| Library / Tipiṭaka / तिपिटक • Tipiṭaka / पटिसम्भिदामग्ग-अट्ठकथा • Paṭisambhidāmagga-aṭṭhakathā |
१४. लोकवादपटिसंयुत्तदिट्ठिनिद्देसवण्णना
14. Lokavādapaṭisaṃyuttadiṭṭhiniddesavaṇṇanā
१४७. अत्ता च लोको चाति सो एव अत्ता च आलोकनट्ठेन लोको चाति अत्थो। सस्सतोति सस्सतवादानं दिट्ठि। असस्सतोति उच्छेदवादानं। सस्सतो च असस्सतो चाति एकच्चसस्सतिकानं। नेव सस्सतो नासस्सतोति अमराविक्खेपिकानं। अन्तवाति परित्तकसिणलाभीनं तक्किकानञ्च निगण्ठाजीविकानञ्च। अथ वा उच्छेदवादिनो ‘‘सत्तो जातिया पुब्बन्तवा, मरणेन अपरन्तवा’’ति वदन्ति। अधिच्चसमुप्पन्निका ‘‘सत्तो जातिया पुब्बन्तवा’’ति वदन्ति। अनन्तवाति अप्पमाणकसिणलाभीनं। सस्सतवादिनो पन ‘‘पुब्बन्तापरन्ता नत्थि, तेन अनन्तवा’’ति वदन्ति। अधिच्चसमुप्पन्निका ‘‘अपरन्तेन अनन्तवा’’ति वदन्ति।
147.Attā ca loko cāti so eva attā ca ālokanaṭṭhena loko cāti attho. Sassatoti sassatavādānaṃ diṭṭhi. Asassatoti ucchedavādānaṃ. Sassato ca asassato cāti ekaccasassatikānaṃ. Neva sassato nāsassatoti amarāvikkhepikānaṃ. Antavāti parittakasiṇalābhīnaṃ takkikānañca nigaṇṭhājīvikānañca. Atha vā ucchedavādino ‘‘satto jātiyā pubbantavā, maraṇena aparantavā’’ti vadanti. Adhiccasamuppannikā ‘‘satto jātiyā pubbantavā’’ti vadanti. Anantavāti appamāṇakasiṇalābhīnaṃ. Sassatavādino pana ‘‘pubbantāparantā natthi, tena anantavā’’ti vadanti. Adhiccasamuppannikā ‘‘aparantena anantavā’’ti vadanti.
अन्तवा च अनन्तवा चाति उद्धमधो अवड्ढित्वा तिरियं वड्ढितकसिणानं। नेव अन्तवा न अनन्तवाति अमराविक्खेपिकानं।
Antavāca anantavā cāti uddhamadho avaḍḍhitvā tiriyaṃ vaḍḍhitakasiṇānaṃ. Neva antavā na anantavāti amarāvikkhepikānaṃ.
लोकवादपटिसंयुत्तदिट्ठिनिद्देसवण्णना निट्ठिता।
Lokavādapaṭisaṃyuttadiṭṭhiniddesavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / पटिसम्भिदामग्गपाळि • Paṭisambhidāmaggapāḷi / १४. लोकवादपटिसंयुत्तदिट्ठिनिद्देसो • 14. Lokavādapaṭisaṃyuttadiṭṭhiniddeso
