| Library / Tipiṭaka / ਤਿਪਿਟਕ • Tipiṭaka / ਦ੍વੇਮਾਤਿਕਾਪਾਲ਼ਿ • Dvemātikāpāḷi |
ਪਾਚਿਤ੍ਤਿਯਕਣ੍ਡੋ
Pācittiyakaṇḍo
੧. ਲਸੁਣવਗ੍ਗੋ
1. Lasuṇavaggo
੧. ਲਸੁਣਸਿਕ੍ਖਾਪਦવਣ੍ਣਨਾ
1. Lasuṇasikkhāpadavaṇṇanā
ਪਾਚਿਤ੍ਤਿਯੇਸੁ ਲਸੁਣવਗ੍ਗਸ੍ਸ ਤਾવ ਪਠਮੇ ਲਸੁਣਨ੍ਤਿ ਮਗਧਰਟ੍ਠੇ ਜਾਤਂ ਆਮਕਂ ਭਣ੍ਡਿਕਲਸੁਣਮੇવ, ਨ ਏਕਦ੍વਿਤਿਮਿਞ੍ਜਕਂ। ਤਞ੍ਹਿ ‘‘ਖਾਦਿਸ੍ਸਾਮੀ’’ਤਿ ਪਟਿਗ੍ਗਣ੍ਹਨ੍ਤਿਯਾ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ।
Pācittiyesu lasuṇavaggassa tāva paṭhame lasuṇanti magadharaṭṭhe jātaṃ āmakaṃ bhaṇḍikalasuṇameva, na ekadvitimiñjakaṃ. Tañhi ‘‘khādissāmī’’ti paṭiggaṇhantiyā dukkaṭaṃ, ajjhohāre ajjhohāre pācittiyaṃ.
ਸਾવਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਲਸੁਣਂ ਹਰਾਪਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਲਸੁਣੇ ਦ੍વਿਕਦੁਕ੍ਕਟਂ। ਤਸ੍ਮਿਂ ਪਨ ਅਲਸੁਣਸਞ੍ਞਾਯ, ਪਲਣ੍ਡੁਕੇ, ਭਞ੍ਜਨਕੇ, ਹਰਿਤਕੇ, ਚਾਪਲਸੁਣੇ, ਸੂਪਸਮ੍ਪਾਕੇ, ਮਂਸਸਮ੍ਪਾਕੇ, ਤੇਲਸਮ੍ਪਾਕੇ, ਸਾਲ਼વੇ, ਉਤ੍ਤਰਿਭਙ੍ਗੇ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਆਮਕਲਸੁਣਞ੍ਚੇવ, ਅਜ੍ਝੋਹਰਣਞ੍ਚਾਤਿ ਇਮਾਨੇਤ੍ਥ ਦ੍વੇ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ।
Sāvatthiyaṃ thullanandaṃ ārabbha lasuṇaṃ harāpanavatthusmiṃ paññattaṃ, tikapācittiyaṃ, alasuṇe dvikadukkaṭaṃ. Tasmiṃ pana alasuṇasaññāya, palaṇḍuke, bhañjanake, haritake, cāpalasuṇe, sūpasampāke, maṃsasampāke, telasampāke, sāḷave, uttaribhaṅge, ummattikādīnañca anāpatti. Āmakalasuṇañceva, ajjhoharaṇañcāti imānettha dve aṅgāni. Samuṭṭhānādīni eḷakalomasadisānīti.
ਲਸੁਣਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Lasuṇasikkhāpadavaṇṇanā niṭṭhitā.
੨. ਸਮ੍ਬਾਧਲੋਮਸਿਕ੍ਖਾਪਦવਣ੍ਣਨਾ
2. Sambādhalomasikkhāpadavaṇṇanā
ਦੁਤਿਯੇ ਸਮ੍ਬਾਧੇਤਿ ਪਟਿਚ੍ਛਨ੍ਨੋਕਾਸੇ, ਉਪਕਚ੍ਛਕੇਸੁ ਚ ਮੁਤ੍ਤਕਰਣੇ ਚਾਤਿ ਅਤ੍ਥੋ। ਸਂਹਰਾਪੇਯ੍ਯਾਤਿ ਏਤ੍ਥ ਖੁਰਸਣ੍ਡਾਸਕਤ੍ਤਰਿਆਦੀਸੁ ਯੇਨ ਕੇਨਚਿ ਸਂਹਰਾਪੇਨ੍ਤਿਯਾ ਪਯੋਗਗਣਨਾਯ ਪਾਚਿਤ੍ਤਿਯਂ, ਨ ਲੋਮਗਣਨਾਯ।
Dutiye sambādheti paṭicchannokāse, upakacchakesu ca muttakaraṇe cāti attho. Saṃharāpeyyāti ettha khurasaṇḍāsakattariādīsu yena kenaci saṃharāpentiyā payogagaṇanāya pācittiyaṃ, na lomagaṇanāya.
ਸਾવਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਸਮ੍ਬਾਧੇ ਲੋਮਂ ਸਂਹਰਾਪਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਤ੍ਤਨੋ ਅਤ੍ਥਾਯ ਅਞ੍ਞਂ ਆਣਾਪੇਨ੍ਤਿਯਾ ਸਾਣਤ੍ਤਿਕਂ, ਆਪਤ੍ਤਿਭੇਦੋਨਤ੍ਥਿ। ਆਬਾਧਪਚ੍ਚਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਆਬਾਧਾਭਾવੋ, ਸਮ੍ਬਾਧੇ ਲੋਮਸਂਹਰਣਨ੍ਤਿ ਇਮਾਨੇਤ੍ਥ ਦ੍વੇ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਭਿਕ੍ਖੁਨਿਯਾ ਸਦ੍ਧਿਂ ਏਕਦ੍ਧਾਨਮਗ੍ਗਗਮਨਸਿਕ੍ਖਾਪਦਸਦਿਸਾਨੀਤਿ।
Sāvatthiyaṃ chabbaggiyā bhikkhuniyo ārabbha sambādhe lomaṃ saṃharāpanavatthusmiṃ paññattaṃ, attano atthāya aññaṃ āṇāpentiyā sāṇattikaṃ, āpattibhedonatthi. Ābādhapaccayā, ummattikādīnañca anāpatti. Ābādhābhāvo, sambādhe lomasaṃharaṇanti imānettha dve aṅgāni. Samuṭṭhānādīni bhikkhuniyā saddhiṃ ekaddhānamaggagamanasikkhāpadasadisānīti.
ਸਮ੍ਬਾਧਲੋਮਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Sambādhalomasikkhāpadavaṇṇanā niṭṭhitā.
੩. ਤਲਘਾਤਕਸਿਕ੍ਖਾਪਦવਣ੍ਣਨਾ
3. Talaghātakasikkhāpadavaṇṇanā
ਤਤਿਯੇ ਤਲਘਾਤਕੇਤਿ ਅਨ੍ਤਮਸੋ ਉਪ੍ਪਲਕੇਸਰੇਨਾਪਿ ਮੁਤ੍ਤਕਰਣਸ੍ਸ ਤਲਘਾਤਨੇ ਮੁਤ੍ਤਕਰਣਮ੍ਹਿ ਪਹਾਰਦਾਨੇ ਪਾਚਿਤ੍ਤਿਯਨ੍ਤਿ ਅਤ੍ਥੋ।
Tatiye talaghātaketi antamaso uppalakesarenāpi muttakaraṇassa talaghātane muttakaraṇamhi pahāradāne pācittiyanti attho.
ਸਾવਤ੍ਥਿਯਂ ਦ੍વੇ ਭਿਕ੍ਖੁਨਿਯੋ ਆਰਬ੍ਭ ਤਲਘਾਤਕਰਣવਤ੍ਥੁਸ੍ਮਿਂ ਪਞ੍ਞਤ੍ਤਂ, ਪੁਰਿਮਨਯੇਨੇવ ਸਾਣਤ੍ਤਿਕਂ, ਆਪਤ੍ਤਿਭੇਦੋ ਨਤ੍ਥਿ। ਇਤੋ ਪਰਂ ਪਨ ਯਤ੍ਥ ਨਤ੍ਥਿ, ਤਤ੍ਥ ਅવਤ੍વਾવ ਗਮਿਸ੍ਸਾਮ। ਆਬਾਧਪਚ੍ਚਯਾ ਗਣ੍ਡਂ વਾ વਣਂ વਾ ਪਹਰਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਆਬਾਧਾਭਾવੋ, ਮੁਤ੍ਤਕਰਣੇ ਪਹਾਰਦਾਨਂ, ਫਸ੍ਸਸਾਦਿਯਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੀਤਿ।
Sāvatthiyaṃ dve bhikkhuniyo ārabbha talaghātakaraṇavatthusmiṃ paññattaṃ, purimanayeneva sāṇattikaṃ, āpattibhedo natthi. Ito paraṃ pana yattha natthi, tattha avatvāva gamissāma. Ābādhapaccayā gaṇḍaṃ vā vaṇaṃ vā paharantiyā, ummattikādīnañca anāpatti. Ābādhābhāvo, muttakaraṇe pahāradānaṃ, phassasādiyananti imānettha tīṇi aṅgāni. Samuṭṭhānādīni paṭhamapārājikasadisānīti.
ਤਲਘਾਤਕਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Talaghātakasikkhāpadavaṇṇanā niṭṭhitā.
੪. ਜਤੁਮਟ੍ਠਕਸਿਕ੍ਖਾਪਦવਣ੍ਣਨਾ
4. Jatumaṭṭhakasikkhāpadavaṇṇanā
ਚਤੁਤ੍ਥੇ ਜਤੁਮਟ੍ਠਕੇਤਿ ਜਤੁਨਾ ਕਤੇ ਮਟ੍ਠਦਣ੍ਡਕੇ। વਤ੍ਥੁવਸੇਨੇਤਂ વੁਤ੍ਤਂ, ਕਾਮਰਾਗੇਨ ਪਨ ਉਪ੍ਪਲਕੇਸਰਮ੍ਪਿ ਪવੇਸੇਨ੍ਤਿਯਾ ਆਪਤ੍ਤਿ।
Catutthe jatumaṭṭhaketi jatunā kate maṭṭhadaṇḍake. Vatthuvasenetaṃ vuttaṃ, kāmarāgena pana uppalakesarampi pavesentiyā āpatti.
ਸਾવਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਜਤੁਮਟ੍ਠਕਸਾਦਿਯਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਤਤਿਯਸਦਿਸਮੇવਾਤਿ।
Sāvatthiyaṃ aññataraṃ bhikkhuniṃ ārabbha jatumaṭṭhakasādiyanavatthusmiṃ paññattaṃ, sesaṃ tatiyasadisamevāti.
ਜਤੁਮਟ੍ਠਕਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Jatumaṭṭhakasikkhāpadavaṇṇanā niṭṭhitā.
੫. ਉਦਕਸੁਦ੍ਧਿਕਸਿਕ੍ਖਾਪਦવਣ੍ਣਨਾ
5. Udakasuddhikasikkhāpadavaṇṇanā
ਪਞ੍ਚਮੇ ਉਦਕਸੁਦ੍ਧਿਕਨ੍ਤਿ ਮੁਤ੍ਤਕਰਣਸ੍ਸ ਧੋવਨਂ। ਆਦਿਯਮਾਨਾਯਾਤਿ ਕਰੋਨ੍ਤਿਯਾ। ਦ੍વਙ੍ਗੁਲਪਬ੍ਬਪਰਮਂ ਆਦਾਤਬ੍ਬਨ੍ਤਿ ਦ੍વੀਸੁ ਅਙ੍ਗੁਲੀਸੁ ਏਕੇਕਂ ਕਤ੍વਾ ਦ੍વਙ੍ਗੁਲਪਬ੍ਬਪਰਮਂ ਆਦਾਤਬ੍ਬਂ। ਤਂ ਅਤਿਕ੍ਕਾਮੇਨ੍ਤਿਯਾਤਿ ਸਚੇ ਧੋવਨਕਾਲੇ ਰਾਗવਸੇਨ વਿਤ੍ਥਾਰਤੋ ਤਤਿਯਾਯ ਅਙ੍ਗੁਲਿਯਾ ਅਗ੍ਗਪਬ੍ਬਂ, ਗਮ੍ਭੀਰਤੋ ਏਕਿਸ੍ਸਾવ ਅਙ੍ਗੁਲਿਯਾ ਤਤਿਯਪਬ੍ਬਂ ਪવੇਸੇਤਿ ਪਾਚਿਤ੍ਤਿਯਂ।
Pañcame udakasuddhikanti muttakaraṇassa dhovanaṃ. Ādiyamānāyāti karontiyā. Dvaṅgulapabbaparamaṃādātabbanti dvīsu aṅgulīsu ekekaṃ katvā dvaṅgulapabbaparamaṃ ādātabbaṃ. Taṃ atikkāmentiyāti sace dhovanakāle rāgavasena vitthārato tatiyāya aṅguliyā aggapabbaṃ, gambhīrato ekissāva aṅguliyā tatiyapabbaṃ paveseti pācittiyaṃ.
ਸਕ੍ਕੇਸੁ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਅਤਿਗਮ੍ਭੀਰਂ ਉਦਕਸੁਦ੍ਧਿਕਂ ਆਦਿਯਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਊਨਕਦ੍વਙ੍ਗੁਲਪਬ੍ਬੇ ਦ੍વਿਕਦੁਕ੍ਕਟਂ। ਤਸ੍ਮਿਂ ਪਨ ਊਨਕਸਞ੍ਞਾਯ, ਦ੍વਙ੍ਗੁਲਪਬ੍ਬਪਰਮਂ ਆਦਿਯਨ੍ਤਿਯਾ, ਆਬਾਧਪਚ੍ਚਯਾ ਅਤਿਰੇਕਮ੍ਪਿ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ, ਸੇਸਂ ਤਤਿਯਸਦਿਸਮੇવਾਤਿ।
Sakkesu aññataraṃ bhikkhuniṃ ārabbha atigambhīraṃ udakasuddhikaṃ ādiyanavatthusmiṃ paññattaṃ, tikapācittiyaṃ, ūnakadvaṅgulapabbe dvikadukkaṭaṃ. Tasmiṃ pana ūnakasaññāya, dvaṅgulapabbaparamaṃ ādiyantiyā, ābādhapaccayā atirekampi, ummattikādīnañca anāpatti, sesaṃ tatiyasadisamevāti.
ਉਦਕਸੁਦ੍ਧਿਕਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Udakasuddhikasikkhāpadavaṇṇanā niṭṭhitā.
