| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. அக்கோஸவக்³கோ³
5. Akkosavaggo
4. குஸினாரஸுத்தவண்ணனா
4. Kusinārasuttavaṇṇanā
44. பஞ்சமஸ்ஸ சதுத்தே² குஸினாராயந்தி ஏவங்னாமகே நக³ரே. தே³வதானங் அத்தா²ய ப³லிங் ஹரந்தி எத்தா²தி ப³லிஹரணோ, தஸ்மிங் ப³லிஹரணே. அச்சி²த்³தே³ன அப்படிமங்ஸேனாதிஆதீ³ஸு யேன கேனசிதே³வ பஹடோ வா ஹோதி, வேஜ்ஜகம்மாதீ³னி வா கதானி, தஸ்ஸ காயஸமாசாரோ உபசிகாதீ³ஹி கா²யிததாலபண்ணங் விய சி²த்³தோ³ ச, படிமஸிதுங் யத்த² கத்த²சி க³ஹெத்வா ஆகட்³டி⁴துங் ஸக்குணெய்யதாய படிமங்ஸோ ச ஹோதி, விபரீதோ அச்சி²த்³தோ³ அப்படிமங்ஸோ நாம. வசீஸமாசாரோ பன முஸாவாத³ஓமஸவாத³பேஸுஞ்ஞஅமூலகானுத்³த⁴ங்ஸனாதீ³ஹி சி²த்³தோ³ ஸப்படிமங்ஸோ ச ஹோதி, விபரீதோ அச்சி²த்³தோ³ அப்படிமங்ஸோ. மெத்தங் நு கோ² மே சித்தந்தி பலிபோ³த⁴ங் சி²ந்தி³த்வா கம்மட்டா²னபா⁴வனானுயோகே³ன அதி⁴க³தங் மே மெத்தசித்தங். அனாகா⁴தந்தி ஆகா⁴தவிரஹிதங், விக்க²ம்ப⁴னேன விஹதாகா⁴தந்தி அத்தோ². கத்த² வுத்தந்தி இத³ங் ஸிக்கா²பத³ங் கிஸ்மிங் நக³ரே வுத்தங்.
44. Pañcamassa catutthe kusinārāyanti evaṃnāmake nagare. Devatānaṃ atthāya baliṃ haranti etthāti baliharaṇo, tasmiṃ baliharaṇe. Acchiddena appaṭimaṃsenātiādīsu yena kenacideva pahaṭo vā hoti, vejjakammādīni vā katāni, tassa kāyasamācāro upacikādīhi khāyitatālapaṇṇaṃ viya chiddo ca, paṭimasituṃ yattha katthaci gahetvā ākaḍḍhituṃ sakkuṇeyyatāya paṭimaṃso ca hoti, viparīto acchiddo appaṭimaṃso nāma. Vacīsamācāro pana musāvādaomasavādapesuññaamūlakānuddhaṃsanādīhi chiddo sappaṭimaṃso ca hoti, viparīto acchiddo appaṭimaṃso. Mettaṃ nu kho me cittanti palibodhaṃ chinditvā kammaṭṭhānabhāvanānuyogena adhigataṃ me mettacittaṃ. Anāghātanti āghātavirahitaṃ, vikkhambhanena vihatāghātanti attho. Kattha vuttanti idaṃ sikkhāpadaṃ kismiṃ nagare vuttaṃ.
காலேன வக்கா²மீதிஆதீ³ஸு ஏகோ ஏகங் ஓகாஸங் காரெத்வா சோதெ³ந்தோ காலேன வத³தி நாம. ஸங்க⁴மஜ்ஜே² வா க³ணமஜ்ஜே² வா ஸலாகக்³க³யாக³க்³க³விதக்கமாளகபி⁴க்கா²சாரமக்³க³ஆஸனஸாலாதீ³ஸு வா உபட்டா²கேஹி பரிவாரிதக்க²ணே வா சோதெ³ந்தோ அகாலேன வத³தி நாம. தச்சே²ன வத³ந்தோ பூ⁴தேன வத³தி நாம. ‘‘த³ஹரமஹல்லகபரிஸாவசரகபங்ஸுகூலிகத⁴ம்மகதி²கபதிரூபங் தவ இத³’’ந்தி வத³ந்தோ ப²ருஸேன வத³தி நாம. காரணனிஸ்ஸிதங் பன கத்வா, ‘‘ப⁴ந்தே மஹல்லகத்த², பரிஸாவசரகத்த², பங்ஸுகூலிகத்த², த⁴ம்மகதி²கத்த²பதிரூபங் தும்ஹாகமித³’’ந்தி வத³ந்தோ ஸண்ஹேன வத³தி நாம. காரணனிஸ்ஸிதங் கத்வா வத³ந்தோ அத்த²ஸங்ஹிதேன வத³தி நாம. மெத்தசித்தோ வக்கா²மி நோ தோ³ஸந்தரோதி மெத்தசித்தங் பச்சுபட்ட²பெத்வா வக்கா²மி, ந து³ட்ட²சித்தோ ஹுத்வா.
Kālena vakkhāmītiādīsu eko ekaṃ okāsaṃ kāretvā codento kālena vadati nāma. Saṅghamajjhe vā gaṇamajjhe vā salākaggayāgaggavitakkamāḷakabhikkhācāramaggaāsanasālādīsu vā upaṭṭhākehi parivāritakkhaṇe vā codento akālena vadati nāma. Tacchena vadanto bhūtena vadati nāma. ‘‘Daharamahallakaparisāvacarakapaṃsukūlikadhammakathikapatirūpaṃ tava ida’’nti vadanto pharusena vadati nāma. Kāraṇanissitaṃ pana katvā, ‘‘bhante mahallakattha, parisāvacarakattha, paṃsukūlikattha, dhammakathikatthapatirūpaṃ tumhākamida’’nti vadanto saṇhena vadati nāma. Kāraṇanissitaṃ katvā vadanto atthasaṃhitena vadati nāma. Mettacitto vakkhāmi no dosantaroti mettacittaṃ paccupaṭṭhapetvā vakkhāmi, na duṭṭhacitto hutvā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. குஸினாரஸுத்தங் • 4. Kusinārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-8. விவாத³ஸுத்தாதி³வண்ணனா • 1-8. Vivādasuttādivaṇṇanā
