| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
២០. វីសតិមវគ្គោ
20. Vīsatimavaggo
(១៩៨) ៥. មគ្គកថា
(198) 5. Maggakathā
៨៧២. បញ្ចង្គិកោ មគ្គោតិ? អាមន្តា។ ននុ អដ្ឋង្គិកោ មគ្គោ វុត្តោ ភគវតា, សេយ្យថិទំ – សម្មាទិដ្ឋិ…បេ.… សម្មាសមាធីតិ? អាមន្តា។ ហញ្ចិ អដ្ឋង្គិកោ មគ្គោ វុត្តោ ភគវតា , សេយ្យថិទំ – សម្មាទិដ្ឋិ …បេ.… សម្មាសមាធិ, នោ ច វត រេ វត្តព្ពេ – ‘‘បញ្ចង្គិកោ មគ្គោ’’តិ។
872. Pañcaṅgiko maggoti? Āmantā. Nanu aṭṭhaṅgiko maggo vutto bhagavatā, seyyathidaṃ – sammādiṭṭhi…pe… sammāsamādhīti? Āmantā. Hañci aṭṭhaṅgiko maggo vutto bhagavatā , seyyathidaṃ – sammādiṭṭhi …pe… sammāsamādhi, no ca vata re vattabbe – ‘‘pañcaṅgiko maggo’’ti.
បញ្ចង្គិកោ មគ្គោតិ? អាមន្តា។ ននុ វុត្តំ ភគវតា –
Pañcaṅgiko maggoti? Āmantā. Nanu vuttaṃ bhagavatā –
‘‘មគ្គានំ អដ្ឋង្គិកោ សេដ្ឋោ, សច្ចានំ ចតុរោ បទា;
‘‘Maggānaṃ aṭṭhaṅgiko seṭṭho, saccānaṃ caturo padā;
វិរាគោ សេដ្ឋោ ធម្មានំ, ទ្វិបទានញ្ច ចក្ខុមា’’តិ 1។
Virāgo seṭṭho dhammānaṃ, dvipadānañca cakkhumā’’ti 2.
អត្ថេវ សុត្តន្តោតិ? អាមន្តា។ តេន ហិ អដ្ឋង្គិកោ មគ្គោតិ។
Attheva suttantoti? Āmantā. Tena hi aṭṭhaṅgiko maggoti.
៨៧៣. សម្មាវាចា មគ្គង្គំ, សា ច ន មគ្គោតិ? អាមន្តា។ សម្មាទិដ្ឋិ មគ្គង្គំ, សា ច ន មគ្គោតិ? ន ហេវំ វត្តព្ពេ…បេ.… សម្មាវាចា មគ្គង្គំ, សា ច ន មគ្គោតិ? អាមន្តា។ សម្មាសង្កប្បោ…បេ.… សម្មាវាយាមោ…បេ.… សម្មាសតិ…បេ.… សម្មាសមាធិ មគ្គង្គំ, សោ ច ន មគ្គោតិ? ន ហេវំ វត្តព្ពេ…បេ.…។
873. Sammāvācā maggaṅgaṃ, sā ca na maggoti? Āmantā. Sammādiṭṭhi maggaṅgaṃ, sā ca na maggoti? Na hevaṃ vattabbe…pe… sammāvācā maggaṅgaṃ, sā ca na maggoti? Āmantā. Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
សម្មាកម្មន្តោ…បេ.… សម្មាអាជីវោ មគ្គង្គំ, សោ ច ន មគ្គោតិ? អាមន្តា។ សម្មាទិដ្ឋិ…បេ.… សម្មាសមាធិ មគ្គង្គំ, សោ ច ន មគ្គោតិ? ន ហេវំ វត្តព្ពេ…បេ.…។
Sammākammanto…pe… sammāājīvo maggaṅgaṃ, so ca na maggoti? Āmantā. Sammādiṭṭhi…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
សម្មាទិដ្ឋិ មគ្គង្គំ, សា ច មគ្គោតិ? អាមន្តា។ សម្មាវាចា មគ្គង្គំ, សា ច មគ្គោតិ? ន ហេវំ វត្តព្ពេ…បេ.… សម្មាទិដ្ឋិ មគ្គង្គំ, សា ច មគ្គោតិ? អាមន្តា។ សម្មាកម្មន្តោ…បេ.… សម្មាអាជីវោ មគ្គង្គំ, សោ ច មគ្គោតិ? ន ហេវំ វត្តព្ពេ…បេ.…។
Sammādiṭṭhi maggaṅgaṃ, sā ca maggoti? Āmantā. Sammāvācā maggaṅgaṃ, sā ca maggoti? Na hevaṃ vattabbe…pe… sammādiṭṭhi maggaṅgaṃ, sā ca maggoti? Āmantā. Sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
