| Library / Tipiṭaka / திபிடக • Tipiṭaka / நெத்திவிபா⁴வினீ • Nettivibhāvinī |
5. லக்க²ணஹாரஸம்பாதவிபா⁴வனா
5. Lakkhaṇahārasampātavibhāvanā
67. யேன யேன பத³ட்டா²னஹாரஸம்பாதேன ஸுத்தப்பதே³ஸத்தா²னி பத³ட்டா²னானி ஆசரியேன நித்³தா⁴ரிதானி, அம்ஹேஹி ச ஞாதானி, ஸோ பத³ட்டா²னஹாரஸம்பாதோ பரிபுண்ணோ, ‘‘கதமோ லக்க²ணஹாரஸம்பாதோ’’தி புச்சி²தப்³ப³த்தா ‘‘தத்த² கதமோ லக்க²ணோ ஹாரஸம்பாதோ’’திஆதி³ வுத்தங். தத்த² தேஸு தே³ஸனாஹாரஸம்பாதாதீ³ஸு ஸோளஸஸு ஹாரஸம்பாதேஸு கதமோ ஸங்வண்ணனாவிஸேஸோ லக்க²ணஹாரஸம்பாதோ நாமாதி புச்ச²தி.
67. Yena yena padaṭṭhānahārasampātena suttappadesatthāni padaṭṭhānāni ācariyena niddhāritāni, amhehi ca ñātāni, so padaṭṭhānahārasampāto paripuṇṇo, ‘‘katamo lakkhaṇahārasampāto’’ti pucchitabbattā ‘‘tattha katamo lakkhaṇo hārasampāto’’tiādi vuttaṃ. Tattha tesu desanāhārasampātādīsu soḷasasu hārasampātesu katamo saṃvaṇṇanāviseso lakkhaṇahārasampāto nāmāti pucchati.
‘‘கதமேஹி ஸுத்தத்தே²ஹி ஸமானலக்க²ணா கதமே த⁴ம்மா க³ஹிதா’’தி புச்சி²தப்³ப³த்தா ‘‘தஸ்மா’’திஆதி³ வுத்தங். ‘‘தஸ்மா ரக்கி²தசித்தஸ்ஸ, ஸம்மாஸங்கப்பகோ³சரோ’’தி ஸுத்தப்பதே³ஸேன வுத்தங் இத³ங் ரக்க²ணங் ஸதிந்த்³ரியங் க³ஹிதங், ஸதிந்த்³ரியே க³ஹிதே ஸத்³தா⁴தி³பஞ்சிந்த்³ரியானி க³ஹிதானி ப⁴வந்தி இந்த்³ரியட்டே²ன ஸமானலக்க²ணத்தா. ‘‘ஸம்மாதி³ட்டி²புரெக்கா²ரோ’’தி ஸுத்தப்பதே³ஸேன வுத்தா ஸம்மாதி³ட்டி² க³ஹிதா, ஸம்மாதி³ட்டி²யா க³ஹிதாய அரியோ அட்ட²ங்கி³கோ மக்³கோ³ க³ஹிதோ ப⁴வதி. தங் கிஸ்ஸ ஹேதூதி காரணங் புச்ச²தி. புச்சி²த்வா காரணமாஹ ‘‘ஸம்மாதி³ட்டி²தோ ஹீ’’திஆதி³னா. ஸம்மாதி³ட்டி²ஹேதுதோ ஸம்மாஸங்கப்போ ஹி யஸ்மா பப⁴வதி, தஸ்மா, ஸம்மாஸங்கப்பதோ ஸம்மாவாசா ஹி யஸ்மா பப⁴வதி, தஸ்மா, ஸம்மாவாசாதோ ஸம்மாகம்மந்தோ ஹி யஸ்மா பப⁴வதி, தஸ்மா, ஸம்மாகம்மந்ததோ ஸம்மாஆஜீவோ ஹி யஸ்மா பப⁴வதி, தஸ்மா, ஸம்மாஆஜீவதோ ஸம்மாவாயாமோ ஹி யஸ்மா பப⁴வதி, தஸ்மா, ஸம்மாவாயாமதோ ஸம்மாஸதிஹி யஸ்மா பப⁴வதி, தஸ்மா, ஸம்மாஸதிதோ ஸம்மாஸமாதி⁴ ஹி யஸ்மா பப⁴வதி, தஸ்மா, ஸம்மாஸமாதி⁴தோ ஸம்மாவிமுத்தி ஹி யஸ்மா பப⁴வதி, தஸ்மா, ஸம்மாவிமுத்திதோ ஸம்மாவிமுத்திஞாணத³ஸ்ஸனங் ஹி யஸ்மா பப⁴வதி, தஸ்மா, அரியோ அட்ட²ங்கி³கோ மக்³கோ³ க³ஹிதோ ப⁴வதீதி.
