| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৭. কুসলাকুসলসমৰিসমপঞ্হো
7. Kusalākusalasamavisamapañho
৭. ‘‘ভন্তে নাগসেন ‘কুসলকারিস্সপি অকুসলকারিস্সপি ৰিপাকো সমসমো, উদাহু কোচি ৰিসেসো অত্থী’তি? ‘‘অত্থি, মহারাজ, কুসলস্স চ অকুসলস্স চ ৰিসেসো, কুসলং, মহারাজ, সুখৰিপাকং সগ্গসংৰত্তনিকং, অকুসলং দুক্খৰিপাকং নিরযসংৰত্তনিক’’ন্তি।
7. ‘‘Bhante nāgasena ‘kusalakārissapi akusalakārissapi vipāko samasamo, udāhu koci viseso atthī’ti? ‘‘Atthi, mahārāja, kusalassa ca akusalassa ca viseso, kusalaṃ, mahārāja, sukhavipākaṃ saggasaṃvattanikaṃ, akusalaṃ dukkhavipākaṃ nirayasaṃvattanika’’nti.
‘‘ভন্তে নাগসেন, তুম্হে ভণথ ‘দেৰদত্তো একন্তকণ্হো, একন্তকণ্হেহি ধম্মেহি সমন্নাগতো, বোধিসত্তো একন্তসুক্কো, একন্তসুক্কেহি ধম্মেহি সমন্নাগতো’তি। পুন চ দেৰদত্তো ভৰে ভৰে যসেন চ পক্খেন চ বোধিসত্তেন সমসমো হোতি, কদাচি অধিকতরো ৰা। যদা দেৰদত্তো নগরে বারাণসিযং ব্রহ্মদত্তস্স রঞ্ঞো পুরোহিতপুত্তো অহোসি, তদা বোধিসত্তো ছৰকচণ্ডালো অহোসি ৰিজ্জাধরো, ৰিজ্জং পরিজপ্পিত্ৰা অকালে অম্বফলানি নিব্বত্তেসি, এত্থ তাৰ বোধিসত্তো দেৰদত্ততো জাতিযা নিহীনো যসেন চ নিহীনো।
‘‘Bhante nāgasena, tumhe bhaṇatha ‘devadatto ekantakaṇho, ekantakaṇhehi dhammehi samannāgato, bodhisatto ekantasukko, ekantasukkehi dhammehi samannāgato’ti. Puna ca devadatto bhave bhave yasena ca pakkhena ca bodhisattena samasamo hoti, kadāci adhikataro vā. Yadā devadatto nagare bārāṇasiyaṃ brahmadattassa rañño purohitaputto ahosi, tadā bodhisatto chavakacaṇḍālo ahosi vijjādharo, vijjaṃ parijappitvā akāle ambaphalāni nibbattesi, ettha tāva bodhisatto devadattato jātiyā nihīno yasena ca nihīno.
‘‘পুন চপরং যদা দেৰদত্তো রাজা অহোসি মহা মহীপতি সব্বকামসমঙ্গী, তদা বোধিসত্তো তস্সূপভোগো অহোসি হত্থিনাগো সব্বলক্খণসম্পন্নো, তস্স চারুগতিৰিলাসং অসহমানো রাজা ৰধমিচ্ছন্তো হত্থাচরিযং এৰমৰোচ ‘অসিক্খিতো তে, আচরিয, হত্থিনাগো, তস্স আকাসগমনং নাম কারণং করোহী’তি, তত্থপি তাৰ বোধিসত্তো দেৰদত্ততো জাতিযা নিহীনো লামকো তিরচ্ছানগতো।
‘‘Puna caparaṃ yadā devadatto rājā ahosi mahā mahīpati sabbakāmasamaṅgī, tadā bodhisatto tassūpabhogo ahosi hatthināgo sabbalakkhaṇasampanno, tassa cārugativilāsaṃ asahamāno rājā vadhamicchanto hatthācariyaṃ evamavoca ‘asikkhito te, ācariya, hatthināgo, tassa ākāsagamanaṃ nāma kāraṇaṃ karohī’ti, tatthapi tāva bodhisatto devadattato jātiyā nihīno lāmako tiracchānagato.
