| Library / Tipiṭaka / ติปิฎก • Tipiṭaka / ธมฺมสงฺคณิ-อฎฺฐกถา • Dhammasaṅgaṇi-aṭṭhakathā |
มคฺคงฺคราสิวณฺณนา
Maggaṅgarāsivaṇṇanā
สมฺมาทิฎฺฐิอาทีสุ ทสฺสนเฎฺฐน สมฺมาทิฎฺฐิฯ อภินิโรปนเฎฺฐน สมฺมาสงฺกโปฺป, ปคฺคหนเฎฺฐน สมฺมาวายาโม, อุปฎฺฐานเฎฺฐน สมฺมาสติ, อวิเกฺขปนเฎฺฐน สมฺมาสมาธีติ เวทิตโพฺพฯ วจนตฺถโต ปน สมฺมา ปสฺสติ, สมฺมา วา ตาย ปสฺสนฺตีติ สมฺมาทิฎฺฐิฯ สมฺมา สงฺกเปฺปติ, สมฺมา วา เตน สงฺกเปฺปนฺตีติ สมฺมาสงฺกโปฺปฯ สมฺมา วายาเมติ, สมฺมา วา เตน วายมนฺตีติ สมฺมาวายาโมฯ สมฺมา สรติ, สมฺมา วา ตาย สรนฺตีติ สมฺมาสติฯ สมฺมา สมาธิยติ, สมฺมา วา เตน สมาธิยนฺตีติ สมฺมาสมาธิฯ อปิจ, ปสตฺถา สุนฺทรา วา ทิฎฺฐิ สมฺมาทิฎฺฐีติฯ อิมินาปิ นเยน เตสํ วจนโตฺถ เวทิตโพฺพฯ ลกฺขณาทีนิ ปน เหฎฺฐา วุตฺตาเนวฯ
Sammādiṭṭhiādīsu dassanaṭṭhena sammādiṭṭhi. Abhiniropanaṭṭhena sammāsaṅkappo, paggahanaṭṭhena sammāvāyāmo, upaṭṭhānaṭṭhena sammāsati, avikkhepanaṭṭhena sammāsamādhīti veditabbo. Vacanatthato pana sammā passati, sammā vā tāya passantīti sammādiṭṭhi. Sammā saṅkappeti, sammā vā tena saṅkappentīti sammāsaṅkappo. Sammā vāyāmeti, sammā vā tena vāyamantīti sammāvāyāmo. Sammā sarati, sammā vā tāya sarantīti sammāsati. Sammā samādhiyati, sammā vā tena samādhiyantīti sammāsamādhi. Apica, pasatthā sundarā vā diṭṭhi sammādiṭṭhīti. Imināpi nayena tesaṃ vacanattho veditabbo. Lakkhaṇādīni pana heṭṭhā vuttāneva.
