| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၆. ကုသုမာသနိယတ္ထေရအပဒာနဝဏ္ဏနာ
6. Kusumāsaniyattheraapadānavaṇṇanā
နဂရေ ဓညဝတိယာတိအာဒိကံ အာယသ္မတော ကုသုမာသနိယတ္ထေရသ္သ အပဒာနံ။ အယမ္ပိ ပုရိမဇိနဝရေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ ဗ္ရာဟ္မဏကုလေ နိဗ္ဗတ္တော ဝိညုတံ ပတ္တော မဟဒ္ဓနော မဟာဘောဂော တိဏ္ဏံ ဝေဒာနံ ပာရံ ဂတော ဗ္ရာဟ္မဏသိပ္ပေသု ကောဋိပ္ပတ္တော သကပရသမယကုသလော မာတာပိတရော ပူဇေတုကာမော ပဉ္စ ဥပ္ပလကလာပေ အတ္တနော သမီပေ ဌပေတ္ဝာ နိသိန္နော ဘိက္ခုသင္ဃပရိဝုတံ ဝိပသ္သိံ ဘဂဝန္တံ အာဂစ္ဆန္တံ ဒိသ္ဝာ နီလပီတာဒိဃနဗုဒ္ဓရသ္မိယော စ ဒိသ္ဝာ ပသန္နမာနသော အာသနံ ပညာပေတ္ဝာ တတ္ထ တာနိ ပုပ္ဖာနိ သန္ထရိတ္ဝာ ဘဂဝန္တံ တတ္ထ နိသီဒာပေတ္ဝာ သကဃရေ မာတု အတ္ထာယ ပဋိယတ္တာနိ သဗ္ဗာနိ ခာဒနီယဘောဇနီယာနိ ဂဟေတ္ဝာ သပရိဝာရံ ဘဂဝန္တံ သဟတ္ထေန သန္တပ္ပေန္တော ဘောဇေသိ။ ဘောဇနာဝသာနေ ဧကံ ဥပ္ပလဟတ္ထံ အဒာသိ။ တေန သောမနသ္သဇာတော ပတ္ထနံ အကာသိ။ ဘဂဝာပိ အနုမောဒနံ ကတ္ဝာ ပကာမိ။ သော တေန ပုညေန ဒေဝမနုသ္သေသု ဒ္ဝေ သမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ သာဝတ္ထိယံ ဝိဘဝသမ္ပန္နေ ဧကသ္မိံ ကုလေ နိဗ္ဗတ္တော ဝိညုတံ ပတ္တော ဘောဂယသေဟိ ဝဍ္ဎိတော ကာမေသု အာဒီနဝံ ဒိသ္ဝာ ဃရာဝာသံ ပဟာယ ပဗ္ဗဇိတော နစိရသ္သေဝ အရဟာ အဟောသိ။
Nagare dhaññavatiyātiādikaṃ āyasmato kusumāsaniyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle brāhmaṇakule nibbatto viññutaṃ patto mahaddhano mahābhogo tiṇṇaṃ vedānaṃ pāraṃ gato brāhmaṇasippesu koṭippatto sakaparasamayakusalo mātāpitaro pūjetukāmo pañca uppalakalāpe attano samīpe ṭhapetvā nisinno bhikkhusaṅghaparivutaṃ vipassiṃ bhagavantaṃ āgacchantaṃ disvā nīlapītādighanabuddharasmiyo ca disvā pasannamānaso āsanaṃ paññāpetvā tattha tāni pupphāni santharitvā bhagavantaṃ tattha nisīdāpetvā sakaghare mātu atthāya paṭiyattāni sabbāni khādanīyabhojanīyāni gahetvā saparivāraṃ bhagavantaṃ sahatthena santappento bhojesi. Bhojanāvasāne ekaṃ uppalahatthaṃ adāsi. Tena somanassajāto patthanaṃ akāsi. Bhagavāpi anumodanaṃ katvā pakāmi. So tena puññena devamanussesu dve sampattiyo anubhavitvā imasmiṃ buddhuppāde sāvatthiyaṃ vibhavasampanne ekasmiṃ kule nibbatto viññutaṃ patto bhogayasehi vaḍḍhito kāmesu ādīnavaṃ disvā gharāvāsaṃ pahāya pabbajito nacirasseva arahā ahosi.