‘‘পুন চপরং যদা দেৰদত্তো মনুস্সো অহোসি পৰনে নট্ঠাযিকো, তদা বোধিসত্তো মহাপথৰী নাম মক্কটো অহোসি, এত্থপি তাৰ দিস্সতি ৰিসেসো মনুস্সস্স চ তিরচ্ছানগতস্স চ, তত্থপি তাৰ বোধিসত্তো দেৰদত্ততো জাতিযা নিহীনো।
‘‘Puna caparaṃ yadā devadatto manusso ahosi pavane naṭṭhāyiko, tadā bodhisatto mahāpathavī nāma makkaṭo ahosi, etthapi tāva dissati viseso manussassa ca tiracchānagatassa ca, tatthapi tāva bodhisatto devadattato jātiyā nihīno.
‘‘পুন চপরং যদা দেৰদত্তো মনুস্সো অহোসি সোণুত্তরো নাম নেসাদো বলৰা বলৰতরো নাগবলো, তদা বোধিসত্তো ছদ্দন্তো নাম নাগরাজা অহোসি। তদা সো লুদ্দকো তং হত্থিনাগং ঘাতেসি, তত্থপি তাৰ দেৰদত্তোৰ অধিকতরো।
‘‘Puna caparaṃ yadā devadatto manusso ahosi soṇuttaro nāma nesādo balavā balavataro nāgabalo, tadā bodhisatto chaddanto nāma nāgarājā ahosi. Tadā so luddako taṃ hatthināgaṃ ghātesi, tatthapi tāva devadattova adhikataro.
‘‘পুন চপরং যদা দেৰদত্তো মনুস্সো অহোসি ৰনচরকো অনিকেতৰাসী, তদা বোধিসত্তো সকুণো অহোসি তিত্তিরো মন্তজ্ঝাযী, তদাপি সো ৰনচরকো তং সকুণং ঘাতেসি, তত্থপি তাৰ দেৰদত্তোৰ জাতিযা অধিকতরো।
‘‘Puna caparaṃ yadā devadatto manusso ahosi vanacarako aniketavāsī, tadā bodhisatto sakuṇo ahosi tittiro mantajjhāyī, tadāpi so vanacarako taṃ sakuṇaṃ ghātesi, tatthapi tāva devadattova jātiyā adhikataro.
‘‘পুন চপরং যদা দেৰদত্তো কলাবু নাম কাসিরাজা 1 অহোসি, তদা বোধিসত্তো তাপসো অহোসি খন্তিৰাদী। তদা সো রাজা তস্স তাপসস্স কুদ্ধো হত্থপাদে ৰংসকল়ীরে ৰিয ছেদাপেসি, তত্থপি তাৰ দেৰদত্তো যেৰ অধিকতরো জাতিযা চ যসেন চ।
‘‘Puna caparaṃ yadā devadatto kalābu nāma kāsirājā 2 ahosi, tadā bodhisatto tāpaso ahosi khantivādī. Tadā so rājā tassa tāpasassa kuddho hatthapāde vaṃsakaḷīre viya chedāpesi, tatthapi tāva devadatto yeva adhikataro jātiyā ca yasena ca.
‘‘পুন চপরং যদা দেৰদত্তো মনুস্সো অহোসি ৰনচরো, তদা বোধিসত্তো নন্দিযো নাম ৰানরিন্দো অহোসি, তদাপি সো ৰনচরো তং ৰানরিন্দং ঘাতেসি সদ্ধিং মাতরা কনিট্ঠভাতিকেন চ, তত্থপি তাৰ দেৰদত্তো যেৰ অধিকতরো জাতিযা।
‘‘Puna caparaṃ yadā devadatto manusso ahosi vanacaro, tadā bodhisatto nandiyo nāma vānarindo ahosi, tadāpi so vanacaro taṃ vānarindaṃ ghātesi saddhiṃ mātarā kaniṭṭhabhātikena ca, tatthapi tāva devadatto yeva adhikataro jātiyā.
