| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. মহাচুন্দসুত্তং
4. Mahācundasuttaṃ
৪৬. এৰং মে সুতং – একং সমযং আযস্মা মহাচুন্দো চেতীসু ৰিহরতি সযংজাতিযং 1। তত্র খো আযস্মা মহাচুন্দো ভিক্খূ আমন্তেসি – ‘‘আৰুসো ভিক্খৰে’’তি। ‘‘আৰুসো’’তি খো তে ভিক্খূ আযস্মতো মহাচুন্দস্স পচ্চস্সোসুং। আযস্মা মহাচুন্দো এতদৰোচ –
46. Evaṃ me sutaṃ – ekaṃ samayaṃ āyasmā mahācundo cetīsu viharati sayaṃjātiyaṃ 2. Tatra kho āyasmā mahācundo bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato mahācundassa paccassosuṃ. Āyasmā mahācundo etadavoca –
‘‘ইধাৰুসো, ধম্মযোগা ভিক্খূ ঝাযী ভিক্খূ অপসাদেন্তি – ‘ইমে পন ঝাযিনোম্হা, ঝাযিনোম্হাতি ঝাযন্তি পজ্ঝাযন্তি নিজ্ঝাযন্তি অৰজ্ঝাযন্তি 3। কিমিমে 4 ঝাযন্তি, কিন্তিমে ঝাযন্তি, কথং ইমে ঝাযন্তী’তি? তত্থ ধম্মযোগা চ ভিক্খূ নপ্পসীদন্তি, ঝাযী চ ভিক্খূ নপ্পসীদন্তি, ন চ বহুজনহিতায পটিপন্না হোন্তি বহুজনসুখায বহুনো জনস্স অত্থায হিতায সুখায দেৰমনুস্সানং।
‘‘Idhāvuso, dhammayogā bhikkhū jhāyī bhikkhū apasādenti – ‘ime pana jhāyinomhā, jhāyinomhāti jhāyanti pajjhāyanti nijjhāyanti avajjhāyanti 5. Kimime 6 jhāyanti, kintime jhāyanti, kathaṃ ime jhāyantī’ti? Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ইধ পনাৰুসো, ঝাযী ভিক্খূ ধম্মযোগে ভিক্খূ অপসাদেন্তি – ‘ইমে পন ধম্মযোগম্হা, ধম্মযোগম্হাতি উদ্ধতা উন্নল়া চপলা মুখরা ৰিকিণ্ণৰাচা মুট্ঠস্সতী অসম্পজানা অসমাহিতা ৰিব্ভন্তচিত্তা পাকতিন্দ্রিযা। কিমিমে ধম্মযোগা, কিন্তিমে ধম্মযোগা, কথং ইমে ধম্মযোগা’তি? তত্থ ঝাযী চ ভিক্খূ নপ্পসীদন্তি, ধম্মযোগা চ ভিক্খূ নপ্পসীদন্তি, ন চ বহুজনহিতায পটিপন্না হোন্তি বহুজনসুখায বহুনো জনস্স অত্থায হিতায সুখায দেৰমনুস্সানং।
‘‘Idha panāvuso, jhāyī bhikkhū dhammayoge bhikkhū apasādenti – ‘ime pana dhammayogamhā, dhammayogamhāti uddhatā unnaḷā capalā mukharā vikiṇṇavācā muṭṭhassatī asampajānā asamāhitā vibbhantacittā pākatindriyā. Kimime dhammayogā, kintime dhammayogā, kathaṃ ime dhammayogā’ti? Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ইধ পনাৰুসো, ধম্মযোগা ভিক্খূ ধম্মযোগানঞ্ঞেৰ ভিক্খূনং ৰণ্ণং ভাসন্তি, নো ঝাযীনং ভিক্খূনং ৰণ্ণং ভাসন্তি। তত্থ ধম্মযোগা চ ভিক্খূ নপ্পসীদন্তি, ঝাযী চ ভিক্খূ নপ্পসীদন্তি, ন চ বহুজনহিতায পটিপন্না হোন্তি বহুজনসুখায বহুনো জনস্স অত্থায হিতায সুখায দেৰমনুস্সানং।
‘‘Idha panāvuso, dhammayogā bhikkhū dhammayogānaññeva bhikkhūnaṃ vaṇṇaṃ bhāsanti, no jhāyīnaṃ bhikkhūnaṃ vaṇṇaṃ bhāsanti. Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ইধ পনাৰুসো, ঝাযী ভিক্খূ ঝাযীনঞ্ঞেৰ ভিক্খূনং ৰণ্ণং ভাসন্তি, নো ধম্মযোগানং ভিক্খূনং ৰণ্ণং ভাসন্তি। তত্থ ঝাযী চ ভিক্খূ নপ্পসীদন্তি, ধম্মযোগা চ ভিক্খূ নপ্পসীদন্তি, ন চ বহুজনহিতায পটিপন্না হোন্তি বহুজনসুখায বহুনো জনস্স অত্থায হিতায সুখায দেৰমনুস্সানং।
‘‘Idha panāvuso, jhāyī bhikkhū jhāyīnaññeva bhikkhūnaṃ vaṇṇaṃ bhāsanti, no dhammayogānaṃ bhikkhūnaṃ vaṇṇaṃ bhāsanti. Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘তস্মাতিহাৰুসো , এৰং সিক্খিতব্বং – ‘ধম্মযোগা সমানা ঝাযীনং ভিক্খূনং ৰণ্ণং ভাসিস্সামা’তি। এৰঞ্হি ৰো, আৰুসো, সিক্খিতব্বং। তং কিস্স হেতু? অচ্ছরিযা হেতে, আৰুসো, পুগ্গলা দুল্লভা লোকস্মিং, যে অমতং ধাতুং কাযেন ফুসিত্ৰা ৰিহরন্তি। তস্মাতিহাৰুসো, এৰং সিক্খিতব্বং – ‘ঝাযী সমানা ধম্মযোগানং ভিক্খূনং ৰণ্ণং ভাসিস্সামা’তি। এৰঞ্হি ৰো, আৰুসো, সিক্খিতব্বং। তং কিস্স হেতু? অচ্ছরিযা হেতে, আৰুসো, পুগ্গলা দুল্লভা লোকস্মিং যে গম্ভীরং অত্থপদং পঞ্ঞায অতিৰিজ্ঝ পস্সন্তী’’তি। চতুত্থং।
‘‘Tasmātihāvuso , evaṃ sikkhitabbaṃ – ‘dhammayogā samānā jhāyīnaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ, ye amataṃ dhātuṃ kāyena phusitvā viharanti. Tasmātihāvuso, evaṃ sikkhitabbaṃ – ‘jhāyī samānā dhammayogānaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ ye gambhīraṃ atthapadaṃ paññāya ativijjha passantī’’ti. Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. মহাচুন্দসুত্তৰণ্ণনা • 4. Mahācundasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৩-৬. ইণসুত্তাদিৰণ্ণনা • 3-6. Iṇasuttādivaṇṇanā