၆၅. သော အပရဘာဂေ ပုဗ္ဗေ ကတကုသလံ ပုဗ္ဗေနိဝာသဉာဏေန သရိတ္ဝာ သောမနသ္သပ္ပတ္တော ပုဗ္ဗစရိတာပဒာနံ ပကာသေန္တော နဂရေ ဓညဝတိယာတိအာဒိမာဟ။ ဓညာနံ ပုညဝန္တာနံ ခတ္တိယဗ္ရာဟ္မဏဂဟပတိမဟာသာလာနံ အနေကေသံ ကုလာနံ အာကရတ္တာ ဓညဝတီ, အထ ဝာ မုတ္တာမဏိအာဒိသတ္တရတနာနံ သတ္တဝိဓဓညာနံ ဥပဘောဂပရိဘောဂာနံ အာကရတ္တာ ဓညဝတီ, အထ ဝာ ဓညာနံ ဗုဒ္ဓပစ္စေကဗုဒ္ဓခီဏာသဝာနံ ဝသနဋ္ဌာနံ အာရာမဝိဟာရာဒီနံ အာကရတ္တာ ဓညဝတီ, တသ္သာ ဓညဝတိယာ။ နဂရန္တိ ပတ္ထေန္တိ ဧတ္ထ ဥပဘောဂပရိဘောဂတ္ထိကာ ဇနာတိ နဂရံ, န ဂစ္ဆတီတိ ဝာ နဂံ, ရာဇယုဝရာဇမဟာမတ္တာဒီနံ ဝသနဋ္ဌာနံ။ နဂံ ရာတိ အာဒဒာတိ ဂဏ္ဟာတီတိ နဂရံ, ရာဇာဒီနံ ဝသနဋ္ဌာနသမူဟဘူတံ ပာကာရပရိခာဒီဟိ ပရိက္ခိတ္တံ ပရိစ္ဆိန္နဋ္ဌာနံ နဂရံ နာမာတိ အတ္ထော။ နဂရေ ယဒာ အဟံ ဝိပသ္သိသ္သ ဘဂဝတော သန္တိကေ ဗ္ယာကရဏံ အလဘိံ, တဒာ တသ္မိံ ဓညဝတိယာ နဂရေ ဗ္ရာဟ္မဏော အဟောသိန္တိ သမ္ဗန္ဓော။ သေသံ သဗ္ဗတ္ထ ဥတ္တာနမေဝာတိ။
65. So aparabhāge pubbe katakusalaṃ pubbenivāsañāṇena saritvā somanassappatto pubbacaritāpadānaṃ pakāsento nagare dhaññavatiyātiādimāha. Dhaññānaṃ puññavantānaṃ khattiyabrāhmaṇagahapatimahāsālānaṃ anekesaṃ kulānaṃ ākarattā dhaññavatī, atha vā muttāmaṇiādisattaratanānaṃ sattavidhadhaññānaṃ upabhogaparibhogānaṃ ākarattā dhaññavatī, atha vā dhaññānaṃ buddhapaccekabuddhakhīṇāsavānaṃ vasanaṭṭhānaṃ ārāmavihārādīnaṃ ākarattā dhaññavatī, tassā dhaññavatiyā. Nagaranti patthenti ettha upabhogaparibhogatthikā janāti nagaraṃ, na gacchatīti vā nagaṃ, rājayuvarājamahāmattādīnaṃ vasanaṭṭhānaṃ. Nagaṃ rāti ādadāti gaṇhātīti nagaraṃ, rājādīnaṃ vasanaṭṭhānasamūhabhūtaṃ pākāraparikhādīhi parikkhittaṃ paricchinnaṭṭhānaṃ nagaraṃ nāmāti attho. Nagare yadā ahaṃ vipassissa bhagavato santike byākaraṇaṃ alabhiṃ, tadā tasmiṃ dhaññavatiyā nagare brāhmaṇo ahosinti sambandho. Sesaṃ sabbattha uttānamevāti.
ကုသုမာသနိယတ္ထေရအပဒာနဝဏ္ဏနာ သမတ္တာ။
Kusumāsaniyattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၆. ကုသုမာသနိယတ္ထေရအပဒာနံ • 6. Kusumāsaniyattheraapadānaṃ
