3. Mahākaccānattheraapadānaṃ

31.

‘‘Padumuttaranāthassa, padumaṃ nāma cetiyaṃ;

Silāsanaṃ ² kārayitvā, suvaṇṇenābhilepayiṃ.

32.

‘‘Ratanāmayachattañca, paggayha vāḷabījaniṃ ⁴;

Buddhassa abhiropesiṃ, lokabandhussa tādino.

33.

‘‘Yāvatā devatā bhummā ⁶, sabbe sannipatuṃ tadā;

Ratanāmayachattānaṃ, vipākaṃ kathayissati.

34.

‘‘Tañca sabbaṃ suṇissāma, kathayantassa satthuno;

Bhiyyo hāsaṃ janeyyāma, sammāsambuddhasāsane.

35.

‘‘Hemāsane nisīditvā, sayambhū aggapuggalo;

Bhikkhusaṅghaparibyūḷho ⁸, imā gāthā abhāsatha.

36.

‘‘‘Yenidaṃ āsanaṃ dinnaṃ, sovaṇṇaṃ ratanāmayaṃ;

Tamahaṃ kittayissāmi, suṇātha mama bhāsato.

37.

‘‘‘Tiṃsakappāni devindo, devarajjaṃ karissati;

Samantā yojanasataṃ, ābhāyābhibhavissati.

38.

‘‘‘Manussalokamāgantvā, cakkavattī bhavissati;

Pabhassaroti nāmena, uggatejo bhavissati.

39.

‘‘‘Divā vā yadi vā rattiṃ, sataraṃsīva uggato;

Samantā aṭṭharatanaṃ, ujjotissati khattiyo.

40.

‘‘‘Kappasatasahassamhi, okkākakulasambhavo;

Gotamo nāma gottena, satthā loke bhavissati.

41.

‘‘‘Tusitā hi cavitvāna, sukkamūlena codito;

Kaccāno nāma nāmena, brahmabandhu bhavissati.

42.

‘‘‘So pacchā pabbajitvāna, arahā hessatināsavo;

Gotamo lokapajjoto, aggaṭṭhāne ṭhapessati.

43.

‘‘‘Saṃkhittapucchitaṃ ¹⁰ pañhaṃ, vitthārena kathessati;

Kathayanto ca taṃ pañhaṃ, ajjhāsayaṃ ¹² pūrayissati’.

44.

‘‘Aḍḍhe kule abhijāto, brāhmaṇo mantapāragū;

Ohāya dhanadhaññāni, pabbajiṃ anagāriyaṃ.

45.

‘‘Saṃkhittenapi pucchante, vitthārena kathemahaṃ;

Ajjhāsayaṃ tesaṃ pūremi, tosemi dvipaduttamaṃ.

46.

‘‘Tosito me mahāvīro, sayambhū aggapuggalo;

Bhikkhusaṅghe nisīditvā, etadagge ṭhapesi maṃ.

47.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā mahākaccāno thero imā gāthāyo abhāsitthāti.

Mahākaccānattherassāpadānaṃ tatiyaṃ.