| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
४. मागधसुत्तं
4. Māgadhasuttaṃ
८५. सावत्थिनिदानं। एकमन्तं ठितो खो मागधो देवपुत्तो भगवन्तं गाथाय अज्झभासि –
85. Sāvatthinidānaṃ. Ekamantaṃ ṭhito kho māgadho devaputto bhagavantaṃ gāthāya ajjhabhāsi –
‘‘कति लोकस्मिं पज्जोता, येहि लोको पकासति।
‘‘Kati lokasmiṃ pajjotā, yehi loko pakāsati;
भवन्तं पुट्ठुमागम्म, कथं जानेमु तं मय’’न्ति॥
Bhavantaṃ puṭṭhumāgamma, kathaṃ jānemu taṃ maya’’nti.
‘‘चत्तारो लोके पज्जोता, पञ्चमेत्थ न विज्जति।
‘‘Cattāro loke pajjotā, pañcamettha na vijjati;
दिवा तपति आदिच्चो, रत्तिमाभाति चन्दिमा॥
Divā tapati ādicco, rattimābhāti candimā.
‘‘अथ अग्गि दिवारत्तिं, तत्थ तत्थ पकासति।
‘‘Atha aggi divārattiṃ, tattha tattha pakāsati;
सम्बुद्धो तपतं सेट्ठो, एसा आभा अनुत्तरा’’ति॥
Sambuddho tapataṃ seṭṭho, esā ābhā anuttarā’’ti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ३-४. माघसुत्तादिवण्णना • 3-4. Māghasuttādivaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ४. मागधसुत्तवण्णना • 4. Māgadhasuttavaṇṇanā