‘‘পুন চপরং যদা দেৰদত্তো মনুস্সো অহোসি অচেলকো কারম্ভিযো নাম, তদা বোধিসত্তো পণ্ডরকো নাম নাগরাজা অহোসি, তত্থপি তাৰ দেৰদত্তো যেৰ অধিকতরো জাতিযা।
‘‘Puna caparaṃ yadā devadatto manusso ahosi acelako kārambhiyo nāma, tadā bodhisatto paṇḍarako nāma nāgarājā ahosi, tatthapi tāva devadatto yeva adhikataro jātiyā.
‘‘পুন চপরং যদা দেৰদত্তো মনুস্সো অহোসি পৰনে জটিলকো, তদা বোধিসত্তো তচ্ছকো নাম মহাসূকরো অহোসি, তত্থপি তাৰ দেৰদত্তো যেৰ জাতিযা অধিকতরো।
‘‘Puna caparaṃ yadā devadatto manusso ahosi pavane jaṭilako, tadā bodhisatto tacchako nāma mahāsūkaro ahosi, tatthapi tāva devadatto yeva jātiyā adhikataro.
‘‘পুন চপরং যদা দেৰদত্তো চেতীসু সূরপরিচরো নাম রাজা অহোসি উপরি পুরিসমত্তে গগনে ৰেহাসঙ্গমো, তদা বোধিসত্তো কপিলো নাম ব্রাহ্মণো অহোসি, তত্থপি তাৰ দেৰদত্তো যেৰ অধিকতরো জাতিযা চ যসেন চ।
‘‘Puna caparaṃ yadā devadatto cetīsu sūraparicaro nāma rājā ahosi upari purisamatte gagane vehāsaṅgamo, tadā bodhisatto kapilo nāma brāhmaṇo ahosi, tatthapi tāva devadatto yeva adhikataro jātiyā ca yasena ca.
‘‘পুন চপরং যদা দেৰদত্তো মনুস্সো অহোসি সামো নাম, তদা বোধিসত্তো রুরু নাম মিগরাজা অহোসি, তত্থপি তাৰ দেৰদত্তো যেৰ জাতিযা অধিকতরো।
‘‘Puna caparaṃ yadā devadatto manusso ahosi sāmo nāma, tadā bodhisatto ruru nāma migarājā ahosi, tatthapi tāva devadatto yeva jātiyā adhikataro.
‘‘পুন চপরং যদা দেৰদত্তো মনুস্সো অহোসি লুদ্দকো পৰনচরো, তদা বোধিসত্তো হত্থিনাগো অহোসি, সো লুদ্দকো তস্স হত্থিনাগস্স সত্তক্খত্তুং দন্তে ছিন্দিত্ৰা হরি, তত্থপি তাৰ দেৰদত্তো যেৰ যোনিযা অধিকতরো।
‘‘Puna caparaṃ yadā devadatto manusso ahosi luddako pavanacaro, tadā bodhisatto hatthināgo ahosi, so luddako tassa hatthināgassa sattakkhattuṃ dante chinditvā hari, tatthapi tāva devadatto yeva yoniyā adhikataro.
‘‘পুন চপরং যদা দেৰদত্তো সিঙ্গালো অহোসি খত্তিযধম্মো, সো যাৰতা জম্বুদীপে পদেসরাজানো তে সব্বে অনুযুত্তে অকাসি, তদা বোধিসত্তো ৰিধুরো নাম পণ্ডিতো অহোসি, তত্থপি তাৰ দেৰদত্তো যেৰ যসেন অধিকতরো।
‘‘Puna caparaṃ yadā devadatto siṅgālo ahosi khattiyadhammo, so yāvatā jambudīpe padesarājāno te sabbe anuyutte akāsi, tadā bodhisatto vidhuro nāma paṇḍito ahosi, tatthapi tāva devadatto yeva yasena adhikataro.
