ⁴மி ஸகங் கம்மங், புப்³பே³ து³க்கடமத்தனோ.

222.

தங் வோ வதா³மி ப⁴த்³த³ந்தே ⁶¹, யாவந்தெத்த² ஸமாக³தா;

மாஸ்ஸு மித்தான ⁶³ து³ப்³பி⁴த்தோ², மித்தது³ப்³போ⁴ ஹி பாபகோ.

223.

குட்டீ² கிலாஸீ ப⁴வதி, யோ மித்தானித⁴ து³ப்³ப⁴தி ⁶⁵;

காயஸ்ஸ பே⁴தா³ மித்தத்³து³ ⁶⁷, நிரயங் ஸோபபஜ்ஜதீதி ⁶⁸.

மஹாகபிஜாதகங் ச²ட்ட²ங்.