‘‘Katamehi suttatthehi samānalakkhaṇā katame dhammā gahitā’’ti pucchitabbattā ‘‘tasmā’’tiādi vuttaṃ. ‘‘Tasmā rakkhitacittassa, sammāsaṅkappagocaro’’ti suttappadesena vuttaṃ idaṃ rakkhaṇaṃ satindriyaṃ gahitaṃ, satindriye gahite saddhādipañcindriyāni gahitāni bhavanti indriyaṭṭhena samānalakkhaṇattā. ‘‘Sammādiṭṭhipurekkhāro’’ti suttappadesena vuttā sammādiṭṭhi gahitā, sammādiṭṭhiyā gahitāya ariyo aṭṭhaṅgiko maggo gahito bhavati. Taṃ kissa hetūti kāraṇaṃ pucchati. Pucchitvā kāraṇamāha ‘‘sammādiṭṭhito hī’’tiādinā. Sammādiṭṭhihetuto sammāsaṅkappo hi yasmā pabhavati, tasmā, sammāsaṅkappato sammāvācā hi yasmā pabhavati, tasmā, sammāvācāto sammākammanto hi yasmā pabhavati, tasmā, sammākammantato sammāājīvo hi yasmā pabhavati, tasmā, sammāājīvato sammāvāyāmo hi yasmā pabhavati, tasmā, sammāvāyāmato sammāsatihi yasmā pabhavati, tasmā, sammāsatito sammāsamādhi hi yasmā pabhavati, tasmā, sammāsamādhito sammāvimutti hi yasmā pabhavati, tasmā, sammāvimuttito sammāvimuttiñāṇadassanaṃ hi yasmā pabhavati, tasmā, ariyo aṭṭhaṅgiko maggo gahito bhavatīti.
‘‘எத்தகோவ லக்க²ணஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ லக்க²ணோ ஹாரஸம்பாதோ’’தி வுத்தங். யேன யேன ஸங்வண்ணனாவிஸேஸபூ⁴தேன லக்க²ணஹாரஸம்பாதேன ஸுத்தப்பதே³ஸத்தா² ஸமானலக்க²ணேன க³ஹிதா ப⁴வந்தி, ஸோ ஸோ ஸங்வண்ணனாவிஸேஸபூ⁴தோ லக்க²ணஹாரஸம்பாதோ நியுத்தோ யதா²ரஹங் நித்³தா⁴ரெத்வா யுஜ்ஜிதப்³போ³தி அத்தோ² க³ஹிதோதி.
‘‘Ettakova lakkhaṇahārasampāto paripuṇṇo’’ti vattabbattā ‘‘niyutto lakkhaṇo hārasampāto’’ti vuttaṃ. Yena yena saṃvaṇṇanāvisesabhūtena lakkhaṇahārasampātena suttappadesatthā samānalakkhaṇena gahitā bhavanti, so so saṃvaṇṇanāvisesabhūto lakkhaṇahārasampāto niyutto yathārahaṃ niddhāretvā yujjitabboti attho gahitoti.
இதி லக்க²ணஹாரஸம்பாதே ஸத்திப³லானுரூபா ரசிதா
Iti lakkhaṇahārasampāte sattibalānurūpā racitā
விபா⁴வனா நிட்டி²தா.
Vibhāvanā niṭṭhitā.
பண்டி³தேஹி பன…பே॰… க³ஹேதப்³போ³தி.
Paṇḍitehi pana…pe… gahetabboti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 5. லக்க²ணஹாரஸம்பாதோ • 5. Lakkhaṇahārasampāto
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 5. லக்க²ணஹாரஸம்பாதவண்ணனா • 5. Lakkhaṇahārasampātavaṇṇanā
