| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೫೨. ಫಲದಾಯಕವಗ್ಗೋ
52. Phaladāyakavaggo
೧. ಕುರಞ್ಚಿಯಫಲದಾಯಕತ್ಥೇರಅಪದಾನಂ
1. Kurañciyaphaladāyakattheraapadānaṃ
೧.
1.
‘‘ಮಿಗಲುದ್ದೋ ಪುರೇ ಆಸಿಂ, ವಿಪಿನೇ ವಿಚರಂ ಅಹಂ।
‘‘Migaluddo pure āsiṃ, vipine vicaraṃ ahaṃ;
ಅದ್ದಸಂ ವಿರಜಂ ಬುದ್ಧಂ, ಸಬ್ಬಧಮ್ಮಾನ ಪಾರಗುಂ॥
Addasaṃ virajaṃ buddhaṃ, sabbadhammāna pāraguṃ.
೨.
2.
‘‘ಕುರಞ್ಚಿಯಫಲಂ ಗಯ್ಹ, ಬುದ್ಧಸೇಟ್ಠಸ್ಸದಾಸಹಂ।
‘‘Kurañciyaphalaṃ gayha, buddhaseṭṭhassadāsahaṃ;
ಪುಞ್ಞಕ್ಖೇತ್ತಸ್ಸ ತಾದಿನೋ, ಪಸನ್ನೋ ಸೇಹಿ ಪಾಣಿಭಿ॥
Puññakkhettassa tādino, pasanno sehi pāṇibhi.
೩.
3.
‘‘ಏಕತಿಂಸೇ ಇತೋ ಕಪ್ಪೇ, ಯಂ ಫಲಂ ಅದದಿಂ ತದಾ।
‘‘Ekatiṃse ito kappe, yaṃ phalaṃ adadiṃ tadā;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ॥
Duggatiṃ nābhijānāmi, phaladānassidaṃ phalaṃ.
೪.
4.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ।
‘‘Kilesā jhāpitā mayhaṃ, bhavā sabbe samūhatā;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ॥
Nāgova bandhanaṃ chetvā, viharāmi anāsavo.
೫.
5.
‘‘ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕೇ।
‘‘Svāgataṃ vata me āsi, buddhaseṭṭhassa santike;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ॥
Tisso vijjā anuppattā, kataṃ buddhassa sāsanaṃ.
೬.
6.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।
‘‘Paṭisambhidā catasso, vimokkhāpi ca aṭṭhime;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥
Chaḷabhiññā sacchikatā, kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ಕುರಞ್ಚಿಯಫಲದಾಯಕೋ ಥೇರೋ ಇಮಾ
Itthaṃ sudaṃ āyasmā kurañciyaphaladāyako thero imā
ಗಾಥಾಯೋ ಅಭಾಸಿತ್ಥಾತಿ।
Gāthāyo abhāsitthāti.
ಕುರಞ್ಚಿಯಫಲದಾಯಕತ್ಥೇರಸ್ಸಾಪದಾನಂ ಪಠಮಂ।
Kurañciyaphaladāyakattherassāpadānaṃ paṭhamaṃ.