‘‘পুন চপরং যদা দেৰদত্তো হত্থিনাগো হুত্ৰা লটুকিকায সকুণিকায পুত্তকে ঘাতেসি, তদা বোধিসত্তোপি হত্থিনাগো অহোসি যূথপতি, তত্থ তাৰ উভোপি তে সমসমা অহেসুং।
‘‘Puna caparaṃ yadā devadatto hatthināgo hutvā laṭukikāya sakuṇikāya puttake ghātesi, tadā bodhisattopi hatthināgo ahosi yūthapati, tattha tāva ubhopi te samasamā ahesuṃ.
‘‘পুন চপরং যদা দেৰদত্তো যক্খো অহোসি অধম্মো নাম, তদা বোধিসত্তোপি যক্খো অহোসি ধম্মো নাম, তত্থপি তাৰ উভোপি সমসমা অহেসুং।
‘‘Puna caparaṃ yadā devadatto yakkho ahosi adhammo nāma, tadā bodhisattopi yakkho ahosi dhammo nāma, tatthapi tāva ubhopi samasamā ahesuṃ.
‘‘পুন চপরং যদা দেৰদত্তো নাৰিকো অহোসি পঞ্চন্নং কুলসতানং ইস্সরো, তদা বোধিসত্তোপি নাৰিকো অহোসি পঞ্চন্নং কুলসতানং ইস্সরো, তত্থপি তাৰ উভোপি সমসমা অহেসুং।
‘‘Puna caparaṃ yadā devadatto nāviko ahosi pañcannaṃ kulasatānaṃ issaro, tadā bodhisattopi nāviko ahosi pañcannaṃ kulasatānaṃ issaro, tatthapi tāva ubhopi samasamā ahesuṃ.
‘‘পুন চপরং যদা দেৰদত্তো সত্থৰাহো অহোসি পঞ্চন্নং সকটসতানং ইস্সরো, তদা বোধিসত্তোপি সত্থৰাহো অহোসি পঞ্চন্নং সকটসতানং ইস্সরো, তত্থপি তাৰ উভোপি সমসমা অহেসুং।
‘‘Puna caparaṃ yadā devadatto satthavāho ahosi pañcannaṃ sakaṭasatānaṃ issaro, tadā bodhisattopi satthavāho ahosi pañcannaṃ sakaṭasatānaṃ issaro, tatthapi tāva ubhopi samasamā ahesuṃ.
‘‘পুন চপরং যদা দেৰদত্তো সাখো নাম মিগরাজা অহোসি, তদা বোধিসত্তোপি নিগ্রোধো নাম মিগরাজা অহোসি, তত্থপি তাৰ উভোপি সমসমা অহেসুং।
‘‘Puna caparaṃ yadā devadatto sākho nāma migarājā ahosi, tadā bodhisattopi nigrodho nāma migarājā ahosi, tatthapi tāva ubhopi samasamā ahesuṃ.
‘‘পুন চপরং যদা দেৰদত্তো সাখো নাম সেনাপতি অহোসি, তদা বোধিসত্তোপি নিগ্রোধো নাম রাজা অহোসি, তত্থপি তাৰ উভোপি সমসমা অহেসুং।
‘‘Puna caparaṃ yadā devadatto sākho nāma senāpati ahosi, tadā bodhisattopi nigrodho nāma rājā ahosi, tatthapi tāva ubhopi samasamā ahesuṃ.
‘‘পুন চপরং যদা দেৰদত্তো খণ্ডহালো নাম ব্রাহ্মণো অহোসি, তদা বোধিসত্তো চন্দো নাম রাজকুমারো অহোসি, তদা সো খণ্ডহালো যেৰ অধিকতরো।
‘‘Puna caparaṃ yadā devadatto khaṇḍahālo nāma brāhmaṇo ahosi, tadā bodhisatto cando nāma rājakumāro ahosi, tadā so khaṇḍahālo yeva adhikataro.