੬. ਉਪਤਿਟ੍ਠਨਸਿਕ੍ਖਾਪਦવਣ੍ਣਨਾ
6. Upatiṭṭhanasikkhāpadavaṇṇanā
ਛਟ੍ਠੇ ਭੁਞ੍ਜਨ੍ਤਸ੍ਸਾਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੁਞ੍ਜਤੋ। ਪਾਨੀਯੇਨਾਤਿ ਸੁਦ੍ਧੇਨ વਾ ਉਦਕੇਨ, ਤਕ੍ਕਾਦੀਸੁ વਾ ਅਞ੍ਞਤਰੇਨ। વਿਧੂਪਨੇਨਾਤਿ ਯਾਯ ਕਾਯਚਿ ਬੀਜਨਿਯਾ। ਉਪਤਿਟ੍ਠੇਯ੍ਯਾਤਿ ਯਾ ਏਤੇਸੁ ਦ੍વੀਸੁ ਅਞ੍ਞਤਰਂ ਗਹੇਤ੍વਾ ਹਤ੍ਥਪਾਸੇ ਤਿਟ੍ਠਤਿ, ਤਸ੍ਸਾ ਪਾਚਿਤ੍ਤਿਯਂ।
Chaṭṭhe bhuñjantassāti pañcannaṃ bhojanānaṃ aññataraṃ bhuñjato. Pānīyenāti suddhena vā udakena, takkādīsu vā aññatarena. Vidhūpanenāti yāya kāyaci bījaniyā. Upatiṭṭheyyāti yā etesu dvīsu aññataraṃ gahetvā hatthapāse tiṭṭhati, tassā pācittiyaṃ.
ਸਾવਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਭੁਞ੍ਜਨ੍ਤਸ੍ਸ ਏવਂ ਤਿਟ੍ਠਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਹਤ੍ਥਪਾਸਂ વਿਜਹਿਤ੍વਾ ਖਾਦਨੀਯਂ ਖਾਦਨ੍ਤਸ੍ਸ ਉਪਤਿਟ੍ਠਨ੍ਤਿਯਾ ਦੁਕ੍ਕਟਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ। ‘‘ਇਮਂ ਪਿવਥ, ਇਮਿਨਾ ਬੀਜਥਾ’’ਤਿ ਏવਂ ਦੇਨ੍ਤਿਯਾ વਾ, ਦਾਪੇਨ੍ਤਿਯਾ વਾ, ਅਨੁਪਸਮ੍ਪਨ੍ਨਂ વਾ ਉਪਤਿਟ੍ਠਾਪਨਤ੍ਥਂ ਆਣਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਭੁਞ੍ਜਨ੍ਤਸ੍ਸ ਭਿਕ੍ਖੁਨੋ ਹਤ੍ਥਪਾਸੇ ਠਾਨਂ, ਪਾਨੀਯਸ੍ਸ વਾ વਿਧੂਪਨਸ੍ਸ વਾ ਗਹਣਨ੍ਤਿ ਇਮਾਨੇਤ੍ਥ ਦ੍વੇ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ।
Sāvatthiyaṃ aññataraṃ bhikkhuniṃ ārabbha bhuñjantassa evaṃ tiṭṭhanavatthusmiṃ paññattaṃ, tikapācittiyaṃ, hatthapāsaṃ vijahitvā khādanīyaṃ khādantassa upatiṭṭhantiyā dukkaṭaṃ, anupasampanne tikadukkaṭaṃ. ‘‘Imaṃ pivatha, iminā bījathā’’ti evaṃ dentiyā vā, dāpentiyā vā, anupasampannaṃ vā upatiṭṭhāpanatthaṃ āṇāpentiyā, ummattikādīnañca anāpatti. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti imānettha dve aṅgāni. Samuṭṭhānādīni eḷakalomasadisānīti.
ਉਪਤਿਟ੍ਠਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Upatiṭṭhanasikkhāpadavaṇṇanā niṭṭhitā.
੭. ਆਮਕਧਞ੍ਞਸਿਕ੍ਖਾਪਦવਣ੍ਣਨਾ
7. Āmakadhaññasikkhāpadavaṇṇanā
ਸਤ੍ਤਮੇ વਿਞ੍ਞਤ੍વਾਤਿ ਅਨ੍ਤਮਸੋ ਮਾਤਰਮ੍ਪਿ ਯਾਚਿਤ੍વਾ। ਭੁਞ੍ਜੇਯ੍ਯਾਤਿ ਅਜ੍ਝੋਹਰੇਯ੍ਯ। ਏਤ੍ਥ ਚ વਿਞ੍ਞਤ੍ਤਿ ਚੇવ ਭੋਜਨਞ੍ਚ ਪਮਾਣਂ, ਤਸ੍ਮਾ ਸਯਂ વਿਞ੍ਞਤ੍વਾ ਅਞ੍ਞਾਯ ਭਜ੍ਜਨਾਦੀਨਿ ਕਾਰਾਪੇਤ੍વਾ વਾ , ਅਞ੍ਞਾਯ વਿਞ੍ਞਾਪੇਤ੍વਾ ਸਯਂ ਭਜ੍ਜਨਾਦੀਨਿ ਕਤ੍વਾ વਾ ਪਟਿਗ੍ਗਹਣਤੋ ਪਟ੍ਠਾਯ ਯਾવ ਦਨ੍ਤੇਹਿ ਸਂਖਾਦਨਂ, ਤਾવ ਪੁਬ੍ਬਪ੍ਪਯੋਗੇਸੁ ਦੁਕ੍ਕਟਾਨਿ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ।
Sattame viññatvāti antamaso mātarampi yācitvā. Bhuñjeyyāti ajjhohareyya. Ettha ca viññatti ceva bhojanañca pamāṇaṃ, tasmā sayaṃ viññatvā aññāya bhajjanādīni kārāpetvā vā , aññāya viññāpetvā sayaṃ bhajjanādīni katvā vā paṭiggahaṇato paṭṭhāya yāva dantehi saṃkhādanaṃ, tāva pubbappayogesu dukkaṭāni, ajjhohāre ajjhohāre pācittiyaṃ.
ਸਾવਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਆਮਕਧਞ੍ਞਂ વਿਞ੍ਞਾਪਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਯਂ વਾ ਅਞ੍ਞਾਯ વਾ ਅવਿਞ੍ਞਤ੍ਤਿਯਾ ਲਦ੍ਧਂ ਭਜ੍ਜਨਾਦੀਨਿ ਕਤ੍વਾ વਾ ਕਾਰੇਤ੍વਾ વਾ ਭੁਞ੍ਜਨ੍ਤਿਯਾ ਦੁਕ੍ਕਟਂ, ਅਞ੍ਞਾਯ વਿਞ੍ਞਤ੍ਤਿਯਾ ਲਦ੍ਧਂ ਪਨ ਸਯਂ ਭਜ੍ਜਨਾਦੀਨਿ ਕਤ੍વਾਪਿ ਕਾਰੇਤ੍વਾਪਿ ਭੁਞ੍ਜਨ੍ਤਿਯਾ ਦੁਕ੍ਕਟਮੇવ। ਆਬਾਧੇ ਸਤਿ ਸੇਦਕਮ੍ਮਾਦੀਨਂ ਅਤ੍ਥਾਯ વਿਞ੍ਞਾਪੇਨ੍ਤਿਯਾ, ਅવਿਞ੍ਞਤ੍ਤਿਯਾ ਲਬ੍ਭਮਾਨਂ ਨવਕਮ੍ਮਤ੍ਥਾਯ ਸਮ੍ਪਟਿਚ੍ਛਨ੍ਤਿਯਾ, ਞਾਤਕਪ੍ਪવਾਰਿਤਟ੍ਠਾਨੇ ਮੁਗ੍ਗਮਾਸਾਦਿਅਪਰਣ੍ਣਂ વਿਞ੍ਞਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਸਤ੍ਤਨ੍ਨਂ ਧਞ੍ਞਾਨਂ ਅਞ੍ਞਤਰਸ੍ਸ વਿਞ੍ਞਾਪਨਂ વਾ વਿਞ੍ਞਾਪਾਪਨਂ વਾ, ਪਟਿਲਾਭੋ, ਭਜ੍ਜਨਾਦੀਨਿ ਕਤ੍વਾ વਾ ਕਾਰੇਤ੍વਾ વਾ ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਅਦ੍ਧਾਨਮਗ੍ਗਸਿਕ੍ਖਾਪਦਸਦਿਸਾਨੀਤਿ।
Sāvatthiyaṃ sambahulā bhikkhuniyo ārabbha āmakadhaññaṃ viññāpanavatthusmiṃ paññattaṃ, sayaṃ vā aññāya vā aviññattiyā laddhaṃ bhajjanādīni katvā vā kāretvā vā bhuñjantiyā dukkaṭaṃ, aññāya viññattiyā laddhaṃ pana sayaṃ bhajjanādīni katvāpi kāretvāpi bhuñjantiyā dukkaṭameva. Ābādhe sati sedakammādīnaṃ atthāya viññāpentiyā, aviññattiyā labbhamānaṃ navakammatthāya sampaṭicchantiyā, ñātakappavāritaṭṭhāne muggamāsādiaparaṇṇaṃ viññāpentiyā, ummattikādīnañca anāpatti. Sattannaṃ dhaññānaṃ aññatarassa viññāpanaṃ vā viññāpāpanaṃ vā, paṭilābho, bhajjanādīni katvā vā kāretvā vā ajjhoharaṇanti imānettha tīṇi aṅgāni. Samuṭṭhānādīni addhānamaggasikkhāpadasadisānīti.
ਆਮਕਧਞ੍ਞਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Āmakadhaññasikkhāpadavaṇṇanā niṭṭhitā.