សម្មាសង្កប្បោ…បេ.… សម្មាវាយាមោ…បេ.… សម្មាសតិ…បេ.… សម្មាសមាធិ មគ្គង្គំ, សោ ច មគ្គោតិ? អាមន្តា។ សម្មាវាចា…បេ.… សម្មាកម្មន្តោ…បេ.… សម្មាអាជីវោ មគ្គង្គំ, សោ ច មគ្គោតិ? ន ហេវំ វត្តព្ពេ…បេ.…។
Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca maggoti? Āmantā. Sammāvācā…pe… sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
៨៧៤. អរិយោ អដ្ឋង្គិកោ មគ្គោតិ? អាមន្តា។ ននុ វុត្តំ ភគវតា – ‘‘បុព្ពេវ ខោ បនស្ស កាយកម្មំ វចីកម្មំ អាជីវោ សុបរិសុទ្ធោ ហោតិ; ឯវមស្សាយំ អរិយោ អដ្ឋង្គិកោ មគ្គោ ភាវនាបារិបូរិំ គច្ឆតី’’តិ 3! អត្ថេវ សុត្តន្តោតិ? អាមន្តា។ តេន ហិ បញ្ចង្គិកោ មគ្គោតិ។
874. Ariyo aṭṭhaṅgiko maggoti? Āmantā. Nanu vuttaṃ bhagavatā – ‘‘pubbeva kho panassa kāyakammaṃ vacīkammaṃ ājīvo suparisuddho hoti; evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti 4! Attheva suttantoti? Āmantā. Tena hi pañcaṅgiko maggoti.
៨៧៥. បញ្ចង្គិកោ មគ្គោតិ? អាមន្តា។ ននុ វុត្តំ ភគវតា – ‘‘យស្មិំ ខោ, សុភទ្ទ, ធម្មវិនយេ អរិយោ អដ្ឋង្គិកោ មគ្គោ ន ឧបលព្ភតិ, សមណោបិ តត្ថ ន ឧបលព្ភតិ, ទុតិយោបិ តត្ថ សមណោ ន ឧបលព្ភតិ, តតិយោបិ តត្ថ សមណោ ន ឧបលព្ភតិ, ចតុត្ថោបិ តត្ថ សមណោ ន ឧបលព្ភតិ។ យស្មិញ្ច ខោ, សុភទ្ទ, ធម្មវិនយេ អរិយោ អដ្ឋង្គិកោ មគ្គោ ឧបលព្ភតិ, សមណោបិ តត្ថ ឧបលព្ភតិ, ទុតិយោបិ…បេ.… តតិយោបិ…បេ.… ចតុត្ថោបិ តត្ថ សមណោ ឧបលព្ភតិ។ ឥមស្មិំ ខោ, សុភទ្ទ, ធម្មវិនយេ អរិយោ អដ្ឋង្គិកោ មគ្គោ ឧបលព្ភតិ។ ឥធេវ, សុភទ្ទ , សមណោ, ឥធ ទុតិយោ សមណោ, ឥធ តតិយោ សមណោ, ឥធ ចតុត្ថោ សមណោ។ សុញ្ញា បរប្បវាទា សមណេភិ អញ្ញេហី’’តិ 5! អត្ថេវ សុត្តន្តោតិ? អាមន្តា។ តេន ហិ អដ្ឋង្គិកោ មគ្គោតិ។
875. Pañcaṅgiko maggoti? Āmantā. Nanu vuttaṃ bhagavatā – ‘‘yasmiṃ kho, subhadda, dhammavinaye ariyo aṭṭhaṅgiko maggo na upalabbhati, samaṇopi tattha na upalabbhati, dutiyopi tattha samaṇo na upalabbhati, tatiyopi tattha samaṇo na upalabbhati, catutthopi tattha samaṇo na upalabbhati. Yasmiñca kho, subhadda, dhammavinaye ariyo aṭṭhaṅgiko maggo upalabbhati, samaṇopi tattha upalabbhati, dutiyopi…pe… tatiyopi…pe… catutthopi tattha samaṇo upalabbhati. Imasmiṃ kho, subhadda, dhammavinaye ariyo aṭṭhaṅgiko maggo upalabbhati. Idheva, subhadda , samaṇo, idha dutiyo samaṇo, idha tatiyo samaṇo, idha catuttho samaṇo. Suññā parappavādā samaṇebhi aññehī’’ti 6! Attheva suttantoti? Āmantā. Tena hi aṭṭhaṅgiko maggoti.
មគ្គកថា និដ្ឋិតា។
Maggakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៥. មគ្គកថាវណ្ណនា • 5. Maggakathāvaṇṇanā
