| Library / Tipiṭaka / तिपिटक • Tipiṭaka / थेरगाथापाळि • Theragāthāpāḷi |
८. अट्ठकनिपातो
8. Aṭṭhakanipāto
१. महाकच्चायनत्थेरगाथा
1. Mahākaccāyanattheragāthā
४९४.
494.
‘‘कम्मं बहुकं न कारये, परिवज्जेय्य जनं न उय्यमे।
‘‘Kammaṃ bahukaṃ na kāraye, parivajjeyya janaṃ na uyyame;
सो उस्सुक्को रसानुगिद्धो, अत्थं रिञ्चति यो सुखाधिवाहो॥
So ussukko rasānugiddho, atthaṃ riñcati yo sukhādhivāho.
४९५.
495.
‘‘पङ्कोति हि नं अवेदयुं, यायं वन्दनपूजना कुलेसु।
‘‘Paṅkoti hi naṃ avedayuṃ, yāyaṃ vandanapūjanā kulesu;
सुखुमं सल्लं दुरुब्बहं, सक्कारो कापुरिसेन दुज्जहो॥
Sukhumaṃ sallaṃ durubbahaṃ, sakkāro kāpurisena dujjaho.
४९६.
496.
‘‘न परस्सुपनिधाय, कम्मं मच्चस्स पापकं।
‘‘Na parassupanidhāya, kammaṃ maccassa pāpakaṃ;
अत्तना तं न सेवेय्य, कम्मबन्धूहि मातिया॥
Attanā taṃ na seveyya, kammabandhūhi mātiyā.
४९७.
497.
‘‘न परे वचना चोरो, न परे वचना मुनि।
‘‘Na pare vacanā coro, na pare vacanā muni;
४९८.
498.
‘‘परे च न विजानन्ति, मयमेत्थ यमामसे।
‘‘Pare ca na vijānanti, mayamettha yamāmase;
ये च तत्थ विजानन्ति, ततो सम्मन्ति मेधगा॥
Ye ca tattha vijānanti, tato sammanti medhagā.
४९९.
499.
‘‘जीवते वापि सप्पञ्ञो, अपि वित्तपरिक्खयो।
‘‘Jīvate vāpi sappañño, api vittaparikkhayo;
५००.
500.
‘‘सब्बं सुणाति सोतेन, सब्बं पस्सति चक्खुना।
‘‘Sabbaṃ suṇāti sotena, sabbaṃ passati cakkhunā;
न च दिट्ठं सुतं धीरो, सब्बं उज्झितुमरहति॥
Na ca diṭṭhaṃ sutaṃ dhīro, sabbaṃ ujjhitumarahati.
५०१.
501.
‘‘चक्खुमास्स यथा अन्धो, सोतवा बधिरो यथा।
‘‘Cakkhumāssa yathā andho, sotavā badhiro yathā;
पञ्ञवास्स यथा मूगो, बलवा दुब्बलोरिव।
Paññavāssa yathā mūgo, balavā dubbaloriva;
… महाकच्चायनो थेरो…।
… Mahākaccāyano thero….
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरगाथा-अट्ठकथा • Theragāthā-aṭṭhakathā / १. महाकच्चायनत्थेरगाथावण्णना • 1. Mahākaccāyanattheragāthāvaṇṇanā
