| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
১০. লেখসুত্তৰণ্ণনা
10. Lekhasuttavaṇṇanā
১৩৩. দসমে থিরট্ঠানতোতি থিরট্ঠানতোৰ। পাসাণে লেখসদিসা পরাপরাধনিব্বত্তা কোধলেখা যস্স সো পাসাণলেখূপমসমন্নাগতো পাসাণলেখূপমোতি ৰুত্তো। এৰং ইতরেপি। অনুসেতীতি অপ্পহীনতায অনুসেতি। ন খিপ্পং লুজ্জতীতি ন অন্তরা নস্সতি কম্মট্ঠানেনেৰ নস্সনতো। এৰমেৰন্তি এৰং তস্সপি পুগ্গলস্স কোধো ন অন্তরা পুনদিৰসে ৰা অপরদিৰসে ৰা নিট্ঠাতি, অদ্ধনিযো পন হোতি, মরণেনেৰ নিট্ঠাতীতি অত্থো। কক্খল়েনাতি অতিকক্খল়েন ধম্মচ্ছেদকেন থদ্ধৰচনেন। সংসন্দতীতি একীভৰতি। সম্মোদতীতি নিরন্তরো হোতীতি এৰমেত্থ অত্থো দট্ঠব্বো।
133. Dasame thiraṭṭhānatoti thiraṭṭhānatova. Pāsāṇe lekhasadisā parāparādhanibbattā kodhalekhā yassa so pāsāṇalekhūpamasamannāgato pāsāṇalekhūpamoti vutto. Evaṃ itarepi. Anusetīti appahīnatāya anuseti. Na khippaṃ lujjatīti na antarā nassati kammaṭṭhāneneva nassanato. Evamevanti evaṃ tassapi puggalassa kodho na antarā punadivase vā aparadivase vā niṭṭhāti, addhaniyo pana hoti, maraṇeneva niṭṭhātīti attho. Kakkhaḷenāti atikakkhaḷena dhammacchedakena thaddhavacanena. Saṃsandatīti ekībhavati. Sammodatīti nirantaro hotīti evamettha attho daṭṭhabbo.
অথ ৰা সন্ধিযতীতি ঠানগমনাদীসু কাযকিরিযাসু কাযেন সমোধানং গচ্ছতি, তিলতণ্ডুলা ৰিয মিস্সীভাৰং উপেতীতি অত্থো। সংসন্দতীতি চিত্তকিরিযাসু চিত্তেন সমোধানং গচ্ছতি, খীরোদকং ৰিয একীভাৰং উপেতীতি অত্থো। সম্মোদতীতি উদ্দেসপরিপুচ্ছাদীসু ৰচীকিরিযাসু ৰাচায সমোধানং গচ্ছতি, ৰিপ্পৰাসাগতোপি পিযসহাযকো ৰিয পিযতরভাৰং উপেতীতি অত্থো। অপিচ কিচ্চকরণীযেসু তেহি সদ্ধিং আদীতোৰ এককিরিযাভাৰং উপগচ্ছন্তো সন্ধিযতি, যাৰ মজ্ঝা পৰত্তন্তো সংসন্দতি, যাৰ পরিযোসানা অনিৰত্তন্তো সম্মোদতীতি ৰেদিতব্বো।
Atha vā sandhiyatīti ṭhānagamanādīsu kāyakiriyāsu kāyena samodhānaṃ gacchati, tilataṇḍulā viya missībhāvaṃ upetīti attho. Saṃsandatīti cittakiriyāsu cittena samodhānaṃ gacchati, khīrodakaṃ viya ekībhāvaṃ upetīti attho. Sammodatīti uddesaparipucchādīsu vacīkiriyāsu vācāya samodhānaṃ gacchati, vippavāsāgatopi piyasahāyako viya piyatarabhāvaṃ upetīti attho. Apica kiccakaraṇīyesu tehi saddhiṃ ādītova ekakiriyābhāvaṃ upagacchanto sandhiyati, yāva majjhā pavattanto saṃsandati, yāva pariyosānā anivattanto sammodatīti veditabbo.
লেখসুত্তৰণ্ণনা নিট্ঠিতা।
Lekhasuttavaṇṇanā niṭṭhitā.
কুসিনারৰগ্গৰণ্ণনা নিট্ঠিতা।
Kusināravaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. লেখসুত্তং • 10. Lekhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. লেখসুত্তৰণ্ণনা • 10. Lekhasuttavaṇṇanā
