| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
២២. ពាវីសតិមវគ្គោ
22. Bāvīsatimavaggo
(២០៩) ២. កុសលចិត្តកថា
(209) 2. Kusalacittakathā
៨៩៤. អរហា កុសលចិត្តោ បរិនិព្ពាយតីតិ? អាមន្តា។ អរហា បុញ្ញាភិសង្ខារំ អភិសង្ខរោន្តោ… អានេញ្ជាភិសង្ខារំ អភិសង្ខរោន្តោ… គតិសំវត្តនិយំ កម្មំ ករោន្តោ… ភវសំវត្តនិយំ កម្មំ ករោន្តោ… ឥស្សរិយសំវត្តនិយំ កម្មំ ករោន្តោ… អធិបច្ចសំវត្តនិយំ កម្មំ ករោន្តោ… មហាភោគសំវត្តនិយំ កម្មំ ករោន្តោ… មហាបរិវារសំវត្តនិយំ កម្មំ ករោន្តោ… ទេវសោភគ្យសំវត្តនិយំ កម្មំ ករោន្តោ… មនុស្សសោភគ្យសំវត្តនិយំ កម្មំ ករោន្តោ បរិនិព្ពាយតីតិ? ន ហេវំ វត្តព្ពេ…បេ.…។
894. Arahā kusalacitto parinibbāyatīti? Āmantā. Arahā puññābhisaṅkhāraṃ abhisaṅkharonto… āneñjābhisaṅkhāraṃ abhisaṅkharonto… gatisaṃvattaniyaṃ kammaṃ karonto… bhavasaṃvattaniyaṃ kammaṃ karonto… issariyasaṃvattaniyaṃ kammaṃ karonto… adhipaccasaṃvattaniyaṃ kammaṃ karonto… mahābhogasaṃvattaniyaṃ kammaṃ karonto… mahāparivārasaṃvattaniyaṃ kammaṃ karonto… devasobhagyasaṃvattaniyaṃ kammaṃ karonto… manussasobhagyasaṃvattaniyaṃ kammaṃ karonto parinibbāyatīti? Na hevaṃ vattabbe…pe….
អរហា កុសលចិត្តោ បរិនិព្ពាយតីតិ? អាមន្តា។ អរហា អាចិនន្តោ អបចិនន្តោ បជហន្តោ ឧបាទិយន្តោ វិសិនេន្តោ ឧស្សិនេន្តោ វិធូបេន្តោ សន្ធូបេន្តោ បរិនិព្ពាយតីតិ? ន ហេវំ វត្តព្ពេ …បេ.… ននុ អរហា នេវាចិនាតិ ន អបចិនាតិ អបចិនិត្វា ឋិតោតិ? អាមន្តា។ ហញ្ចិ អរហា នេវាចិនាតិ ន អបចិនាតិ អបចិនិត្វា ឋិតោ, នោ ច វត រេ វត្តព្ពេ – ‘‘អរហា កុសលចិត្តោ បរិនិព្ពាយតី’’តិ។ ននុ អរហា នេវ បជហតិ ន ឧបាទិយតិ បជហិត្វា ឋិតោ, នេវ វិសិនេតិ ន ឧស្សិនេតិ វិសិនេត្វា ឋិតោ; ននុ អរហា នេវ វិធូបេតិ ន សន្ធូបេតិ វិធូបេត្វា ឋិតោតិ? អាមន្តា។ ហញ្ចិ អរហា នេវ វិធូបេតិ ន សន្ធូបេតិ វិធូបេត្វា ឋិតោ, នោ ច វត រេ វត្តព្ពេ – ‘‘អរហា កុសលចិត្តោ បរិនិព្ពាយតី’’តិ។
Arahā kusalacitto parinibbāyatīti? Āmantā. Arahā ācinanto apacinanto pajahanto upādiyanto visinento ussinento vidhūpento sandhūpento parinibbāyatīti? Na hevaṃ vattabbe …pe… nanu arahā nevācināti na apacināti apacinitvā ṭhitoti? Āmantā. Hañci arahā nevācināti na apacināti apacinitvā ṭhito, no ca vata re vattabbe – ‘‘arahā kusalacitto parinibbāyatī’’ti. Nanu arahā neva pajahati na upādiyati pajahitvā ṭhito, neva visineti na ussineti visinetvā ṭhito; nanu arahā neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe – ‘‘arahā kusalacitto parinibbāyatī’’ti.
៨៩៥. ន វត្តព្ពំ – ‘‘អរហា កុសលចិត្តោ បរិនិព្ពាយតី’’តិ? អាមន្តា។ ននុ អរហា ឧបដ្ឋិតស្សតិ សតោ សម្បជានោ បរិនិព្ពាយតីតិ? អាមន្តា។ ហញ្ចិ អរហា ឧបដ្ឋិតស្សតិ សតោ សម្បជានោ បរិនិព្ពាយតិ, តេន វត រេ វត្តព្ពេ – ‘‘អរហា កុសលចិត្តោ បរិនិព្ពាយតី’’តិ។
895. Na vattabbaṃ – ‘‘arahā kusalacitto parinibbāyatī’’ti? Āmantā. Nanu arahā upaṭṭhitassati sato sampajāno parinibbāyatīti? Āmantā. Hañci arahā upaṭṭhitassati sato sampajāno parinibbāyati, tena vata re vattabbe – ‘‘arahā kusalacitto parinibbāyatī’’ti.
កុសលចិត្តកថា និដ្ឋិតា។
Kusalacittakathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ២. កុសលចិត្តកថាវណ្ណនា • 2. Kusalacittakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ២. កុសលចិត្តកថាវណ្ណនា • 2. Kusalacittakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ២. កុសលចិត្តកថាវណ្ណនា • 2. Kusalacittakathāvaṇṇanā
