| Library / Tipiṭaka / तिपिटक • Tipiṭaka / अपदानपाळि • Apadānapāḷi |
७. लसुणदायकत्थेरअपदानं
7. Lasuṇadāyakattheraapadānaṃ
८९.
89.
‘‘हिमवन्तस्साविदूरे , तापसो आसहं तदा।
‘‘Himavantassāvidūre , tāpaso āsahaṃ tadā;
लसुणं उपजीवामि, लसुणं मय्हभोजनं॥
Lasuṇaṃ upajīvāmi, lasuṇaṃ mayhabhojanaṃ.
९०.
90.
‘‘खारियो पूरयित्वान, सङ्घाराममगच्छहं।
‘‘Khāriyo pūrayitvāna, saṅghārāmamagacchahaṃ;
हट्ठो हट्ठेन चित्तेन, सङ्घस्स लसुणं अदं॥
Haṭṭho haṭṭhena cittena, saṅghassa lasuṇaṃ adaṃ.
९१.
91.
‘‘विपस्सिस्स नरग्गस्स, सासने निरतस्सहं।
‘‘Vipassissa naraggassa, sāsane niratassahaṃ;
सङ्घस्स लसुणं दत्वा, कप्पं सग्गम्हि मोदहं॥
Saṅghassa lasuṇaṃ datvā, kappaṃ saggamhi modahaṃ.
९२.
92.
‘‘एकनवुतितो कप्पे, लसुणं यमदं तदा।
‘‘Ekanavutito kappe, lasuṇaṃ yamadaṃ tadā;
दुग्गतिं नाभिजानामि, लसुणस्स इदं फलं॥
Duggatiṃ nābhijānāmi, lasuṇassa idaṃ phalaṃ.
९३.
93.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा लसुणदायको थेरो इमा गाथायो अभासित्थाति।
Itthaṃ sudaṃ āyasmā lasuṇadāyako thero imā gāthāyo abhāsitthāti;
लसुणदायकत्थेरस्सापदानं सत्तमं।
Lasuṇadāyakattherassāpadānaṃ sattamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ७. लसुणदायकत्थेरअपदानवण्णना • 7. Lasuṇadāyakattheraapadānavaṇṇanā
