| Library / Tipiṭaka / තිපිටක • Tipiṭaka / අපදානපාළි • Apadānapāḷi |
52. ඵලදායකවග්ගො
52. Phaladāyakavaggo
1. කුරඤ්චියඵලදායකත්ථෙරඅපදානං
1. Kurañciyaphaladāyakattheraapadānaṃ
1.
1.
‘‘මිගලුද්දො පුරෙ ආසිං, විපිනෙ විචරං අහං;
‘‘Migaluddo pure āsiṃ, vipine vicaraṃ ahaṃ;
අද්දසං විරජං බුද්ධං, සබ්බධම්මාන පාරගුං.
Addasaṃ virajaṃ buddhaṃ, sabbadhammāna pāraguṃ.
2.
2.
‘‘කුරඤ්චියඵලං ගය්හ, බුද්ධසෙට්ඨස්සදාසහං;
‘‘Kurañciyaphalaṃ gayha, buddhaseṭṭhassadāsahaṃ;
පුඤ්ඤක්ඛෙත්තස්ස තාදිනො, පසන්නො සෙහි පාණිභි.
Puññakkhettassa tādino, pasanno sehi pāṇibhi.
3.
3.
‘‘එකතිංසෙ ඉතො කප්පෙ, යං ඵලං අදදිං තදා;
‘‘Ekatiṃse ito kappe, yaṃ phalaṃ adadiṃ tadā;
දුග්ගතිං නාභිජානාමි, ඵලදානස්සිදං ඵලං.
Duggatiṃ nābhijānāmi, phaladānassidaṃ phalaṃ.
4.
4.
‘‘කිලෙසා ඣාපිතා මය්හං, භවා සබ්බෙ සමූහතා;
‘‘Kilesā jhāpitā mayhaṃ, bhavā sabbe samūhatā;
නාගොව බන්ධනං ඡෙත්වා, විහරාමි අනාසවො.
Nāgova bandhanaṃ chetvā, viharāmi anāsavo.
5.
5.
‘‘ස්වාගතං වත මෙ ආසි, බුද්ධසෙට්ඨස්ස සන්තිකෙ;
‘‘Svāgataṃ vata me āsi, buddhaseṭṭhassa santike;
තිස්සො විජ්ජා අනුප්පත්තා, කතං බුද්ධස්ස සාසනං.
Tisso vijjā anuppattā, kataṃ buddhassa sāsanaṃ.
6.
6.
‘‘පටිසම්භිදා චතස්සො, විමොක්ඛාපි ච අට්ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්ඤා සච්ඡිකතා, කතං බුද්ධස්ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්ථං සුදං ආයස්මා කුරඤ්චියඵලදායකො ථෙරො ඉමා
Itthaṃ sudaṃ āyasmā kurañciyaphaladāyako thero imā
ගාථායො අභාසිත්ථාති.
Gāthāyo abhāsitthāti.
කුරඤ්චියඵලදායකත්ථෙරස්සාපදානං පඨමං.
Kurañciyaphaladāyakattherassāpadānaṃ paṭhamaṃ.
