| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၂. ကူဋသုတ္တံ
2. Kūṭasuttaṃ
၁၂. ‘‘ပဉ္စိမာနိ , ဘိက္ခဝေ, သေခဗလာနိ။ ကတမာနိ ပဉ္စ? သဒ္ဓာဗလံ, ဟိရီဗလံ, ဩတ္တပ္ပဗလံ, ဝီရိယဗလံ, ပညာဗလံ – ဣမာနိ ခော, ဘိက္ခဝေ, ပဉ္စ သေခဗလာနိ။ ဣမေသံ ခော, ဘိက္ခဝေ, ပဉ္စန္နံ သေခဗလာနံ ဧတံ အဂ္ဂံ ဧတံ သင္ဂာဟိကံ ဧတံ သင္ဃာတနိယံ, ယဒိဒံ ပညာဗလံ။
12. ‘‘Pañcimāni , bhikkhave, sekhabalāni. Katamāni pañca? Saddhābalaṃ, hirībalaṃ, ottappabalaṃ, vīriyabalaṃ, paññābalaṃ – imāni kho, bhikkhave, pañca sekhabalāni. Imesaṃ kho, bhikkhave, pañcannaṃ sekhabalānaṃ etaṃ aggaṃ etaṃ saṅgāhikaṃ etaṃ saṅghātaniyaṃ, yadidaṃ paññābalaṃ.
‘‘သေယ္ယထာပိ , ဘိက္ခဝေ , ကူဋာဂာရသ္သ ဧတံ အဂ္ဂံ ဧတံ သင္ဂာဟိကံ ဧတံ သင္ဃာတနိယံ, ယဒိဒံ ကူဋံ။ ဧဝမေဝံ ခော, ဘိက္ခဝေ, ဣမေသံ ပဉ္စန္နံ သေခဗလာနံ ဧတံ အဂ္ဂံ ဧတံ သင္ဂာဟိကံ ဧတံ သင္ဃာတနိယံ, ယဒိဒံ ပညာဗလံ။
‘‘Seyyathāpi , bhikkhave , kūṭāgārassa etaṃ aggaṃ etaṃ saṅgāhikaṃ etaṃ saṅghātaniyaṃ, yadidaṃ kūṭaṃ. Evamevaṃ kho, bhikkhave, imesaṃ pañcannaṃ sekhabalānaṃ etaṃ aggaṃ etaṃ saṅgāhikaṃ etaṃ saṅghātaniyaṃ, yadidaṃ paññābalaṃ.
‘‘တသ္မာတိဟ, ဘိက္ခဝေ, ဧဝံ သိက္ခိတဗ္ဗံ – ‘သဒ္ဓာဗလေန သမန္နာဂတာ ဘဝိသ္သာမ သေခဗလေန, ဟိရီဗလေန။ ဩတ္တပ္ပဗလေန။ ဝီရိယဗလေန။ ပညာဗလေန သမန္နာဂတာ ဘဝိသ္သာမ သေခဗလေနာ’တိ။ ဧဝဉ္ဟိ ဝော, ဘိက္ခဝေ, သိက္ခိတဗ္ဗ’’န္တိ။ ဒုတိယံ။
‘‘Tasmātiha, bhikkhave, evaṃ sikkhitabbaṃ – ‘saddhābalena samannāgatā bhavissāma sekhabalena, hirībalena… ottappabalena… vīriyabalena… paññābalena samannāgatā bhavissāma sekhabalenā’ti. Evañhi vo, bhikkhave, sikkhitabba’’nti. Dutiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၂. ကူဋသုတ္တဝဏ္ဏနာ • 2. Kūṭasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. မဟာသုပိနသုတ္တဝဏ္ဏနာ • 6. Mahāsupinasuttavaṇṇanā
