| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၄. ကူဋာဂာရသုတ္တံ
4. Kūṭāgārasuttaṃ
၁၁၁၄. ‘‘ယော ဟိ, ဘိက္ခဝေ 1, ဧဝံ ဝဒေယ္ယ – ‘အဟံ ဒုက္ခံ အရိယသစ္စံ ယထာဘူတံ အနဘိသမေစ္စ။ပေ.။ ဒုက္ခနိရောဓဂာမိနိံ ပဋိပဒံ အရိယသစ္စံ ယထာဘူတံ အနဘိသမေစ္စ သမ္မာ ဒုက္ခသ္သန္တံ ကရိသ္သာမီ’တိ – နေတံ ဌာနံ ဝိဇ္ဇတိ။
1114. ‘‘Yo hi, bhikkhave 2, evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘သေယ္ယထာပိ , ဘိက္ခဝေ, ယော ဧဝံ ဝဒေယ္ယ – ‘အဟံ ကူဋာဂာရသ္သ ဟေဋ္ဌိမံ ဃရံ အကရိတ္ဝာ ဥပရိမံ ဃရံ အာရောပေသ္သာမီ’တိ – နေတံ ဌာနံ ဝိဇ္ဇတိ; ဧဝမေဝ ခော, ဘိက္ခဝေ, ယော ဧဝံ ဝဒေယ္ယ – ‘အဟံ ဒုက္ခံ အရိယသစ္စံ ယထာဘူတံ အနဘိသမေစ္စ။ပေ.။ ဒုက္ခနိရောဓဂာမိနိံ ပဋိပဒံ အရိယသစ္စံ ယထာဘူတံ အနဘိသမေစ္စ သမ္မာ ဒုက္ခသ္သန္တံ ကရိသ္သာမီ’တိ – နေတံ ဌာနံ ဝိဇ္ဇတိ။
‘‘Seyyathāpi , bhikkhave, yo evaṃ vadeyya – ‘ahaṃ kūṭāgārassa heṭṭhimaṃ gharaṃ akaritvā uparimaṃ gharaṃ āropessāmī’ti – netaṃ ṭhānaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘ယော စ ခော, ဘိက္ခဝေ, ဧဝံ ဝဒေယ္ယ – ‘အဟံ ဒုက္ခံ အရိယသစ္စံ ယထာဘူတံ အဘိသမေစ္စ။ပေ.။ ဒုက္ခနိရောဓဂာမိနိံ ပဋိပဒံ အရိယသစ္စံ ယထာဘူတံ အဘိသမေစ္စ သမ္မာ ဒုက္ခသ္သန္တံ ကရိသ္သာမီ’တိ – ဌာနမေတံ ဝိဇ္ဇတိ။
‘‘Yo ca kho, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘သေယ္ယထာပိ, ဘိက္ခဝေ, ယော ဧဝံ ဝဒေယ္ယ – ‘အဟံ ကူဋာဂာရသ္သ ဟေဋ္ဌိမံ ဃရံ ကရိတ္ဝာ ဥပရိမံ ဃရံ အာရောပေသ္သာမီ’တိ – ဌာနမေတံ ဝိဇ္ဇတိ; ဧဝမေဝ ခော , ဘိက္ခဝေ, ယော ဧဝံ ဝဒေယ္ယ – ‘အဟံ ဒုက္ခံ အရိယသစ္စံ ယထာဘူတံ အဘိသမေစ္စ။ပေ.။ ဒုက္ခနိရောဓဂာမိနိံ ပဋိပဒံ အရိယသစ္စံ ယထာဘူတံ အဘိသမေစ္စ သမ္မာ ဒုက္ခသ္သန္တံ ကရိသ္သာမီ’တိ – ဌာနမေတံ ဝိဇ္ဇတိ။
‘‘Seyyathāpi, bhikkhave, yo evaṃ vadeyya – ‘ahaṃ kūṭāgārassa heṭṭhimaṃ gharaṃ karitvā uparimaṃ gharaṃ āropessāmī’ti – ṭhānametaṃ vijjati; evameva kho , bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘တသ္မာတိဟ , ဘိက္ခဝေ, ‘ဣဒံ ဒုက္ခ’န္တိ ယောဂော ကရဏီယော။ပေ.။ ‘အယံ ဒုက္ခနိရောဓဂာမိနီ ပဋိပဒာ’တိ ယောဂော ကရဏီယော’’တိ။ စတုတ္ထံ။
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Catutthaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. ကူဋာဂာရသုတ္တဝဏ္ဏနာ • 4. Kūṭāgārasuttavaṇṇanā