‘‘পুন চপরং যদা দেৰদত্তো ব্রহ্মদত্তো নাম রাজা অহোসি, তদা বোধিসত্তো তস্স পুত্তো মহাপদুমো নাম কুমারো অহোসি, তদা সো রাজা সকপুত্তং চোরপপাতে খিপাপেসি, যতো কুতোচি পিতাৰ পুত্তানং অধিকতরো হোতি ৰিসিট্ঠোতি, তত্থপি তাৰ দেৰদত্তো যেৰ অধিকতরো।
‘‘Puna caparaṃ yadā devadatto brahmadatto nāma rājā ahosi, tadā bodhisatto tassa putto mahāpadumo nāma kumāro ahosi, tadā so rājā sakaputtaṃ corapapāte khipāpesi, yato kutoci pitāva puttānaṃ adhikataro hoti visiṭṭhoti, tatthapi tāva devadatto yeva adhikataro.
‘‘পুন চপরং যদা দেৰদত্তো মহাপতাপো নাম রাজা অহোসি, তদা বোধিসত্তো তস্স পুত্তো ধম্মপালো নাম কুমারো অহোসি, তদা সো রাজা সকপুত্তস্স হত্থপাদে সীসঞ্চ ছেদাপেসি, তত্থপি তাৰ দেৰদত্তো যেৰ উত্তরো অধিকতরো।
‘‘Puna caparaṃ yadā devadatto mahāpatāpo nāma rājā ahosi, tadā bodhisatto tassa putto dhammapālo nāma kumāro ahosi, tadā so rājā sakaputtassa hatthapāde sīsañca chedāpesi, tatthapi tāva devadatto yeva uttaro adhikataro.
অজ্জেতরহি উভোপি সক্যকুলে জাযিংসু। বোধিসত্তো বুদ্ধো অহোসি সব্বঞ্ঞূ লোকনাযকো, দেৰদত্তো তস্স দেৰাতিদেৰস্স সাসনে পব্বজিত্ৰা ইদ্ধিং নিব্বত্তেত্ৰা বুদ্ধালযং অকাসি। কিং নু খো, ভন্তে নাগসেন, যং মযা ভণিতং, তং সব্বং তথং উদাহু ৰিতথ’’ন্তি?
Ajjetarahi ubhopi sakyakule jāyiṃsu. Bodhisatto buddho ahosi sabbaññū lokanāyako, devadatto tassa devātidevassa sāsane pabbajitvā iddhiṃ nibbattetvā buddhālayaṃ akāsi. Kiṃ nu kho, bhante nāgasena, yaṃ mayā bhaṇitaṃ, taṃ sabbaṃ tathaṃ udāhu vitatha’’nti?
‘‘যং ত্ৰং, মহারাজ, বহুৰিধং কারণং ওসারেসি, সব্বং তং তথেৰ, নো অঞ্ঞথা’’তি। ‘‘যদি, ভন্তে নাগসেন, কণ্হোপি সুক্কোপি সমসমগতিকা হোন্তি, তেন হি কুসলম্পি অকুসলম্পি সমসমৰিপাকং হোতী’’তি? ‘‘ন হি, মহারাজ, কুসলম্পি অকুসলম্পি সমসমৰিপাকং হোতি, ন হি, মহারাজ, দেৰদত্তো সব্বজনেহি পটিৰিরুদ্ধো, বোধিসত্তেনেৰ পটিৰিরুদ্ধো। যো তস্স বোধিসত্তেন পটিৰিরুদ্ধো, সো তস্মিং তস্মিং যেৰ ভৰে পচ্চতি ফলং দেতি। দেৰদত্তোপি, মহারাজ, ইস্সরিযে ঠিতো জনপদেসু আরক্খং দেতি, সেতুং সভং পুঞ্ঞসালং কারেতি, সমণব্রাহ্মণানং কপণদ্ধিকৰণিব্বকানং নাথানাথানং যথাপণিহিতং দানং দেতি। তস্স সো ৰিপাকেন ভৰে ভৰে সম্পত্তিযো পটিলভতি। কস্সেতং, মহারাজ, সক্কা ৰত্তুং ৰিনা দানেন দমেন সংযমেন উপোসথকম্মেন সম্পত্তিং অনুভৰিস্সতীতি?