੮. ਪਠਮਉਚ੍ਚਾਰਛਡ੍ਡਨਸਿਕ੍ਖਾਪਦવਣ੍ਣਨਾ
8. Paṭhamauccārachaḍḍanasikkhāpadavaṇṇanā
ਅਟ੍ਠਮੇ ਸਙ੍ਕਾਰਨ੍ਤਿ ਕਚવਰਂ। વਿਘਾਸਨ੍ਤਿ ਯਂਕਿਞ੍ਚਿ ਪਰਿਭੁਤ੍ਤਾવਸੇਸਂ ਉਚ੍ਛਿਟ੍ਠੋਦਕਮ੍ਪਿ ਦਨ੍ਤਕਟ੍ਠਮ੍ਪਿ, ਅਟ੍ਠਿਕਚਲਕੇਸੁ ਪਨ વਤ੍ਤਬ੍ਬਮੇવ ਨਤ੍ਥਿ। ਤਿਰੋਕੁਟ੍ਟੇ વਾ ਤਿਰੋਪਾਕਾਰੇ વਾਤਿ ਯਸ੍ਸਕਸ੍ਸਚਿ ਕੁਟ੍ਟਸ੍ਸ વਾ ਪਾਕਾਰਸ੍ਸ વਾ ਪਰਤੋ। ਛਡ੍ਡੇਯ੍ਯ વਾ ਛਡ੍ਡਾਪੇਯ੍ਯ વਾਤਿ ਸਬ੍ਬਾਨਿਪੇਤਾਨਿ ਏਕਤੋ ਛਡ੍ਡੇਨ੍ਤਿਯਾ ਏਕਪ੍ਪਯੋਗੇ ਏਕਾਪਤ੍ਤਿ, ਸਕਿਂ ਆਣਤ੍ਤਿਯਾ ਬਹੁਕੇਪਿ ਛਡ੍ਡਿਤੇ ਏਕਾવ।
Aṭṭhame saṅkāranti kacavaraṃ. Vighāsanti yaṃkiñci paribhuttāvasesaṃ ucchiṭṭhodakampi dantakaṭṭhampi, aṭṭhikacalakesu pana vattabbameva natthi. Tirokuṭṭe vā tiropākāre vāti yassakassaci kuṭṭassa vā pākārassa vā parato. Chaḍḍeyya vā chaḍḍāpeyya vāti sabbānipetāni ekato chaḍḍentiyā ekappayoge ekāpatti, sakiṃ āṇattiyā bahukepi chaḍḍite ekāva.
ਸਾવਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਉਚ੍ਚਾਰਂ ਤਿਰੋਕੁਟ੍ਟੇ ਛਡ੍ਡਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਂ, ਭਿਕ੍ਖੁਸ੍ਸ ਦੁਕ੍ਕਟਂ , ਓਲੋਕੇਤ੍વਾ વਾ ਅવਲਞ੍ਜੇ વਾ ਛਡ੍ਡੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਉਚ੍ਚਾਰਾਦਿਭਾવੋ, ਅਨੋਲੋਕਨਂ, વਲਞ੍ਜਨਟ੍ਠਾਨਂ, ਤਿਰੋਕੁਟ੍ਟਤਿਰੋਪਾਕਾਰਤਾ, ਛਡ੍ਡਨਂ વਾ ਛਡ੍ਡਾਪਨਂ વਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ।
Sāvatthiyaṃ aññataraṃ bhikkhuniṃ ārabbha uccāraṃ tirokuṭṭe chaḍḍanavatthusmiṃ paññattaṃ, sāṇattikaṃ, bhikkhussa dukkaṭaṃ , oloketvā vā avalañje vā chaḍḍentiyā, ummattikādīnañca anāpatti. Uccārādibhāvo, anolokanaṃ, valañjanaṭṭhānaṃ, tirokuṭṭatiropākāratā, chaḍḍanaṃ vā chaḍḍāpanaṃ vāti imānettha pañca aṅgāni. Samuṭṭhānādīni sañcarittasadisāni, idaṃ pana kiriyākiriyanti.
ਪਠਮਉਚ੍ਚਾਰਛਡ੍ਡਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Paṭhamauccārachaḍḍanasikkhāpadavaṇṇanā niṭṭhitā.
੯. ਦੁਤਿਯਉਚ੍ਚਾਰਛਡ੍ਡਨਸਿਕ੍ਖਾਪਦવਣ੍ਣਨਾ
9. Dutiyauccārachaḍḍanasikkhāpadavaṇṇanā
ਨવਮੇ ਹਰਿਤੇਤਿ ਖੇਤ੍ਤੇ વਾ ਨਾਲ਼ਿਕੇਰਾਦਿਆਰਾਮੇ વਾ ਯਤ੍ਥਕਤ੍ਥਚਿ ਰੋਪਿਮਹਰਿਤਟ੍ਠਾਨੇ। ਤਾਨਿ વਤ੍ਥੂਨਿ ਛਡ੍ਡੇਨ੍ਤਿਯਾ વਾ ਛਡ੍ਡਾਪੇਨ੍ਤਿਯਾ વਾ ਪੁਰਿਮਨਯੇਨੇવ ਆਪਤ੍ਤਿ, ਤਾਦਿਸੇ ਠਾਨੇ ਨਿਸੀਦਿਤ੍વਾ ਅਨ੍ਤਮਸੋ ਉਦਕਂ ਪਿવਿਤ੍વਾ ਮਤ੍ਥਕਚ੍ਛਿਨ੍ਨਂ ਨਾਲ਼ਿਕੇਰਮ੍ਪਿ ਛਡ੍ਡੇਨ੍ਤਿਯਾ ਆਪਤ੍ਤਿਯੇવ।
Navame hariteti khette vā nāḷikerādiārāme vā yatthakatthaci ropimaharitaṭṭhāne. Tāni vatthūni chaḍḍentiyā vā chaḍḍāpentiyā vā purimanayeneva āpatti, tādise ṭhāne nisīditvā antamaso udakaṃ pivitvā matthakacchinnaṃ nāḷikerampi chaḍḍentiyā āpattiyeva.
ਸਾવਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਉਚ੍ਚਾਰਾਦੀਨਿ ਹਰਿਤੇ ਛਡ੍ਡਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਭਿਕ੍ਖੁਨੋ ਦੁਕ੍ਕਟਂ, ਭਿਕ੍ਖੁਨਿਯਾਪਿ ਨਿਕ੍ਖਿਤ੍ਤਬੀਜੇ ਖੇਤ੍ਤੇ ਯਾવ ਅਙ੍ਕੁਰੋ ਨ ਉਟ੍ਠਹਤਿ, ਤਾવ ਦੁਕ੍ਕਟਂ, ਅਹਰਿਤੇ ਦ੍વਿਕਦੁਕ੍ਕਟਂ। ਤਸ੍ਮਿਂ ਪਨ ਅਹਰਿਤਸਞ੍ਞਾਯ ਛਡ੍ਡਿਤਖੇਤ੍ਤੇ વਾ, ਸਾਮਿਕੇ ਅਪਲੋਕੇਤ੍વਾ વਾ ਛਡ੍ਡੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਸੇਸਂ ਅਟ੍ਠਮਸਦਿਸਮੇવਾਤਿ।
Sāvatthiyaṃ sambahulā bhikkhuniyo ārabbha uccārādīni harite chaḍḍanavatthusmiṃ paññattaṃ, sāṇattikaṃ, tikapācittiyaṃ, bhikkhuno dukkaṭaṃ, bhikkhuniyāpi nikkhittabīje khette yāva aṅkuro na uṭṭhahati, tāva dukkaṭaṃ, aharite dvikadukkaṭaṃ. Tasmiṃ pana aharitasaññāya chaḍḍitakhette vā, sāmike apaloketvā vā chaḍḍentiyā, ummattikādīnañca anāpatti. Sesaṃ aṭṭhamasadisamevāti.
ਦੁਤਿਯਉਚ੍ਚਾਰਛਡ੍ਡਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Dutiyauccārachaḍḍanasikkhāpadavaṇṇanā niṭṭhitā.
੧੦. ਨਚ੍ਚਗੀਤਸਿਕ੍ਖਾਪਦવਣ੍ਣਨਾ
10. Naccagītasikkhāpadavaṇṇanā
ਦਸਮੇ ਨਚ੍ਚਨ੍ਤਿ ਅਨ੍ਤਮਸੋ ਮੋਰਨਚ੍ਚਮ੍ਪਿ। ਗੀਤਨ੍ਤਿ ਅਨ੍ਤਮਸੋ ਧਮ੍ਮਭਾਣਕਗੀਤਮ੍ਪਿ। વਾਦਿਤਨ੍ਤਿ ਅਨ੍ਤਮਸੋ ਉਦਕਭੇਰਿવਾਦਿਤਮ੍ਪਿ। ਦਸ੍ਸਨਾਯਾਤਿ ਏਤੇਸੁ ਯਂਕਿਞ੍ਚਿ ਦਸ੍ਸਨਾਯ ਗਚ੍ਛਨ੍ਤਿਯਾ ਪਦੇ ਪਦੇ ਦੁਕ੍ਕਟਂ, ਯਤ੍ਥ ਠਿਤਾ ਪਸ੍ਸਤਿ વਾ ਸੁਣਾਤਿ વਾ, ਏਕਪ੍ਪਯੋਗੇ ਏਕਾਪਤ੍ਤਿ, ਤਂ ਤਂ ਦਿਸਂ ਓਲੋਕੇਨ੍ਤਿਯਾ ਪਯੋਗੇ ਪਯੋਗੇ ਆਪਤ੍ਤਿ।
Dasame naccanti antamaso moranaccampi. Gītanti antamaso dhammabhāṇakagītampi. Vāditanti antamaso udakabherivāditampi. Dassanāyāti etesu yaṃkiñci dassanāya gacchantiyā pade pade dukkaṭaṃ, yattha ṭhitā passati vā suṇāti vā, ekappayoge ekāpatti, taṃ taṃ disaṃ olokentiyā payoge payoge āpatti.
