| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
மக்³க³ங்க³ராஸிவண்ணனா
Maggaṅgarāsivaṇṇanā
ஸம்மாதி³ட்டி²ஆதீ³ஸு த³ஸ்ஸனட்டே²ன ஸம்மாதி³ட்டி². அபி⁴னிரோபனட்டே²ன ஸம்மாஸங்கப்போ, பக்³க³ஹனட்டே²ன ஸம்மாவாயாமோ, உபட்டா²னட்டே²ன ஸம்மாஸதி, அவிக்கே²பனட்டே²ன ஸம்மாஸமாதீ⁴தி வேதி³தப்³போ³. வசனத்த²தோ பன ஸம்மா பஸ்ஸதி, ஸம்மா வா தாய பஸ்ஸந்தீதி ஸம்மாதி³ட்டி². ஸம்மா ஸங்கப்பேதி, ஸம்மா வா தேன ஸங்கப்பெந்தீதி ஸம்மாஸங்கப்போ. ஸம்மா வாயாமேதி, ஸம்மா வா தேன வாயமந்தீதி ஸம்மாவாயாமோ. ஸம்மா ஸரதி, ஸம்மா வா தாய ஸரந்தீதி ஸம்மாஸதி. ஸம்மா ஸமாதி⁴யதி, ஸம்மா வா தேன ஸமாதி⁴யந்தீதி ஸம்மாஸமாதி⁴. அபிச, பஸத்தா² ஸுந்த³ரா வா தி³ட்டி² ஸம்மாதி³ட்டீ²தி. இமினாபி நயேன தேஸங் வசனத்தோ² வேதி³தப்³போ³. லக்க²ணாதீ³னி பன ஹெட்டா² வுத்தானேவ.
Sammādiṭṭhiādīsu dassanaṭṭhena sammādiṭṭhi. Abhiniropanaṭṭhena sammāsaṅkappo, paggahanaṭṭhena sammāvāyāmo, upaṭṭhānaṭṭhena sammāsati, avikkhepanaṭṭhena sammāsamādhīti veditabbo. Vacanatthato pana sammā passati, sammā vā tāya passantīti sammādiṭṭhi. Sammā saṅkappeti, sammā vā tena saṅkappentīti sammāsaṅkappo. Sammā vāyāmeti, sammā vā tena vāyamantīti sammāvāyāmo. Sammā sarati, sammā vā tāya sarantīti sammāsati. Sammā samādhiyati, sammā vā tena samādhiyantīti sammāsamādhi. Apica, pasatthā sundarā vā diṭṭhi sammādiṭṭhīti. Imināpi nayena tesaṃ vacanattho veditabbo. Lakkhaṇādīni pana heṭṭhā vuttāneva.