‘‘Yaṃ tvaṃ, mahārāja, bahuvidhaṃ kāraṇaṃ osāresi, sabbaṃ taṃ tatheva, no aññathā’’ti. ‘‘Yadi, bhante nāgasena, kaṇhopi sukkopi samasamagatikā honti, tena hi kusalampi akusalampi samasamavipākaṃ hotī’’ti? ‘‘Na hi, mahārāja, kusalampi akusalampi samasamavipākaṃ hoti, na hi, mahārāja, devadatto sabbajanehi paṭiviruddho, bodhisatteneva paṭiviruddho. Yo tassa bodhisattena paṭiviruddho, so tasmiṃ tasmiṃ yeva bhave paccati phalaṃ deti. Devadattopi, mahārāja, issariye ṭhito janapadesu ārakkhaṃ deti, setuṃ sabhaṃ puññasālaṃ kāreti, samaṇabrāhmaṇānaṃ kapaṇaddhikavaṇibbakānaṃ nāthānāthānaṃ yathāpaṇihitaṃ dānaṃ deti. Tassa so vipākena bhave bhave sampattiyo paṭilabhati. Kassetaṃ, mahārāja, sakkā vattuṃ vinā dānena damena saṃyamena uposathakammena sampattiṃ anubhavissatīti?
‘‘যং পন ত্ৰং, মহারাজ, এৰং ৰদেসি ‘দেৰদত্তো চ বোধিসত্তো চ একতো অনুপরিৰত্তন্তী’তি, সো ন জাতিসতস্স অচ্চযেন সমাগমো অহোসি, ন জাতিসহস্সস্স অচ্চযেন, ন জাতিসতসহস্সস্স অচ্চযেন, কদাচি করহচি বহূনং অহোরত্তানং অচ্চযেন সমাগমো অহোসি। যং পনেতং, মহারাজ, ভগৰতা কাণকচ্ছপোপমং উপদস্সিতং মনুস্সত্তপ্পটিলাভায, তথূপমং, মহারাজ, ইমেসং সমাগমং ধারেহি।
‘‘Yaṃ pana tvaṃ, mahārāja, evaṃ vadesi ‘devadatto ca bodhisatto ca ekato anuparivattantī’ti, so na jātisatassa accayena samāgamo ahosi, na jātisahassassa accayena, na jātisatasahassassa accayena, kadāci karahaci bahūnaṃ ahorattānaṃ accayena samāgamo ahosi. Yaṃ panetaṃ, mahārāja, bhagavatā kāṇakacchapopamaṃ upadassitaṃ manussattappaṭilābhāya, tathūpamaṃ, mahārāja, imesaṃ samāgamaṃ dhārehi.
‘‘ন, মহারাজ, বোধিসত্তস্স দেৰদত্তেনেৰ সদ্ধিং সমাগমো অহোসি, থেরোপি, মহারাজ, সারিপুত্তো অনেকেসু জাতিসতসহস্সেসু বোধিসত্তস্স পিতা অহোসি, মহাপিতা অহোসি, চূল়পিতা অহোসি , ভাতা অহোসি, পুত্তো অহোসি, ভাগিনেয্যো অহোসি, মিত্তো অহোসি।
‘‘Na, mahārāja, bodhisattassa devadatteneva saddhiṃ samāgamo ahosi, theropi, mahārāja, sāriputto anekesu jātisatasahassesu bodhisattassa pitā ahosi, mahāpitā ahosi, cūḷapitā ahosi , bhātā ahosi, putto ahosi, bhāgineyyo ahosi, mitto ahosi.
