| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१९. कुटजपुप्फियवग्गो
19. Kuṭajapupphiyavaggo
१. कुटजपुप्फियत्थेरअपदानं
1. Kuṭajapupphiyattheraapadānaṃ
१.
1.
‘‘सुवण्णवण्णं सम्बुद्धं, सतरंसिंव उग्गतं।
‘‘Suvaṇṇavaṇṇaṃ sambuddhaṃ, sataraṃsiṃva uggataṃ;
दिसं अनुविलोकेन्तं, गच्छन्तं अनिलञ्जसे॥
Disaṃ anuvilokentaṃ, gacchantaṃ anilañjase.
२.
2.
‘‘कुटजं पुप्फितं दिस्वा, संवित्थतसमोत्थतं।
‘‘Kuṭajaṃ pupphitaṃ disvā, saṃvitthatasamotthataṃ;
रुक्खतो ओचिनित्वान, फुस्सस्स अभिरोपयिं॥
Rukkhato ocinitvāna, phussassa abhiropayiṃ.
३.
3.
‘‘द्वेनवुते इतो कप्पे, यं पुप्फमभिरोपयिं।
‘‘Dvenavute ito kappe, yaṃ pupphamabhiropayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
४.
4.
‘‘इतो सत्तरसे कप्पे, तयो आसुं सुपुप्फिता।
‘‘Ito sattarase kappe, tayo āsuṃ supupphitā;
सत्तरतनसम्पन्ना, चक्कवत्ती महब्बला॥
Sattaratanasampannā, cakkavattī mahabbalā.
५.
5.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा कुटजपुप्फियो थेरो इमा गाथायो अभासित्थाति।
Itthaṃ sudaṃ āyasmā kuṭajapupphiyo thero imā gāthāyo abhāsitthāti.
कुटजपुप्फियत्थेरस्सापदानं पठमं।
Kuṭajapupphiyattherassāpadānaṃ paṭhamaṃ.