ਰਾਜਗਹੇ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਨਚ੍ਚਾਦੀਨਿ ਦਸ੍ਸਨਾਯ ਗਮਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਯਂ ਤਾਨਿ વਤ੍ਥੂਨਿ ਕਰੋਨ੍ਤਿਯਾ, ਅਞ੍ਞਂ વਾ ਆਣਾਪੇਨ੍ਤਿਯਾ, ‘‘ਚੇਤਿਯਸ੍ਸ ਉਪਹਾਰਂ ਦੇਥਾ’’ਤਿ ਈਦਿਸੇਨ ਪਰਿਯਾਯੇਨ વਾ ਭਣਨ੍ਤਿਯਾ, ‘‘ਚੇਤਿਯਸ੍ਸ ਉਪਹਾਰਂ ਕਰੋਮਾ’’ਤਿ વਾ વੁਤ੍ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਨ੍ਤਿਯਾ ਚ ਪਾਚਿਤ੍ਤਿਯਮੇવਾਤਿ ਸਬ੍ਬਅਟ੍ਠਕਥਾਸੁ (ਪਾਚਿ॰ ਅਟ੍ਠ॰ ੮੩੫-੮੩੭) વੁਤ੍ਤਂ, ਭਿਕ੍ਖੁਨੋ ਸਬ੍ਬਤ੍ਥ ਦੁਕ੍ਕਟਂ। ‘‘ਤੁਮ੍ਹਾਕਂ ਚੇਤਿਯਸ੍ਸ ਉਪਟ੍ਠਾਨਂ ਕਰੋਮਾ’’ਤਿ વੁਤ੍ਤੇ ਪਨ ‘‘ਉਪਟ੍ਠਾਨਕਰਣਂ ਨਾਮ ਸੁਨ੍ਦਰ’’ਨ੍ਤਿ ਈਦਿਸਂ ਪਰਿਯਾਯਂ ਭਣਨ੍ਤਿਯਾ, ਆਰਾਮੇ ਠਤ੍વਾ ਪਸ੍ਸਨ੍ਤਿਯਾ વਾ ਸੁਣਨ੍ਤਿਯਾ વਾ, ਤਥਾ ਅਤ੍ਤਨੋ ਠਿਤੋਕਾਸਂ ਆਗਨ੍ਤ੍વਾ ਪਯੋਜਿਤਂ ਪਟਿਪਥਂ ਗਚ੍ਛਨ੍ਤਿਯਾ ਸਮ੍ਮੁਖੀਭੂਤਂ ਸਲਾਕਭਤ੍ਤਾਦਿਕੇ ਸਤਿ ਕਰਣੀਯੇ ਗਨ੍ਤ੍વਾ, ਆਪਦਾਸੁ વਾ ਸਮਜ੍ਜਟ੍ਠਾਨਂ ਪવਿਸਿਤ੍વਾਪਿ ਪਸ੍ਸਨ੍ਤਿਯਾ વਾ ਸੁਣਨ੍ਤਿਯਾ વਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਨਚ੍ਚਾਦੀਨਂ ਅਞ੍ਞਤਰਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਗਮਨਂ, ਦਸ੍ਸਨਂ વਾ ਸવਨਂ વਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨਿ, ਇਦਂ ਪਨ ਲੋਕવਜ੍ਜਂ, ਅਕੁਸਲਚਿਤ੍ਤਂ, ਤਿવੇਦਨਨ੍ਤਿ।
Rājagahe chabbaggiyā bhikkhuniyo ārabbha naccādīni dassanāya gamanavatthusmiṃ paññattaṃ, sayaṃ tāni vatthūni karontiyā, aññaṃ vā āṇāpentiyā, ‘‘cetiyassa upahāraṃ dethā’’ti īdisena pariyāyena vā bhaṇantiyā, ‘‘cetiyassa upahāraṃ karomā’’ti vā vutte ‘‘sādhū’’ti sampaṭicchantiyā ca pācittiyamevāti sabbaaṭṭhakathāsu (pāci. aṭṭha. 835-837) vuttaṃ, bhikkhuno sabbattha dukkaṭaṃ. ‘‘Tumhākaṃ cetiyassa upaṭṭhānaṃ karomā’’ti vutte pana ‘‘upaṭṭhānakaraṇaṃ nāma sundara’’nti īdisaṃ pariyāyaṃ bhaṇantiyā, ārāme ṭhatvā passantiyā vā suṇantiyā vā, tathā attano ṭhitokāsaṃ āgantvā payojitaṃ paṭipathaṃ gacchantiyā sammukhībhūtaṃ salākabhattādike sati karaṇīye gantvā, āpadāsu vā samajjaṭṭhānaṃ pavisitvāpi passantiyā vā suṇantiyā vā, ummattikādīnañca anāpatti. Naccādīnaṃ aññataratā, aññatra anuññātakāraṇā gamanaṃ, dassanaṃ vā savanaṃ vāti imānettha tīṇi aṅgāni. Samuṭṭhānādīni eḷakalomasadisāni, idaṃ pana lokavajjaṃ, akusalacittaṃ, tivedananti.
ਨਚ੍ਚਗੀਤਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Naccagītasikkhāpadavaṇṇanā niṭṭhitā.
ਲਸੁਣવਗ੍ਗੋ ਪਠਮੋ।
Lasuṇavaggo paṭhamo.