‘‘বোধিসত্তোপি, মহারাজ, অনেকেসু জাতিসতসহস্সেসু থেরস্স সারিপুত্তস্স পিতা অহোসি, মহাপিতা অহোসি, চূল়পিতা অহোসি, ভাতা অহোসি, পুত্তো অহোসি, ভাগিনেয্যো অহোসি , মিত্তো অহোসি, সব্বেপি, মহারাজ, সত্তনিকাযপরিযাপন্না সংসারসোতমনুগতা সংসারসোতেন ৰুয্হন্তা অপ্পিযেহিপি পিযেহিপি সমাগচ্ছন্তি। যথা, মহারাজ, উদকং সোতেন ৰুয্হমানং সুচিঅসুচিকল্যাণপাপকেন সমাগচ্ছতি, এৰমেৰ খো, মহারাজ, সব্বেপি সত্তনিকাযপরিযাপন্না সংসারসোতমনুগতা সংসারসোতেন ৰুয্হন্তা অপ্পিযেহিপি পিযেহিপি সমাগচ্ছন্তি। দেৰদত্তো, মহারাজ, যক্খো সমানো অত্তনা অধম্মো পরে অধম্মে নিযোজেত্ৰা সত্তপঞ্ঞাসৰস্সকোটিযো সট্ঠি চ ৰস্সসতসহস্সানি মহানিরযে পচ্চি , বোধিসত্তোপি, মহারাজ, যক্খো সমানো অত্তনা ধম্মো পরে ধম্মে নিযোজেত্ৰা সত্তপঞ্ঞাসৰস্সকোটিযো সট্ঠি চ ৰস্সসতসহস্সানি সগ্গে মোদি সব্বকামসমঙ্গী, অপি চ, মহারাজ, দেৰদত্তো ইমস্মিং ভৰে বুদ্ধং অনাসাদনীযমাসাদযিত্ৰা সমগ্গঞ্চ সঙ্ঘং ভিন্দিত্ৰা পথৰিং পাৰিসি, তথাগতো বুজ্ঝিত্ৰা সব্বধম্মে পরিনিব্বুতো উপধিসঙ্খযে’’তি। ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি।
‘‘Bodhisattopi, mahārāja, anekesu jātisatasahassesu therassa sāriputtassa pitā ahosi, mahāpitā ahosi, cūḷapitā ahosi, bhātā ahosi, putto ahosi, bhāgineyyo ahosi , mitto ahosi, sabbepi, mahārāja, sattanikāyapariyāpannā saṃsārasotamanugatā saṃsārasotena vuyhantā appiyehipi piyehipi samāgacchanti. Yathā, mahārāja, udakaṃ sotena vuyhamānaṃ suciasucikalyāṇapāpakena samāgacchati, evameva kho, mahārāja, sabbepi sattanikāyapariyāpannā saṃsārasotamanugatā saṃsārasotena vuyhantā appiyehipi piyehipi samāgacchanti. Devadatto, mahārāja, yakkho samāno attanā adhammo pare adhamme niyojetvā sattapaññāsavassakoṭiyo saṭṭhi ca vassasatasahassāni mahāniraye pacci , bodhisattopi, mahārāja, yakkho samāno attanā dhammo pare dhamme niyojetvā sattapaññāsavassakoṭiyo saṭṭhi ca vassasatasahassāni sagge modi sabbakāmasamaṅgī, api ca, mahārāja, devadatto imasmiṃ bhave buddhaṃ anāsādanīyamāsādayitvā samaggañca saṅghaṃ bhinditvā pathaviṃ pāvisi, tathāgato bujjhitvā sabbadhamme parinibbuto upadhisaṅkhaye’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
কুসলাকুসলসমৰিসমপঞ্হো সত্তমো।
Kusalākusalasamavisamapañho sattamo.
Footnotes:
