| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༥. མགྒཀཐཱཝཎྞནཱ
5. Maggakathāvaṇṇanā
༨༧༢-༨༧༥. ཨིདཱནི མགྒཀཐཱ ནཱམ ཧོཏི། ཏཏྠ ཡེསཾ ‘‘པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏཱི’’ཏི (ཨ॰ ནི॰ ༣.༤༣༡) ཨིདཉྩེཝ སུཏྟཾ སམྨཱཝཱཙཱཀམྨནྟཱཛཱིཝཱནཉྩ ཙིཏྟཝིཔྤཡུཏྟཏཾ ནིསྶཱཡ ‘‘ནིཔྤརིཡཱཡེན པཉྩངྒིཀོཝ མགྒོ’’ཏི ལདྡྷི, སེཡྻཐཱཔི མཧིསཱསཀཱནཾ, ཏེ སནྡྷཱཡ པཉྩངྒིཀོཏི པུཙྪཱ སཀཝཱདིསྶ, པཊིཉྙཱ ཨིཏརསྶ། སམྨཱཝཱཙཱ མགྒངྒཾ, སཱ ཙ ན མགྒོཏིཨཱདི པརསམཡཝསེན ཝུཏྟཾ། པརསམཡསྨིཉྷི སམྨཱཝཱཙཱདཡོ མགྒངྒནྟི ཨཱགཏཱ། རཱུཔཏྟཱ པན མགྒོ ན ཧོཏཱིཏི ཝཎྞིཏཱ། སམྨཱདིཊྛི མགྒངྒནྟིཨཱདི མགྒངྒསྶ ཨམགྒཏཱ ནཱམ ནཏྠཱིཏི དསྶནཏྠཾ ཝུཏྟཾ། པུབྦེཝ ཁོ པནསྶཱཏི སུཏྟེ པརིསུདྡྷསཱིལསྶ མགྒབྷཱཝནཱ ནཱམ ཧོཏི, ན ཨིཏརསྶཱཏི ཨཱགམནིཡཔཊིཔདཱཡ ཝིསུདྡྷིབྷཱཝདསྶནཏྠཾ ‘‘ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏཱི’’ཏི ཝུཏྟཾ, ན ཨིམེཧི ཝིནཱ པཉྩངྒིཀབྷཱཝདསྶནཏྠཾ། ཏེནེཝཱཧ ‘‘ཨེཝམསྶཱཡཾ ཨརིཡོ ཨཊྛངྒིཀོ མགྒོ བྷཱཝནཱཔཱརིཔཱུརིཾ གཙྪཏཱི’’ཏི། སཀཝཱདིནཱ ཨཱབྷཏསུཏྟཾ ནཱིཏཏྠམེཝཱཏི།
872-875. Idāni maggakathā nāma hoti. Tattha yesaṃ ‘‘pubbeva kho panassa kāyakammaṃ vacīkammaṃ ājīvo suparisuddho hotī’’ti (a. ni. 3.431) idañceva suttaṃ sammāvācākammantājīvānañca cittavippayuttataṃ nissāya ‘‘nippariyāyena pañcaṅgikova maggo’’ti laddhi, seyyathāpi mahisāsakānaṃ, te sandhāya pañcaṅgikoti pucchā sakavādissa, paṭiññā itarassa. Sammāvācā maggaṅgaṃ, sā ca na maggotiādi parasamayavasena vuttaṃ. Parasamayasmiñhi sammāvācādayo maggaṅganti āgatā. Rūpattā pana maggo na hotīti vaṇṇitā. Sammādiṭṭhi maggaṅgantiādi maggaṅgassa amaggatā nāma natthīti dassanatthaṃ vuttaṃ. Pubbeva kho panassāti sutte parisuddhasīlassa maggabhāvanā nāma hoti, na itarassāti āgamaniyapaṭipadāya visuddhibhāvadassanatthaṃ ‘‘kāyakammaṃ vacīkammaṃ ājīvo suparisuddho hotī’’ti vuttaṃ, na imehi vinā pañcaṅgikabhāvadassanatthaṃ. Tenevāha ‘‘evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti. Sakavādinā ābhatasuttaṃ nītatthamevāti.
མགྒཀཐཱཝཎྞནཱ།
Maggakathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༡༩༨) ༥. མགྒཀཐཱ • (198) 5. Maggakathā
