| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā |
၁၄. လောကဝာဒပဋိသံယုတ္တဒိဋ္ဌိနိဒ္ဒေသဝဏ္ဏနာ
14. Lokavādapaṭisaṃyuttadiṭṭhiniddesavaṇṇanā
၁၄၇. အတ္တာ စ လောကော စာတိ သော ဧဝ အတ္တာ စ အာလောကနဋ္ဌေန လောကော စာတိ အတ္ထော။ သသ္သတောတိ သသ္သတဝာဒာနံ ဒိဋ္ဌိ။ အသသ္သတောတိ ဥစ္ဆေဒဝာဒာနံ။ သသ္သတော စ အသသ္သတော စာတိ ဧကစ္စသသ္သတိကာနံ။ နေဝ သသ္သတော နာသသ္သတောတိ အမရာဝိက္ခေပိကာနံ။ အန္တဝာတိ ပရိတ္တကသိဏလာဘီနံ တက္ကိကာနဉ္စ နိဂဏ္ဌာဇီဝိကာနဉ္စ။ အထ ဝာ ဥစ္ဆေဒဝာဒိနော ‘‘သတ္တော ဇာတိယာ ပုဗ္ဗန္တဝာ, မရဏေန အပရန္တဝာ’’တိ ဝဒန္တိ။ အဓိစ္စသမုပ္ပန္နိကာ ‘‘သတ္တော ဇာတိယာ ပုဗ္ဗန္တဝာ’’တိ ဝဒန္တိ။ အနန္တဝာတိ အပ္ပမာဏကသိဏလာဘီနံ။ သသ္သတဝာဒိနော ပန ‘‘ပုဗ္ဗန္တာပရန္တာ နတ္ထိ, တေန အနန္တဝာ’’တိ ဝဒန္တိ။ အဓိစ္စသမုပ္ပန္နိကာ ‘‘အပရန္တေန အနန္တဝာ’’တိ ဝဒန္တိ။
147.Attā ca loko cāti so eva attā ca ālokanaṭṭhena loko cāti attho. Sassatoti sassatavādānaṃ diṭṭhi. Asassatoti ucchedavādānaṃ. Sassato ca asassato cāti ekaccasassatikānaṃ. Neva sassato nāsassatoti amarāvikkhepikānaṃ. Antavāti parittakasiṇalābhīnaṃ takkikānañca nigaṇṭhājīvikānañca. Atha vā ucchedavādino ‘‘satto jātiyā pubbantavā, maraṇena aparantavā’’ti vadanti. Adhiccasamuppannikā ‘‘satto jātiyā pubbantavā’’ti vadanti. Anantavāti appamāṇakasiṇalābhīnaṃ. Sassatavādino pana ‘‘pubbantāparantā natthi, tena anantavā’’ti vadanti. Adhiccasamuppannikā ‘‘aparantena anantavā’’ti vadanti.
အန္တဝာ စ အနန္တဝာ စာတိ ဥဒ္ဓမဓော အဝဍ္ဎိတ္ဝာ တိရိယံ ဝဍ္ဎိတကသိဏာနံ။ နေဝ အန္တဝာ န အနန္တဝာတိ အမရာဝိက္ခေပိကာနံ။
Antavāca anantavā cāti uddhamadho avaḍḍhitvā tiriyaṃ vaḍḍhitakasiṇānaṃ. Neva antavā na anantavāti amarāvikkhepikānaṃ.
လောကဝာဒပဋိသံယုတ္တဒိဋ္ဌိနိဒ္ဒေသဝဏ္ဏနာ နိဋ္ဌိတာ။
Lokavādapaṭisaṃyuttadiṭṭhiniddesavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / ပဋိသမ္ဘိဒာမဂ္ဂပာဠိ • Paṭisambhidāmaggapāḷi / ၁၄. လောကဝာဒပဋိသံယုတ္တဒိဋ္ဌိနိဒ္ဒေသော • 14. Lokavādapaṭisaṃyuttadiṭṭhiniddeso
